GONDO 25
Themba Jehovha u di hagari ka sikarato
“Ni . . . wo xaniseka moyani.”—1 SAM. 1:15.
NDANDO 30 Tate wangu, Txizimu txangu ni mngana wangu
ATI HI NO TI GONDA *
1. Ngu kutxani hi di fanete kuengisa txialakanyiso txa Jesu?
JESU a wombile tiya mayelano ni masiku o gwitisa: “Kambe ti woneleni, kasiku timbilu tanu ti si thuki ti nemelwa ngu kwa mbi ti pimela . . . ni kuvilela ngu sa wutomi wuwa.” (Luka 21:34) Ngu kutxani hi di fanete kuengisa txialakanyiso txonetxo? Ka masiku awa ti na lava hi wonisana ni sikarato asi votshe vathu va mananako naso.
2. Ngu sihi sikarato so panda asi vanathu va mananako naso?
2 Makhambi mamwani hi fanete hi wonisana ni sikarato sa singi ngu mkama wumwewo. He woni sikombiso siya: Mwanathu wu a dhanwako ku i John * awu a xaniswako ngu malwati a hombe a wikile msana mbimo yi a nga lekwa ngu mkatakwe msana ka 19 wa malembe va di txhadhile. Ngu msana, vanana vakwe va mahorana va to leka kuthumela Jehovha. Mpatwa wumwani i ku Bob ni Linda wu mananile ni txikarato txo hambana ni txa John. Va gumetwe ngu mthumo ve tshumela ve pwata ni ko sisa msungo. Txitimwi ka eto, ku tumbutwe malwati a mbilu ka Linda ni malwati mamwani a nga ti nawo se e khata kugoma ngu kulwala.
3. Dibhuku da Vafilipiya 4:6, 7, di hi gela txani ngu Jehovha?
3 Hi nga tsaniseka ti to Jehovha i ku Mvangi ni Tate wathu wa lirando, wa kupfisisa kuxaniseka kwathu. Ene a lava ku hi vhuna hi wonisana ni sikarato si hi mananako naso. (Lera Vafilipiya 4:6, 7.) Bhiblia yi ni sikombiso so tala sa vathu va va nga wonisana ni sikarato. Yi tshumela yi kombisa nzila yi Jehovha a nga va vhuna ngu yona ka sixaniso soneso. He woni sikombiso so kari.
ELIJA I TI M’THU WO FANA NI NATHU
4. Ngu sihi sikarato asi Elija a nga manana naso? Ni ku a ti pfisile kutxani ngu Jehovha?
4 Elija a thumete Jehovha ngu mbimo yo karata e tshumela e manana ni sikarato sa hombe. Ngu mbimo yoneyo, Israyeli ku ti fuma Mkoma Akabhe awu a nga ti tekanile ni Jezabheli wo khozela Bhahali. Akabhe ni Jezabheli va tatile ditiko dotshe ngu wukhozeli wa Bhahali ve tshumela ve dayela vaprofeti va Jehovha. Elija a hulukile. Ngu kuthemba Jehovha, a tshumete e huluka ka nzala ya hombe. (1 Vafu. 17:2-4, 14-16) Kuengetela ka toneto, Elija ti lavile e themba Jehovha mbimo yi a nga ti jamisanile ni vaprofeti ni vakhozeli va Bhahali. A kuzetile Vaisrayeli kuthumela Jehovha. (1 Vafu. 18:21-24, 36-38) Elija a ti woni ngu maso ku a ti vhunwa ngu Jehovha ka sotshe siemo soneso so karata.
Jehovha a rumete ngelozi ti to yi ta vhuna Elija ku e wuseta mtamo (Wona tindimana 5-6) *
5-6. Ngu kuya ngu 1 Vafumeli 19:1-4, i ti yahi matipfelo a Elija? Jehovha a mu kombisile kutxani to wa mu dhunda?
5 Lera 1 Vafumeli 19:1-4. Hambi keto, mbimo yi Jezabheli a nga khene a lava ku m’daya, Elija a thavile ngutu. Se a to tutuma e ya barama Bherisebha. A ti gumile mtamo ha koza e “ti kombelela kufa.” Ngu kutxani? Elija a sa hetiseka, “i ti m’thu wa kuxaniseka kufana ni nathu.” (Jak. 5:17) Ti nga maha a ti jujekile mapimo ni kuva ni dikhodho. Ti woneka nga Elija a pimisile to mizamo yakwe yo seketela wukhozeli wa ditshuri i si nga ya txilo ni ku Israyeli ku nge tshukwali txilo futhi a ti ti wona nga ova ene dwe a nga ti ngadi e thumela Jehovha. (1 Vafu. 18:3, 4, 13; 19:10, 14) Hi nga thuka hi xamala ti to mprofeti wa Txizimu a ti pfite ngu nzila yoneyo. Kambe Jehovha a ma pfisisile matipfelo a Elija.
6 Jehovha kha m’bhongela a ku a nga womba matipfelo akwe. Kuhambana ni toneto a to mu tsanisa. (1 Vafu. 19:5-7) Ngu msana, Jehovha a lulamisile mialakanyo ya Elija ngu ku mu komba mtamo Wakwe. Jehovha a gwitile a txi khene ku ngadi ni 7.000 wa vathu ava va nga lamba kukhozela Bhahali. (1 Vafu. 19:11-18) Jehovha a ti vekile ha kubasani to wa mu dhunda Elija.
JEHOVHA A HI VHUNISA KUTXANI
7. Hi vhuneka txani ka nzila yi Jehovha a nga vhuna Elija ngu yona?
7 Ina awe u wonisana ni sikarato sa hombe? Kuziva to Jehovha a pfisisile matipfelo a Elija, ta hi thavelela! Ti hi tsanisekisa to Jehovha wa pfisisa sikarato sathu sa matipfelo. Jehovha wa kuziva mu hi tandekako, a ziva ni matipfelo kumweko ni ti hi ti pimisako. (Mas. 103:14; 139:3, 4) Ngako hi txi etetela Elija, hi themba Jehovha, ene a na hi vhuna kuwonisana ni sikarato asi si jujako msungo.—Mas. 55:22.
8. Jehovha a na kuvhunisa kutxani kuwonisana ni sikarato?
8 Kujujeka msungo ti nga kuthela mapimo o biha ni dikhodho. Ti txi kuhumelela, u nga divali to Jehovha a na kuvhuna kuwonisana ni sikarato. A na kuvhunisa kutxani? Ene a khene mu gele sikarato ni matipfelo ako. Se ene a na xamula txidilo txako. (Mas. 5:3; 1 Pedro 5:7) Mbimo yotshe, khongela ka Jehovha mayelano ni sikarato sako. Hi nga ti to Jehovha a no womba-womba ni nawe nga ti a nga mahisa tona ni Elija, kambe a na thumisa Bhiblia ni Sengeletano yakwe. Timhaka ati u no lera mu ka Bhiblia ti nga kuthavelela ni kukuninga themba. Ku ni vanathu ava va ni vona va no kuthavelela.—Var. 15:4; Vaheb. 10:24, 25.
9. Vangana vo thembeka va nga hi vhunisa kutxani?
9 Mbimo yi Jehovha a nga gela Elija ti to e ninga wutixamuleli Elizewu, Ene a mu ningile mngana wamnene, awu a nga mu vhuna kutsanisela sikarato sakwe sa matipfelo. Ngu ha kufanako, ngako hi txi gela mngana wathu matipfelo athu, a na hi vhuna ku hi tsanisela. (2 Vafu. 2:2; Mav. 17:17) Ngako u txi ti pfa u si nga ni mngana wo mthemba, kombela Jehovha e kuvhuna ti to u mana mwanathu wo vitwa ngu didhawa da moya awu a no kuvhuna ku u tsanisela.
10. Ati Elija a nga manana nato ti hi ningisa kutxani themba? Txithembiso atxi txi ku ka Isaya 40:28, 29 txi nga hi vhunisa kutxani?
10 Jehovha a vhunile Elija ti to e timisela sikarato ni ku e thuma ngu kuthembeka malembe o tala. Ati Elija a nga manana nato ti hi ninga themba. Ti nga maha sikarato si hi belela ngu kulondiselana se si sakata mimidi ni matipfelo athu. Ngako hi txi themba Jehovha, a na hi ninga mtamo wo simama hi mu thumela.—Lera Isaya 40:28, 29.
ANA, DHAVHIDHA, NI MBHALI WA MASALMO VA TI THEMBA JEHOVHA
11-13. Kujujeka msungo ti ma gwesisile kutxani malanda a kale a Jehovha?
11 Vathu vamwani va mu ka Bhiblia ni vona va mananile ni sikarato. Ngu txikombiso, Ana a tsanisete tingana nguko a nga ti si veleki ni ku a nga ti xaniswa ngu mkati-kulowe. (1 Sam. 1:2, 6) Sikarato soneso si mahile a si tsaki ha koza e dila a si dyi.—1 Sam. 1:7, 10.
12 Ku ni mbimo yi Mkoma Dhavhidha a nga ti ni dikhodho ngu sikarato. Hi nga wona ti a nga manana nato. A ti pandiseka ngu tiphazamo ti a nga ti khala kumaha. (Mas. 40:12) Abhisalome mwanana wakwe wo mdhunda a mu wukete, ngu msana a datwe. (2 Sam. 15:13, 14; 18:33) Dhavhidha a kanganyisilwe ngu mngana wakwe wa hombe. (2 Sam. 16:23–17:2; Mas. 55:12-14) Kutala ka masalmo aya ma nga bhalwa ngu Dhavhidha, ma kombisa matipfelo akwe a dikhodho kumweko ni themba yakwe yo tsana ka Jehovha.—Mas. 38:5-10; 94:17-19.
Nji txani txi nga vhuna mbhali wa masalmo kuthumela Jehovha ngu litsako? (Wona tindimana 13-15) *
13 Msana keto, m’bhali mmwani wa masalmo a khatile kubavela vathu vo biha. Ti nga maha i ti Mulevhi wa ka Asafe awu a nga ti thuma “nyumbani ko sawuleka ka Txizimu.” Ene a ti karateka mbiluni kwakwe, eto ti mu tekete litsako ni ku mu thela dikhodho. Phela a tshumete e pimisa to kuthumela Jehovha hi nga ta txilo.—Mas. 73:2-5, 7, 12-14, 16, 17, 21.
14-15. Hi gonda txani ka sikombiso sa siraru mayelano ni kuthemba Jehovha hi txi manana ni sikarato?
14 Malanda ya a mararu hi nga bhula ngu ona, otshe ma thembile Jehovha kasi ku e ma vhuna. Ona ma ti ningela sikarato ka Jehovha ngu mkombelo. Ona ma si thavi kugela Jehovha to ngu kutxani ma txi karateka. Ni ku, ma ti simama me khozela Jehovha.—1 Sam. 1:9, 10; Mas. 55:22; 73:17; 122:1.
15 Jehovha a ma kombile wuxinji e tshumela e ma vhuna. Ana a pepile moyani. (1 Sam. 1:18) Dhavhidha a bhate a txi khene: “Vathu vo lulama va dukwa ngu sixaniso so tala, aniko MKOMA wa va hulukisa ka sotshe.” (Mas. 34:19) Se ngu msana mbhali wa masalmo a txi ti pfa a txi ‘setelwa ngu diwoko’ e ningwa sileletelo sa sinene. A gwitile a txi embelela a txi: “Kwangu, ndinene kuzumba hafuhi ka Txizimu. Awe, MKOMA, Txizimu txangu, u wuthavelo wangu.” (Mas. 73:23, 24, 28) Hi gonda txani ka sikombiso siya? Mbimo yimwani hi na manana ni sikarato asi si no hi maha hi jujeka msungo. Kambe hi nga si xula ngako hi txi alakanyisisa ngu nzila yi Jehovha a nga vhuna ngu yona vamwani, ti lava kambe hi maha mkombelo, hi mu themba ni ku mu engisa i ku kumaha ati a hi kombelako.—Mas. 143:1, 4-8.
THEMBA JEHOVHA U NA XULA SIKARATO
Makhatoni mwanathu a txi zumba ekha, kambe a ti ta vhuneka mbimo yi a nga txi vhuna vamwani (Wona tindimana 16-17)
16-17. a) Ngu kutxani hi sa fanela kuzumbela kule ni Jehovha ni vanathu? b) Hi nga wusetwa mtamo ngu nzila yihi?
16 Sikombiso siya sa siraru si hi gondisa timhaka ta lisima ngutu i ku kwa mbi zumba kule ni Jehovha ni vanathu. (Mav. 18:1) Nancy, awu a nga karateka mbimo yi a nga lekwa ngu mwamna wakwe a khene: “Ku ni mbimo yi ni nga ti si lavi kubwabwata nem kuwona m’thu. Eto ti txo engetela kupanda kwangu.” Kambe mbimo yi Nancy a nga ti vhuna vamwani va va nga ti ni sikarato ku ve ni kutxitxa. Nancy a khene: “Ni riya nzeve mbimo yi va txhamuselako sikarato sawe. Ni woni to mbimo yi ni nga ti va pfela wusiwana, ni si karateki ngutu.”
17 Hi nga wusetwa mtamo ngu kuya mitshanganoni. Mbimo yi hi manekako ka yona hi ninga Jehovha txivangelo txo e hi ‘vhuna ni ku hi tsanisa.’ (Mas. 86:17) Ene wa hi tsanisa ngu kuthumisa moya wakwe wo sawuleka, Bhiblia ni vathu vakwe. Mitshangano yi hi ninga mkhanjo wo hi “thavelelana ngu likholo.” (Var. 1:11, 12) Mwanathu wu a dhanwako ku i Sofia a khene: “Jehovha ni vanathu ngu vona va nga ti ni ninga mtamo wo ni simama. Txa lisima ngutu kwangu i ti ku ya mitshanganoni. Ni ti woni to kusimama ni txhumayela ni ku va ni vanathu hafuhi, ti txi ni vhuna kuwonisana ni sikarato ni kuvilela kwangu.”
18. Mbimo yi hi ku ni dikhodho, Jehovha a nga hi ninga txani?
18 Mbimo yi hi ku di ni dikhodho, ti lava hi khumbula to Jehovha kha thembisi kugumisa sikarato dwe mbimo yi yi tako, kambe wa hi ninga txivhuno kasi ku hi wonisana naso. Txona txi hi ninga ‘kuxuva ni kuthuma’ ngu mtamo kasi kuxula dikhodho ni kugumelwa ngu themba.—Vaf. 2:13.
19. Dibhuku da Varoma 8:37-39 di hi ninga txitsaniso txihi?
19 Lera Varoma 8:37-39. Mpostoli Paulo wa hi thembisa to txiwalo txi txi nga hi hambanisako lirandoni ka Txizimu. Hi nga va vhunisa kutxani vanathu va ku ka sikarato si si va jujako mapimo? Ka msungo wu wu londiselako hi na wona to hi nga etetelisa kutxani Jehovha ngu kukombisa wumbilu ni kuvhuna vanathu va va xanisekako.
NDANDO 44 Mkombelo wa dilanda do lulama
^ par. 5 Kuzumbela kuvilela ku nga hi tisela malwati. Jehovha a nga hi vhunisa kutxani? Hi na wona nzila yi Jehovha a nga vhuna ngu yona Elija ti to e wonisana ni kuvilela. Sikombiso simwani si na hi vhuna kuwona to hi nga txi manisa kutxani txivhuno txa Jehovha hi di kuxanisekani.
^ par. 2 Ka msungo wuwa matina mamwani ma txitxilwe.
