1. Ngu sihi sikarato asi malanda a Jehovha ma nga wonisanako naso?

INA awe u wonisana ni sikarato so kari? Ti nga maha mwanathu wo kari a di ku henyisile. (Jak. 3:2) Mwendo ku u txi poyilelwa ngu vagondi kuloni ava va si thumeliko Jehovha. (1 Pedro 4:3, 4) Ti nga maha vamwayani kwako va txi kutsimba kuya mitshanganoni mwendo kutxhumayela. (Mat. 10:35, 36) Kuwonisana ni sikarato eso ta panda ni ku ti nga kumaha u navela ni kutsukula kuthumela Jehovha. Kambe tsaniseka ti to ti singa ni mhaka ni sikarato asi u mananako naso, Jehovha a na kunina mtamo ni wutxhari ti to u si timisela.

2. Ngu kuya ngu Varoma 15:4, hi nga wuyelwa ngu txani hi txi gonda Bhiblia?

² Jehovha a mahile ti to a mu ka Bhiblia kubhalwa nzila yi vathu vo mbi hetiseka va nga wonisana ni sikarato ngu yona. Ngu kutxani? Ti to hi gonda ka tona. Eto ngu ti nga maha Jehovha a e susumeta mpostoli Paulo e bhala ati ti ku ka Varoma 15:5. (Yi lere.) Kugonda ngu matimu awa ta hi thavelela ni ku hi ninga themba. Kambe ti to hi wuyelwa kha ha fanela kugwitela ko lera Bhiblia dwe. Ti lava hi tumelela mibhalo yi titxa mapimiselo athu ni kugwesa mbilu yathu. Hi nga maha txani ngako hi txi lava mkongomiso wo kari ngako hi txi wonisana ni sikarato? Hi nga maha timhaka ta mune ti ti londiselako i ku tiya: 1) Mkombelo, 2) Kutiwona ngu maso a mialakanyo, 3) Kualakanyisisa, ni 4) Ku ti thumisa. Konku he wone to  hi nga ti mahisa kutxani toneto. * Hi na thumisa magondelo awa hi txi xolisisa ati ti nga maheka ka wutomi wa mkoma Dhavhidha ni mpostoli Paulo.

3. Ngu tihi ti u nga ti mahako u si se khata kulera Bhiblia? Ngu kutxani?

³ 1) Mkombelo. U si se khata kulera Bhiblia, kombela txivhuno ka Jehovha ti to e kuvhuna u wona nzila yi u nga wuyelwako ngu yona ngu ti u no ti gonda. Ngu txikombiso ngako u txi lava nzila yo wonisana ni txikarato, kombela Jehovha e kuvhuna u mana matshina a milayo amu ka Bhiblia aya ma nga ku kongomisako.—Vaf. 4:6, 7; Jak. 1:5.

4. Nji txani txi nga kuvhunako u kota kupfisisa didungula da mu ka Bhiblia?

⁴ 2) Tiwone ngu maso a mialakanyo. Jehovha a hi ningile wusikoti wo kota kuwona tomaha ati ti nga maheka mwendo ti ti si se kumaheka ngu maso a mialakanyo. Ti to u kota kupfisisa kwati didungula da mu ka Bhiblia, duketa kuwona ati m’thu wa kona a ngati ti wona, ni kupfa ati a ngati ti pfisa tona.

5. Nji txani kualakanyisisa? Hi nga kumahisa kutxani?

⁵ 3) Kualakanyisisa. Kualakanyisisa ti womba kupimisa ngu didungula adi u di gondako ni kuwona nzila yo di thumisa. Kualakanyisia ti hi vhuna kupfisisa ni kupfa m’bhumulo ka ti u ti gondako. Kugonda Bhiblia u si alakanyisisi tifana ni kuva ni ma ingredhieti a mdiwo wo kari kambe u sa wu bhika, khu nge wupfi mbhumulo wa kona. Ngu ha kufanako kualakanyisisa ti fana ni kupatela ma ingredhieti u bhika sakudya, ngu kona u nopfa kutshamba ka sona. Kasi ku u alakanyisisa u txi maha gondo, zama kumana tixamulo ta siwotiso siya: ‘Awu ni gondako ngu ngene a mahile txani ti to e vhuneka? Jehovha a m’vhunisile kutxani? Ni nga ti thumisisa kutxani tiya kasi kuxula sikarato sangu?’

6. Ngu kutxani hi di fanete kuthumisa ti hi ti gondako?

⁶ 4) Tithumisi. Jesu a wombile ti to ngako hi si thumisi ti hi ti gondako hi na fana ni m’thu wu a akako nyumba ka mtxhefa. Ene a nga thuma ngutu kambe mthumo wakwe wu ngava mnyuku wa yimbwa. Ngu kutxani? Nguko ngako ku txi humelela singulo ni tindambi, nyumba yi nawa. (Mat. 7:24-27) Ngu ha kufanako toneto, ngako hi txi maha mkombelo, hi ti wona ngu maso a mialakanyo ni kualakanyisisa ngu ti hi ti gondako kambe hi si tithumisi hi nava hi txo thuma mahala. Ngako hi txi dukwa, likholo li nava li sa tsana. Kambe ngako hi txi thumisa ati hi ti gondako, hi na kota kumaha sisungo sa sinene, hi va ni kudikha ni kuva ni likholo lo tsana. (Isaya 48:17, 18) Aku se hi nga bhula ngu timhaka tiya ta mune a hi wone to hi nga ti thumisisa kutxani hi txi xolisisa wutomi wa Dhavhidha.

7. Ngu yahi matimu ya hi no bhula ngu ona?

⁷ Ina u khala kujikelwa ngu mngana wo kari mwendo dixaka? I di toneto u nga wuyelwa ngu kuxolisisa matimu a Abhisalome, awu a nga jikela tate wakwe Dhavhidha e lava ku mu honyola wukoma.—2 Sam. 15:5-14, 31; 18:6-14.

8. Ngu tihi ti u nga ti kombelako ka Jehovha?

⁸ 1) Maha mkombelo. U si se gonda didungula diya, gela Jehovha a ti u ti pfisako tona ngu ti ti nga kumahekela. (Mas. 6:6-9) U nga jika-jike, peka msungo mhaka. Kombela Jehovha ngu kukongoma ti to e kuvhuna ku u mana ditshina da mlayo adi di no kuvhuna ku u wonisana ni txikarato txako.

9. Ngu tihi ti ti nga maheka ka Dhavhidha ni Abhisalome?

 ⁹ 2) Tiwoni ngu maso a mialakanyo. Pimisa ngu ti ti nga ti maheka ka didungula donedo u wona ati Dhavhidha a nga ti tipfisa tona. Abhisalome a dhunukile malembe o tala ti to e xenga vathu ti to ve mu dhunda. (2 Sam. 15:7) Mbimo yi Abhisalome a nga wona to a ti kute, a rumete sipiyawu ti to siya Israyeli ti to si ya xengetela vathu kasi ku ve ya mu amukela kota mkoma. Ene a tshumete e kota ni kuxenga mngana wa hombe wa Dhavhidha i ku Ayitofeli, ti to e jikela Dhavhidha. Abhisalome a tshumete e ti huwelela kota mkoma e tshumela e duketa kudaya Dhavhidha, awu ti wonekango nga a ti lwala ngu mbimo yoneyo. (Mas. 41:1-9) Mbimo yi Dhavhidha a nga ti ziva, ti lavile e thava e huma Jerusalema. Msana keto, masotxhwa a Abhisalome ma ti yalwa ni masotxhwa a Dhavhidha. Hambiketo masotxhwa a Abhisalome ma xutwe se Abhisalome a datwe.

10. Sikarato si Dhavhidha a nga wonisana naso, si di m’mahile a txi txani?

¹⁰ Alakanya nzila yi Dhavhidha a nga tipfa ngu yona mbimo yi eto ti nga humelela. Ene a txi mu dhunda Abhisalome, ni ku a txi themba Ayitofeli. Hambi keto ngu vona vavambidi va nga mu jikela. Vona va mu dyisetile ngutu ve tshumela ve lava ku mu daya. Eto ti di mahile Dhavhidha e khata kukana-kana vangana vakwe e pimisa ti to ni vona va na ti pata ni Abhisalome. Toneto ti di mmahile e lava takwe dwe, se e thava eya barama a di ekha. Txikarato txonetxo txi di tshumete ti m’heta mtamo. Hambiketo, Dhavhidha kha maha nem timweto keto. Hahanze keto, ene a xute txikarato txakwe. A mahisile kutxani?

11. Dhavhidha a mihile txani mbimo yi a nga ti ka sikarato?

¹¹ 3) Kualakanyisisa. Hi gonda txani ka didungula diya? Xamula txiwotiso txiya: “Ngu tihi ti Dhavhidha a nga maha ati ti nga m’vhuna?” Dhavhidha kha jujeka mapimo se e maha nyammahe sisungo. Nem kha swelisela kumaha sisungo ngu kuthava. Hahanze keto, ene a kombete txivhuno ka Jehovha. Ene a tshumete e kombela txivhuno ka vangana vakwe. Ene a kha swela kumaha ati a nga ti pimisa. Hambiku a nga ti karatekile, Dhavhidha kha kana-kana vangana vakwe mwendo kuva nyenya. Ene a simamile e themba Jehovha kumweko ni vangana vakwe.

12. Jehovha a m’vhunisile kutxani Dhavhidha?

¹² Jehovha a m’vhunisile kutxani Dhavhidha? U txi maha wuxolisisi, u na mana to Jehovha a ningile Dhavhidha mtamo wu a nga ti wu lava ti to e xula txikarato. (Mas. 3:1-8) Jehovha a katekisile sisungo sa Dhavhidha. A tshumete e vhuna vangana va Dhavhidha ava va nga ti m’vhikela.

13. U nga etetelisa kutxani Dhavhidha ngako m’thu wo kari a di kuhenyisile? (Matewu 18:15-17)

¹³ 4) Ti thumisi. Tiwotisi tiya: ‘Ni nga txi tekelelisa kutxani txikombiso txa Dhavhidha?’ U nga swele kululamisa txikarato. Ngako ti txi koteka, u nga thumisa txialakanyiso txi ku ka Matewu 18. (Lera Matewu 18:15-17.) Kambe tiwonele ku u si mahi nyammahe sisungo ngu kuva u di henyile. Ti lava u kombela Jehovha ti to e kuninga mbilu yo rula, wuzivi awu wu lavekako ti to u lulamisa txikarato. U nga kana-kani vangana vako. Hahanze keto, tiemiseli kuamukela txivhuno txawe. (Mav. 17:17) Kambe txa lisima ngutu, londisela txialakanyiso atxi Jehovha a no kuninga ngu kuthumisa Bhiblia.—Mav. 3:5, 6.

14. Ngu sihi siemo si ti nga lavako u thumisa ti ti ka 2 Timoti 1:12-16; 4:6-11, 17-22?

¹⁴ Ina u wonisana ni kukanetwa ngu siro  sa mwaya? Mwendo u zumba ka ditiko di mthumo wo txhumayela wu tsimbiswako? I di toneto, u nga gonda ka 2 Timoti 1:12-16 ni 4:6-11, 17-22. * Paulo a bhate didungula diya a di jele.

15. U nga kombela txani ka Jehovha?

¹⁵ 1) Maha mkombelo. U si se gonda didungula donedo, gela Jehovha sikarato sako ni ti u ti pfisako tona. U nga jika-jike, peka msungo mhaka. Kombela Jehovha ti to e kuvhuna u mana matshina a mlayo ka didungula adi di yelanako ni sikarato asi Paulo a nga manana naso, aya ma no kuvhuna ti to u ziva to u nga maha txani ngako u txi manana ni sikarato.

16. Ngu tihi ti nga humelela Paulo?

¹⁶ 2) Tiwoni ngu maso a mialakanyo. A hi nge khathu u Paulo. Alakanya a di sungilwe ngu titxhini a di jele khe Roma. I singa dikhambi do khata kubetwa jele, kambe akuwa ti woneka nga a na dawa. Vamwani va vangana vakwe va ti mtutumile, ni ku ene a ti karate.—2 Tim. 1:15.

17. Sikarato sa Paulo si di mmahile a txi txani?

¹⁷ Paulo a di khumbute ta msana, e pimisa ti to i ti ku kha maha txisungo txile, nga a sa sekelwa. Ene a di tilikete vavamna vale va Ásia va nga mtutuma ni ku a di kanakanile vangana vakwe vamwani. Kambe Paulo kha nga maha nem timweto ka eto. Nji txani txi nga vhuna Paulo e simama a di ni themba?

18. Ngu tihi ti Paulo a nga maha mbimo yi a nga ti ni sikarato?

¹⁸ 3) Alakanyisisa. Xamula txiwotiso txiya: “Paulo a mahile txani ati ti nga mu vhuna?” Hambiku Paulo a nga ti thembisilwe kudawa, ene kha nga divala ati i ku ta lisima ngutu, i ku kudhumisa Jehovha. Ene a simamile e tsanisa vamwani. Mbimo yotshe Paulo a txi khongela ka Jehovha. (2 Tim. 1:3) Hahanze ko veka mapimo ka vale va nga mtutuma, ene a kombisile kubonga ka vale va nga ti mu vhuna. I si ngeto dwe, ene a simamile e gonda Dipswi da Txizimu. (2 Tim. 3:16, 17; 4:13) Kambe txa lisima ngutu, ene a txi tsaniseka ti to Jehovha ni Jesu va ti mu dhunda. Ene a ti tshumela e tsaniseka ti to kha va na mbi mu leka, ni ku va ndi na mu hakela nguku a nga ti thembekile.

19. Jehovha a vhunisile kutxani Paulo?

¹⁹ Jehovha a ti txharihisile Paulo ti to a ti fanete kutimisela sikarato ngu kuva i di Mkristo. (Mith. 21:11-13) Jehovha a vhunisile kutxani Paulo? Ene a xamute mikombelo ya Paulo, ni ku mbimo yotshe a ti mninga mtamo. (2 Tim. 4:17) Paulo a ti tsaniseka ti to a ndina mana hakelo ya ku ti karata kwakwe. Jehovha a tshumete e kuzeta vangana va Paulo ti to ve mu vhuna.

20. Ngu kuya ngu Varoma 8:38, 39, hi nga gonda txani ka txikombiso txa Paulo?

²⁰ 4) Ti thumise. Tiwotise tiya: ‘Ni nga txa ti etetelisa kutxani txikombiso txa Paulo?’ Kufana ni Paulo, ti lava hi ti ziva to hi na kanetwa ngu kona ha ka likholo lathu. (Marku 10:29, 30) Mbimo yi hi mananako ni sikarato, ti lava hi simama hi khongela ka Jehovha ni kuva ni txiemiso txa txinene txo gonda Bhiblia. Ti lava hi khumbula ti to txa lisima ngutu ngu dhumisa Jehovha. Hi fanete hi tsaniseka ti to Jehovha kha na mbi hi tshotsha ni ku txi walo atxi txi vhalelako Jehovha ti to e hi randa.—Lera Varoma 8:38, 39; Vaheb. 13:5, 6.

21. Nji txani txi nga vhuna Ayan ni Hector ti to ve xula sikarato sawe?

²¹ Ti si nga ni mhaka ni siemo sathu, hi nga mana mtamo ngu kugonda ka sikombiso sa mu ka Bhiblia. Ngu txikombiso, Ayan, awu i ku nyaphandule wa Japão, a womba ti to matimu  a Jona, ma mu vhunile ti to eva ni txibindi txo txhumayela ha kubasani. Hector, mphya mmwani wa Indonésia awu vaveleki vakwe va si thumeliko Jehovha, a vhunwe ngu txikombiso txa Rute ti to e lava kugonda ngu Jehovha ni ku mu thumela.

22. Madrama ni mxaxamelo awu wu ku Imite a Sua Fé, si nga kuvhunisa kutxani?

²² U nga si mana hani sikombiso sa mu ka Bhiblia asi si nga kuningako mtamo? Mavhidhiyo, madrama o maha ngu kuengisela, ni mxaxamelo awu wu ku Imite a Sua Fé, si nga kuvhuna ti to u pfisisa ati u ti gondako amu ka Bhiblia. * U si se xalela, kuengisela mwendo kulera madungula onewo, kombela Jehovha ti to e kuvhuna kuwona ati u nga ti thumisako. Tiveke ka wukhalo wa vathu vonevo. Alakanyisisa ngu ti malanda onewo ma nga timaha ni ti to Jehovha a ma vhunisile kutxani ti to me xula sikarato. Se gwita u thumisa ati u nga tigonda ka txiemo txako. Bonga txivhuno txi Jehovha a nga kuninga. Tshumela u kombisa kubonga kwako ngu kulava mkhanjo wo tsanisa ni kuvhuna vamwani.

23. Ngu kuya ngu Isaya 41:10, 13, ngu tihi ti Jehovha a hi thembisako?

²³ Txa wutomi ka mafu awa a Sathani txi nga hi bhedhela. (2 Tim. 3:1) Hambiketo, kha hi karateki nem kuthavha. Jehovha wa tiziva ati ti nga hi humelelako. Mbimo yi hi kombelako txivhuno, ene wa thembisa ku hi vhuna ni ku hi ñola ngu diwoko dakwe da txinene. (Lera Isaya 41:10, 13.) Ngako hi txi themba Jehovha, hi na mana mtamo wu wu tako ngu ka Mibhalo, ti to hi xula sikarato.