Makristu mamwani ma thumisa tekenolojiya kasi ku me pfuxelana ni maxaka kumweko ni vanawe. Hambiketo Makristu ya ma nga vitwa ma txi tekela ha msungo txialakanyiso atxi txi ku: “Awule a zivako a wona phango e sisala; aniko siphukuphuku si pinda ngu kona si xaniseka.”—Mav. 27:12.

Ha tsaka aku Jehovha a lavako ti to hi vhikeleka. Ngu toneto kha hi lavi kutipata ni ava va mahako mibhando, ava va nga thaviswa dibanzani ni va va gondisako tigondo to soholotwa. (Var. 16:17; 1 Vak. 5:11; 2 Joh. 10, 11) Mahanyelo a vanathu vamwani kha ma veki txikombiso txa txinene. (2 Tim. 2:20, 21) Atiya hi fanete ku ti khumbula mbimo yi hi sawulako vangana. Kha hi na kusikota kusawula vangana vavanene ngu kuthumisa internet.

Kusawula kwati vangana ti nga karata ngako hi di tibetete ka magrupu a mabhulo ngu kuthumisa internet. Makristu mamwani ma tibetete ka magrupu a hombe se me va ni wuyelo yo biha. Se hi nga maha txani ngako hi di tibetete ka magrupu a vathu vo tala? Ti nga karata kuziva wumoya ni ti to m’thu mmwani ni mmwani a zumbisile kutxani ka grupu onewo. Dibhuku da Masalmo 26:4 di womba tiya: “Kha ni zumbi ni ava va randako makuhu, kambe kha ni tsimbili ni vakanganyisi.” Ngu toneto, ti nga va wutxhari kuthumisa mamesaji ka m’thu awu u mu zivako.

Mkristu hambi a di ka grupu ya yidotho a fanete kutiwonela ka ti a ti wombako ni ka mbimo yi a yi hetako. Kha ha fanela kusungeka kuxamula mamesaji ti si nga ni mhaka ni ti to ma womba-womba ngu txani ni ti to hi na heta mbimo muni. Paulo a txharihisile Timoti ti to e tiwonela ka ava va ku “ti maha valanduli va timhaka ta wutomi wa vane.” (1 Tim. 5:13) Ni nyamsi ku ni ava va mahako toneto ngu kuthumisa internet.

Kha ngaho Mkristu wu a nga vitwa a nga womba-wombako ngu timhaka ti i ku txihunja mwendo kuwomba-womba kubiha ngu Makristu kulowe. (Mas. 15:3; Mav. 20:19) Ene nem kha engiseli mabhulo onewo. (Vaef. 4:25) Athu ha mana sakudya sa moya ni madungula o thembeka ka site ya jw.org ni ka JW Broadcasting^® ya mtxima ni mtxima.

Vanathu vamwani va thumisa internet ti to ve xava ni kuxavisa, ve zivisa ta mabhindu ni kuthola vathumi. Kambe eto kha ta fanela ka Makristu. Mkristu wu a si laviko ‘kufumwa ngu male,’ wa vayilela kuxolola vanathu.—Vaheb. 13:5.

Ina ndinene kukriyara magrupu kasi kumaha misengo yo vhuna vanathu ava va nga welwa ngu phango? Athu ha ti lava kukombisa lirando ngu kuvhuna ni kutsanisa vanathu vonevo. (Jak. 2:15, 16) Kambe kukriyara magrupu o maha toneto ti lwisana ni malulamiselo aya ma nga vekwa ngu Bhetele ya wukhalo wonewo mwendo dibanza. (1 Tim. 5:3, 4, 9, 10, 16) Ni ku athu kha hi lavi kutikombisa hi di ni txiavelo txo sawuleka txo vhuna vathu va Jehovha.

Athu hi lava kumaha timhaka ati ti dhumisako Jehovha. (1 Vak. 10:31) Se ngako hi txi sawula kuthumisa tekenolojiya kasi kurumelelana mamesaji, hi lava kukhumbula ngu tiphango ati ti nga vakoho.