1-2. Mba mani va patekako ko vhuna txigondo txi kula txi hokelela ko bhabhatiswa?

AMY awu a zumbako Fiji a womba tiya: “Ni txi tidhunda ati ni nga txi ti gonda amu ka Bhiblia, ni ku txi ti ziva ti to ditshuri, hambiketo ni si kuli ngu didhawa da moya. Kambe ni khatile kumaha kutxitxa ni kula ni hokelela ko bhabhatiswa mbimo yi ni nga khata kuya mitshanganoni.” Ati ti nga humelela Amy ti kombisa ti to txigondo txi ngo kula txi hokelela ko bhabhatiswa ngako txi txi mana txivhuno txa vamwani dibanzani.

² Muhuweleli mmwani ni mmwani a nga vhuneta ko dibanza di kula. (Vaef. 4:16) Leilani awu a zumbako Vanuatu a womba tiya: “Ti to txigondo txi kula ngu didhawa da moya txi lava txivhuno txa dotshe dibanza i singa txako dwe.” Kuvhuna txigondo txi kula ngu didhawa da moya ti fana ni kukulisa mwanana. Ti to mwanana e kula, ti nga lava txivhuno txa votshe ha mwayani, vangana ni vagondisi. Vona va nga maha toneto ngu ku mu kuzeta ni ku mu gondisa timhaka ta lisima. Ngu ha kufanako, vahuweleli va nga kuzeta txigondo txa Bhiblia ni ku txi vekela txikombiso txa txinene ti to txi kula txi hokela ko bhabhatiswa.—Mav. 15:22.

3. Hi nga gonda txani ka ti Ana, Dorin ni Leilani va nga womba?

³ Ngu kutxani muhuweleli awu a tsimbitisako txigondo a di fanete e tumela txivhuno txa vahuweleli vamwani? Wona ti  Ana awu i ku nyaphandule wo sawuleka a zumbako Moldávia a ti wombako, ene a khene: “Kha ti hehuki ku m’thu wamweyo e khatalela sotshe silaveko asi m’thu aku naso.” Dorin awu i ku nyaphandule wo sawuleka nene a zumbako Moldávia a khene: “Ngu txitalo vahuweleli vamwani va womba ti ti gwesako mbilu ya txigondo, i ku timhaka ti ani ni sa pimisa ngu kutiwomba.” Leilani awu hi nga womba-womba ngu ngene a womba tiya: “Lirando ni wumbilu awu vahuweleli wa kombisako sigondo ta si vhuna si wona ti to mba mani ngu ditshuri i ku vathu va Txizimu.” —Joh. 13:35.

4. Hi na bhula ngu txani ka gondo yiya?

⁴ Ngako hi txi lava kupateka ko vhuna txigondo hi nga ti wotisa tiya: ‘Ni nga maha txani ti to ni vhuna txigondo txa mmwani txi kula kuve hi ngani ni txi tsimbitisako?’ Konkuwa he bhule ngu ti to hi nga maha txani ngako hi txi rambwa ku ya tsimbitisa txigondo ni ku hi nga maha txani ngako txi txi khata ku ta mitshanganoni. Hi na tshumela hi wona ti to madhota ma nga maha txani kasi kuvhuna txigondo txi kula txi hokela ko bhabhatiswa.

5. Ngu wuhi mthumo wako ngako u txi rambwa ku ya tsimbitisa txigondo?

⁵ Nyamne wa txigondo ngene ngutu-ngutu a ku ni wutixamuleli wo vhuna txigondo txi pfisisa kwati Bhiblia. Ngako u txi rambwa ku ya tsimbitisa txigondo u fanete kutiwona u di m’vhuni. Mthumo wako ngu ya mu vhunetela. (Ekl. 4:9, 10) Se ngako u txi rambwa u nga maha txani ti to u vhuneta kasi ku txigondo txi pfisisa ati txi ti gondako?

6. Mbimo yi hi ku ya tsimbitisa txigondo hi nga thumisisa kutxani ditshina da mlayo adi di ku ka Mavingu 20:18?

⁶ Lulamisela kwati. Txo khata, wotisa nyamne wa txigondo mayelano ni txigondo txakwe. (Lera Mavingu 20:18.) U nga mu wotisa tiya: “Ngu tihi ti u ti zivako mayelano ni txigondo txako? Ngu tihi ti hi no ya gonda ngu tona? Ngu txihi txikongomelo txa gondo? Ngu tihi ni fanelako ku ti womba ni kwa mbi ti womba mbimo yi hi tsimbitisako gondo? Ngu tihi ti nga vhunako txigondo ti to txi kula?” Ditshuri ti to nyamne wa txigondo kha na mbi womba ta txihunja, kambe a na kugela ati ti no vhuna txigondo. Murumiwa mmwani awu a dhanwako ku i Joy a tolovela ku va ni mabhulo o nga toneto ni va a lavako ku ya tsimbitisa txigondo navo. Ene a khene: “Eto ta vhuna awu ni nga mu ramba ti to e ziva to a nga vhunisa kutxani txigondo.”

7. Ngu kutxani u di fanete u lulamisela ngako u di rambilwe ku ya tsimbitisa gondo?

⁷ Ngako u di rambilwe ku ya tsimbitisa txigondo ti nga va tinene kululamisela ati mi no ya gonda ngu tona. (Ezra 7:10) Dorin, mwanathu wu hi nga bhula ngu ngene makhatoni  a womba tiya: “Na tsaka ngako awu ni mu rambako ku ya tsimbitisa txigondo a txi lulamisela kwati. Eto ti mu vhuna ku e ya vhuneta kwati.” I singeto dwe, txigondo txi na wona ti to hotshe hi lulamisete gondo se txi na lava kutekelela txikombiso txathu. Hambi i di ti to khu sikoti kululamisela txidotho ngu txidotho ka gondo yoneyo, pelomenus hi yi ziva kwati gondo yoneyo.

8. Hi nga mahisa kutxani ti to mkombelo wathu wu vhuna txigondo?

⁸ Nda lisima kumaha mkombelo u si se khata gondo, ngu toneto lulamisela kwati ati u no ya ti womba ka mkombelo. U txi maha toneto mkombelo wako wu na vhuna txigondo. (Mas. 141:2) Mwanathu Hanae awu a zumbako Japão a ngadi a txi khumbula mapswi a mkombelo wa mwanathu awu a nga txi tsula ni m’gondisi wakwe. Ene a womba tiya: “Ka mkombelo wonewo ni woni to mwanathu wule a ti ni wuxaka wo tsana ni Jehovha, se ni lavile ku m’tekelela. Ni tshumete ni tipfa ni di wa lisima mbimo yi a nga ti womba ditina dangu ka mkombelo.”

9. Ngu kuya ngu Jakobe 1:19, hi nga maha txani kasi kuvhuneta ngako hi di rambilwe kuya tsimbitisa txigondo?

⁹ Vhuneta awu a tsimbitisako gondo. Nyaphandule mmwani wo sawuleka wa Nigéria awu a dhanwako ku i Omamuyovbi a womba tiya: “Vanathu va hi va rambako ku ya tsimbitisa gondo va riya kwati nzeve, hambiketo kha va tateli to womba. Vona va ti ziva ti to nyamne wa txigondo ngene a tsimbitisako.” Ni nga ti zivisa kutxani ati ni fanelako kuwomba ni ti to ni nga ti womba mbimo muni? (Mav. 25:11) Riya kwati nzeve mbimo yi nyamne wa gondo a womba-wombako ni txigondo, se i di kona u no ningela txivhuno ngako ti txi laveka. (Lera Jakobe 1:19.) Hambiketo, ti lava u alakanyisisa u si se womba. Ngu txikombiso, khu na mbi womba-womba ti di tate, nem khu na mbi mu belela mkanani nyamne wa txigondo mwendo ku ya vhuka mhaka yimwani. Kambe ngu mapswi o koma u nga thumisa txikombiso, txiwotiso kasi kuvhuna txigondo txi pfisisa mhaka yo kari. Mbimo yimwani u nga tipfa nga khwa maha to tala kasi kuvhuna txigondo. Kambe, ngako u txi txi ndunduzela ni ku kombisa ti to wa khatala ngu txona u nga txi vhuna txi kula ngu didhawa da moya.

10. Kubhulela txigondo to manana nato ti nga txi vhunisa kutxani?

¹⁰ M’bhulele ati ti nga kuhumelela. Ngako ti txi dingana u nga mu bhulela nzila yi u nga gonda ngu yona ditshuri, nzila yi u nga xula ngu yona sikarato ni nzila yi Jehovha a nga kuvhuna ngu yona ka wutomi wako. (Mas. 78:4, 7) Eto ti nga vhuna txigondo txako. Ti nga tshumela ti tsanisa likholo la txona ni ku ti nga txi kuzeta ku txi kula ngu didhawa da  moya txi hokela ko bhabhatiswa. Ti nga tshumela ti vhuna txigondo txi ziva kuwonisana ni sikarato asi txi mananako naso. (1 Pedro 5:9) Gabriel wa Brasil wa khumbula nzila yi a nga vhuneka ngu yona mbimo yi a nga ti gonda Bhiblia. Ene a khene: “Mbimo yi va nga hi bhulela ati ti nga va humelela, ni ti woni ti to Jehovha wa si wona sikarato asi hi manako naso. Ni tshumete ni wona ti to aku vona va nga si xula, nanani ni nga sixula.”

11-12. Ngu kutxani hi di fanete kuamukela sigondo asi si tako mitshanganoni?

¹¹ Ti to txigondo txi kula txi hokelela ko bhabhatiswa txi fanete txi ta mitshanganoni mbimo yotshe ni ku tshumela txi vhuneka ka yona. (Vaheb. 10:24, 25) Ngu tolovelo nyamne wa txi gondo ngene a txi rambako ngu dikhambi do khata. Mbimo yi txi tako, hotshethu hi fanete ku txi kuzeta ku txi simama txi ta mitshanganoni. Hi nga mahisa kutxani toneto?

¹² Amukela txigondo ngu manza mambidi. (Var. 15:7) Ngako txi gondo txi txi wona to txa amukeleka mitshanganoni txi nga lava kusimama txi ta. U nga txi lose ngu nzila yi txi nga mbi yi tolovela. Txi kombe vanathu vamwani. U nga ti veke ko khawe ku ni wu amu khatalelako, ti nga maha nyamne wa txigondo a di txetwe mwendo a di ni mithumo yimwani. Riya kwati nzeve ka ti txigondo txi tiwombako u tshumela u kombisa kukhatala ngu txona. Ina eto ti nga vhuna txigondo? Mwanathu Dmitrii awu a ku ngadi kubhabhatiswa, awu konku a thumako kota dilanda da wuthumeli a womba tiya: “Mwanathu mmwani a ni woni ni di emile hahanze ka Nyumba ya Mfumo, se a ti ta ni teka ni bela nayo. Vanathu vo tala va ti ta ni losa. Eto ti ni tsakisile ha koza ni navela ku mitshangano yi txi mahwa ditshiku ni ditshiku. Ati ni nga ti wona ni si khali ku tiwona ka wukhalo wumwani.”

13. Mahanyelo ako ma nga vhunisa kutxani txigondo txa Bhiblia?

¹³ Veka txikombiso txa txinene. Mahanyelo ako ma nga vhuna txigondo kuwona ti to txi mani ditshuri. (Mat. 5:16) Vitalii wa Moldávia awu a thumako kota nyaphandule a womba tiya: “Ni gondile to tala ka mahanyelo a vanathu vamwani dibanzani. Eto ti ni tsanisekisile ti to Tifakazi ta Jehovha ngu ditshuri ti tsimbila ni Txizimu.”

14. Txikombiso txathu txa txinene, txi nga vhunisa kutxani txigondo txi kula ngu didhawa da moya?

¹⁴ Ti to txigondo txi hokela ko bhabhatiswa txi fanete txi thumisa ati txi ti gondako. Eto ka ti hehuki. Kambe mbimo yi txi wonako nzila yi u wuyelwako ngu yona ngu kuthumisa matshina a milayo a Bhiblia txi susumeteleka kukuetetela. (1 Vak. 11:1) Wona ati  Hanae awu hi nga womba-womba ngu ngene a ti wombako, ene a khene: “Ati ni nga ti ti gonda, vanathu va ti ti maha. Ni gondile nzila yo divalela ni kukombisa lirando. Vona va si womba-wombi kubiha ngu vamwani. Se ni lavile ku va etetela.”

15. Ngu kuya ngu Mavingu 27:17, NM, ngu kutxani i di ta lisima kumaha wungana ni sigondo asi si tako mitshanganoni?

¹⁵ Maha wungana ni txigondo. Mbimo yi txigondo txi simamako txi ta mitshanganoni kombisa ti to wa khatala ngu txona. (Vaf. 2:4) Peka natxo papo, txi ndunduzele ngu kutxitxa ku txi nga kumaha. U nga lave kuziva wuxoko-xoko wa wutomi wa txona, u nga txi wotisa ngu ta gondo ya txona, mwaya wa txona ni mthumo. Mabhulo onewo ma nga mi maha mi va vangana. Ngako mi txi maha wungana, u nga txi vhuna txi kula txi hokela ko bhabhatiswa. (Lera Mavingu 27:17, NM.) Hanae konkuwa a thuma kota nyaphandule wa mbimo yotshe. Ene a womba tiya mayelano ni mbimo yi a nga khata kuya mitshanganoni: “Ni vile ni vangana mitshangano, se ni txi ti tsakela kuya kona hambi ni di karate. Ni txi tsaka ngu kuva ni vangana va vaphya, se ti vhunile ku ni wila wungana ni vathu ava va si thumeliko Jehovha. Ni lavile kutshuketa hafuhi ka Jehovha ni ka vanathu. Ngu toneto, ni mahile txisungo txo ni bhabhatiswa.”

16. Ngu tihi timwani hi nga ti mahaka ti to hi vhuna txigondo txi tipfa i di txa lisima dibanzani?

¹⁶ Mbimo yi txigondo txi kulaka ni kumaha kutxitxa txi vhune txi tipfa i di txa lisima dibanzani. U nga maha toneto ngu kutiha mbimo yo va natxo. (Vaheb. 13:2) Denis awu a zumbako Moldávia a txi khumbula mbimo yi i nga ti ngadi txigondo txa Bhiblia a womba tiya: “Makhambi o tala vanathu va txi ni ramba ni msikati wangu ti to hi ya sakana navo. Ti txi hi tsanisa ku va pfa va txi womba ati Jehovha a nga va vhunisa tona. Eto ti hi vhunile ku hi tiemisela kusimama hi thumela Jehovha nikutshumela hi tsaniseka ti to hi na ta mana makatekwa o tala mbimo yi yi tako.” Mbimo yi txigondo txi vako muhuweleli txi rambe ti to mi huma motshe thembwe. Diego wa Brazil awu i ku muhuweleli a womba tiya: “Vanathu vo tala va ni ramba ku ni huma nayo thembwe. Eyo nzila ya yinene ya ku va ziva kwati. Na gonda to tala kwawe ni ku ta ni kulisa wuxaka wangu ni Jehovha ni Jesu.”

17. Madhota ma nga vhunisa kutxani txigondo txa Bhiblia?

¹⁷ Kombisa kukhatala ngu txigondo. Anu madhota, lirando ni kukhatala kwanu ngu nga vhuna txigondo txi kula txi hokelela ko bhabhatiswa. Ngako txigondo txi ni tile mitshanganoni ti heni mbimo yo bhula natxo. Txigondo  txi nga wona ti to wa khatala ngu txona ngu kukhumbula ditina da txona ngutu-ngutu mbimo yi txi lavako kuxamula. Ka mithumo yako, ti siyele mbimo yo huma thembwe ni vahuweleli, eto ti nga va ni wuyelo ya hombe ka sigondo. Mawanathu mmwani a dhanwako ku i Jackie awu i ku nyaphandule a zumbako Nigéria a womba tiya: “Sigondo sangu si xamate mbimo yi si nga wona ti to mwanathu awu ni nga ti nayo thembweni didhota. Txigondo tximwani txi wombile tiya: ‘Vafundisi vathu kha mahi tiya, vona va pfuxela vo ganya dwe. Ni ku va lava male kasi kumaha toneto.’” Txigondo txangu konkuwa txa xalela mitshangano.

18. Madhota ma nga wu hetisisa kutxani mthumo wawe awu wu ka Mithumo 20:28?

¹⁸ Treinara ni kukuzeta vahuweleli. Anu madhota mu ni wutixamuleli wo vhuna vahuweleli ti to ve humelela ka mthumo wawe wo txhumayela kupata ni wu wo tsimbitisa sigondo. (Lera Mithumo 20:28.) Ngako muhuweleli a di ni tingana to tsimbitisa txigondo masoni kwako u nga mu tsimbitisela. Jackie awu hi nga womba-womba ngu ngene makhatoni a womba tiya: “Madhota ma tolovela ku ni wotisa mayelano ni sigondo sangu. Mbimo yi ni mananako ni sikarato ko tsimbitisa sigondo ona ma ni ninga sialakanyiso.” Madhota ma nga kuzeta ni kutsanisa vahuweleli. (1 Vat. 5:11) Jackie a tshumele a txi khene: “Na tsaka mbimo yi madhota ma ni kuzetako ni ku ni gela ti to ma bonga mthumo awu ni wu mahako. Eto ti fana ni kusela mati o titila ni txi pfa ditora da hombe. Mbimo yi va ni ndunduzelako ti ni maha ni tipfa ni di wa lisima ni kuengetela litsako ka mthumo wo maha vagondiswa.”—Mav. 25:25.

19. Ngu tihi ati hotshethu hi nga ti mahako?

¹⁹ Hambi i di ti to kha hi nga ni sigondo asi hi si tsimbitisako konakuwa hi nga vhuna sigondo sa vamwani ti to si kula ngu didhawa da moya. Kha ti lavi ku tatela to womba, to lava hi ti lulamisela ti to hi ya vhuneta ko tsimbitisa txigondo. Hi nga aka wungana ni sigondo mbimo yi si tako mitshanganoni, hi nga va ni mahanyelo a manene aya sigondo si no tsakela ku ma tekelela. Madhota ni ona ma nga kuzeta awu a ku ni txigondo kumweko ni txigondo txawe, ni ku tiha mbimo yo va navo. Ona ma nga tshumela me va treinara ni kundunduzela vahuweleli. Ta tsakisa kuziva ti to hi mahile to kari kasi ku vhuna m’thu e ziva Jehovha ni ku mthumela.