1. Ngu kutxani Jesu a di kombete Jehovha ti to e vhikela vagondiswa vakwe?

KA WUSIKU awu Jesu a di no fa ngu wona a ti pimisa ngu sikarato asi vagondiswa vakwe va ndi no manana naso. Aku a nga ti randa vagondiswa vakwe a kombete Jehovha ti to e “va vhikela ka M’bihi.” (Joh. 17:14, 15) Jesu a ti ti ziva ti to msana kova a di tshumete eya nzumani Sathani Dhiyabhulosi a ndi na txi nungisa, e wukela ava va thumelako Jehovha. Se ti hakubasani ti to vathu va Jehovha va ti lava kuvhikelwa.

2. Nji txani txi hi tsanisekisako ti to Jehovha a na xamula mikombelo yathu?

² Jehovha a xamute mkombelo wa Jesu nguko wa m’randa Mwanana wakwe. Ngako hi txi maha ti hi nga tikotako ti to hi tsakisa Jehovha nathu a na hi randa, ni ku a na engisa mkombelo wathu wo kombela txivhuno ni kuvhikelwa. Kufana ni tate awu a khatalelako mwaya wakwe, Jehovha wa simama e khatalela vanana vakwe ngu lirando. Ene wa tiziva ti to a txo mbi maha toneto ditina dakwe di na rukwa.

3. Ngu kutxani hi txi lava kuvhikelwa ngu Jehovha nyamsi?

³ Konku ha ti lava ngutu kuvhikelwa ngu Jehovha. Sathani a ni tovetwe nzumani se a ni “txiviti ngutu.” (Mtu. 12:12) Ene a kuzetela vathu ava va hi wukelako ve pimisa ti to ati va ti mahako vo ‘thumela Txizimu.’ (Joh. 16:2) Vamwani ava va si kholwiko ka Txizimu va hi wukela ngu ku hi si eteteliko mahanyelo a ditiko. Ku singa ni mhaka ni ti to ngu tihi ati ti mahako vathu ve hi wukela, hi nga themba ti to Jehovha a ni hi vhikela. Ngu kutxani? Nguko Bhiblia yi hi thembisa tiya: “Mkoma mbwo thembeka: Ene a na mi ninga kutsana, a na mi vhikela  ka m’bihi.” (2 Vat. 3:3) Jehovha a hi vhikelisa kutxani? A hi bhuleni ngu tinzila timbidi.

4. Ngu kuya ngu Vaefesu 6:13-17, nji txani txi Jehovha a hi ningako ti to hi ti vhikela?

⁴ Jehovha wa hi ninga sivhikelo ni matxhari ti to hi tivhikela ka ngu sona ka Sathani. (Lera Vaefesu 6:13-17.) Sivhikelo siya sa moya si ni m’tamo ni ku sa thuma! Kambe sona si ngo hi vhikela ngako hi txi ambala sotshe sivhikelo ni kuthumisa mathxari. Txivhikelo tximwani ni tximwani txi emela txani? Konku a hi xolisise mhaka yoneyo.

5. Nji txani libhande la ditshuri? Ngu kutxani hi di fanete ku li ambala?

⁵ Libhande la ditshuri li emela ditshuri adi di manekako ka dipswi da Txizimu, i ku Bhiblia. Ngu kutxani hi di fanete ku li ambala? Nguko Sathani i “tate wa makuhu.” (Joh. 8:44) Ka makuhu Sathani i ngongwe, ene a timetile “dotshe ditiko.” (Mtu. 12:9) Kambe ditshuri da mu ka Bhiblia di nga hi vhikela ku hi si timetwi. Se hi nga li ambalisa kutxani libhande liya? Hi nga maha toneto ngu kugonda ditshuri mayelano ni Jehovha, hi mu khozela ngu “moya ni ditshuri” ni kusimama hi va ni mahanyelo a manene ka totshe.—Joh. 4:24; Vaef. 4:25; Vaheb. 13:18.

6. Nji txani txivhikelo txa ha khana txa kululama? Ngu kutxani hi di fanete ku txi ambala?

⁶ Txivhikelo txa ha khana txa kululama txi emela milayo yo lulama ya Jehovha. Ngu kutxani hi di fanete ku txi ambala? Kufana ni mbilu ya disotxhwa yi vhikelwako ngu txivhikelo txa ha khana, txivhikelo txo lulama txa ha khana txi vhikela mbilu yathu yo fanekisela, i ku wuthu wathu wa mndani ti to hi si njikiswi ngu moya wa ditiko diya. (Mav. 4:23) Jehovha a emela ti to hi mu randa ngu mbilu yathu yotshe. (Mat. 22:36, 37) Kambe Sathani lwela kuabanisa mbilu yathu kasi ku hi khata kuranda silo sa mafu yawa, i ku silo asi Jehovha a si vengako. (Jak. 4:4; 1 Joh. 2:15, 16) Ngako a txi xuleka ene a lwela ku hi sinzisa ti to hi tshuralela milayo ya Jehovha.

7. Hi nga txi ambalisa kutxani txivhikelo txa ha khana txa kululama?

⁷ Hi nga amabla txivhikelo txa hakhana txa kululama, ngu kuranda ati Jehovha a wombako to ndinene hi venga ati a wombako to ti bihile. (Mas. 97:10) Vamwani va wona milayo ya Jehovha yi txo va veka jele. Kambe ngako hi txo leka kuengisa milayo ya Jehovha ka wutomi wathu hi na fana disotxhwa adi ti ambulako txivhikelo txa dona txa hakhana di di yimbini ngu kupimisa ti to txa nemela. Eto i ngava wuphukuphuku wa hombe! Ava va randako Jehovha va wona milayo yakwe yi “si nemeli” kambe yi txo va vhikela.—1 Joh. 5:3.

8. Ti womba txani kuambala tikathula u womba mahungu a manene a kudikha?

⁸ Paulo a tshumete e hi kuzeta ku hi ambala tikathula, hi womba mahungu a manene a kudikha. Eto ti womba ku mbimo yotshe hi fanete kuzumba hi di lungekete kutxhumayela mahungu a manene a Mfumo. Ngako hi txi txhumayela vamwani didungula da mu ka Bhiblia, likholo lathu li na tsana. Vathu va Jehovha va zumba va di lungekete kulondola mkhanjo wumwani ni wumwani ti to ve txhumayela mahungu a manene. Vona va txhumayela va di txikolwani, mthumoni, madhoropani ngu m’ti ni m’ti, sitolo, va txi bhula ni vangana ni loko va txi pfuxela maxaka, va maha toneto hambi va si si koti kuhuma m’tini. Ngu ditshuri eto ta tsakisa! Ngako hi txi thava hi leka kutxhumayela mahungu a manene hi nga fana ni disotxhwa adi di di xivilako tikathula di di yimbini, di txo maha toneto di nga tholwa. Eto ti nga di maha di xulwa ngu  valala. Ti nga tshumela ti di karatela kuengisa mkonkomiso wa kumandate wa dona.

9. Ngu kutxani ti txi lava hi ñola txitxavangu txathu txa likholo?

⁹ Txitxhavangu txa likholo txi emela likholo li hi ku nalo ka Jehovha. Athu ha themba ti to Jehovha a na hetisisa sotshe sithembiso sakwe. Txitxhavangu txonetxo hi na “vhika ngu txona siholoma sa mndilo sa m’bihi.” Nguko txani ti txi lava hi tsimbila-tsimbila ni txitxhavangu txathu txa likholo? Nguko txona txa hi vhikela ti to hi si jikiswi ngu tigondo ta vaapostata mwendo ku hi si gumi mtamo mbimo yi hi poyilelwako. Ngako hi txo mbi na likholo, kha hi na mbi ema hi tsana mbimo yi va hi kuzetelako kundaka matshina a milayo ya Jehovha. Kambe mbimo yotshe hi emako hi tsana hi emela likholo lathu hi di txikolwani mwendo mthumoni ti fana ni kuva hi di ñote txitxhavangu txathu txa likholo. (1 Pedro 3:15) Mbimo yotshe yi hi lambako mthumo awu wu nga tsulupetelako txiemiso txathu txa timhaka ta moya hambi i di ti to va hi thembisa ku hi holela male yo tala, hi va hi txo simama hi ñolisisa txitxhavangu txathu txa likholo. (Vaheb. 13:5, 6) Ngako mbimo yotshe hi txi thumela Jehovha ti singa ni mhaka ni kukanetwa, hi va hi txo ti vhikela ngu txitxhavangu txathu txa likholo.—1 Vat. 2:2.

10. Nji txani txigoko txa kuhanyiswa? Ngu kutxani hi di fanete ku txi ambala?

 ¹⁰ Txigoko txa kuhanyiswa i themba ayi Jehovha a hi ningako, i ku themaba ya ti to ene a na hakhela votshe avale va mu thumelako ni ku hambi hi txo fa, a na ta hi wusa. (1 Vat. 5:8; 1 Tim. 4:10; Tit. 1:1, 2) Kufana ni txigoko atxi txi vhikelako msungo wa disotxhwa, themba yathu ya kuhanyiswa ya vhikela mialakanyo yathu. Ngu nzila yihi? Themba ya hi vhuna hi veka mapimo ka sithembiso sa Txizimu ni ku hi vhuna ti to hi si karateki hambi hi txi manana ni sikarato. Hi nga txi ambalisa kutxani txigoko txa kuhanyiswa? Hi nga txi ambala ngu kuwona timhaka ngu nzila yi Jehovha a ti wonako ngu yona. Ngu txikombiso, athu kha hi veki themba yathu ka ti thomba ta mafu yawa, kambe hi yi veka ka Txizimu.—Mas. 26:2; 104:34; 1 Tim. 6:17.

11. Nji txani ditxhari da moya? Ngu kutxani hi di fanete ku di thumisa?

¹¹ Ditxhari da moya dipswi da Txizimu i ku Bhiblia. Dona di ni mtamo wo tshatulela tigondo ta makuhu, ni kukhulula vathu ka tigondo ta wukhongeli wa makuhu ni mikhuva ya nzambwa. (2 Vak. 10:4, 5; 2 Tim. 3:16, 17; Vaheb. 4:12) Hi gondela kuthumisa ditxhari donedo ngu ku ti mahela gondo ya m’thu apune ni kuthumisa tigondo ati hi ti manako ka sengeletano ya Jehovha. (2 Tim. 2:15) Kuengeteka ka matxhari ni sivhikelo asi Jehovha a hi ningako ku ni timwani ati ti hi vhikelako. Ngu tihi ta kona?

12. Ngu txihi txivhuno tximwani atxi hi txi lavako? Ngu kutxani?

¹² Disotxhwa adi di ku ni wusikoti da tiziva ti to kha di nge humeleli yimbini di di dokha. Dona di lava txivhuno txa masotxhwa kulowe. Ngu ha kufanako athu kha hi nge xuli Sathani ni valondeteli vakwe hi di hokha hi lava txivhuno txa vanathu. Jehovha a hi ningile “vanathu” va ha mafuni kotshe, ava va hi vhunako.—1 Pedro 2:17, NM.

13. Ngu kuya ngu Vahebheru 10:24, 25, ngu yihi wuyelo yo xalela mitshangano?

¹³ Yimweyo ya tinzila yo mana txivhuno txonetxo ngu ya mitshanganoni. (Lera Vahebheru 10:24, 25.) Mbimo yimwani ha tshuka hi guma mtamo. Ngako toneto ti txi maheka, mitshangano yi nga wuseta mtamo wathu. Hi di mitshanganoni ha kuzetwa ngu tixamulo ta vanathu. Miwomba-wombo ayi yi nga seketelwa amu ka Bhiblia ni mikombiso ni yona ya wuseta kutiemisela kwathu ko thumela Jehovha. Mabhulo ya hi vako nawo yi si se khata mitshangano ni mbimo ayi yi gumako, ni ona ma hi tsanisa. (1 Vat. 5:14) Kuengetela keto mitshangano ya hi ninga mkhonjo wo mana litsako ali li tiswako ngu kuvhuna vamwani. (Mith. 20:35; Var. 1:11, 12) Mitshangano ya hi vhuna ngu tinzila timwani. Yona ya hi vhuna hi tshukwatisa nzila yolwa yimbi ya Wukristu ngu ku hi lulamisela ka mthumo wo txhumayela. Ngu txikombiso ha ziva kuthumisa kwati Farameti yo Gondisa. Ngu toneto, lulamisela kwati mitshangano. U di mitshanganoni riya kwati nzeve. Msana ka mitshangano thumisa ati u nga ti gonda. Toneto ti na kuvhuna u va “disotxhwa da dinene da Kristu Jesu.”—2 Tim. 2:3.

14. Ngu txihi txivhuno tximwani atxi hi ku natxo?

¹⁴ Hi tshumela hi mana txivhuno txa magidhi-gidhi a tingelozi. Hi nga alakanya ngu ti ngelozi yimweyo dwe yi nga ti mahako! (Isaya 37:36) Se tshumela u alakanya ngu ti ti ngo mahwako ngu magidhi-gidhi a tingelozi. Kha ngaho m’thu mwendo didhimoni adi di nga dinganiswako ni dibutho donedo da Jehovha. Ngako hi di ni Jehovha hi nga  xula valala vathu ti si nga ni mhaka ni ti to mba ngahi. (Val. 6:16) Eto ta hi tsanisa ngutu. Eto u fanete kusimama u ti khumbula ngutu-ngutu mbimo yi vagondi kuloni, vathumi kuloni mwendo maxaka va zamako ku kudhukisela ngu ti va ti wombako mwendo va ti mahako. U nga divale ti to khu lwi u di wekha ka yimbi yoneyo. Awe u lwa u di ni Jehovha.

15. Ngu kuya ngu Isaya 54:15, 17, ngu kutxani vathu va Jehovha va no mbi thuka ve vhalwa sisofu?

¹⁵ Mafu a Sathani ma hi venga ngu mhaka ya sivangelo so tala. Athu kha hi nga va mafu ni ku kha hi yi yimbini. Ha gondisa vathu ditina da Txizimu, ha txhumayela ti to Mfumo wa Txizimu ngu wona dwe wu no tisa kudikha, hi hanya ngu milayo ya Jehovha yo lulama. Athu hi tshumela hi tiveka hakubasani ti to Sathani i m’dayi ni ku m’hembi. (Joh. 8:44) Ha tshumela hi huwelela ti to mafu a Sathani ma na loviswa. Hambiketo ene kha nge sikoti ku hi vhala sisofu. Kuhambana nito athu hi na simama hi dhumisa Jehovha ngu tinzila to hambana-hambana. Ti singa ni mhaka ni mtamo awu Sathani a ku nawo, ene kha nge sikoti kuvhalela ti to mahungu a manene me txhumayelwa ha mafuni kotshe nguko Jehovha wa hi vhikela.—Lera Isaya 54:15, 17.

16. Jehovha a na maha txani ngu vathu vakwe?

¹⁶ Ngu tihi ti hi nga ti rinzela i singa kale? Ngu mbimo ya xanisa ya hombe Jehovha a na hulukisa vathu vakwe ngu tinzila to xamatisa. Yo khata, ene a na hulukisa malanda akwe o thembeka mbimo yi a no maha ti to vakoma va lovisa Bhabhilona wa Hombe, i ku wotshe wukhongeli wa makuhu. (Mtu. 17:16-18; 18:2, 4) Ngu magwito ene a na hulukisa vathu vakwe mbimo yi a no lovisa Sathani kumweko ni votshe ava va emako nayo ka yimbi ya Armagedhoni.—Mtu. 7:9, 10; 16:14, 16.

17. Hi na wuyelwa ngu txani ngako hi txi va ni wuxaka ni Jehovha?

¹⁷ Ngako hi txi simama hi va ni wungana ni Jehovha, Sathani kha na mbi lunga ni yimbi yakwe. Ene ngene a no ma bwela mafu. (Var. 16:20) Ngu toneto simama u ambala sivhikelo ni kuthumisa matxhari aya Jehovha a ku ningako. U nga si leki! U nga dukete kulwa yimbi u di wekha. Tumela txivhuno txa vanathu. Londisa nkongomiso wa Jehovha. U txi maha toneto Jehovha Tate wathu wa nzumani a ni lirando, ene a na kuvhikela ni ku kutsanisa.—Isaya 41:10.