1. Ngu yahi mawonelo hi fanelako kuva nawo mayelano ni lungelo ya mkombelo?

 ATHU hi ni lungelo yo xamalisa ngutu, i ku kutshuketa ka txikhalo txa Mvangi wa nzuma ni mafu ngu kuthumisa mkombelo. Alakanyisisa ngu tiya, athu hi nga sikota kugela Jehovha ta mbiluni kwathu ditshiku ni ditshiku, ngu lidimi limwani ni limwani, ti si lavi ku mvhizara to mangwana, divhiki di di tako hi na ta wombawomba ni nawe ngu mbimo yo kari. Hi nga wombawomba nayo ngu mkombelo hambi hi di bhaxarile sibhejela, hambi hi di jele, hi txi tsaniseka ti to tate wathu wa lirando a na hi engisa. Se athu kha hi yi tekeli hahatshi lungelo yiya.

2. I ngu nzila yihi Dhavhidha a nga kombisa ti to a ti ninga lisima lungelo ya mkombelo?

² Mkoma Dhavhidha a txi ninga ngutu lisima lungelo ya mkombelo. Ene a embelete tiya ka Jehovha: “Mkombelo wangu wu na fane ni dibaselo adi di hiswako masoni kwako.” (Mas. 141:1, 2) Ka timbimo ta Dhavhidha, dibaselo adi di nga ti thumiswa ngu vaphaxeli ka wukhozeli khe dithepeleni di ti lulamiselwa kwati. (Eks. 30:34, 35) Kuva Dhavhidha a di yelanisile dibaselo ni mkombelo, a ti lava kuwomba ti to ene a ti tiha mbimo yo alakanyisisa ngu ti a no gela Tate wakwe wa nzumani ngu kuthumisa mkombelo. Nanathu hi lava kumaha toneto, hi lava ti to mikombelo yathu yi tsakisa Jehovha.

3. Ngu tihi ati hi fanelako ku ti khumbula mbimo yi hi tshuketelako ka Jehovha ngu mkombelo? Ngu kutxani?

³ Mbimo yi hi mahako mkombelo ka Jehovha hi fanete  hi maha toneto ngu txixonipho txa hombe. Alakanyisa ngu muwoniso awu Isaya, Ezekhiyele, Dhaniyeli ni Johani va nga kombiswa. Miwoniso yoneyo ya hambana, kambe ku ni mu yi fanako kona. Yotshe yi kombisa Jehovha i di Mkoma wo guleka ngutu. Isaya a woni Jehovha “a di khalahatshile ka txikhalo txo guleka txa wukoma.” (Isaya 6:1-3) Ezekhiyele a woni Jehovha a di khalahatshile ka txikotxikani txakwe txa nzumani, a di randetwe ngu “kuphatima . . . ko fana ni kuphatima ka wulaho wa nzumani.” (Eze. 1:26-28) Dhaniyeli a woni Jehovha kota “didhota da kale,” adi ambate siambalo so basa ni ku ka txikhalo txakwe txa wukoma ku ti huma titshatsha ta mndilo. (Dhan. 7:9, 10) Johani nene a woni Jehovha a di khalahatshile ka txikhalo txakwe txa wukoma adi randetwe ngu dirigwi da esmeraldha do khetima. (Mtu. 4:2-4) Mbimo yi hi alakanyisisako ngu wudhumo wa Jehovha awu wu si dinganiswiko ni wumwani, ti hi khumbutisa lungelo ayi hi ku nayo yo xamatisa yo wombawomba ni nene ngu mkombelo, ni kuwona lisima lo maha toneto ngu ti namisa ka hombe. Se, hi nga mahisa kutxani mkombelo?

4. Hi gonda txani mayelano ni mkombelo ka mapswi aya Jesu a nga ma womba ka Matewu 6:9, 10?

⁴ Lera Matewu 6:9, 10. Ka gondo yakwe ya mmangoni, Jesu a gondisile vagondiswa vakwe ti to ve khongela ngu nzila ayi yi tsakisako Txizimu. Msana ko womba to “anu mi na khongelisa tiya” Jesu a khatile ngu kuwomba timhaka ta lisima ati ti yelanako ni kudhunda ka Jehovha, i ku kusawulekisa ditina dakwe, ni kutisa makatekwa ya a no ninga vathu hamafuni. Se ngako hi txi pata tiya ka mikombelo yathu, hi kombisa ti to kudhunda ka Txizimu ngu kona i ku ka lisima kwathu.

5. Ina ti bihile kukombela Jehovha ngu ti hi ti xuvako mwendo ati ti hi karatako?

⁵ Jesu a tshumete e womba to ndinene kukombela ngu ti hi ti xuvako mwendo ati ti hi karatako. Se, hi nga kombela Jehovha ti to e hi ninga sakudya sa ditshiku ni ditshiku, ehi divalela sionho sathu, e hi vhikela ti to hi si weli kudukwani ni ku hi hulukisa ka m’bihi. (Mat. 6:11-13) Mbimo yi hi kombelako siya ka Jehovha, hi kombisa ti to athu hi dhependerwa ngu ngene, ni ku hi lava ti to ene e hi tsakela.

6. Ina ku ni timwani ati hi nga ti kombelako to hambana ni ti ti nga wombwa ka mkombelo wa txikombiso? Txhamusela.

 ⁶ Jesu a si njo womba ti to valondeteli vakwe va ti fanete kuwomba mapswi otshe ale ma ku ka mkombelo wa txikombiso. Makhambi mamwani Jesu a ti maha mkombelo a txi kombela ati a nga txi ti xuva ka mbimo yile. (Mat. 26:39, 42; Joh. 17:1-26) Ngu ha kufanako, nathu hi nga kombela tximwani ni tximwani hi txi xuvako mwendo to kari ti hi karatako. Ngako hi txi lava kumaha txisungu hi nga kombela wutxhari ni kupfisisa. (Mas. 119:33, 34) Ngako hi txi lava kumaha txiavelo txo kari txo karata, hi nga kombela Jehovha ti to e hi tuletela mapimo. (Mav. 2:6) Vaveleki va nga kombelela vanana vawe, vanana va nga kombelela vaveleki vawe ni ku hotshethu hi fanete kukombelela sigondiana sathu ni vamwani ava hi va txhumayelako. Ditshuri ti to mikombelo yathu kha ya fanela kugwitela ko kombela so kari dwe.

7. Ngu kutxani hi di fanete kudhumisa Jehovha ka mikombelo yathu?

⁷ Hi fanete hi khumbula kudhumisa Jehovha ka mikombelo yathu. Kha ngaho mmwani awu a fanelwako ngu wudhumo kupinda Txizimu txathu. Nguko txona ‘nja wunene ni kudivalela.’ Ni ku Txizimu txathu ‘Njizimu txa wunene ni wumbilu txa kutimisela, txo tala ngu wunene ni kuthembeka.’ (Mas. 86:5, 15) Ngu ditshuri hi ni txivangelo txo dhumisa Jehovha ngu tifanelo takwe ni totshe ati a ti mahako.

8. Ngu tihi timwani ati hi nga bongako Jehovha ngu tona? (Masalmo 104:12-15, 24)

⁸ Hahanze ko dhumisa Jehovha ka mikombelo yathu, hi nga tshumela hi m’bonga ngu sotshe so xamalisa asi a hi ningako. Ngu txikombiso, hi nga m’bonga ngu tikori to tshura ati hi ti wonako ka mafilori, sakudya asi ahi ningako so tshamba, ni vangana va vanene ava a hi ningako. Tate wathu wa mzumani a hi ninga sotshe siya, nguko ene a lava ti to hi tsaka. (Lera Masalmo 104:12-15, 24.) Kambe txa lisima ngutu hi lava kubonga Jehovha ngu sakudya so tala sa moya asi a hi ningako, ni themba yo tsakisa ya mbimo ayi yi tako.

9. Nji txani txi nga hi vhunako ti to hi khumbula kubonga Jehovha? (1 Vatesalonika 5:17, 18)

⁹ Ti nga hi hehukela kudivala kubonga Jehovha  ngu totshe ati a hi mahelako. Se nji txani txi nga hi vhunako ku hi khumbula? U nga maha lista ya si u nga si kombela ka Jehovha, se ngu kutsimbila ka mbimo u nga wona nzila yi Jehovha a xamulako ngu yona. Se ngu msana u nga tshumela u bonga Jehovha ngu mikombelo ayi a nga yi xamula. (Lera 1 Vatesalonika 5:17, 18.) Alakanyisisa ngu tiya, athu ha tsaka ngutu ngako m’thu a txi kombisa kubonga ngu kuva hi di mu mahete ta tinene. Ngu ha kufanako, ngako hi txi khumbula kubonga Jehovha nguku a nga xamula mikombelo yathu, ta tsakisa mbilu yakwe. (Vakl. 3:15) Se, ngu txihi tximwani txivangelo atxi txi hi mahako hi lava kukombisa kubonga Txizimu txathu?

10. Ngu kuya ngu 1 Pedro 2:21 ngu kutxani hi di ni txivangelo txo bonga Jehovha ngu kuva a di rumete Jesu e ta hamafuni?

¹⁰ Lera 1 Pedro 2:21. Hi fanete hi bonga Jehovha ngu kuva a di rumete mwanana wakwe wo randeka ngutu kasi e ta hi gondisa. Mbimo yi hi gondako ta wutomi wa Jesu hi gonda to tala ngu Jehovha mayelano ni nzila yo mtsakisa. Ngako hi txi kombisa likholo ka digandelo da Kristu, hi va ni wuxaka wo tsana ni Jehovha ni kutshumela hi va ni kudikha nayo.—Var. 5:1.

11. Ngu kutxani hi txi maha mkombelo ngu kuthumisa ditina da Jesu?

¹¹ Ha bonga Jehovha ngu kuva hi txi maha mkombelo ngu kuthumisa mwanana wakwe. Jesu i nzila ayi Jehovha a yi thumisako kasiku e engisa mikombelo yathu. Jehovha wa engisa mikombelo ayi yi mahwako ngu kuthumisa ditina da Jesu. Jesu a wombile tiya: “Sotshe asi mi no kombela ngu ditina dangu, ni na simaha kasi ku Tate e dhumiswa ngu kona ha ka mwanana.”—Joh. 14:13, 14.

12. Ngu txihi txivangelo txo bonga Jehovha ngu kona ha ka mwanana wakwe?

¹² Jehovha a si koti kudivalela sionho sathu ngu kuthumisa mtirulo wa digandelo da Jesu. Mibhalo yi womba ti to Jesu ngene “Mphaxeli wa Hombe . . . awu a nga khalahatsha txineneni ka txiluvelo txa wukoma nzumani.” (Vaheb. 8:1) Ni ku Jesu “Mthaveleli masoni ka Tata.” (1 Joh. 2:1) Ha bonga ngutu Jehovha nguku a nga hi ninga Mphaxeli wa Hombe awu a hi pfelako wusiwana, a pfisisako kutandeka kwathu ni ku “hi kombelela.” (Var. 8:34; Vaheb. 4:15) Kota vathu vo mbi hetiseka hi nge sikoti kutshuketela ka Jehovha ngu mkombelo i si nga ngu kuthumisa digandelo da Jesu Kristu. Ti ha kubasani ti to nawe wa kholwa ti to hi nge sikoti kubonga Jehovha ti enela ngu kona ha ka ningo ayi ene a nga hi ninga, i ku mtirulo wa Jesu Kristu!

13. Ka wusiku awu a ndi no fa ngu wona, Jesu a ti kombisisile kutxani ti to a txi randa vagondiswa vakwe?

¹³ Ka wusiku awu a ndi no fa ngu wona, Jesu a kombelete ngutu vagondiswa vakwe, e kombela Tate wakwe ti to e va “vhikela ka m’bihi.” (Joh. 17:15) Hi nga wona lirando ali Jesu a ku nalo! Hambiku a nga ti hafuhi ni kuwonisana ni txikarato txa hombe ka wutomi wakwe, ene a ti ngadi a txi karatekela vagondiswa vakwe.

14. Hi nga kombisisa kutxani ti to ha randa vanathu?

¹⁴ Hi kombisa ti to ha etetela Jesu ngu kwa mbi khatalela silaveko sathu dwe. Hahanze keto, mbimo yotshe hi khongelela vanathu ni vona. Ngako hi txi maha toneto hi na va hi txi engisa txirumo txa Jesu txa ti to hi randana ni kutshumela hi kombisa Jehovha ti to ha ma randa ngutu Makristu kulothi. (Joh. 13:34) Phela kukhongelela vanathu hi nga mnyuko wa yimbwa. Nguku Dipswi da Txizimu di hi gela  tiya: “Mkombelo wa lisima wa mlulami wu ni mtamo ngutu.”—Jak. 5:16.

15. Ngu kutxani txi lava hi khongelela vanathu?

¹⁵ Ti lava hi kombelela vanathu nguko vona va manana ni sikarato sa singi. Hi nga kombela Jehovha ti to e va vhuna kutsanisela malwati, tiphango ta mtumbuluko, tiyimbi ni simwani sikarato asi va mananako naso. Hi nga tshumela hi kombelela vanathu ava va ti ningetelako kasi kuvhuna ava va nga humelelwa ngu tiphango. Ti nga maha u txi va ziva vamwani ava va mananako ni sikarato. Ngu toneto, mbimo yi u mahako mkombelo u nga womba matina awe. Athu hi nga kombisa ti to ha randa vanathu ngu kukombela Jehovha ku e va vhuna ve tsanisela.

16. Ngu kutxani hi di fanete kukombelela ava va thangelako?

¹⁶ Ava va thangelako ni vona va bonga ngutu mikombelo yathu ni ku va wuyelwa. Paulo a txi tiziva to ene a ti txi lava txivhuno txa mikombelo ya vamwani. Ene a bhate tiya: “Nanani ni kombeleleni kasiku Txizimu txi txi ni tula khana mbimo yi ni lavako kugondisa kasi ku ni sikota kuwombawomba ni si thavi txilo ni txi zivisa vathu txikungo txa Evhangeli.” (Vaef. 6:19) Nyamsi wa ditshiku ku ni vanathu vo tala ava va thangelako dibanzani. Se hi nga kombisa ti to ha varanda ngu kukombela ti to Jehovha e katekisa mthumo wawe.

17-18. Ngu sihi siemo asi hi nga kombelwako ti to hi emela vamwani ngu mkombelo, ni ku ngu tihi ati hi fanelako ku ti khumbula?

¹⁷ Mbimo yimwani hi nga kombelwa ti to hi emela vamwani ngu mkombelo. Ngu txikombiso, mwanathu wa txisikati awu a tsimbitisako gondo ya Bhiblia a nga kombela mwanathu wa txisikati awu a ku nayo ti to e maha mkombelo. Mwanathu wule a nga kombelwa kumaha mkombelo, ti nga maha a si txi zivi kwati txigondiana. Se a nga wona i di tshuku kumaha mkombelo wo gwita. Ngu nzila yoneyo, ti na mu hehukela kumaha mkombelo ngu kuya ngu silaveko sa txigondiana.

¹⁸ Mwanathu a nga kombelwa kumaha mkombelo ka mtshangano wa thembwe mwendo ka mtshangano wa dibanza. Vanathu vonevo va fanete kutiziva ati va fanelako ku ti pata ka mikombelo yawe. Mikombelo kha yi thumiselwi kulaya dibanza mwendo kumaha siziviso. Ka  mitshangano ya dibanza, kutolovela kuva ni 5 wa timeneti para ndando ni mkombelo. Ngu toneto, mwanathu awu a mahako mkombelo kha fanela kuthumisa “mapswi o tala” ngutu-ngutu ka mkombelo wo khata.—Mat. 6:7.

19. Nji txani txi no hi vhuna ti to hi ta manwa hi di emekile ka ditshiku da kulamula da Jehovha?

¹⁹ Hi fanete kuteka mkombelo i di mhaka ya lisima ngutu ka wutomi wathu, ngutu-ngutu aku ditshiku da Jehovha di tshuketelako. Ka mhaka yiya, Jesu a wombile tiya: “Khutalani na mi txi khongela txotshe txikhati, kasi ku mi na va mtamo wa kuhuluka totshe ati ti no humelela.” (Luka 21:36) Ina, ngako mbimo yotshe hi txi maha mkombelo ti na hi vhuna ku hi zumba hi di khenjimukile ngu didhawa da moya, kasiku ditshiku da Jehovha di ta hi mana hi di emekile.

20. I ngu nzila yihi mkombelo wathu wu nga fanako ni dibaselo do bhumula?

²⁰ Ngu tihi ati hi nga bhula ngu tona? Athu ha ninga lisima lungelo yi hi ku nayo yo maha mkombelo. Kambe ta lisima ngutu ati hi nga ti wombako ka mkombelo ngu ti ti yelanako ngu kukongoma ni txikongomelo txa Jehovha. Hi nga tshumela hi kombisa kubonga ngu mwanana wakwe, Mfumo wakwe ni kukombelela vanathu. Ni ku hi nga tshumela hi kombelela ti to Jehovha e khatalela silaveko sathu sa nyama ni sa moya. Ngako hi txi alakanyisisa kha kwati ngu ti hi no tiwomba ka mkombelo, hi kombisa ti to ha ninga lisima lungelo yiya yo xamalisa. Mapswi aya hi no mawomba ka mkombelo ma na fana ni dibaselo do bhumula masoni ka Jehovha, i ku ti to mkombelo wonewo wu na ‘tsakisa’ Jehovha.—Mav. 15:8.