1. 2 Vakorinto 3:1-3, yi hi vhunisa kutxani kuwona lisima lo gondisa m’thu e hokelwa ko bhabhatiswa? (Wona mfota wa kapa.)

U TI pfisa kutxani u txi wona txigondo txa dibanzani kwako txi txi bhabhatiswa? Ngu ditshuri eto ta ku tsakisa! (Mat. 28:19) Ngako i di awe u nga mtsimbitisela gondo litsako lako nda hombe ngutu ku mu wona a txi bhabhatiswa! (1 Vat. 2:19, 20) Ku va txigondo txa Bhiblia txi di kute ngu didhawa da moya txi hokela ko bhabhatiswa ti kombisa ti to awe kumweko ni dibanza mi thumile ngutu to mi txi vhuna kuza txi hokelela makungo oneyo. Hi nga womba ti to txigondo txo ngadi ku bhabhatiswa txi fana ni “mapapilo o emela dibanza” kumweko ni mwanathu wu a nga txi gondela kala kuza txi bhabhatiswa.—Lera 2 Vakorinto 3: 1-3.

2. a) Ngu txihi txiwotiso txa lisima a txi hi fanelako ku tiwotisa, ngu kutxani? b) Nji txani gondo ya Bhiblia? (Wona txhamuselo ya hahatshi.)

² Ta tsakisa kuwona to ka mune wa malembe aya ma nga pinda, kutsimbitisilwe kona mu ka 10.000.000 wa sigondo sa Bhiblia * mtxima ni mtxima. Mndani ka malembe oneyo, 280.000 wa sigondo si bhabhatisilwe si va Tifakazi ta Jehovha ni ku va vagondiswa va Kristu. Hi nga maha txani ti to hi vhuna timiliyoni ta sigondo soneso sa Bhiblia ti to si bhabhatiswa? A ku Jehovha a ku ngadi a txi tumelela vathu ku ve va vagondiswa nathu, hi lava kumaha ati hi nga ti kotako  ngu txikuluveta ti to hi va gondisa ve va vagondiswa ve hokela ha ko bhabhatiswa. Nguko mbimo yi tsute!—1 Vak. 7:29a; 1 Pedro 4:7.

3. Ngu tihi ti hi no ti gonda ka msungo wuwa?

³ Aku txilaveko txo maha vagondiswa i ku txa txikuluveta Mmidi wu wu Fumako wu wotisile makomisawu a ma Bhetele a matiko o hambana-hambana ti to ku nga mahwa txani to ku vhunwa sigondo ti to si kula si hokela ko si bhabhatiswa. Ka gondo yiya ni yi yi londiselako hi na wona ti to hi nga gonda txani ka vanyaphandule, varumiwa ni va woneleli va sigava. * (Mav 11:14; 15:22) Tona ti na hi vhuna kuwona ati vahuweleli ni sigondo va fanelako kumaha ti to gondo yi humelela. Ka gondo yiya hi na wona 5 wa timhaka ati sigondo si fanelako kumaha ti to si kula si hokelela ko bhabhatiswa.

4. Ngu tihi ti hi fanelako ku tiziva ngu gondo ya Bhiblia yo koma?

⁴ Vanathu vo tala va heta mbimonyana ya yidotho va txi tshimbitisa gondo ya Bhiblia, mbimo yimwani va di emile. U txi nga txi khata eto ti nga vhuna ku m’thu e tsakela gondo, kambe ti nga maha gondo yi si mahwi divhiki ni divhiki. Kasi kusakulela kutsakela vahuweleli vamwani va kombela tinumero ta sigondo ti to ve bhula naso ngu timhaka ta Bhiblia ka masiku ya va si tsuliko. Mabhulo oneyo ma nga teka mitxima txigondo txi si kuli. U alakanya ti to txigondo txa Bhiblia txi nga hokela ha ko bhabhatiswa ngu mamahelo oneyo na txi si ti karati ni ku tininga mbimo yo gonda Bhiblia? Ti ha kubasani ti to ti nge koteki.

5. Ngu kuya ngu Luka 14:27-33, ngu tihi ti Jesu a nga ti womba ati ti nga hi vhunako ka mthumo wathu wo maha vagondiswa?

⁵ Jesu a kombisile ati ti lavekako ti to eva mgondiswa. Ene a fananisile ni m’thu wu a lava kuaka txitezi ni mkoma wu a lavako ku yalwa yimbi. Jesu a wombile ti to muaki a fanete ‘kuthanga ngu kukhalahatsha a txi bala mtengo wa si si lavekako’ ti to e heta txitezi txakwe, kasi mkoma nene a fanete ‘kuthanga ngu kukhalahatsha a txi wonisisa’ ti to masotxhwa akwe ma nga sikota kuxula. (Lera Luka 14:27-33.) Ngu ha kufanako Jesu a txi ti ziva ti to a wu a lavako kuva mgondiswa wakwe a fanete ku alakanyisisa ngu ti to ti womba txani kuva mlondeteli wakwe. Ngu toneto ti lava hi kuzeta votshe va hi gondako navo to hi gonda navo divhiki ni divhiki. Hi nga ti mahisa kutxani toneto?

6. Hi nga maha txani ti to txigondo txathu txi kula?

 ⁶ Ti lava hi kuzeta txigondo ku hi gonda natxo divhiki ni divhiki. Ti to hi maha toneto, txo khata hi fanete kuengetela mbimo yi hi yi hetako hi txi gonda natxo. Hahanze ko komisa gondo dikhambi dimwani ni dimwani u mu endelako u nga laphisa gondo. A txi za nyamne wa m’ti, e tolovela mbimo yo lapha hi nga mkombela kuengetela mbimo ayi hi yi hetako hi txi gonda nayo. Nzila yi a no xamula ngu yona yi na tiveka hakubasani ti to wa yi tekela ha msungo gondo ya Bhiblia mwendo ahim-him. Ngako a txi tumela hi nga mkombela ti to hi gonda nayo kumbidi ngu divhiki. Hambiketo kugonda nayo divhiki ni divhiki kha ta enela.

7. M’gondisi a nga lulamiselisa kutxani gondo ya Bhiblia?

⁷ Kota mgondisi, u fanete ku ti lulamisela ka gondo yimwani ni yimwani ya Bhiblia. U nga khata ngu kulera didungula da kona, u gwita u wona mibhalo. Pfisisa kwati timhaka ta lisima, alakanyisisa kwati ngu msungo wa mhaka, sisungwana sa timhaka si nga ñola gondo yoneyo, mibhalo yi yi nga kombiswa ku lera, siwotiso, mifota ni mavhidhiyo ya ma no kuvhuna kutxhamusela kwati gondo yoneyo. Alakanyisisa ngu txigondo txako, u pimisa ngu nzila yi u nga txhamuselako ngu yona timhaka kasiku e ti pfisisa ni ku e tshumela e ti thumisa.—Neh. 8:8; Mav. 15:28a.

8. Ngu tihi ti dibhuku da Vakolosa 1:9, 10 di hi gelako ku hi ti maha mayelano ni sigondo sathu?

⁸ Mbimo yi u lulamiselako gondo kombela Jehovha e kuvhuna ti to u pfisisa silaveko sa txigondo txako. Mkombele e kuvhuna u gondisa ngu nzila yi yi no gwesa mbilu ya txigondo. (Lera Vakolosa 1:9, 10.) Alakanyisisa ngu timhaka ti ti nga karatelako txigondo ku txi ti pfisisa ni ku ti tumela. Khumbula ti to txikongomelo txa wena ngu m’vhuna e kula e bhabhatiswa.

9. Hi nga txi vhunisa kutxani txigondo ti to txi lulamisela gondo? Txhamusela.

⁹ Mbimo yi hi gondako ni txigondo hi si lovhi, hi navela ti to txigondo txi tsakela a ti Jehovha ni Jesu va nga ti maha se txi navela ku gonda to tala. (Mat. 5:3, 6) Ti to txigondo txi wuyelwa, txi fanete kuveka mapimo ka ti txi ti gondako. Ti to ti koteka toneto hi fanete ku m’gela ti to e lulamisela gondo yimwani  ni yimwani, e wona ti to a nga ti thumisisa kutxani a ti ati gondako. Hi nga m’vhunisa kutxani? Lulamisela nayo gondo u tshumela u m’komba ti a nga mahisako tona. * M’txhamusele nzila yo mana tixamulo ta siwotiso ni ku m’komba ti to a nga ndandisa kutxani mapswi a lisima a ya ma xamulako siwotiso. M’kombele ti to e xamula ngu mapswi akwe. A txi maha toneto u na kota kuwona ti to a ti pfisisile mwendo ahim-him. Kambe ku ngadi ni timwani ati u nga kuzetako txigondo ku txi ti maha.

10. Ngu txani i di ta lisima kugonda Bhiblia ditshiku ni ditshiku?

¹⁰ Kha ta enela ti to txigondo txi tsimbitiselwa gondo basi, kambe txi fanete txi ti ha mbimo yo txi ti mahela gondo txipune. Txi fanete kubhula ni Jehovha. Txi nga ti mahisa kutxani? Ngu ku muengisa ni ku womba-womba nayo, txi nga maha toneto ngu kulera Bhiblia ditshiku ni ditshiku. (Jox. 1:8; Mas. 1:1-3) Mkombe ti to a nga txi thumisisa kutxani txiemiso txa gondo ya Bhiblia atxi txi manekako ka jw.org. * Txi vhune txi alakanyisisa ngu ti txi ti gondako, ngu ku tiwotisa siwotiso so fana ni siya: Ti ni gondisa txani toneto ngu Jehovha, ni nga ti thumisisa kutxani ka wutomi wangu.—Mith. 17:11; Jak. 1:25.

11. Hi nga txi vhunisa kutxani txigondo txi maha mkombelo? Ngu kutxani i di ta lisima ku txigondo txi maha mkombelo mbimo yotshe ka Jehovha?

¹¹ Kuzeta txigondo ti to txi womba-womba ni Jehovha ngu mkombelo ditshiku ni ditshiku. Maha mkombelo u pata ditina da txigondo txako mi txi lava kukhata gondo yimwani ni yimwani ni loko mi di gwitile. Mbimo yi txigondo txi ku pfako u txi maha mkombelo, txi na gonda kumaha mkombelo ka Jehovha a wu wu humako mbiluni ngu ditina da Jesu Kristu. (Mat 6:9; Joh 15:16) Ngako txigondo txi txi engisa Jehovha ngu kulera Bhiblia ditshiku ni ditshiku, ni kuwomba-womba nayo ngu ku maha mkombelo, eto ti na vhuna txigondo ti to txi tshuketa hafuhi ni Txizimu! (Jak 4:8) Ngako a txi maha toneto ti na m’vhuna ku e maha timwani ati ti no maha e kula e hokelela ha ko tiningetela ni kubhabhatiswa. Ngu tihi ta kona?

12. U nga vhunisa kutxani txigondo ti to txi aka wuxaka ni Jehovha?

¹² A ti txigondo txi ti gondako kha ta fanela ku zumba ka mialakanyo basi, kambe ti fanete kugwesa mbilu. Ngu kutxani? Nguko mbilu yathu yi patako minavelo, mixuvo ni matipfelo, ngu yona yi hi kuzetako kumaha ati hi tigondako. Jesu a txi gondisa timhaka to pfala kambe vathu va txi mlondisela nguko ati a nga txi gondisa ti txi gwesa mbilu. (Luka 24:15, 27, 32) Vhuna txigondo txako txi wona Jehovha kota m’thu wu txi nga akako wuxaka nayo ni ku txi m’teka kota tate, m’ngana mwendo Txizimu txakwe. (Mas. 25:4, 5) Mbimo yi u tsimbitisako gondo vhuna txigondo txi wona tifanelo ta Jehovha. (Eks 34:5, 6; 1 Ped 5:6, 7) Ti si nga ni mhaka ni msungo wu mi bhulako ngu wona vhuna txigondo txako txi wona Jehovha ti a ku ngu tona. M’vhune e wona tifanelo ta tinene ta Jehovha to fana ni lirando, wunene ni wuxinji. Jesu a wombile ti to “txirumo txa hombe txo khata” ngu txi txi ku “randa Mkoma Txizimu txako.” (Mat. 22:37, 38) Vhuna txigondo txako txi va ni lirando lo tshima ngu Txizimu.

13. U nga txi vhunisa ku txani txigondo ti to txi mziva kwati Jehovha?

¹³ Ka mabhulo aku ni txigondo txi txhamusele ti to ngu kutxani u txi randa Jehovha. Toneto ti na m’vhuna e wona txilaveko txo va ni wuxaka wo tsana ni Jehovha. (Mas 73:28) Ti nga maha ka mhaka yi mi gondako ngu tona ku di ni mapswi mwendo m’bhalo awu wu txhamuselako tifanelo ta Jehovha to fana ni lirando, wuzivi, wululami ni mtamo ati ti nga gwesa mbilu yako. Ti di ngeto u nga txhamusela txigondo txako ti to eto ti ku mahile u randa Tate wathu wa nzumani. Ku ni timwani ati txigondo txi fanelako ku txi maha ti to txi kula txi hokelela ha ko bhabhatiswa.

14. Ngu kuya ngu va Vahebheru 10:24, 25 mitshangano yi nga vhunisa ku txani txigondo ti to txi kula ku didhawa da moya?

¹⁴ Hotshethu ha ti lava ti to sigondo sathu si kula si bhabhatiswa. Yimweyo ya tinzila to va vhuna ku maha toneto ngu va kuzeta ku veta mitshanganoni. Vatxhumayeli va kale va womba ti to txigondo txi txi tako mitshanganoni txa kuluveta kukula ngu didhawa da moya. (Mas. 111:1) Vanathu vamwani va txhamusela txigondo ti to tigondo ta Bhiblia nda tingi, ati a mgondelako o va hafu  basi, a txiya mitshanganoni a nga ya gonda ta tingi. Lerela Vahebheru 10:24, 25 txigondo txako, u tshumela u txi txhamusela ti to ngu kutxani i di ta lisima ku txita mitshanganoni, txi kombe vhidhiyo yi yi ku: Ku mahwa txani Nyumbani ka Mfumo? * Vhuna txigondo ti to kuxalela mitshangano divhiki ni divhiki ti maha txienge txa lisima ka wutomi wa txona.

15. Hi nga mahisa kutxani to txigondo txita mitshanganoni mbimo yotshe?

¹⁵ U nga maha txani ngaku txigondo txako txi si khali kuta mitshanganoni, mwendo txi si ti mbimo yotshe? Txi bhulele to tsakisa ati u ku ngadi ku ti gonda mitshanganoni. Eto ta vhuna ngutu kupinda ku zumbela ku txi ramba. Ninga txigondo txako Muwoneleli mwendo Txibhukwana txa mitshangano asi si gondwako divhiki donedo. M’kombe ati ti no ya gondwa ka mitshangano ayi yi londiselako u tshumela u muwotisa ati ti nga mtsakisa. Ati txigondo txi no ya ti wona ngu dikhambi do khata ti na txi tsakisa kupinda totshe ti txi nga ti wona ka titxhetxhe timwani. (1 Vak. 14:24, 25) Txigondo txi na ziva vathu va i ku sikombiso sa sinene ava txi nga va tekelelako, ni ku ve mvhuna ku e kula e hokela ko bhabhatiswa.

16. Ngu tihi ti hi fanelako ku ti maha ti to hi vhuna txigondo txi hokela ha ko bhabhatiswa? Hi na ta bhula ngu txani ka gondo yi yi londiselako?

¹⁶ Ngu kuya ngu ti hi nga gonda hi nga tsimbitisisa kutxani sigondo si hokela ha ko bhabhatiswa? Ngu kuvhuna txigondo txi yi tekela ha msungo gondo, txi gonda divhiki ni divhiki, txi lulamisela ka gondo yimwani ni yimwani. Hi nga kuzeta txigondo ti to txi womba-womba ni Jehovha ditshiku ni ditshiku ngu mkombelo, ni ku txi aka wuxaka wo tsana nayo. Kuzeta txigondo ku txi ta mitshanganoni. (Wona dibhokiso di di ku: “ Ngu tihi ti txigondo txi fanelako ku ti maha ti to txi kula txi bhabhatiswa?”) Hambiketo ku ni 5 wa timhaka ati muhuweleli a fanelako ku ti maha ti to e vhuna txigondo txi hokela ha ko bhabhatiswa. Hi na ta bhula ngu tona ka gondo yi yi londiselako.