1. Ngu yihi themba yi Jehovha a hi ningako?

 JEHOVHA a hi ningile themba yo tsakisa ngutu. Vamwani kwathu va emela kuhanya ngu ha ku si gumiko nzumani kota sivangwa sa moya. (1 Vak. 15:50, 53) Kambe vo tala va emela ku ta hanya ngu ha ku si gumiko hamafuni va di ni wutomi wo hetiseka ni litsako. (Mtu. 21:3, 4) Ti si nga ni mhaka to hi rinzela ku ya hanya nzumani mwendo kuta hanya hamafuni themba yathu nja lisima ngutu.

2. Ngu kutxani hi txi tsaniseka ti to themba yathu yi na maheka?

² Dipswi “themba” adi di nga thumiswa ka Bhiblia di nga tshumela di womba “kurinzela to ku ni to kari ta tinene ti no maheka.” Ha tsaniseka ti to themba yathu ngu wumangwana yi na maheka nguko yi ta ngu ka Jehovha. (Var. 15:13) Ha tiziva ati a nga hi thembisa ni ti to mbimo yotshe ene wa hetisisa ati a ti wombako. (Mit. 23:19) Ha tsaniseka ti to Jehovha ani mtamo ni ku wa ti lava kuhetisisa ati a nga hi thembisa. Themba yathu hi nga mloro mwendo mavale-vale, kambe yi seketetwe ka ditshuri di hi di zivako.

3. Hi na bhula ngu txani ka gondo yiya? (Masalmo 27:14)

³ Tate wathu wa nzumani wa hi randa ni ku a lava to hi mthemba. (Lera Masalmo 27:14.) Ngako themba yathu ka Jehovha yi di tsani, hi ni na sikota kutimisela sikarato ni ku emela wumangwana ngu txibindi ni litsako. Hi na wona to themba yathu yi hi vhikelisa kutxani. Kambe kukhata a hi woni to themba yi fanisa ku txani ni hangi ni txigoko. Hi na gwita hi wona to hi nga tsanisisa kutxani themba yathu.

4. Themba yi fanisa kutxani ni hangi? (Vahebheru 6:19)

⁴ Ka dipasi di mpostoli Paulo a nga bhalela Vahebheru, ene a fananisile themba ni hangi. (Lera Vahebheru 6:19.) Paulo a txi tolovela kutsimbila ngu ngalava ngu toneto ene a txi ti ziva to tihangi ti txi thumiselwa kurikhisa ngalava kasi ku yi pengi. Ditshiku dimwani Paulo adi mngalavani ku khatile txingulo se a woni va tsimbitisi va ngalava ve beta hangi matini kasi ku ngalava yi si pengi. (Mith. 27:29, 39-41) Kufana hi hangi yi rikhisako ngalava, themba yathu ya hi tsanisa kasi ku hi si tshuketi kule ni Jehovha, mbimo yi hi tshanganako ni sikarato. Themba yathu yo tsana ya hi vhuna ku hi wonisana ni singulo so fanekisela nguko ha tiziva to ta ta timbimo to zenga. Khumbula to Jesu a wombile to hi na xaniswa. (Joh. 15:20) Kualakanyisisa ngu wumangwana wu hi nga thembiswa ta hi vhuna kusimama hi di tsani ka wutomi wathu kota Makristu.

5. Themba yi mu vhunisile kutxani Jesu mbimo yi a nga txi lava kudawa?

⁵ Wona nzila yi themba yi nga vhuna ngu yona Jesu ku e simama a di tsani hambi ku a nga txi emela lifo lo panda ngutu. Ngu Pentekoste ya 33 mpostoli Pedro a wombile wuprofeti awu wu ku ka dibhuku da Masalmo wu kombisako nzila yi Jesu nga di tsani ngu yona, wuprofeti wu womba tiya: “Mmidi wangu ni wona wu na zumba wu di ni txithembo, nguko khu na mbi tshotsha moya wangu wukhaloni ka vafi, kambe khu na mbi tumetisa msawuleki wako e wona kusina. . . . Awe u ni ningile kuziva tinzila ta wutomi, u na ni khurisa ngu litsako masoni kwako.” (Mith. 2:25-28; Mas. 16:8-11) Hambi ku Jesu a nga txi ti ziva to a ndi na fa a dini themba yo tsana ka ti to Txizimu txi ndi na mu wusa ni ti to a ndi na va ni litsako lo tshumela eva ni tate wakwe nzumani.—Vaheb. 12:2, 3.

6. Ngu tihi ti mwanathu mwani a nga ti womba mayelano ni themba?

⁶ Themba yathu ya Wukristu yi vhuni vanathu vo tala ku tsanisela sikarato. Wona txikombiso txa mwanathu Leonard Chinn a nga txi zumba Inglaterra. Ka yimbi ya wumbidi ya mafu a nõtwe ngu ku a nga txi lamba ku ya yimbini. Msana ka mitxima yimbidi a khotetwe ka wukhalo wakwe ekha ni ku va msikete mithumo yo nemela. Ene a womba tiya: “Ati ni nga pinda ngu ka tona ti ni vhuni kuwona lisima la themba kasi kutsanisela sikarato. Hi ni txikombiso txa Jesu, txa vapostoli, vaprofeti, kumweko ni sithembiso so tsakisa si ku amu ka Bhiblia. Totshe tiya ti hi ninga themba yo tsakisa ngu wumangwana ni ku ta hi vhuna ku hi simama hi timisela.” Themba i di hangi ka Leonard se yi ngava hangi kwathu.

7. Siduko si yi tsanisisa kutxani themba? (Varoma 5:3-5; Jakobe 1:12)

⁷ Themba yathu ya tiya msana kova hi di pindile ngu ka siduko ni kutshumela hi wona txivhuno txa Jehovha ni kuamukelwa ngu ngene. (Lera Varoma 5:3-5; Jakobe 1:12.) Eto ti nga maha hi va ni themba yo tsana kupinda mbimo yi hi nga gonda ditshuri. Sathani a lava ku hi nemetwa ngu sikarato, kambe ngu kuvhunwa ngu Jehovha hi nga si kota ku si xula sotshe.

8. Themba yi fanisa kutxani ni txigoko? (1 Vatesalonika 5:8)

⁸ Bhiblia yi tshumela yi fananisa themba ni txigoko. (Lera 1 Vatesalonika 5:8.) Disotxhwa di ambala txigoko kasi kuvhikela msungo wa dona ka matxhari a valala. Ka yimbi yathu ya moya hi fanete kuvhikela mapimo athu kasi ku ma si xaselwi ngu Sathani. Ene a  hi xasela ngu siduko ni mialakanyo yo biha ayi yi nga jikisako mapimo athu. Kufana ni ku txigoko txi vhikelako msungo wa disotxhwa, themba ya vhikela mapimo athu kasi ku hi simama hi di thembekile ka Jehovha.

9. Nji txani txi txi mahekako ka vathu va va singako ni themba?

⁹ Themba yathu yo mana wutomi wo mbi guma yi na hi vhuna kuva ni wuzivi ni kumaha sisungo sa wutxhari. Kambe ngako themba yathu yi txi hola hi tumelela mialakanyo ya nyama, hi nga khata kupimisa ngu minavelo yathu dwe, se hi divala themba yathu yo hanya ngu ha ku si gumiko. Wona ti ti nga maheka ngu Makristu mwani a Korinto. Ona ma luzile likholo ka kuwuswa ka vakufa. (1 Vak. 15:12) Paulo a wombile ti to ava va hanyako va singa ni themba ya kuwuswa ka vakufa va hanyela ku hetisisa minavelo yawe dwe. (1 Vak. 15:32) Nyamsi vathu va va si ngako ni themba va hanyela ta kona hawa ni kona hawa ve tidila ngu ti va ti manako. Kambe athu hi themba ka wumangwana awu Txizimu txi hi thembisako. Themba yathu yi thuma kota txigoko txo fanekisela, atxi txi vhikelako mapimo athu ni ku hi vhikela ku hi si sawuli kuhanya ngu nzila yi yi no onha wuxaka wathu ni Jehovha.—1 Vak. 15:33, 34.

10. Themba yi nga hi vhikelisa ku txani ka mialakanyo yo biha?

¹⁰ Themba yathu yi nga tshumela yi hi vhuna ku hi si pimisi to hi nge sikoti kutsakisa Txizimu. Ngu txikombiso vamwani va nga khona: “Ani kha ni nambi maneka ka vale va no hanya ngu ha ku si gumiko. Ani kha ni nga wamnene ni ku kha ni na ku ti kota kulondisa milayo ya Txizimu.” Khumbula to Elifazi i nga ti mngana wo biha a wombile ati ti fanako ngu Jobe, ene a ti khene: “Njitxani m’thu, kona za eva a di sawulekile kani?” A tshumete e womba mayelano ni Txizimu atxi khene: “Wonani taku, txi nga thembisa kutxani vasawuleki va txona, hambi nzuma yi nga mbi sawuleka masoni ka txona.” (Jobe 15:14, 15) Eto i ti makuhu. Khumbula to Sathani ngene a lavako hi tipfisa toneto. Ene wa tiziva to ngako hi txi tumelela mialakanyo yiya themba yathu yi nga guma. Ngu toneto vayilela makuhu u veka mapimo ako ka sithembiso sa Jehovha. U nga kana-kani ti to ene a lava to u hanya ngu ha ku si gumiko ni ku a na kuvhuna kumaha toneto.—1 Tim. 2:3, 4.

11. Ngu ku txani hi di fanete ku timisela mbimo yi hi emelako ku Txizimu txi hetisisa sithembiso sa txona?

¹¹ Kha ti hehuki kuva ni themba yo tsana mbimo yotshe. Hi nga thuka hi pimisa to Txizimu txo swela kuhetisisa sithembiso sa txona. Kambe Jehovha mbwa kala ku pinduka, se nzila yi a wonako mbimo ngu yona ya hambana ni yathu. (2 Pedro 3:8, 9) Ene a na hetisisa txikongomelo txakwe ngu nzila yo tsakisa ngutu, kambe hi nga ti wona nga wa swela kuhetisisa sithembiso soneso. Hi nga vhunwa ngu txani mbimo yi hi emelako ku Txizimu txi hetisisa sithembiso sa txona?—Jak. 5:7, 8.

12. Ngu kuya ngu Vahebheru 11:1, 6 ngu kuhi kuyelana ku kuho ka themba ni likholo?

¹² Themba yathu yi nga tsana ngako hi txi simama hi di hafuhi ni Jehovha i ku ene a hi ningako themba. Bhiblia yi yelanisa themba ni likholo la ti to Jehovha vaho ni ti to “wa ninga txhatxhazelo ka vale va mlavako.” (Lera Vahebheru 11:1, 6.) Ngako hi txi wona Jehovha i di wa ditshuri kwathu, themba yathu ya ti to ene a na hetisisa totshe ti a nga ti thembisa yi na tsana. A hi woni to hi nga maha txani kasi ku tiyisa wuxaka wathu ni Jehovha kasi ku hi kota ku va ni themba yo tsana.

13. Hi nga tshuketisa kutxani ka Txizimu?

¹³ Khongela ka Jehovha ni kugonda Dipswi  dakwe. Hambi ku hi si mu woniko Jehovha hi nga tshuketa kwakwe. Hi nga womba-womba nayo ngu mkombelo hi txi tsaniseka to a na hi engisa. (Jer. 29:11, 12) Hi nga engisa Txizimu ngu kugonda Bhiblia ni kualakanyisisa ngu yona. Mbimo yi hi gondako ngu nzila yi Jehovha a nga khatalelisa tona malanda akwe o thembeka a kale, themba yathu yi naya yi tsana. Totshe ti ti ku ka Dipswi da Txizimu ti “bhaletwe ku ti txi hi gondisa; kasiku hi mana txithembo ngu kuhonisela ni thavelelo yi hi yi manako amu ka Mibhalo.”—Var. 15:4.

14. Ngu kutxani hi di fanete kualakanyisisa ngu ti Jehovha a nga mahela vamwani?

¹⁴ Alakanyisisa ngu nzila yi Jehovha a nga hetisisa ngu yona sithembiso sakwe. Wona ati Jehovha a nga mahela Abrahamu ni Sara. Vona se va ti ka tanga yi va nga di no mbi si kota kuveleka. Hambi keto vona va ve ni mwanana nga ha Jehovha a nga di thembisile ngu kona. (Gen. 18:10) Abrahamu a angulisile ku txani? Bhiblia yi khene: “A ti kholwa ti to a na va tate wa tixaka to tala.” (Var. 4:18) Hambiku ka mawonelo a vathu ti nga txi woneka ku si nga ni themba Abrahamu a txi tsaniseka to Jehovha a ndina hetisisa txithembiso txakwe. Wamwamna wuwa wo thembeka kha theleka tingana. (Var. 4:19-21) Matimu yawa ma hi gondisa ti to hi nga tsaniseka to mbimo yotshe Jehovha a na hetisisa sithembiso sakwe, hambi ti txi woneka nga ti nge maheki.

15. Ngu kutxani hi di fanete kualakanyisisa ngu ti Jehovha a nga kumahela?

¹⁵ Alakanyisisa ngu ti Jehovha a nga kumahela. Pimisa ngu ti awe u wuyeliswako tona ngu kuhetiseka ka sithembiso si si ku ka Dipswi da Txizimu. Ngu txikombiso Jesu a thembisile to tate akwe a ndi na khatalela silaveko sako sa nyama. (Mat. 6:32, 33) Jesu a tshumete e tsanisekisa to Jehovha  a na ku ninga moya wo sawuleka ngako u txi wu kombela. (Luka 11:13) Jehovha a hetisisile sithembiso siya. Ti nga maha u txi alakanya ngu simwani sithembiso a si hetisisako kwako. Ngu txikombiso, ene a thembisa ku kudivalela, ku kuthavelela, ni ku kudyisa ngu didhawa da moya. (Mat. 6:14; 24:45; 2 Vak. 1:3) Ngako u txi alakanyisisa ngu ti Txizimu txi nga kumahela u na tsanisa themba yako ka ti a kuthembisako ngu wumangwana.

16. Ngu kutxani themba i di ningo ya lisima?

¹⁶ Themba yo ta mana wutomi wo mbi guma i ningo yo sawuleka yi tako ngu ka Txizimu. Hi wu emete ngu maso o Bhilivila wumangwana wuwa wo tsakisa awu hi tsanisekako to wu na hoka. Themba yiya yi fana ni hangi ayi yi hi tsanisako kasi ku hi wonisana ni sikarato, hi tsanisela kuxaniswa hambi kuwonisana ni lifo. Ni ku, themba yi tshumela yi thuma kota txigoko atxi txi vhikelako mapimo athu kasi ku hi vayilela to biha kambe hi namarela ka ti i ku ta tinene. Themba yathu ayi yi nga seketelwa ka Bhiblia, ya hi tshuketisa ka Txizimu ni ku yi kombisa lirando la hombe a li Txizimu txi ku nalo ngu ngathu. Ha wuyelwa ngutu ngako hi txi simama hi va ni themba yo tsana.

17. Ngu kutxani themba yi txi tisa litsako?

¹⁷ Ka dipasi di a nga bhalela Varoma Paulo a va kuzetile tiya: “Tsakani kuthembani kwanu.” (Var. 12:12) Paulo a txi tsaka nguko a di ni kutsaniseka ka ti to ngako a txi simama a di thembekile a ndina mana wutomi wo mbi guma nzumani. Nanathu hi nga tsaka ngu themba yathu, nguko ha tsaniseka to Jehovha a na hetisisa sithembiso sakwe. Mbhali mwani wa Masalmo a ti khene: “A katekile wule themba yakwe yi ku ka MKOMA, Txizimu txakwe, . . . a xayisako ditshuri kala kupinduka.”—Mas. 146:5, 6.