1. Ngu kuya ngu Matewu 28:18-20, ngu txihi txirumo atxi Jesu a nga ningela?

MSANA kova Jesu a di wusilwe ka vakufa, a humelete ka vagondiswa vakwe ava va nga ti tshanganile Galileya. Ene a ti ni timhaka ta lisima ati a nga ti lava ku va gela. Ngu tihi ta kona? Tona ti maneka ka Matewu 28:18-20.—Yi lere.

2. Ngu sihi siwotiso asi hi no bhula ngu sona?

² Txirumo txa Jesu txo maha vagondiswa txi ngadi txi txi thuma ni kwathu nyami. Ka gondo yiya hi na bhula ngu siwotiso siraru asi si yelanako ni txirumo atxi Jesu a nga hi ninga. Txo khata, hi txi gondisa m’thu mayelano ni Txizimu hi fanete kutshumela hi maha txani? Txa wumbidi, vanathu dibanzani va nga vhunisa kutxani ti to txigondo txi kula ngu didhawa da moya? Txa wuraro, hi nga va vhunisa kutxani vanathu va va nga hola ti to ve wuyela ka mthumo wo maha vagondiswa?

3. Ngu tihi ti Jesu a nga ti veka hakubasani ka txirumo txakwe?

³ Txirumo txa Jesu txi hakubasani. Hi fanete kugondisa vathu ati Jesu a nga hi leleta. Hambi keto, hi fanete kukhumbula timhaka ta lisima ngutu. Jesu kha nga khene: ‘Mi txi va gondisa totshe tiya ni nga mi leleta tona.’ Kambe a ti khene: “Mi txi va gondisa kuvekisa totshe tiya ni nga mi leleta tona.” Ti to hi engisa txirumo txa Jesu hi txi maha vagondiswa ti lava hi va gondisa hi tshumela hi va kongomisa. (Mith. 8:31) Ngu kutxani toneto ti txi laveka?

4. Ti womba txani ku vekisa sirumo? Womba txikombiso.

⁴ “Kuvekisa” sirumo ti womba ku si engisa. He wone txikombiso a txi txi nga hi vhunako kuwona to hi nga gondisisa kutxani m’thu e vekisa mwendo kuengisa sirumo sa Jesu. Mgondisi  wa to tsimbitisa mimovha a maha txani kasi ku gondisa va aluno vakwe kasi ku vekisa milawu ya ta sitarato? Ku khata a va gondisa milawu yoneyo va di salani, hambi keto ti to e va gondisa ku vekisa milawu yoneyo ti lava e ava gondisa timwani. Ene a fanete ku teka va aluno vakwe, e va veka txitaratoni e va komba nzila yo thumisa ati va nga gonda va di salani. Hi nga gonda txani ka txikombiso txiya?

5. a) Ngu kuya ngu Johani 14:15; 1 Johani 2:3 ngu tihi a ti hi fanelako kugondisa sigondo sathu ku si ti maha? b) Womba txikombiso txa ti hi nga vhunisako tona sigondo sathu.

⁵ Mbimo yi hi gondako Bhiblia ni vamwani hi fanete ku va gondisa ati Txizimu txi ti lavako kwathu. Kambe kha ha fanela ku gwitela eho. Hi fanete hi gondisa sigondo sathu kuthumisa ati si ti gondako ka wutomi wa sona wa ditshiku ni ditshiku. (Lera Johani 14:15; 1 Johani 2:3.) Ngu txikombiso hi nga komba sigondo sathu kuthumisa matshina a milayo ya Bhiblia si di txikolwani, mthumoni hambi va di ka misakano. Hi nga womba ati kuthumisa matshina a milayo ya Bhiblia ti nga hi vhikelisa tona, ni ku hi vhuna kumaha sisungo sa sinene. Mbimo yi hi gondako navo hi nga kombela moya wo sawuleka ka Jehovha ti to wu va kongomisa.—Joh. 16:13.

6. Ngu tihi ti patekako ko vhuna vamwani ve veketa sirhumo sa Jesu?

⁶ Ngu tihi timwani ati ti patekako ko gondisa m’thu e vekisa sirumo sa Jesu? Ti lava hi vhuna sigondo sathu si navela kutxhumayela. Simwani sigondo sa thava ku txhumayela. Se ti lava hi timisela mbimo yi hi va vhunako ti to ve pfisisa ditshuri da mu Bhiblia, eto ti na gwesa mbilu yawe se ti va susumetela kulava kutxhumayela. Hi nga maha txani ti to hi vhuna sigondo sathu si tsakela kutxhumayela vamwani?

7. Hi nga txi vhunisa kutxani txigondo txi tsakela kutxhumayela vamwani?

⁷ U nga wotisa txigondo txako siwotiso so fana ni siya: “Ina ditshuri di tshukwatisile wutomi wako? Ina u ti wona i di ta lisima ku vamwani ve di ziva? U nga maha txani ti to u vhuna?” (Mav. 3:27; Mat. 9:37, 38) U nga komba siphephana si si ku ka Farameti yathu yo Gondisa txigondo txako u txi gela txi sawula a txi txi nga txi thumisako, kasiku txi vhuna vangana, maxaka ni va thumi kolowe. Mningi siphephana so kari. Mkombe sikombiso sa nzila yi a nga ningelisako ngu yona ngu nzila ya txixonipho. Hambi keto mbimo yi a no va muhuweleli wo mbi bhabhatiswa hi na tsakela kutxhumayela nayo kasiku hi simama hi mu kongomisa.—Ekl. 4:9, 10; Luka 6:40.

8. Ngukutxani i di ta lisama ku txigondo txi kulisa lirando la txona ngu Txizimu ni vaakelani? (Wona dibhokiso di di ku khene “ U nga vhunisa kutxani sigondo’ ti to si randa Txizimu.”)

⁸ Khumbula ti to Jesu a hi rumile ku gondisa vamwani “ku ve vekisa totshe” ti a nga hi leleta tona. Toneto ti pata sirumo simbidi sa hombe ka sotshe a si si yelanako ni ku txhumayela ni ku maha vagondiswa, i ku—kuranda Txizimu ni vaakelani. (Mat. 22:37-39) Si yelana ngu nzila yihi? Atxi txi hi susumetelako kutxhumayela; lirando ngu Txizimu ni ngu muakelani. Sigondo simwani si nga thava kupateka ka mthumo wo txhumayela. Kambe hi nga si tsanisa ti to ngu kona ha ko vhunwa ngu Jehovha si nga xula ku thava. (Mas. 18:1-3; Mav. 29:25) Dibhokiso di di tsimbitisanako ni gondo yi ya di kombisa a ti hi nga ti mahako ti to hi vhuna txigondo txi kulisa lirando ngu Txizimu. Dibanza di nga maha ti to di vhuna vahuweleli va vaphya ti to ve kulisa lirando ngu Jehovha?

9. Aluno wo tsimbitisa mmovha a gondisa kutxani matsimbitiselo a manene a mmovha?

 ⁹ He tshumele hi bhula ngu txikombiso txa aluno wo tsimbitisa mmovha. Mbimo yi va ku ha txitaratoni aluno a gonda ngu nzila muni? A gonda ngu kuengisa ati mgondisi a mgelako ni kuwona ati va mahisako tona vatsimbitisi vamwani. Ngu txikombiso mgondisi a nga mkomba vatsimbitisi vavanene a va va nyiselako nzila va kwawe. Mwendo mgondisi a nga komba aluno vatsimbitisi a va va hungutako liwoningo la magezi ti to va si tsunyi vakwawe. Aluno a nga gonda ka sikombiso soneso nzila ya yinene yo tsimbitisa mmovha wakwe.

10. Nji txani txi ngo vhuna txigondo ti to txi kula ngu didhawa da moya?

¹⁰ Ngu nzila yi yi fanako txigondo txi txi khatako kuthumela Jehovha kha txi gwiteli kugonda ka mgondisi wa txona dwe, kambe txi tshumela txi gonda ka vanathu vamwani vo thembeka. Se njitxani txi nga vhunako txigondo ku txi kula ngu didhawa da moya kudotho-kudotho? Ngu xalela mitshangano. Ngu kutxani toneto i di ta lisima? Nguko tigondo ti txi no ti mana mitshanganoni ti nga txivhuna ku txi engetela wuzivi wa txona, txi tsanisa likholo ni ku txi vhuna ti to txi kulisa lirando la txona ngu Jehovha. (Mith. 15:30-32) A di mitshanganoni mgondisi a nga tshumela e komba txigondo vanathu va va tshanganako ni sikarato so fana ni sakwe. Txigondo txi na ziva vanathu a va va kombisako lirando dibanzani. He wone sikombiso si si londiselako.

11. Txigondo txi nga vhunekisa kutxani ngu sikombiso si txi nga si manako dibanzani?

¹¹ Alakanya ngu txigondo atxi txi kulisako vanana txi di txokha, txi txi wona mwanathu wu a ku ka txiemo atxi txi fanako ni txakwe. Txona txi nga gweseka mbilu ngu kuwona mizamo a yi mwanathu wule ayi mahako yo ta mitshanganoni ni vanana vakwe. Tshumela u alakanya ngu txigondo atxi txi lwako ti to txi xula mkhuva wo dhaha, txi txi ziva mwanathu wu nene a nga di ka txikarato txi txi fanako kambe se a nga txi xula. Mwanathu eneyo a nga bhulela nzila yi lirando lakwe ngu Jehovha li nga mvhuna ngu yona ti to e leka kudhaha. (2 Vak. 7:1; Vaf. 4:13) Msana kova mwanathu a di bhulete txigondo ati a nga sikotisa tona kuleka kudhaha, a nga tsanisekisa txigondo to ni txona txi nga sikota ku leka kudhaha. Tshumela kambe u alakanya ngu txigondo txi i ku ngadi dihorana txiwonako mwanathu wu i kuphya a txi tiguleta ngu kuva Fakazi. Mbimo yi txigondo txi wonako litsako li mwanathu wule a ku nalo ti nga txi maha txi lava kuziva ti to a ti kotisa kutxani kuzuba a di tsakile.

12. Ngu kutxani hi nga wombako ti to mwani ni mwani wathu dibanzani a nga vhuna sigondo?

¹² Mbimo yi txigondo txi zivako vanathu vo hambana-hambana txona txi nga gonda ko engisa txirumo txa Jesu txo randa Txizimu ni muakelani. (Joh. 13:35; 1 Tim. 4:12) Kuengetela keto txigondo txi nga gonda ka sikombiso sa vanathu ava va nga wonisana ni sikarato so fana ni si txi mananako naso. Txigondo txi nga gonda ka sikombiso soneso ti to ni txona txi nga maha kutxitxa ku kulavekako ti to txi va mgondiswa wa Kristu. (Dhewut. 30:11) Hotshethu dibanzani hi nga vhuneta ti to txigondo txi kula ngu didhawa da moya. (Mat. 5:16) Ngu tihi ti u nga ti mahako ti to u vhuna txigondo txi txi tako mitshanganoni?

13-14. Jesu a va ñolisile kutxani vapostoli vakwe mbimo yi va nga ti godhote?

¹³ Hi lava kuvhuna vanathu va va nga hola ti to ve ta maha mthumo wu Jesu a nga hi ruma wo maha vagondiswa. Hi nga gonda ati hi nga mahisako tona ka nzila yi Jesu a nga ñola ngu yona vagondiswa vakwe ava va nga ti godhote.

¹⁴ Mbimo yi Jesu a nga ti hafuhi ni ku dawa, vapostoli “va to mu leka ve thava votshe.” (Marku 14:50; Joh. 16:32) Jesu a va ñolisile kutxani vapostoli vakwe mbimo yi va nga ti gumile mtamo? Neti Jesu a nga wuswa a gete vamwani ka vagondiswa vakwe a txi khene: “mi nga thaveni txilo tsulani mi ya gela vamwani ti to [ni wusilwe].” (Mat. 28:10a) Jesu kha nga tsukula vapostoli vakwe. Hambi ku va nga ti mu tutumile, ene a simamile e va dhana ku “vanathu.” Kufana ni Jehovha Jesu a di ni wuxinji ni ku divalela.—2 Vafu. 13:23.

15. Hi tipfisa kutxani ngu vanathu va va nga ema kutxhumayela?

¹⁵ Kufana ni Jesu nathu ha karateka ngu vanathu va va nga ema kutxhumayela. Vona i ngadi vanathu ni ku ha va randa ngutu. Hi ngadi hi txi khumbula mithumo yawe ni lirando li va nga li kombisa, hambi i di ti to kupinda mbimo yo lapha. (Vaheb. 6:10) Ngu ditshuri ha va xuva! (Luka 15:4-7) Kufana ni Jesu hi nga kombisisa kutxani ti to ha karateka ngu vanathu vonevo?

16. Hi nga kombisisa kutxani ti to ha karateka ngu vanathu va va nga hola?

¹⁶ Va rambe ngu lirando. Yimweyo ya tinzila ti Jesu a nga kuzeta ngu yona vapostoli vakwe ngu va ramba ti to ve ya tshangana. (Mat. 28:10b; 1 Vak. 15:6) Ngu ha ku fanako nathu nyamsi hi nga kuzeta vanathu ti to veta mitshanganoni ngako va ti emile kuta. Ha tiziva ti to ti nga lava hi va ramba makhambi o tala va siti. Ti hakubasani ti to Jesu a tsakile ngutu mbimo yi vagondiswa vakwe va nga maneka ka txirambo txakwe.—Fananisa Matewu 28:16 ni Luka 15:6.

17. Hi nga maha txani nga ku hi txi wona mwanathu wu a nga hola a txi hoka mitshanganoni?

¹⁷ Va hoyozele ti txi huma mbiluni. Jesu a mahile to vagondiswa vakwe ve tipfa va txi amukeleka kwakwe, ene a tekile dizambo do va hoyozela. (Mat. 28:18) Hi maha txani ngako hi txi wona mwanathu wu a nga hola a txi hoka mitshanganoni? Ti lava hi teka dizambo do va hoyozela ngu lirando ni ku va losa. Ti nga maha hi si tizivi to hi nga maha txani. Kambe hi fanete kuvayilela ku va thela tingana, hi nga va gela ti to ha tsaka ngu ku va navo.

18. Hi nga maha txani ti to hi tsanisa vanathu va va nga hola?

¹⁸ Va tsanise. Vagondiswa va Jesu ti nga maha va di dhukile mbimo yi va nga ziva ti to va di fanete kutxhumayela hamafuni kotshe. Jesu a va tsanisile ngu ku va gela ti ya: “Ni ni nanu yotshe mbimo.” (Mat. 28:20) Ina mapswi onewo ma va vhuni? Ina ma va vhuni. Ngu txikuluveta vona va ti bhisi “kugondisa, . . . ve nuwela mahungu a maphya a Jesu Kristu.” (Mith. 5:42) Vahuweleli va va nga hola ni vona va lava ku tsaniswa. Vona va nga thava kutshumela ve txhumayela. Athu hi nga va tsanisa ngu ku va gela ti to va na mbi maha mthumo wuwa vokha. Ngako va di tiemisete hi nga huma navo thembwe. Ti hakubasani ti to vahuweleli vonevo va na tsakela ku vhunwa mbimo yi va khatako kutxhumayela mahungu a manene. Ngako hi txi va teka kota vangana vathu dibanza di na wuyelwa.

19. Ngu tihi ti hi nga tiemisela ku maha? Ngu kutxani?

¹⁹ Hi na simama hi maha vagondiswa kala ditshiku? Hi na simama kala mafu a Sathani me loviswa. (Mat. 28:20) Ina hi na sikota kusimama hi txhumayela ni kumaha vagondiswa kala magwito? Athu hi ti emisete ku maha toneto, ngu litsako hi ti emisete kuthumisa mbimo yathu, mtamo ni silo sathu ti to hi mana ‘vale va ku ni fanelo ya wutomi wo mbi guma.’ (Mith. 13:48) Ngako hi txi maha toneto hi etetela txikombiso txa Jesu. Ene a ti khene: “Sakudya sango ngu maha kudhunda ka wu a nga ni ruma ni ku hetisisa mthumo wakwe.” (Joh. 4:34; 17:4) Nanathu hi navela toneto. Hi lava kuhetisisa mthumo awu a nga hi ninga. (Joh. 20:21) Ni ku hi lava ku vhuna vamwani kupata ni va va nga hola ti to ve tsanisela ka mthumo wuwa.—Mat. 24:13.

20. Ngu kuya ngu Vafilipiya 4:13, hi tizivisa kutxani ti to hi na sikota ku hetisisa mthumo wu Jesu a nga hi ruma?

²⁰ Ku hetisisa txirumo txa Jesu kha ta hehuka. Hambiketo mthumo wuwa hi na mbi wu maha hokha, Jesu a thembisile ti to a nava ni nathu. Mbimo yi hi hetisisako mthumo wo maha vagondiswa hi thuma kota “vavhuneteli va Txizimu” ni ku hi “sithumi sa Kristu.” (1 Vak. 3:9; 2 Vak. 2:17) Ngu toneto hi na sikota ku wu hetisisa. Hi nga wona lungelo yo tsakisa yo hetisisa mthumo wu Jesu a nga hi ruma, ni kuvhuna vamwani ti to ni vona ve maha toneto!—Lera Vafilipiya 4:13.