Paulo a womba tiya: “Mbimo yi primo wangu a nga ni lwisa ni mu pfinyile mkolo, ni txi lava ku mu daya.”

Marco a womba tiya: “Ni txa nga vhukwa ni txo guruka. Ni txi fayetela situlo, mabrinkedhu ni txi txi ku nga va hafuhi.”

Athu kha hi hokeli ko fayetela silo. Kambe, hotshethu ha thuka hi tandeka kutipimela mwendo kutiñola. Atiya ti maheka nguku hi nga tshapelwa ngu thionho txa Adhumu. (Var. 5:12) Vamwani ta va karatela kutiñola kufana ni Paulo ni Marco. Vamwani va nga wona ti txi karata kwa mbi maha ati mialakanyo yawe yi va rumako tona. Va pimisa to kutiñola ta karata. Kuveti vamwani va txi za ve navela ta mataho, kudhaha mwendo kusela, kha va sikoti kutiñola.

Ava va tumelako kufumwa ngu mipimiso ni minavelo yawe va nga ti vangela sikarato. Kambe ti nga koteka kuvayilela sikarato soneso. Ngu nzila yihi? Ngu kusakulela kutiñola. Ti to hi wona to hi nga mahisa kutxani he bhule ngu siwotiso siya sa siraru: 1) Nji txani kutipimela mwendo kutiñola? 2) Ngu kutxani i di ta lisima? 3) Hi nga sakulelisa kutxani fanelo yiya i ku yimweyo ya “mihando ya Moya”? (Vag. 5:22, 23) Se hi na gwita hi wona to hi nga maha txani ngako hi txi thuka hi tandeka kutiñola.

Awu a zivako kutiñola kha mahi to maha ngu ti a ti pfisako tona ka mbimo yoneyo. Kambe, ene a zama ku a si wombi mwendo kumaha ati ti no henyisa Txizimu.

Jesu a kombisile ati ti wombako tona kutiñola. Bhiblia yi womba tiya: “Mbimo yi va nga ti m’ruketela, kha ruketela nene. Mbimo yi va nga ti m’xanisa, kha va henyela, aniko a to ti ningela ka wule a lamulako ngu kululama.” (1 Pedro 2:23) Jesu a kombisile kutiñola mbimo yi vakaneti va nga ti mu poyilela adi gogotetwe ha phandeni. (Mat. 27:39-44) A si se gogotelwa, ene a kombisile kutipimela mbimo yi vathangeli va wukhongeli va nga zama kulava marindi a ku mu ñola amu ka mapswi akwe. (Mat. 22:15-22) Hi nga wona tximwani txikombiso txa Jesu, mbimo yi Majudha mamwani ma nga ti henyile ngutu me rolela marigwi ma txi lava ku mu faya ene kha va tshumetela. Kambe, Bhiblia yi khene: “Jesu a to sisala, e huma Dithepeleni.”—Joh. 8:57-59.

Ina hi nga sikota kuetetela txikombisa txa Jesu? Hi nga sikota, hambiku hi no ta hi tandeka. Mpostoli Pedro a bhate tiya: “Kristu nene, a tumete kuxaniswa ngu mhaka yanu, kasi ku mi siyela txikombiso, ti to mi na sikota kulondetela mkondo wakwe.” (1 Pedro 2:21) Hambiku hi nga mbi hetiseka hi nga sikota kulondisa ngu hafuhi txikombiso txa Jesu txo ziva kutiñola. Ngu kutxani ti di ni lisima kumaha toneto?

Ti lava hi ziva kutiñola ti to Jehovha a tsaka ngu ngathu. Hambi i di kale hi txi thumela Jehovha  ngu kuthembeka, hi nga luza wuxaka wathu ni nene ngako hi si veki mihingano ka ti hi wombako ni ti hi ti mahako.

Alakanya txikombiso txa Mosi awu i nga “ti m’thu wo dikha ngutu kupinda votshe vathu ha mafuni.” (Mit. 12:3) A hetile malembe a mangi a txi thumisana ni Vaisrayeli ngu kutimisela, kambe ditshiku dimwani a tandekile kutiñola. A henyile mbimo yi va nga tshumela ve ngungurukela ngu mhaka yo pwata mati. Ene a va bhongete a txi khene: “Engisani konkuwa anu va kukholwa ka kudotho! Athu hi na humisa mati ha dirigwini hawa kani?”—Mit. 20:2-11.

Mosi a tandekile kutiñola. Ene kha ningela wudhumo ka Jehovha awu i ku ene a nga maha to dirigwi di humisa mati. (Mas. 106:32, 33) Ngu toneto, Jehovha kha mu tumelela ku e wulela ka Ditiko da Txithembiso. (Mit. 20:12) Aku Mosi a nga tandeka kutiñola, ti nga maha a di ti sote kala ditshiku di a nga fa ngu dona.—Dhewut. 3:23-27.

Hi gonda txani? Hambi i di ti to hi ni malembe o tala hi txi thumela Jehovha, kha hi lavi kuthukha hi bhongela ava va nga hi henyisa mwendo ava va lavako kukawukwa. (Vaef. 4:32; Vakl. 3:12) Ditshuri ti to mbimo yi hi yako hi txi kula, mbimo yimwani kha tihehuki kutiñola. Khambe khumbula ti ti nga humelela Mosi. Athu kha hi lavi kuluza wuxaka wathu ni Jehovha ngu mhaka yo tandeka kutiñola. Hi nga yi sakulelisa kutxani fanelo yiya ya lisima?

Kombela moya wo sawuleka. Ngu kutxani? Nguko kutiñola wumwewo wa mihando ya moya wo sawuleka ni ku Jehovha a ninga moya wo sawuleka ava va mu kombelako. (Luka 11:13) Ngu kuthumisa moya wo sawuleka, Jehovha a nga hi ninga mtamo wu wu lavekako ti to hi kota kutiñola. (Vaf. 4:13) Ene a nga tshumela e hi vhuna kusakulela mihando yimwani ya moya yo fana ni lirando, se lona li nga maha ti hi hehukela kutiñola.—1 Vak. 13:5.

Vayilela silo si si nga mahako ti ku karatela kutiñola. Ngu txikombiso, vayilela ma site ni misakano ayi yi kombisako mikhuva ya nzambwa. (Vaef. 5:3, 4) Ti lava hi vayilela silo si si nga hi tiselako txiduko txo maha timhaka to biha. (Mav. 22:3; 1 Vak. 6:12) Ngu txikombiso, m’thu wu ti hehukako ku e va ni minavelo ya nzambwa ti nga lava e vayilela mabhuku ni mafilmi a wugangu aya ma dhanwako ku nga lirando.

 Hi nga ti wona ti txi karata kuengisa txialakanyiso txiya. Kambe ngako hi txi maha mizamo, Jehovha a na hi ninga mtamo wu wu lavekako ti to hi kota kutiñola. (2 Pedro 1:5-8) Ene a na hi vhuna hi kota kuwonelela mipimiso, mapswi ni simaho sathu. Hi ni txikombiso txa toneto ngu Paulo ni Marco ava va nga wombwa makhatoni, vona va gondile kutiñola. Wona txikombiso tximwani txa mwanathu awu a ku ni mmovha ene a ti tolovela kuhenyela vatsimbitisi kulowe e veka ni ku va bhongela. Kambe a mahile txani? Ene a khene: “Ni khongete ngutu ka Jehovha ditshiku ni ditshiku. Ni gondile timhaka ti ti womba-wombako ngu kutiñola ka mabhuku athu ni kuvekisa tindimana ta Bhiblia ati ti womba-wombako ngu kutiñola. Hambiku ni ku ni malembe ni txi lwa, ditshiku ni ditshiku ta ni khumbutisa ti to ni fanete kutiñola. Se ni txi lava kuya ka wukhalo ni khukha i di nga di mbimo ti to ni si tsimbili ni di jahile.”

Mbimo yimwani hi nga tshuka hi tandeka kutiñola. Ngako eto ti txi humelela hi nga thuka hi thava kumaha mkombelo. Kambe eyo i mbimo yi ti lavekako ngutu kumaha mkombelo. Se kuluveta u maha mkombelo ka Jehovha. Mkombele e kudivalela, kombela txivhuno txakwe u tshumela u ti emisela kwa mbi phinda phazamo yoneyo ya yimweyo. (Mas. 51:9-11) U nga pimise ti to Jehovha kha na mbi engisa mkombelo wako. (Mas. 102:17) Mpostoli Johani a hi khumbutisa ti to mnoha wa mwanana wa Txizimu “wa hi basisa ka sotshe sionho.” (1 Joh. 1:7; 2:1; Mas. 86:5) Khumbula ti to Jehovha a hi gela ti to hi divalelana ngu kuphinda-phinda. Se hi nga tsaniseka ti to nene a na maha ti ti fanako kwathu.—Mat. 18:21, 22; Vakl. 3:13.

Jehovha a henyile mbimo yi Mosi a nga tandeka kutiñola. Hambi keto Jehovha a mu divalete. Bhiblia yi tshumela yi womba ti to Mosi a vite ni likholo la hombe lo hi nga li tekelela. (Dhewut. 34:10; Vaheb. 11:24-28) Jehovha kha m’tumelela ku e bela ka Ditiko da Txithembiso, kambe Ene a na ta mu wusa ti to e ta hanya ngu ha ku si gwitiko ka mafu a Paradhise. Nathu hi na ta tidila ngu themba yi yi fanako ngako hi txi simama hi sakulela fanelo yiya ya lisima ya kutiñola.—1 Vak. 9:25.