GONDO 23
Ditina dako di na basiswe
“MKOMA, ditina dako di na pfaliswa kala kupinduka!” —MAS. 135:13.
NDANDO 10 Dhumisani Jehovha Txizimu txathu!
ATI HI NO TI GONDA *
1-2. Ngu tihi timhaka ati ti hi tsakisako aku hi ku Tifakazi ta Jehovha?
KU NI mhaka ayi i ku ya lisima ngutu kwathu i ku yiya: Wukoma wa Txizimu ni kubasiswa ka ditina da txona. Aku hi ku Tifakazi ta Jehovha kubhula ngu timhaka toneto ta hi tsakisa ngutu. Kambe hi nga ti to wukoma wa Txizimu ni kubasiswa ka ditina da txona o va timhaka to hambana.
2 Hotshethu ha ti wona to ditina da Txizimu di fanete di basiswa. Futshi ha tiziva to nda lisima kukombisa ti to wukoma wa Jehovha mwendo mafumelo akwe ngu ona i ku a lisima ka otshe. Timhaka toneto totshe, nda lisima ngutu.
3. Ditina da Jehovha di womba txani?
3 Phela ditina do, Jehovha, di womba totshe mayelano ni Txizimu txathu, kupata ni nzila yi txi fumako ngu yona. Se i di ti to hi khathu ditina da Jehovha di fanete di basiswa ka yotshe nzambwa ayi di nga phatekelwa, ti womba to hi tumela to mafumelo a Jehovha ngu ona a manene kupala otshe. Ditina da Jehovha di tsimbitisana ni nzila yi a fumako ngu yona kota Mkoma wu a nga guleka.—Wona dibhokiso di di ku, “ Timhaka timbidi ti patekako ka dihungu da hombe.”
4. Dibhuku da Masalmo 135:13 di womba txani ngu ditina da Txizimu? Ngu sihi siwotiso asi hi no bhula ngu sona?
4 Ditina do Jehovha di sawulekile nguto ta tinene. (Lera Masalmo 135:13.) Nji txani txi mahako ditina da Txizimu di sawuleka ngutu? Jehovha a khatile kulumbetwa ditshiku? Txizimu txi di basisisa kutxani ditina da txona? Athu hi di lwelisa kutxani ditina da Txizimu? Konku hi na bhula ngu tixamulo ta siwotiso siya.
NJI TXANI TXI MAHAKO DITINA DI VA DA LISIMA
5. Ngu tihi ati vathu va nga ti wotisako mbimo yi va pfako ti to ditina da Txizimu di lava kubasiswa?
5 Jesu a ti khene hi txi maha mkombelo kukhata he kombeleni tiya: “Ditina dako di na sawulwe.” (Mat. 6:9) Ti womba txani kusawulekisa ditina? Kusawulekisa txo maha ti womba ku txi basisa. Vamwani va nga tiwotisa tiya: ‘Kasi ditina da Jahovha kha da basa kani?’ Ti to hi mana xamulo kukhata he alakanyisise ngu ti ditina di wombako tona.
6. Nji txani txi mahako ditina di va da lisima?
6 Ditina di womba to tala kupinda ti di bhaliswako tona ni ti di dhaniswako tona. Bhiblia yi womba tiya: “Ditina da dinene da dhundeka ngutu, kupinda tithomba ta tingi; ni wunene i txhuku kupinda nzalama.” (Mav. 22:1; Ekl. 7:1) Ngu kutxani ditina i di da lisima? Nguko di womba nduma ya m’thu ni ti vamwani va ti zivako ngu ngene. Ngu toneto ku di wona di di bhatwe mwendo ku dipfa di txi dhanwa dwe hi nga ta txilo, ati i ku ta lisima, ngu ti vathu va ti pimisako mbimo yi va pfako ditina donedo.
7. Vathu va nyetisa ditina da Txizimu ngu nzila muni?
7 Mbimo yi vathu va hembako makuhu ngu Jehovha va maha to vamwani ve pimisa to biha ngu ngene. Va txi maha toneto va nyetisa ditina dakwe. Dikhambi do khata aha a nga hembelwa Jehovha, i jaradhi ka Edheni. He wone to hi nga gonda txani ka mhaka yoneyo.
JEHOVHA A KHATILE KULUMBETWA DITSHIKU?
8. Ngu tihi ati Adhamu ni Evha va nga ti ti ziva? Ngu sihi siwotiso asi si gulekako?
8 Adhamu ni Evha va ti di ziva kwati ditina da Jahovha ni ti di wombako tona. Vona va ti ti ziva ti to ngene M’vangi, ngene a nga va ninga wutomi, e va ninga Paradhise e tshumela e va txhadhisa. (Gen. 1:26-28; 2:18) Ina Adhamu ni Evha va thumisile mialakanyo yawe yo hetiseka ti to ve alakanyisisa ngu totshe ati Jehovha a nga va mahela? Ina va simamile ve kulisa lirando lawe ni kukombisa kubonga Awu ditina dakwe i ku Jehovha? Xamulo yi manekile mbimo yi mlala wa Jehovha a nga va duka.
9. Ngu kuya ngu Genesisi 2:16, 17 ni 3:1-5, nji txani atxi Jehovha a nga gela Adhamu ni Evha? Sathani a di soholotisile kutxani ditshuri donedo?
9 Lera Genesisi 2:16, 17 ni 3:1-5. Sathani a womba-wombile ni Evha e maha nga mnyoka wu nga ti wotisa Evha wu txi khene: “Ina Txizimu txi wombile to mi nga dyeni muhando ni wawumwewo, ka yotshe mindonga yi yi ku thembweni muwa kani?” Ka txiwotiso txonetxo, Sathani txi ti sisile makuhu ya ma ku ni phango. Ati Txizimu txi nga ti va gete ngu ti to vona va ndi na dya yotshe mihando ayi va yi lavako ve leka wumwewo dwe. Phela i ti yingi mindonga ayi Adhamu ni Evha va ndi no tibusa ngu yona. (Gen. 2:9) Ngu ditshuri Jehovha a ni wuha. Hambi keto, Sathani a soholotile ditshuri donedo. Aku Txizimu txi nga ti va tsimbisile kudya mndonga awu txi nga ti wu sawute, Sathani a mahile ti woneka nga Txizimu txi ni likungo. Ti nga maha Evha a di xamate a txi khene: ‘Kasi Txizimu txi hi tona silo so tshamba!’
10. Sathani a wombisile kutxani makuhu ngu ditina da Txizimu? Toneto ti vite ni wuyelo yihi?
10 Mbimo yi Sathani a nga wotisa txiwotiso txonetxo, Evha a ti ngadi a txi engisa Jehovha. Ene a wombile ati Jehovha a nga ti wombile tona. A vekile ni kukhene mndonga wule kha wu gweswi. A sa divala txialakanyiso txa Jehovha txo khene va txo thuka ve tihunda va ndi na fa. Kambe Sathani a ti khene: “Lambi! Kufa kha mi nambi fa!” (Gen. 3:2-4) Hi nga ti to Sathani a txo lava ve pimisa ku Jehovha a ni makuhu. Ene a txo womba makuhu ngu ditina da Txizimu, e gela Evha to Jehovha wa hemba. Ngu toneto ene a nga va Dhiyabhulosi mwendo m’hembi. Evha se va ti mu koti; a khotwe ka Sathani. (1 Tim. 2:14) Evha a to kholwela Sathani kupinda Jehovha. Ngu toneto ti nga bharukisa Evha, e maha phazamo yo hambi mwanana a nge yi mahi. A to wona i di tshuku kwa mbi engisa Jehovha. A to khata kudya m’hando awu Jehovha a nga va tsimbisa. Se, ngu msana a to ninga Adhamu nene e dya.—Gen. 3:6.
11. Ngu tihi ati Adhamu ni Evha va nga ti fanete kutimaha? Kambe vona va tandekile kumaha txani?
11 U alakanya to Evha a di m’gete txani Sathani? Alakanya i di ku Evha a to khene: “Kasi ngawe mani? Ani ni ziva Jehovha, i ku Tate wangu awu ni mu randako ni ku mu themba. Ene a ningile ani ni Adhamu sotshe asi hi ku naso. U mahisa kutxani awe kuwomba-womba kubiha ngu ngene kani? U txi hangalaka konkuwa!” Ngu ditshuri Jehovha a di tsakile kupfa mapswi onewo o kombisa kuthembeka ka Evha, mwanana wakwe wa dihorana! (Mav. 27:11) Kambe Evha a si nga ni lirando lo thembeka ka Jehovha; Adhamu nene a ti fana ni msikati wakwe. Ngu mhaka yo pwata kwawe lirando lo thembeka ka Jehovha, va tandekile kulwela ditina da Txizimu ka Nyatataniyo wa makuhu.
12. Sathani a kuphayisile kutxani kukana-kana ka mbilu ya Evha? Adhamu ni Evha va tandekile kumaha txani?
12 Nga ha hi nga ti wona ngu kona, Sathani a khatile ngu kuphaya kukana-kana ka mbiluni ka Evha. Ene a mu wotisile mhaka ayi yi ndi no mu kanakanisa ati ditina da Txizimu di wombako tona. Se Adhamu ni Evha va tandekile kulwela ditina da Jehovha ni nduma yakwe. Eto ti va mahile ve engisa Sathani ve tshuralela Tate wawe. Ni nyamsi, Sathani a thumisa marindi o fana. Ene a hembela ditina da Jehovha. Ava va tumelako makuhu a Sathani, va tshuralela wukoma wa Jehovha.
JEHOVHA WA BASISA DITINA DAKWE
13. Dibhuku da Ezekhiyele 36:23 di wu kombisisa kutxani msungo wa mhaka wa Bhiblia?
13 Ina Jehovha a khalahatshile ngu mawoko, e tumeletela makuhu onewo? Nadha! Bhiblia yotshe yi womba ati Jehovha a nga maha ti to e kombisa to, ati ti nga wombawa ngu Sathani hi nga ditshuri. (Gen. 3:15) Phela, ngu kukomisa hi nga womba msungo wa mhaka wa Bhiblia ngu mapswi awa: Jehovha a sawulekisa ditina dakwe ngu kuthumisa Mfumo wakwe awu Mwanana wakwe i ku ene Mkoma ni ngu kutisa wululami ni kudikha ha mafuni. Bhiblia yi ni timhaka ati ti hi vhunako kupfisisa nzila yi Jehovha a basisako ngu yona ditina dawe.—Lera Ezekhiyele 36:23.
14. Jehovha a maha txani ka mhaka yile ya makuhu a Sathani kasi ku e basisa ditina dakwe?
14 Kha ti ziwi to makhambi mangahi aya Sathani a nga wa e kasa a txi zama kuvhalela makungo a Jehovha. Kambe i to va mnyuko wa yimbwa. Bhiblia yi kombisa to Jehovha kha khalahatsha ngu mawoko, se eto ti kombisa to kha nga ho wo fana ni Jehovha Txizimu. Phela, Jehovha kha maha ngu kupfa kutshamba ngu kubharuka ka Sathani ni votshe va va mu seketelako. (Mas. 78:40) Hambi keto, kha lwisi ku nga yimbwa yi di mani tximbeziyani. Ene a thumisa mapimo, wa timisela ni kuva ni wunene. Hi nga dikhambi dimwedo a nga kombisa mtamo wakwe wa hombe. Kupinda totsheleleto, lirando lakwe la woneka ka totshe ati a ti mahako. (1 Joh. 4:8) Jehovha kha leki kulwela kubasisa ditina dakwe.
Sathani a gete makuhu Evha mayelano ni Jehovha, se kala nyamsi Dhiyabhulosi a simama e hembela Txizimu (Wona tindimana 9-10, 15) *
15. Ngu yahi makuhu aya Sathani a ma thumisako nyamsi wa ditshiku? Ona ma maha to vathu ve pimisa txani?
15 Ni nyamsi Sathani a bhisi ni ku hembela ditina da Txizimu. Ene a duketa kumaha to vathu ve kholwa to Txizimu kha txi na mtamo, hi nga txa txinene, txi divate ni ku kha txi na lirando. Ngu txikombiso, Sathani a zama kukholwisa vathu to Jehovha hi ngene a nga vanga sotshe. Se ngako vathu va txi lamba toneto, a zama ku va kholwisa to milaya ya Txizimu ya karata ni ku hi nga ya yinene. A veka ni kugondisa vathu to Jehovha njikonyoka, wa hisa vathu ngu mndilo nzumani. Ngako va txi tumela, ta va hehukela kutshuralela wukoma wa Jehovha. Sathani a no leka makuhu mbimo yi va no mu daya ngu Jehovha, se hambi konkuwa wa ti lava to nawe u leka Jehovha. Ina a na ku kota?
AWE U NGA MAHA TXANI KA MHAKA YIYA
16. Ngu tihi ti awe u nga mahako ati Adhamu ni Evha va nga ti tanda?
16 Jehovha a tumelela ku vathu vo mbi hetiseka va vhuneta ko basisa ditina dakwe. Awe u nga sikota kumaha ati Adhamu ni Evha va nga ti tanda kumaha. Hambiku hi hanyako ka mafu ya vathu va kona va ruketelako ni ku lumbeta ditina da Jehovha, awe u ni lungelo yo emela ni kuwomba ditshuri mayelano ni Jehovha. U ti veka hakubasani ti to Jehovha a sawulekile, a lulamile, mnene ni ku a ni lirando. (Isaya 29:23) U nga sikota kuemela wukoma wakwe. U nga vhuna vathu ku ve pfisisa to wukoma wa Jehovha ngu wona i ku wa wunene ngutu ni ku wu na tisa kudikha ni litsako kotshe ha mafuni.—Mas. 37:9, 37; 146:5, 6, 10.
17. Jesu a zivisisile kutxani ditina da Jehovha?
17 Ngako hi txi emela ditina da Jehovha hi tekelela txikombiso txa Jesu Kristu. (Joh. 17:26) Jesu a zivisile ditina da Jehovha i si nga ngu ku di thumisa dwe, kambe ngu kugela vathu to Jehovha a zumbisile kutxani. Ngu txikombiso, ene a kanetile Vafarisi ava va nga ti lumbeta Jehovha va txi khona Njizimu txo karata, txa tshofu, txo mbi khatala ni kwa mbi na wuxinji. Jesu a vhuni vathu ve wona to Jehovha wa alakanyela, wa timisela, a ni lirando ni ku wa divalela. A tshumete e vhuna vathu kuziva tifanelo ta Jehovha ngu nzila yi a nga txi hanya ngu yona nguko a ti etetela kwati Tate wakwe.—Joh. 14:9.
18. Hi nga hasamuselisa kutxani makuhu aya vathu va lumbetako Jehovha?
18 Kufana ni Jesu, hi nga gela vathu ati hi ti zivako ngu Jehovha hi va gondisa ve ziva to ene a ni lirando ni wunene. Mbimo yi hi mahako toneto, hi hasamula makuhu aya vathu va nga bhamekela Jehovha. Hi basisa ditina da Jehovha ngu kuvhuna vathu ve pfisisa to ene a sawulekile. Nathu hi nga etetela Jehovha. Eto hi nga ti kota hambiku hi nga mbi hetiseka. (Vaef. 5:1, 2) Ngako simaho sathu ni ti hi ti wombako ti txi kombisa to hi etetela Jehovha, hi vhuneta kubasisa ditina dakwe. Hi tshumela hi di kuwula ka manyala ngu kuvhuna vathu ve ziva ditshuri mayelano ni Txizimu txathu. * Ni ku kombisa ti to vathu vo mbi hetiseka va nga thembeka ka Txizimu hambi va txi manana ni sikarato.—Jobe 27:5.
Hi lava kuvhuna sigondo sathu si pfisisa ti to Jehovha a ni wunene ni lirando (Wona tindimana 18-19) *
19. Ngu kuya ngu dibhuku da Isaya 63:7, ngu tihi ti hi fanela ku ti junyatisa hi txi gondisa vathu?
19 Ku ni nzila yimwani yo sawulekisa ditina da Jehovha. Mbimo yi hi gondisako vamwani Bhiblia hi tolovela kujunyatisa wukoma wa Jehovha, i ku ti to ngene a fanelako kufuma ha mafuni ni nzumani nguko eto ditshuri. Kambe, hambiku ti ku ni lisima kugondisa vathu milayo ya Txizimu, txikongomelo txathu txi fanete txi va txo vhuna vathu ve randa Tate wathu Jehovha ni ku ve thembeka kwakwe. Se hi lava ku vathu ve pfisisa tifanelo ta tinene ta Jehovha ni ku va vhuna ve mu ziva kwati Awu di lumbako ene ditina do Jehovha. (Lera Isaya 63:7.) Ngako hi txi gondisa ngu nzila yiya, hi na vhuna vathu ve randa Jehovha ni ku mu engisa ngu kulava kuthembeka kwakwe.
20. Hi na ta bhula ngu txani ka msungo wu wu tako?
20 Se hi nga maha txani ti to mahanyelo athu ni ti hi ti gondisako ti kombisa ti to Jehovha ngu ditshuri a sawulekile ni kutshumela me maha vathu ve lava ku mu thumela? Msungo wu wu londiselako wu na ta xamula txiwotiso txonetxo.
NDANDO 2 Ditina dako u Jehovha
^ par. 5 Ka vathu ni tingelozi, ngu yihi mhaka ayi i ku ya lisima? Ngu kutxani i di ya lisima ni ku ti mahisa kutxani ku athu hi pateka? Kupfisisa tixamulo ta siwotiso soneso ni simwani asi si yelanako naso ti na hi vhuna kutsanisa wuxaka wathu ni Jehovha.
^ par. 18 Mabhuku ma ti nga womba ti to kha ti sungi kulwela ditina da Jehovha, nguko sotshe sivangwa sa ti ziva to Jehovha ngene ekha Nyatxitimwi ni ku wa fanelwa ngu ditina do Jehovha. Kambe ku na ni mapfisiselo a maphya aya ma nga txhamuselwa ka Mtshangano wa dilembe wa 2017. Mzumba txitulo a wombile tiya: “Ngu mapswi o koma, kha ta biha ku kombela ku ditina da Jehovha di lwelwa nguko ngu ditshuri nduma yakwe yi lava kubasiswa ka manyala ya a nga bhamekelwa.” Wona mlongoloko wa Broadcasting ya Janeiro wa 2018 ka jw.org®. Bela ka BIBLIOTECA > JW BROADCASTING®.
^ par. 62 TITXHAMUSELO TA MIFOTA: Dhiyabhulosi a lumbetile Txizimu, e gela Evha to Txizimu txi ni makuhu. Kala nyamsi, Sathani a huwelela makuhu o fana ni gondo ya ti to Txizimu txi ni tshofu ni ku kha txa vanga vathu.
^ par. 64 TITXHAMUSELO TA MIFOTA: Mbimo yi mwanathu a tsimbitisako gonda ya Bhiblia ene a junyatisa tifanelo ta Jehovha.
