MBIMO yi Vaisrayeli va nga ti hafuhi ni kutxhatuka mnambo wa Jordhani kasi ku ve bela ka Ditiko da Txithembiso, ku humelete vapfhumba vo kari. Vapfhumba va kona i ti vavasikati vamatiko, va ti ta va ramba m’buso. Ti nga maha va di pimisile ku ti na tsakisa. Nguko va ndi na va ni vangana va vaphya, ve sinya ni kubusa. Hambiku mikhuwo ni milayo yawe si nga ti si tsimbitisani ni Mlayo wa Txizimu, ti nga maha va di pimisile tiya: ‘Ha! Hi na ti wona bawuloni. Hi na ti wonela.’

 Nji txani txi nga maheka? Bhiblia yi khene: “Vathu va to khata kumaha wugango ni vanana va mahorana a Vamowabhi.” Vavasikati vonevo va ti lava ku Vaisrayeli ve khozela sizimu sa walo. Phela va si khozete! Ngu toneto “kuhenya ka MKOMA ku to tura masoni ka Israyeli.”—Mit. 25:1-3.

Vaisrayeli va ndakile kumbidi mlayo wa Txizimu: Ku khata, va khozete sizimu sa walo, ka wumbidi va mahile wugelegele. Mazana-zana a vathu va fite ngu mhaka ya kwa mbi engisa. (Eks. 20:4, 5, 14; Dhewut. 13:6-9) Ngu txani ti di pandile ngutu? Nguko i di ku majaha ale ma sa bhayiza ngu kundaka Mlayo wa Txizimu, ma di txhatukile Jordhani me wulela ka Ditiko da Txithembiso nguko ma ti hafuhi ngutu.—Mit. 25:5, 9.

Mpostoli Paulo a bhate tiya mayelano ni ti ti nga humelela Vaisrayeli: “Sotshe simaha siya si va humelete kasi kumaha txikombiso kwathu, kambe si bhatwe kasi ku hi laya athu hi nga hoka magwito ka timbimo.” (1 Vak. 10:7-11) Ti ha kubasani ti to Sathani a sinyile makhara ngu kuwona Vaisrayeli vamwani va txi maha txionho txa hombe se ve thindeka kuwulela Ditikoni da Txithembiso. Hi na va hi di txharihile hi txi riya nzeve ka txialakanyiso txonetxo, nguko ha ti ziva to Sathani a lava ku hi manya hi si beli ka mafu a maphya!

Sathani a riyela Makristu ngu kuthumisa txikelemu atxi i ku kale a txi txi thumisa kasi kubzweta vathu ngu txona. Nga ha hi nga wona ngu kona, a thumisile wugelegele kasi kubzweta Vaisrayeli. Ni nyamsi wugelegele njikelemu txa hombe ngutu. Dinyambwa di a di thumisako ngutu sithombe sa vathu va i ku simbwiri.

Nyamsi ti nga koteka kuxalela sithombe sa vathu va i ku simbwiri txihunjani. Malembe msana, m’thu wu a nga txi lava kuxalela sithombe sa vathu va i ku simbwiri ti txi lava e enda e ya sinema e ya xalela mwendo ku ya sitolo e ya xava mabhuku a sithombe sa vathu va simbwiri. Se vathu vo tala va di ni tingana to ya ka makhalo oneyo. Kambe nyamsi, m’thu a txo nga va ni internet a nga si xalela hambi a di mthumoni mwendo mmovhani. Ka makhalo o tala, wamwamna mwendo wamsikati a nga xalela sithombe sa walo a di mtini.

Kambe ku ni timwani! Matelefone ma maha ti hehuka ngutu kuxalela sithombe sa vathu va i ku simbwiri. Vathu va nga xalela sithombe sa walo va txi tsimbila, va di mu ka xapa ngu kuthumisa tifone tawe.

Aku se ti hehukako ngutu kuxalela sithombe sa vathu va i ku simbwiri txihunjani, ti dayisa ngutu vathu kupinda kale. Kutala ka va va xalelako sithombe soneso va hoxota mtxhadho wawe, txixonipho ni livhalo lawe. To panda ngutu va tshumela ve moxa wuxaka wawe ni Jehovha. Se ngu ditshuri wa ti wona to mkhuwo wuwa wu dayisa va va wu xalelako. Ka makhambi o tala ti tisa kukarateka ka hombe ngutu. Kukarateka koneko ku nga pinda kudotho-kudotho, kambe mbimo yimwani ku nga siya sibawa ka mialakanyo.

Hambiketo, ti lava hi ti ziva to Jehovha a nga hi vhikela ka txikelemu txiya txa Sathani. Kasi ku hi mana kuvhikelwa ngu Jehovha ti lava hi maha ti Vaisrayeli va nga ti tanda, i ku ‘kuengisa’ Jehovha. (Eks. 19:5) Ti lava hi khumbula to Txizimu txa nyenya ku hi xalela sithombe sa vathu va i ku simbwiri. Ngu kutxani hi nga wombako toneto?

Khumbula ti to ditiko da Israyeli i ti dona dwe di nga di ni milayo ya Txizimu. Milayo yoneyo yi ti fana ni mmuru awu wu nga txi va vhikela ka vamatiko ni kukuzetelwa ngu vona. (Dhewut. 4:6-8) Milayo yoneyo yi txi junyatisa timhaka ta lisima ngutu i ku ti to Jehovha wa nyenya wugelegele.

 Mbimo yi Jehovha a nga womba-womba mayelano ni matiko ale a ti khene: “Mi nga maheni . . . tile va mahako Vakanana vathu va ditiko dile ni lavako ku mi yisa ka dona. Ditiko di nyenyezile, se ani ni tsayisa wubihi wa dona.” Wutomi wa Vakanana wu ti nyamile masoni ka Txizimu txi txi nga sawuleka, ha ko za ditiko di va di nga nyenyeziswa.—Levhi 18:3, 25.

Hambiku Jehovha a nga tsayisa Vakanana, vamwani va simamile ni mahanyelo a nzambwa. Msana kova ku di pindile 1.500 wa malembe, Paulo a wombile to Makristu ma ti hanya ka matiko ya ma nga ti tate ngu “wubhemba.” Ni ku “va ti ningetete ka mikhuwo ya manyala, kasiku ve maha totshe tixaka ta mithumo ya nzambwa, va si sikoti ku ti ñola.” (Vaef. 4:17-19) Ni nyamsi, vathu va va ku ni mahanyelo a nzambwa va tshumela ve ti bhuma ngu ona. Nga ha hi ti kotako ngu kona, kota vakhozeli va ditshuri hi fanete kuvayilela simaho sa nzambwa sa ditiko diya.

Kuxalela sithombe sa vathu va i ku simbwiri ti ruka Txizimu. Txona txi vangile m’thu ngu mfananiso wa txona, se a hi mahile ni wusikoti wo ziva ta tinene. Ngu toneto Txizimu ngu wuzivi txi vekile mihingano yo pfisiseka ka ta mataho. Jehovha a mahile timhaka ta mataho ti va ti ti tsakisako ka va va nga tekana. (Gen. 1:26-28; Mav. 5:18, 19) Se ava va mahako sona sithombe siya ko? Vona va eyisa Milayo ya Txizimu. Ngu ditshuri, vathu va va seketelako mkhuwo wuwa va ruka Jehovha. Ene a na lamula ava va eyisako milayo yakwe ngu kumaha mwendo kuseketela mkhuwo wo hangalasa sithombe sa nzambwa.—Var. 1:24-27.

Ani vathu va ngu kutilava va lerako mwendo kuxalela sithombe sa vathu va i ku simbwiri ko? Vamwani va nga khona msakano dwe, kha wu nga ni phango. Kambe vona va seketela va va eyisako milayo ya Jehovha. Ava va mahako toneto ti nga maha va sa pimisa to va seketela vathu vonevo va eyisako Jehovha. Kambe Bhiblia yi ti veka ha kubasani ti to vakhozeli va Txizimu va fanete kunyenya sithombe sa vathu  va i ku simbwiri. Bhiblia yi womba tiya: “MKOMA wa randa avale va nyenyako kubiha.”—Mas. 97:10.

Hambi va va si nyenyako, ti nga va karatela. Aku hi nga mbi hetiseka, ti lava hi lwisana ni minavelo yo biha ya ta mataho. Mbimo yimwani, mbilu yathu yi nga hi ndindela ku hi divala milayo ya Txizimu. (Jer. 17:9) Kambe vo tala ava se i ku Makristu va xute yimbi yiya. Se eto ti nga kutsanisa ngako u txi lwisana ni minavelo yo biha. Wona tinzila ti Dipswi da Txizimu di nga kuvhunako ngu yona kasi kuvayilela txikelemu txiya.

Nga ha hi nga ti wona ngu kona, Vaisrayeli vo tala va lekile minavelo yo biha yi va beta txibeheni. Ni nyamsi eto ti nga humelela. Mgondiswa Jakobe a wombile ngu phango yoneyo a txi khene: “M’thu ni m’thu a dukwa ngu kunavela kwakwe ko biha, ku m’ndindako, ku txi mu yisa kubihani.” (Jak. 1:14, 15) Mbimo yi minavelo yo biha yi kulako mu ka mbilu, ti na tula nzila ya ku m’thu e onha. Se ti lava hi si zumbeli kupimisa ngu ta nzambwa.

Ngako ku txi thuka kuta mialakanyo ya nzambwa, zama ku yi thavisa. Jesu a ti khene: “Ngako diwoko mwendo mnenge wako si txi kukhuvekisa, si wile, u si tshotsha kule ni nawe!  . . Se ngako diso dako di txi kukhuvekisa, diphokonyole u txi di tshotsha kule ni nawe.” (Mat. 18:8, 9) Jesu a si wombi to hi fanete hi ti wilela sihangu. Ene a ti lava kutxhamusela ti to ti lava hi dula ditshina da mhaka ngu txikuluveta. Hi nga mahisa kutxani ti txi ta ka mhaka ya sithombe sa simbwiri?

Ngako u txi humbana ni sithombe sa walo u nga pimisi to u na ti wonela. Ngu txikuluveta jikisa maso. Tima TV yako, komputadhori mwendo fone ngu txikuluveta. Lava timwani ta tinene to ti maha. U txi maha toneto u na va u si rumwi ngu minavelo ya nzambwa.

Se ngako u di xute txikarato txo xalela sithombe sa walo, kambe mbimo yimwani sithombe  siya si wuya ka mialakanyo, u nga maha txani? Sithombe sa walo si nga zumba mu ka mialakanyo ngu mbimo yo lapha. Se si nga thuka si kupfuxela. Ngako eto ti txi maheka ti nga maha u xulwa, se u hetisisa minavelo ya ta mataho ngu kusakanisela siro sako sa wujaha mwendo sa wusikati. Se zumba u di ma tute, kasi ku u xula minavelo yoneyo.

Zumba u di ti emisete kuveka mialakanyo ni simaho sako ka kuranda ka Txizimu. Etetela Mpostoli Paulo awu a nga di ti emisete ‘kutsayisa mmidi wakwe, a txi wu maha khumbi.’ (1 Vak. 9:27) U nga tumele kurumwa ngu minavelo ya nzambwa. ‘Phinduka amu ka mapimo ako, kasiku u ziva kuranda ka Txizimu: Ati i ku ta tinene, a ti ti m’tsakisako, ni ti i ku ta kuhetiseka.’ (Var. 12:2) Khumbula ti to kupimisa ngu nzila yi yi tsakisako Txizimu ni kumaha kuranda ka txona ti tisa litsako la hombe ngutu kupinda kurumwa ngu minavelo ya nzambwa.

Zama kuveka ha msungo tindimana to kari ta Bhiblia. Se mbimo yi mialakanyo yo biha yi tako, alakanyisisa ngu Mibhalo yoneyo. Tindimana to fana ni Masalmo 119:37; Isaya 52:11; Matewu 5:28; Vaefesu 5:3; Vakolosa 3:5; ni 1 Vatesalonika 4:4-8 ti na kuvhuna kulongolokisa mialakanyo yako ni ya Jehovha, a ti ene a si wonisako tona sithombe sa simbwiri ni a ti lavako ku u maha.

Se u nga maha txani ngako u txi thuka u telwa ngu minavelo yo lava kuxalela sithombe sa walo? Londetela kwati txikombiso txa Jesu. (1 Pedro 2:21) Msana kova a di bhabhatisilwe a dukilwe ngu Sathani. Se a mahile txani? Ene a simamile e tserama. Ngu kuthumisa mibhalo, a xute siduko sa Sathani. Ati khene: “Suka, Sathani!” Se Sathani a to khukha e mu leka. Kufana ni Jesu a nga simama e lwisana ni siduko sa Sathani, nawe u fanete kumaha toneto. (Mat. 4:1-11) Phela Sathani ni ditiko dakwe va na ya masoni ve zama kutata mialakanyo yako ngu timhaka ta nzambwa, se u nga karali. Ngu kuvhunwa ngu Jehovha u nga xula yimbi yoneyo.

Khongela ka Jehovha mbimo yotshe. Paulo a ti khene: “Mikombelo yanu yi na kombe minavelo yanu ni kubonga kwanu ka Txizimu. Senikoko kurula ka Txizimu, ku pindako wotshe wuzivi, ku na veketa timbilu tanu ni mialakanyo yanu ngu Kristu Jesu.” (Vaf. 4:6, 7) Txizimu txi na kuninga kudikha kasi kukuvhuna u si mahi ta walo. Ngako u txi tshuketela ka Txizimu ‘ni txona txi na tshuketela hafuhi kwako.’—Jak. 4:8.

Kuvhikelwa ka hombe hi ngo kumana basi ka Mkoma wa wuvangi wotshe. Jesu a ti khene: “Nguko Mkoma wa mafu awa wata. Kambe kha nga ni mtamo wa txilo txitimwi kwangu.” (Joh. 14:30 Testametu ya Yiphya) Ngu kutxani Jesu a di wombile toneto? A gwitile e txhamusela a txi khene: “Awu a nga ni ruma, ana ni nani; kha ni leka nokha, nguko ani, otshe masiku, ni thuma ti ti mu tsakisako.” (Joh. 8:29) Se ngako u txi maha kuranda ka Jehovha, kha na mbi thuka e kuleka. Vayilela txikelemu txiya txo xalela sithombe sa vathu va i ku simbwiri, u txi maha eto Sathani kha na mbi kunyisa kala magwito.