1. Ngu tihi ati Jehovha ati lavako to ti mahwa nyamsi?

 KURANDA ka Txizimu ngu ti to nyamsi mahungu a manene a Mfumo me txhumayelwa ha mafuni kotshe. (Marku 13:10; 1 Tim. 2:3, 4) Ni ku mbwa lisima ngutu aha koza e wu veka manzani ka Mwanana wakwe wo dhundeka ngutu. Hi nga tsaniseka ti to aku mthumo wo txhumayela wu ko hahatshi ka wu woneleli wa Jesu Kristu wona wu na hetiseka ngu nzila ayi Jehovha ayi lavako ngu yona na ku sise kuhoka magwito.—Mat. 24:14.

2. Hi na bhula ngu txani ka gondo yiya?

² Ka gondo yiya hi na wona nzila yi Jesu a thumisako ngu yona ‘txithumi txo thembeka na txi di ni wutxhari’ ti to e hi ninga sakudya sa moya ni ku lulamisela valondeteli vakwe ti to ve maha mthumo wo txhumayela mahungu a manene mafuni kotshe. (Mat. 24:45) Hi na tshumela hi wona ti to mwani ni mwani wathu, a nga maha txani ti to e seketela Jesu kumweko ni txithumi txo thembeka.

3. Ngu wuhi wutixamuleli wumwani awu Jesu a nga ningwa?

³ Jesu ngene a wonelelako mthumo wo txhumayela. Hi ti zivisa kutxani toneto? A di hafuhi ni ku tshumela eya nzumani Jesu a tshanganile ni valondeteli vakwe mmangoni ka Galileya e va gete tiya: “Ni ningilwe mtamo wotshe, nzumani ni ha mafuni.” Wona ti a nga tshumela e ti womba: “Ngu toneto, tsulani mi txi ya phindula vamatiko votshe, ve maha vagondiswa vangu.” (Mat. 28:18, 19) Ka wutixamuleli wo tala awu Jesu nga ningwa, wumwewo wa kona ngu wu wo thangela ka mthumo wo txhumayela.

4. Ngu kutxani hi nga wombako ti to Jesu ngene a simamako e wonelela mthumo wo txhumayela kala nyamsi?

 ⁴ Jesu a wombile ti to mthumo wo txhumayela ni kumaha vagondiswa wu di na mahwa ka ‘matiko otshe’ ni ku a di na simama e vhuna vagondiswa wakwe “yotshe mbimo, kala kugumani ka mafu.” (Mat. 28:20) Eto ti veka hakubasani ti to mthumo wo txhumayela wu di na simama wu wonelelwa ngu Jesu Kristu kala ka masiku a nyamsi.

5. U patekisa kutxani ka ku hetiseka ka wuprofeti wa Masalmo 110:3?

⁵ Jesu a si thavi mwendo ku karateka, a txi pimisa ti to ti nga maha e ta pwata vathu va va di no txhumayela ka masiku yawa a magwito. Ene atxi ziva ti to wuprofeti wuwa wu ku ka Masalmo wu di na hetiseka awu wu ku khene: “Vathu vako va nata kwako ngu kutsaka, ngako u txi xoma matxhari a kuya yimbini.” (Mas. 110:3) Ngako u txi pateka ka mthumo wo txhumayela, awe u maneka u txi seketela Jesu Kristu kumweko ni txithumi txo thembeka ni ku tshumela u vhuneta ka kuhetiseka ka wuprofeti wonewo. Se mthumo wu ya masoni, hambi keto ku ni sikarato si hi mananako naso.

6. Ngu txihi txikarato atxi vatxhumayeli va Mfumo va mananako natxo nyamsi?

⁶ Tximwani txa sikarato asi vatxhumayeli va Mfumo va mananako natxo ngu kanetwa. Vapostata, vathangeli va titxhetxhe, ni va mwa tipolitika va womba-womba kubiha ngu mthumo wathu wo txhumayela. Se ngako maxaka athu ma txi kholwa makuho oneyo vona va nga hi sinzisa kuleka kuthumela Jehovha mwendo ni kuleka kutxhumayela. Ka matiko mamwani vakaneti va hi dhukisela ngu ku hi ñola ni kutshumela ve hi khotela jele. Kambe atiya kha ti hi xamalisi nguko Jesu a wombile to ti di na maheka mbimo yi a nga womba tiya: “Mi na vengelwa ngu votshe vathu, ngu mhaka ya ditina dangu.” (Mat. 24:9) Ku va hi txi kanetwa ngu nzila yiya ti kombisa ti to athu ngu ditshuri hi vathu va Jehovha. (Mat. 5:11, 12) Sathani ngene a kuzutelako ko kaneta kuwa. Kambe ene kha wu dyeli ka Jesu. Ngu seketelwa ngu Jesu mahungu a manene ma hokela votshe vathu ha mafuni kotshe. He woni sikombiso so kari.

7. Ngu tihi ti kombisako ti to ati ti ku ka dibhuku da Mtuletelo 14:6, 7 ta hetiseka nyamsi?

⁷ Kota vatxhumayeli va Mfumo ha manana ni tximwani txikarato i ku txa tidimi. Jesu a tuletete Mpostoli Johani ti to ka masiku athu txikarato txonetxo txi di na xulwa. (Lera Mtuletelo 14:6, 7.) Ngu nzila muni? Athu ha ninga mkhanjo vathu o tala ti to ve sawula ku engisa mahungu a manene mwendo nem. Nyamsi hamafuni kotshe vathu va nga sikota kulera Bhiblia ni mabhuku athu ka site ya jw.org, ayi yi nga hunduluxelwa ngu tidimi ati ti pindako kona mu ka 1.000 wa tona. Kutshumetwe kutumelelwa ti to dibhuku di di ku: Hanya wutomi wo tsakisa kala kupinduka! adi i ku masale wa kona ka tifarameti ati hi hi ti thumisako ko maha vagondiswa di humiswa tidimi ati ti pindako 700 wa tona! Sakudya sa moya si tshumela si maneka ngu mavhidhiyo kasi kuvhuna ava va ku ni txikarato txa tinzeve ni ku ku ni mabhuku a braille kasi kuvhuna ava va ku ni sikarato sa maso. Athu ha wona wuprofeti wuwa wu txi hetiseka nyamsi awu wu ku: Vathu “va totshe tidimi ta matiko” va na gondela ku womba-womba lidimi lo ‘sawuleka,’ i ku ditshuri da mu ka Bhiblia. (Zak. 8:23; Zef. 3:9) Totshe tiya ti koteka ngu kona ha ka mthumo awu wu mahwako ngu Jesu kota muwoneleli wa mthumo wo txhumayela.

8. Ngu yihi wuyelo ya yinene ayi yi tiswako ngu mthumo wo txhumayela?

⁸ Nyamsi kupinda 8 wa timiliyoni ta vathu ka 240 wa matiko va seketela sengeletano ya Jehovha, ni ku dilembe ni dilembe mazana-zana ava vathu va bhabhatiswa kota Tifakazi ta Jehovha. Kambe ati i ku ta lisima ngutu hi nga  mtengo, kambe ndifanelo ta moya i ku “m’thu wamphya,” ati va ti sakulelako vagondiswa wonewo. (Vakl. 3:8-10) Vo tala ti lavile ve leka wugango, tshofu hambi txisawu-sawu. Se wuprofeti awu wu ku ka Isaya 2:4 wa hetiseka wa ti to ‘kha va na mbi gondela kambe kulwa yimbi.’ Mbimo yi hi mahako totshe hi nga ti kotako kasi kuambala m’thu wamphya, hi vhuna vathu ti to ve seketela sengeletano ya Jehovha ni ku hi tshumela hi ti veka hakubasani ti to hi londisa muwoneleli wathu Jesu Kristu. (Joh. 13:35; 1 Pedro 2:12) Atiya hi nga to kotxana kambe Jesu ngene a hi ningako txivhuno atxi txi lavekako.

9. Ngu kuya ngu Matewu 24:45-47, ngu tihi ati ti nga profetwa mayelano ni masiku ya magwito?

⁹ Lera Matewu 24:45-47. Jesu profetile ti to ka masiku a magwito ene adi na sawula ‘txithumi txo thembeka na txi di ni wutxhari’ ti to txi ningela sakudya sa moya. Se ti hakubasani ti to txithumi txonetxo txi bhisi txi txi maha mthumo wa txona. Muwoneleli wathu a thumisa mtxawanyana wa wudotho wa vanathu va nga sawulwa ti to wu ninga sakudya sa moya vathu va Txizimu, ni vamwani va tsakelako “ngu txikhati txi txi fanelako.” Vanathu vonevo kha va ti woni i di vafumeli va likholo la vamwani. (2 Vak. 1:24) Hahanze keto vona va tiziva ti to Jesu ngene i ku “Mthangeli ni Mfumeli” wathu.—Isaya 55:4.

10. Ngu dihi dibhuku adi di kombiswako ka mfota adi di nga ku tsanisekisa ti to u mani nzila ya ditshuri?

¹⁰ Kukhukhela 1919, txithumi txo thembeka txi humisa mabhuku aya ma vhunako vathu to ve gonda ditshuri. Ngu 1921, txithumi txo thembeka txi lulamisete dibhuku di ku A Harpa de Deus ti to di vhuna ava va tsakelako ti to ve gonda ditshuri. Ngu tsimbila ka mbimo ku humisilwe mabhuku mamwani. Ngu dihi dibhuku a di di nga ku vhuna ti to u ziva kuranda ka Jehovha? Ina di vile “Seja Deus Verdadeiro,” A Verdade  Que Conduz à Vida Eterna, Viva Para Sempre em Felicidade na Terra!, Conhecimento que Conduz à Vida Eterna, O Que a Bíblia Realmente Ensina?, Bhiblia yi nga hi gondisa txani? Mwendo adi da diphya da, Hanya wutomi wo tsakisa kala kupinduka! Otshe mabhuku yawa ma humisilwe kasi ku hi maha vagondiswa, ni ku dimwani ni dimwani di humisilwe ngu mbimo ya yinene kasi ku hetisisa txilaveko txa mbimo yoneyo.

11. Ngu kutxani ti di ni lisima ti to hotshethu hi mana sakudya sa moya?

¹¹ Ava i ku ngadi vavaphya ka sengeletano, hi nga vona dwe va fanelako kumana sakudya so banga sa moya. Hotshethu hi fanete kudya sakudya siya. Mpostoli Paulo a bhate tiya: “Sakudya si so banga, nza vahombe.” Paulo a tshumete e womba ti to kudya sakudya soneso, ti di na hi vhuna ti to hi “ziva kuhambanisa to tshura ni to biha.” (Vaheb. 5:14) Ka timbimo tiya to karata hawa wubihi wu yako wu engetela ngutu ti nga hi karatela ku londisa milayo ya Jehovha. Kambe Jesu wa hi vhuna ti to hi mana mtamo wu hi wu lavako ngu ku hi ninga sakudya sa moya so tshamba. Txisima txa sakudya soneso i dipswi da Txizimu i ku Bhiblia. Txithumi txo thembeka ngu txona txi lulamiselako ni kuningela sakudya siya hahatshi ka mkongomiso wa Jesu.

12. Kufana ni Jesu i ngu nzila muni hi kombisako ti to ha ninga lisima ditina da Txizimu?

¹² Kufana ni Jesu nanathu ha ninga wudhumo awu wu fanelako ditina da Txizimu. (Joh. 17:6, 26) Ngu txikombiso ngu 1931 hi sawute ku dhanwa ngu ditina adi di nga seketelwa mu ka Bhiblia, i ku Tifakazi ta Jehovha. Ngu kumaha toneto hi kombisa ti to athu ha ninga ngutu lisima ditina da Jehovha ni ku hi lava kuziwa ngu ditina da Tate wathu a ku nzumani. (Isaya 43:10-12) Ni ku kukhukhela ka Outubro wa dilembe donedo ditina da Jehovha da maneka ka kapa ya otshe marevhista a Muwoneleli. I si nga eto dwe Bhiblia ya Tradução do Novo Mundo da  Bíblia Sagrada yi wuyisete ditina da Txizimu wukhalo wa dona. Eto ta hambana ni ti titxhetxhe ti ti mahako to namula ditina da Jehovha amu ka wuhunduluxeli wa ma Bhiblia awe!

13. Nji txani txi ku tsanisekisako ti to Jesu a thumisa “txithumi txo thembeka na txi di ni wutxhari” nyamsi? (Johani 6:68)

¹³ Ngu ku thumisa ‘txithumi txo thembeka na txi di ni wutxhari’ Jesu a lulamisete sengeletano ayi yi hambanako ni timwani tisengeletano ha mafuni hawa kasi ku thangetisa wukhozeli wa ditshuri. U ti pfisa kutxani kupateka ka sengeletano yiya? Ti nga maha u ti pfa nga ti Mpostoli Pedro mbimo yi a nga gela tiya Jesu: “Hi na ya ka mani kani Mkoma kani? Awe ngawe u ku ni mapswi a wutomi wo mbi guma.” (Joh. 6:68) I si nga kona ka sengeletano ya Jehovha ina hi ndi na va hayi? Ngu kuthumisa sengeletano yiya Jesu wa maha totshe kasi ku hi mana kudya ngu didhawa da moya. Ene a tshumela e hi trenara ti to hi maha kwati mthumo wathu wo txhumayela. I si nga eto dwe, ene wa hi vhuna ti to hi ambala “m’thu wamphya” kasi ku hi tsakisa Jehovha.—Vaef. 4:24.

14. I ngu nzila muni u nga wuyelwa ngu kuva u txi lumba sengeletano ya Jehovha ka mbimo ya mtungo wa COVID-19?

¹⁴ Jesu wa hi ninga mkongomiso ka timbimo ta sikarato. Mbimo yi nga khata mtungo wa COVID-19 ti vile hakubasani ti to ngu ditshuri Jesu wa hi ninga mkongomiso. Mbimo yi vathu vo tala hamafuni va nga txi karateka ngu kulava kuziva ti to va na maha txani, Jesu a tsanisekisile ti to hi mana mkongomiso to hi zumba hi di vhikelekile. Hi kuzetilwe ti to hi ambala ma maskara ngako hi ti mu ko tala vathu, ni ku tshumela hi zumba kule ni kule ni vamwani. Madhota ma tshumete me kongomiswa ti to mbimo yotshe me xola votshe ava va ku dibanzani  ti to va njani ngu didhawa da moya ni da nyama. (Isaya 32:1, 2) Hi tshumete hi amukela mkongomiso ni txitsaniso ngu kuthumisa mavhidhiyo a Madungula a Mmidi wu wu Fumako.

15. Ngu wuhi mkongomiso u nga wu mana mayelano ni kunõla mitshangano kumweko ni mthumo wo txhumayela ka mbimo ya mtungo ni ku yi vile ni wuyelo?

¹⁵ Ka mbimo ya mtungo hi tshumete hi amukela mkongomiso mayelano ni ti to hi di na mahisa kutxani mitshangano yathu ni mthumo wathu wo txhumayela. Kunukunuko u khatile kuxalela mitshangano ya divhiki ni divhiki, mitshangano ya txigava ni ya m‘ganga ngu ku thumisa vhidhiyo-konferensia. Hi tshumete hi khata kutxhumayela ngu kuthumisa fone ni ku bhala mapasi. Jehovha a katekisile mizamo yoneyo. Mabhetele o tala ma rumete ma relatoriyo aya ma kombisako ti to mtengo wa vahuweleli wu engetelekile. Ngu ditshuri vanathu vo tala va mani ni maexperiyensia o tsakisa ngutu ka mbimo yiya.—Wona dibhokiso di di ku “ Jehovha wa katekisa mthumo wathu wo txhumayela.”

16. Ngu tihi ati hi nga tsanisekako ka tona?

¹⁶ Ti nga maha vamwani va di pimisile ti to sengeletano ya Jehovha yo pindisa ngutu ngu nzila yi yi nga lava ti to hi vhikeleka ngu yona ka mtungo wa COVID-19. Kambe ti vile hakubasani ti to mkongomiso awu hi wu manako hi nga wa walo-walo, mkongomiso wa wunene. (Mat. 11:19) Ni ku ngako u txi alakanyisisa ngu nzila ya lirando ayi Jehovha a thumisanako ngu yona ni vathu vakwe, ti hi maha hi tsaniseka ti to Jehovha kumweko ni Mwanana wakwe va na va ni nathu, ti si nga ni mhaka ati ti no maheka mangwana.—Lera Vahebheru 13:5, 6.

17. U ti pfisa kutxani ngu thuma hahatshi ka wuwoneleli wa Jesu?

¹⁷ I kateko ya hombe kuthuma hahatshi ka wuwoneleli wa Jesu Kristu. Athu hi lumba sengeletano ayi yi ku ni wumwewo ti si ngani mhaka ni kuhambana ka midhawuko, matiko ya hi tako ngu ka wona, mwendo tidimi ti hi womba-wombako. Athu ha mana sakudya sa moya sa sinene ni ku ha lulamiselwa ti to hi maha mthumo wo txhumayela. Mmwani ni mmwani wathu wa vhunwa ti to e ambala m’thu wamphya ni ku ha gondiswa ku randana. Ngu toneto hi ni sivangelo so tala sa ti to hi ti gela ngu Jesu kota muwoneleli wathu!