1. Nji txani txi hi tsanisekisako ti to Mfumo wa Txizimu se wa fuma?

 TI NGA kukaratela kukholwa ti to mahanyelo ya ngweno mana tshukwala ngutu-ngutu o txi wona sikarato asi u mananako naso nyamsi. Maxaka kha ma pfanani ni ku vathu va tolovela kuva va mazunga, vo ti randa vapune ni kuva va tshofu. Se eto ti maha ti to vathu ti va karatela kuxonipha wukoma. Kambe mahanyelo oneyo ma nga hi ninga themba nyamsi. Ngu nzila muni? Nguko vathu vonevo va hanyisa nga ha ti nga wombwa ngu kona ka wuprofeti mayelano ni “masiku a kugwitisa.” (2 Tim. 3:1-5) Kuhetiseka ka wuprofeti wuwa ti ti veka hakubasani ti to Jesu Kristu a khatile kufuma kota Mkoma wa Mfumo wa Txizimu. Wuprofeti wuwa, wumwewo ka wuprofeti wo tala awu wu womba-wombako ngu Mfumo wa Txizimu. Se ti nga tsanisa likholo lathu kuxolisisa wuprofeti wumwani awu wu hetisekako konkuwa mayelano ni Mfumo wa Txizimu.

2. Hi na bhula ngu txani ka gondo yiya? (Mtxhamusela mfota wa kapa.)

² Ka gondo yiya hi na bhula ngu 1) wuprofeti awu wu no hi vhuna kutumbula mbimo yi Mfumo wa Txizimu wu nga simekwa ngu yona, 2) wuprofeti awu wu no hi vhuna kupfisisa ti to Jesu ngu ditshuri wa fuma ka Mfumo wa Txizimu ni 3) wuprofeti awu wu no hi vhuna kuwona ti to valala va Txizimu va na lovisiswa kutxani. Hi na tshumela hi wona nzila ayi wuprofeti wuwa wu no maha ti to ku txi ñweee kuhetiseka ka wuprofeti wa Jehovha kufana ni kule ko va u txo veka txuva yo gwita ka jogo ya kebra-kabhesa ayi yi no kumaha u wina, ni kutshumela hi wona ti to hi pfala hani ka kuhetiseka ka wuprofeti wa Txizimu.

3. Ngu tihi a ti dibhuku da Dhaniyeli 7:13, 14 yi ti wombako mayelano ni Mkoma wa Mfumo wa Txizimu?

³ Wuprofeti awu wu ku ka dibhuku da Dhaniyeli 7:13, 14 wa hi tsanisekisa ti to Jesu ngene a fanelwako ngu kuva Mkoma wa Mfumo wa Txizimu. Vathu va tixaka to hambana-hambana va na ‘mthumela’ ngu kutsaka ni ku ene kha na mbi vhaletwa ngu Mkoma mmwani. Wuprofeti wumwani wu ku ka dibhuku da Dhaniyeli wu womba ti to Jesu a ndi na khata kufuma ka Mfumo wonewo ngu magwito ka mtxhanu wa timbimo ni timbidi. Ina ti nga koteka ku ziva ti to tximahakalo txonetxo txo tsakisa txi vile ngu mbimo muni?

4. I ngu nzila muni dibhuku da Dhaniyeli 4:10-17 di hi vhunako ngu yona kukalkulara dilembe a di Jesu a nga vekwa kota Mkoma. (Wona txhamuselo ya hahatshi.)

⁴ Lera Dhaniyeli 4:10-17. “Mtxhanu wa timbimo ni timbidi” ti emela 2.520 wa malembe. Mbimo yoneyo yi khatile ngu dilembe da 607 A.E.C. mbimo yi Vabhabhilona va nga ta thavisa mkoma wo gwita ka txikhalo txa wukoma a malulamiselo a Jehovha khe Jerusalema. Mbimo yoneyo yi gwitile ngu 1914, i ku mbimo yi Jehovha a nga veka Jesu ka txikhalo txa wukoma i ku “wule wu lumbako m’thu wa kona” kota Mkoma wa Mfumo wa Txizimu. *—Eze. 21:25-27.

5. Hi nga wuyeliswa kutxani ngu ziva txhamuselo ya wuprofeti wa “mtxhanu wa timbimo ni timbidi”?

⁵ Hi wuyeliswa kutxani ngu wuprofeti wuwa? Kuziva txhamuselo ya “mtxhanu wa timbimo ni timbidi” ti hi tsanisekisa ti to Jehovha a hetisisa wuprofeti wakwe ngu mbimo ya kona. Nga ha a nga hetisisa ngu kona wuprofeti wa ku simekwa ka Mfumo ngu mbimo ayi a nga di yi vekile, a na maha toneto ngu wuprofeti wumwani awu wu no hetiseka ngu mbimo ayi a nga yi veka. Ngu ditshuri, ditshiku da Jehovha kha di na “mbi swela!”—Hab. 2:3.

6. a) Ngu tihi ati ti kombisako ti to Jesu se a khatile kufuma nzumani? b)  Ngu txihi txi tsanisekiso atxi txi ku ka dibhuku da Mtuletelo 6:2-8 mayelano ni mhaka yiya?

⁶ Ka masiku o gwita a mthumo wakwe wo txhumayela Jesu a wombile simahakalo asi si di no vhuna vagondiswa vakwe kutumbula ti to ene a na va a di khatile kufuma nzumani. Timwani ti a nga ti womba ngu tiya: Ku na va ni tiyimbi, tinzala ni kuzinginikela ka mafu. Ene a tshumete e womba to ku di na va ni mitungu ni malwati “ka makhalo a mangi,” COVID-19 yimweyo ya mitungu yoneyo. Simahakalo siya ngu si Bhiblia yi si wombako ti to “txikombekiso” txa ti to Jesu se wa fuma. (Mat. 24:3, 7; Luka 21:7, 10, 11) Kudipindile 60 wa malembe msana ko Jesu a di tshumete nzumani, ene a ningile Mpostoli Johani txitsanisekiso txa ti to simahakalo soneso si na maheka ngu ditshuri. (Lera Mtuletelo 6:2-8.) Ni ku sotshe simahakalo siya si khatile kumaheka msana ko va Jesu a di ningilwe txikhalo txa wukoma ngu 1914.

7. Ngu kutxani ku khata ku fuma ka Jesu ku di tisile dikhombo ha mafuni?

⁷ Ngu kutxani txiemo txa mafu yawa txi di khatile kuvesisa mbimo yi Jesu a nga khata kufuma? Dibhuku da Mtuletelo 6:2 di womba ti to mbimo yi Jesu a nga va Mkoma, txo khata a nga txi maha a to lwa yimbi ni Sathani kumweko ni madhimoni akwe. Ngu kuya ngu dibhuku da Mtuletelo ndima 12, Sathani a xutwe ka yimbi yoneyo ni ku ene kumweko ni madhimoni akwe va rinzilwe hawa ha mafuni. Se Sathani a henyile ngutu e engetela  kuxanisa vathu ati ti nga tisa “dikhombo” ha mafuni.—Mtu. 12:7-12.

8. Mbimo yi hi yako hi txi wona wuprofeti mayelano ni Mfumo wa Txizimu wu txi hetiseka hi nga wuyelwa ngu nzila muni?

⁸ Hi nga wuyeliswa kutxani ngu wuprofeti wuwa? Kuengetela ka mahanyelo o biha a vathu ku hi vhuna kupfisisa ti to ngu ditshuri Jesu se a khatile kufuma. Se hahanze ko hi henya mbimo yi vathu va engetelako wubihi hi fanete hi khumbula ti to simaho sawe si hetisisa wuprofeti wa mu ka Bhiblia. I ku ti to Mfumo se wa fuma. (Mas. 37:1) Ni ku ti nga maha ku wubihi wu ya masoni wu engeteleka mbimo yi Armagedhoni yi yako yi txi tshuketela. (Marku 13:8; 2 Tim. 3:13) Se ha mu bonga ngutu Tate wathu wa nzumani Jehovha awu a hi vhunako ku pfisisa ti to ngu kutxani wubihi wu txi ya wu engeteleka ha mafuni.

9. Wuprofeti awu wu ku ka Dhaniyeli 2:28, 31-35, wu womba txani mayelano ni wukoma wo gwita? Ni ku wu khatile kufuma mbimo muni?

⁹ Lera Dhaniyeli 2:28, 31-35. Ha kuwona kuhetiseka ka wuprofeti wuwa nyamsi. Mloro wa Nebhukodhonosori wu womba ti ti no maheka “ka masiku a ma tako,” msana kova Jesu a di khatile kufuma. Valala vamwani va Jesu ha mafuni hawa kupata wukoma wo gwita awu wu nga wombwa mu ka Bhiblia awu wu emelako “mikondo ya sikete ni ya dibumba,” wukoma wuwa se wa fuma. Wona wu khatile ku humelela ngu mbimo ya Yimbi yo khata ya Mafu mbimo yi Grã-Bretanha ni Estados Unidos va nga thathana wundoni, ve wumba wukoma wa Anglo-Americano. Mloro awu wa txithombe txa Nebhukodhonosori wu tshumela wu womba timhaka timbidi mayelano ni wukoma  wuwa, ati ti wu mahako wu hambana ni mifumo yimwani ayi yi nga fuma.

10. a) Ngu tihi ati hi ti wonako ka wukoma wa Anglo-Americano ati ti nga wombwa ka wuprofeti wa Dhaniyeli? b) Ngu tihi ati hi fanelako ku ti wonela ka tona? (Wona dibhokiso di di ku: “ Ti wonele ka dibumba!”)

¹⁰ Yo khata: Kuhambana ni mifumo yimwani ayi yi nga wombwa ka muwoniso wuwa, mfumo wa wu Anglo-Americano wu faniswa ni simbi yo patwa ni dibumba i singa kuva nzalama, silivhela. Se dibumba di emela vathu ava va fumwako. (Dhan. 2:43) Nga ha hi ti wonako ngu kona nyamsi nzila yi vathu vonevo va kuzetelako ngu yona ka timhaka ta mavhoto mwendo txisawula-mani, kumaha sitereka so lava kutshukwatisa mahanyelo a vathu, sitereka so lava kutshukwatisa mathumelo, eto ti maha ti to wukoma wuwa wu si tiyi.

11. Ngu kutxani kufuma ka wukoma wa Anglo-Americano ti txi hi tsanisekisa ti to hi hanya ka masiku a magwito?

¹¹ Ya wumbidi: Nga ha ti nga kombiswa ngu kona ngu minenge ya txithombe txa hombe wukoma wa Anglo-Americano ngu wona wo gwita awu wu nga wombwa mu ka Bhiblia. Wona wu na mbi vhaletwa ngu wumwani wukoma. Hahanze ka eto wona wu na ta loviswa ngu txitshuketi ka yimbi ya Armagedhoni, mbimo yi Mfumo wa Txizimu wu no lovisa yotshe mifumo ya vathu. *—Mtu. 16:13, 14, 16; 19:19, 20.

12. Ngu tihi timwani ati wuprofeti wa Dhaniyeli wu ti wombako ati ti hi thavelako ni ku hi ninga themba?

¹² Hi wuyeliswa kutxani ngu wuprofeti wuwa? Wuprofeti wa Dhaniyeli wa hi tsanisekisa ti to athu ngu ditshuri hi hanya ka timbimo ta magwito. Kona mu ka 2.500 wa malembe ya ma nga pinda Dhaniyeli a profetile ti to msana ka mfumo wa Bhabhilona ku na ta va ni mune wa mifumo ayi yi no xanisa vathu va Txizimu. I si nga eto dwe, ene a tshumete e kombisa ti to wukoma wa Anglo-Americano wu ndi na va wo gwita. Atiya ti hi ninga thavelelo ni themba ya ti to i singa kale Mfumo wa Txizimu wu na hiyela yotshe mifumo ya vathu ni ku tshumela wu fuma hamafuni kotshe.—Dhan. 2:44.

13. “Mfumeli wa wutxhanu ni vararu” ni “digumi ta titxheho,” si nga wombwa ka Mtuletelo 17:9-12 si emela txani? Ni ku wu hetisekile ngu nzila muni wuprofeti wuwa?

¹³ Lera Mtuletelo 17:9-12. Kuhuxotwa aku ku nga vangwa ngu Yimbi yo Khata ya Mafu ku mahile ti to ku hetiseka wuprofeti wumwani wa Bhiblia mayelano ni masiku a magwito. Matiko ma sikile makungo o lava ku vanga ku dikha ha mafuni. Se ngu Janeiro wa 1920, vona va simekile sengeletano wa Liga das Nações, awu wu nga gwita wu vhaletwa ngu sengeletano wa Nações Unidas ngu Outubro wa 1945. Sengeletano yiya yi dhanwa ku “mfumeli wa wutxhanu ni vararu.” Kambe awuwa wukoma kha wu fumi ha mafuni kotshe. Mtamo wa wona wu dhependerwa ngu matiko aya ma wu seketelako. Bhiblia yi womba ti to matiko oneyo ma seketelako Nações Unidas i “digumi da vafumeli.”

14-15. a) Ngu tihi ti Mtuletelo 17:3-5 yi ti wombako mayelano ni “Bhabhilona wa Hombe”? b) Ngu tihi ati ti mahekako ka titxhetxhe ta wukhongeli wa makuho?

¹⁴ Lera Mtuletelo 17:3-5. Ngu kususumetelwa ngu Moya wo Sawuleka Mpostoli Johani a woni muwoniso wa digelegele i ku “Bhabhilona wa Hombe,” a di di emelako totshe titxhetxhe ta wukhozeli wa makuho. Ngu yihi txhamuselo ya muwoniso wonewo? Ku khukhela kale tisengeletano ta wukhozeli wa makuho, ti thumisana kumweko ni mifumo ya ditiko ni ku tshumela ti seketela mifumo yoneyo. Kambe i singa kale Jehovha a na veka timbiluni ka mifumo yoneyo ti to yi ‘maha makungo Akwe.’ Ngu yahi makungo a kona? Mifumo yoneyo i ku “digumi da mifumo” yi na jikela totshe  tisengeletano ta wukhongeli wa makuho ni kutshumela ti wu lovisa.—Mtu. 17:1, 2, 16, 17.

¹⁵ Hi ti zivisa kutxani ti to magwito a Bhabhilona wa Hombe ku hafuhi? Ti to hi xamula txiwotiso txiya, hi fanete hi khumbula ti to didhoropa da kale ka Bhabhilona ku ti didhawa adi di nga ti ranganyetilwe ngu mati a mnambo wa Ewufrate. Mati onewo ma txi thuma kota txivhikelo. Dibhuku da Mtuletelo di fananisa timiliyoni ta vathu a ti ti seketelako Bhabhilona wa Hombe kota “mati” aya ma mu vhikelako. (Mtu. 17:15) Dibhuku da Mtuletelo di tshumela di womba ti to mati oneyo ma di na ‘phwa’, ti wombako ti to titxhetxhe totshe ta wukhongeli wa makuho ti di na phwelwa ngu vathu ava va ti seketelako. (Mtu. 16:12) Wuprofeti wuwa ha wu wona wu txi hetiseka nyamsi. Vathu vo tala vo tsukula wukhozeli wa makuho.

16. Hi nga wuyeliswa kutxani ngu kupfisisa wuprofeti mayelano ni kuhumelela ka Nações Unidas kumweko ni kuloviswa ka Bhabhilona wa hombe?

¹⁶ Hi wuyeliswa kutxani ngu wuprofeti wuwa? Kuhumelela ka sengeletano wa Nações Unidas, kumweko ni ku vathu vo tala ve tsukula titxhetxhe tawe ti ti veka ha kubasani ti to hi hanya ka masiku ya magwito. Hambiku mati o fanekisela aya ma vhikelako Bhabhilona ma  phwako, kuloviswa kwakwe kuna va ngu nzila yimwani. Nga ha hi nga tiwona ngu kona Jehovha a na veka timbiluni ka “digumi da vafumeli” i ku matiko aya ma seketelako Nações Unidas ti to me ‘maha makungo Akwe.’ Magwito a wukhongeli wa makuho ku nava ta konaha ni kona-hawa ni ku vathu vo tala va na va sa ti rinzela. * (Mtu. 18:8-10) Kuloviswa ka Bhabhilona wa hombe kuna nyeka-nyekisa dotshe ditiko ni ku ti na tisa sikarato. Kambe vathu va Txizimu va na va ni sivangelo simbidi sa ti to ve tsaka. Ngu sihi sa kona? Txo khata, mlala wa mawongwe wa Jehovha i ku Bhabhilona wa Hombe a na ta va a di fuvisilwe da magwito ni ku txa wumbidi, kuhulukiswa kwathu se ku na ta va ku di hafuhi!—Luka 21:28.

17-18. a) Hi nga maha txani to hi simama hi tsanisa likholo lathu? b) Hi na ta bhula ngu txani ka gondo ayi yi londiselako?

¹⁷ Dhaniyeli a profetile ti to “wutxhari” wu di na “anda.” Ngu ditshuri eto ta maheka! Ha mana kutuletelwa kasi kupfisisa wuprofeti mayelano ni timbimo ta ngweno. (Dhan. 12:4, 9, 10) Kwa mbi faliyara ka wuprofeti wa Jehovha ti hi maha hi xamaliswa ngu ngene ni kuxonipha ngutu Dipswi dakwe i ku Bhiblia. (Isaya 46:10; 55:11) Se simama u tsanisa likholo lako ngu gonda kha kwati mibhalo ni kutshumela u vhuna vamwani ti to ve sakulela ku va ni wuxaka wa wunene ni Jehovha. Ene a na vhikela votshe vale va thembelako kwakwe ni ku a na tshumela e va “xayisa ngu kudikha.”—Isaya 26:3.

¹⁸ Ka gondo ayi yi londiselako hi na ta wona wuprofeti mayelano ni dibanza da Wukristu ka timbimo tiya ta magwito. Hi na tshumela hi wona to wuprofeti wuwa wa tsimbitisana kwati ni wuprofeti wumwani mayelano ni masiku a magwito. Ni ku hi na wona sikombekiso sa ti to Jesu Mkoma wathu wa pateka ko thumisana kumweko ni valondeteli vakwe.