Jesu a txi txhumayela mahungu a kudikha. Kambe ditshiku dimwani a wombile tiya: “Mi nga alakanyeni ti to ni tete kuneha kudikha ha mafuni; kha na tela kuneha kudikha, aniko ditxhari. Nguko ni tete ku ta hambanisa m’thu ni tate wakwe, mwanana wa dihorana e wukela mame wakwe, ni mamanyani e wukela masale wakwe.” (Mat. 10:34, 35) Jesu a txi lava kuwomba txani?

Jesu a si txo lava kuhambanisa maxaka, kambe ene a txi ti ziva ti to tigondo takwe ti ndi na hi maha hi hambana ni maxaka. Ngu toneto ava va lavako kuva Makristu ni kubhabhatiswa va fanete ve khumbula ati ti nga thukako ti va humelela. Ngako va txi wonisana ni kukanetwa ngu wu va nga tekana nayo mwendo vamwani va ha mwayani, ti nga va karatela kusimama ve namarela ka tigondo ta Kristu.

Bhiblia yi kuzeta Makristu ti to me “hanya ngu kuthutha ni votshe vathu.” (Var. 12:18) Kambe, ka timwaya timwani tigondo ta Jesu ti nga fana ni di “ditxhari.” Atiya ti nga maheka ngako mmweyo wa wa hamwayani a txi tumela tigondo ta Jesu, kuveti vamwani va kaneta. Ngako eto ti txi maheka, avale vamwani vahamwayani va si tumeliko ditshuri va nga fana ni “valala” va wule a gondako ditshuri.—Mat. 10:36.

Makristu aya ma hanyako ka timwaya ati ti ku ni wukhongeli wo hambana, lirando lawe ngu Jehovha ni Jesu la thuka li dukwa. Maxaka ya i singako Tifakazi ta Jehovha, ma nga va kuzetela ti to ve ti betela ka mikhuva ayi yi yelanako ni wukhongeli wa makuho. Ngako eto ti txi maheka vona va na tsakisa mani? Jesu a wombile tiya: “Awule a randako ngutu tate mwendo mame wakwe kupinda ani, kha ni faneli. Awule a dhundako ngutu mwanana wakwe wa mfana mwendo wa dihorana kupinda ani, kha ni faneli.” (Mat. 10:37) Ditshuri ti to Jesu a si njo womba ti to kasi ku hi faneleka kwakwe, hi fanete kwa mbi randa ngutu vaveleki vathu. Ene a txi lava kuwomba ti to hi fanete kuthangetisa timhaka ta moya kukhata. Athu ha simama hi va randa, kambe a khumbula ti to lirando lathu ngu Jehovha ngu lona li fanelako kuva lo khata.

Kha ti kana-kanisi ti to kukanetwa ngu maxaka ta panda ngutu. Hambiketo vagondiswa va Kristu va khumbula mapswi akwe aya ma ku khene: “Awule a si rwaliko txihambano txakwe, a txi ni londeta, kha ni faneli.” (Mat. 10:38) Ti wombako ti to Makristu ma wona kuxaniswa i di simwani ka sikarato asi ma felako kupinda ngu ka sona. Ni ku ona ma navela ti to mahanyelo awe a manene me va txikombiso txa txinene ka maxaka awe, ati ti nga mahako ti to me lava kugonda ditshuri.—1 Pedro 3:1, 2.