HOTSHETHU ha kholwa ti to Jehovha wa kongomisa ni ku dyisa vathu vakwe ngu didhawa da moya ka “masiku a kugwitisa” a ya hi hanyako ka ona. (2 Tim. 3:1) Kambe ti kwathu ti to hi na tumela kukongomiswa ngu ngene mwendo ahim-him. Hi nga faninisa txiemo txathu ni txa Vaisrayeli mbimo yi va nga di txiwulani. Vona va ti fanete kumaha to kari mbimo yi ku nga txi vetwa mpundu.

Jehovha a gete Mosi ti to e maha mipundu yimbidi ya silivhela yo tshulwa ti to e “ramba ngu yona msengeletano, kasi kumaha txiziviso txo khukha ha wugoveloni.” (Mit. 10:2) Vaphaxeli va txi txitxa mavetelo a mpundu ngu kuya ngu ti ti nga txi laveka ku vathu ve ti maha. (Mit. 10:3-8) Nyamsi vathu va Jehovha va amukela mkongomiso ngu tinzila to hambana-hambana. He wone tinzila tiraru ati ti fanako ni mavetelo a mpundu a mbimo ya Vaisrayeli. Tinzila toneto ngu tiya: Kurambwa ka mitshangano ya hombe, kurambwa ka txikolwa txa madhota ni kukombelwa kutshukwatisa mwendo kulumisa mathumelo o kari ka sengeletano.

Mbimo yi Jehovha a nga ti lava ku “wotshe msengeletano” wu manana ka txike txa wutxani masoni ka ditenda da msengeletano, vaphaxeli ti txi lava ve veta mipundu yotshe ya yimbidi. (Mit. 10:3) Totshe tihunzu ti di gwimbile matenda a tona ka mune wa madhawa se ditenda di ti maneka hagari, ngu toneto votshe va txi kupfa kuvetwa ka mpundu. Ava va nga ti hafuhi ngutu va txi kuluveta ve hoka. Kambe, vamwani va ti kulenyana, se evo ti ti lava ve maha mizamo ya hombe. Hambiketo, Jehovha a txi lava ku votshe ve maneka ti to ve mana mkongomiso, ti si nga ni mhaka ni mpfuka.

Nyamsi, kha hi sengeletani ditendani, kambe ha rambwa ku hi ya ka mitshangano ya vathu va Txizimu. Mitshangano yoneyo yi pata mitshangano ya m’ganga ni yimwani yo sawuleka, ka mitshangano yoneyo ngu kona hi manako sileletelo ni mkongomiso. Ha mafuni kotshe, hi gonda timhaka timweto. Se, ava va tumelako kuta ka mitshangano yoneyo va ta tsaka kumweko ni vakwawe. Vamwani ti lava ve tsimbila mipfuka yo lapha. Kambe, ava va tumelako txirambo txiya va ti wona to ta va wuyelisa ngutu.

Se kuwombwa txani ngu va va manekako kule ni mu kutshanganako mitxhawa yimwani ya hombe? Ngu kuvhunwa ngu tekenolojiya ya ngweno ta koteka ku vanathu vonevo va manekako kule ve xalela mitshangano ni kutshumela ve tipfa va txi pateka ka yona. Ngu txikombiso, ka liendo limwani la muemeli wa Mzinda wa ha mafuni kotshe khe Níger, vanathu va Bhetele ya Benin va haxile mlongoloko wa mtshangano wu ya Arlit, ku manekako Txiwulani ka Sahara. 21 wa vanathu  ni vamwani i nga ti vatsakeli va mtshanganile. Hambiku va nga ti kule, va ti pfite va di kumweko ni mtxhawa wa hombe wa 44.131 wa vathu. Mwanathu mmwani a bhate tiya: “Ha mi bonga ngutu vanathu ngu mbilu yathu yotshe ngu ku hi haxela mitshangano yiya. Ti ti kombile ti to anu ma hi dhunda ngu ditshuri.”

Mbimo yi vaphaxeli va nga txi veta mpundu wumwewo, “vathangeli, i ku misungo ya va vamagumi a mazana” va ti sengeletana ditendani da mtshangano. (Mit. 10:4) Ka mitshangano yoneyo va txi ya ningwa mkongomiso ngu Mosi. Eto ti ndi na va vhuna kukhatalela mthumo wu va nga avelwa wona ka tihunzu tawe. I di ku awe u to ko va mmweyo wa vathangeli vava i na u sa tikarata ti to u ya maneka ka mitshangano yoneyo ti to u vhuneka?

Nyamsi madhota a dibanza hi nga “vathangeli” nem hi nga vafumeli va vathu va Txizimu. (1 Pedro 5:1-3) Hambi keto ona ma maha totshe ti ma nga ti kotako ti to me dyisa mtxhambi. Ona ma ti emisete kutumela txirambo tximwani ni tximwani txo ya gondiswa kufana ni kuya ka Txikolwa txa Vathumeli va Mfumo. Ka txikolwa txonetxo madhota ma gonda kukhatalela dibanza ngu nzila ya yinene. Eto ti maha to votshe dibanzani ve vitwa ngu didhawa da moya. Hambi u sa tsula ka txikolwa txonetxo, u nga wuyelwa ngutu ngu kona ha ka va va nga ya ka txikolwa txiya.

Vaphaxeli va Vaisrayeli va txi ta ve va ni mavetelo mamwani a mpundu. Eto ti txi zivisa ti to Jehovha a ti lava to wotshe msengeletano wu khukha wugoveloni. (Mit. 10:5, 6) Mbimo yi vathu va nga ti khukha ka wugovelo wo kari, va txi khukha va di lulamisetwe kwati i ku ti to va si lwetani, kambe ti sa hehuka. Vaisrayeli vamwani ti nga maha va si renderi ngu kukhukha. Ngu kutxani?

Ti nga maha vamwani va ti wona nga mpundu wa kuluveta kuvetwa ni ku wu ti vetwa va sa tiemela. Mbimo yimwani “direfu di txi ema kukhukhela minova kala mixo.” Kambe mbimo yimwani “di txi zumba txitimwi ka nyumba masiku mambidi mwendo mtxima, mwendo mbimo yo lapha ngutu.” (Mit. 9:21, 22) Kasi makhambi mangahi va nga zumba wugoveloni? Ndima 33 ya Mitengo yi womba-womba ngu 40 wa makhalo a wugovelo amu Vaisrayeli va nga zumba kona.

Ku tilava vamwani va ti mana wukhalo wu wu nga ti ni mtsudi. Phela mtshudi wu ti laveka ka “txiwula txile txa hombe txo tshisa” va nga ti tsimbila ka txona. (Dhewut. 1:19) Ngu toneto kuziva to va khukha, ti txi va dhukisa ngu kupimisa to amu va yako kona va na ya xaniseka.

Mbimo yi tihunzu ti nga ti khata ku khukhela, a kutilava ati timwani ti si ti hehukeli kurinzela dikhambi da tona. Phela votshe va txi pfa kuvetwa ka mpundu ngu mbimo yo fana, kambe ti si lavi ve khukha ngu mbimo yimweyo. Kutxhaywa ko khata ka mpundu ku txi womba ti to tihunzu ti ta wutxani i nga ti Judha, Isakari ni la Zebhuloni va ti fanete kukhukha. (Mit. 2:3-7; 10:5, 6) Ngako se va di khukhile, vaphaxeli va ti veta mpundu ngu nzila yo kombisa kukhukha ka tihunzu tiraru ati ti nga ti gova ngu didhawa da wulambwe. Vaphaxeli va ti mahisa toneto kala wu khukha wotshe msengeletano.

Ti nga maha ti di ku nemelete kuamukela kutxitxa ka timhaka to kari ka sengeletano. Ti nga maha ti di ku karatete mbimo yi ku nga va ni kutxitxa ko u sa ku rinzela. Mwendo kutilava ku ni mathumelo o kari aya ma nga kutsakisa se u navela to me simama. Ti si nga ni mhaka ni ti to sivangelo ngu sihi, ti nga maha ti di ku karatete kutolovela kutxitxa koneko. Hambi keto ngako hi txi tumela kutxitxa, hi na wona makatekwa a Jehovha.

Ka masiku a Mosi, Jehovha a kongomisile timiliyoni ta va vavamna, vavasikati ni vanana ngu yotshe mbimo yi va nga tsimbila txiwulani. I ti ku Jehovha kha va khatalela ni ku va kongomisa va di gumile txiwulani mule. Ni nathu nyamsi ha wuyelwa ngu kukongomiswa ngu Jehovha. Phela ngu ditshuri ha humelela! Ngu toneto hotshethu a hi ti emiseleni kuengisa kuvetwa ka mpundu kufana ni Vaisrayeli vo thembeka.