1. Ngu txihi txilaveko txathu txa moya, ni ku txi yelanisa kutxani ni litsako?

 LITSAKO la ditshuri hi nga matipfelo ya hi nga thukako hi va nawo me gwita me nyamalala. M’thu a ngava nalo litsako la ditshuri wutomi wakwe wotshe. Jesu a txhamusete tiya ka gondo yakwe ya mmangoni, mbimo yi a nga khene: “Va katekile ava i ku sisiwana moyani.” (Mat. 5:3) Jesu atxi tiziva to vathu va tini txilaveko txa hombe txo ziva Jehovha Mvangi wawe ni kutshumela ve mkhozela. Se atxiya ngu txona txilaveko txathu txa moya. Aku Jehovha i ku “Txizimu txa makatekwa” mwendo Txizimu txa litsako, ava va txi khozelako va nga tsaka.—1 Tim. 1:11.

2-3. (a) Ngu kuya ngu Jesu mba mani va ni vona va nga li manako litsako? (b) Hi na bhula ngu txani ka gondo yiya?

² Ina ti lava ku hiva ka txiemo txo guleka ka wutomi wathu kasi ku hiva ni litsako? Ahim-him. Ka mwomba-wombo wakwe wa mmangoni Jesu a wombile timhaka to xamalisa, a ti khene: “Va katekile ava va dilako”, ti nga maha va txo karatwa ngu sionho sawe mwendo va txo wonisana ni sikarato sa wutomi, hambi keto va nga sikota kuva ni litsako. Jesu a tshumete e womba ti ti fanako ngu vale va “xaniswako ngu kumaha kuranda ka Txizimu”, ni vale “va ruketelwako” ngu kuva valondeteli va Kristu. (Mat. 5:4, 10, 11) Kambe ti kotekisa kutxani kuva ni litsako la ditshuri ka siemo so nga siya?

³ Jesu a txi hi gondisa to kasi ku hi va ni litsako kha tiyi ngu kuva hi di ka siemo so tsakisa kambe, ti dhependerwa ngu kukhatalela  txilaveko txathu txa moya ni kutshuketa ka Txizimu. (Jak. 4:8) Hi nga mahisa kutxani toneto? Ka gondo yiya hi na wona tinzila tiraru ti yisako ka litsako la ditshuri.

4. Ngu yihi nzila yo khata yi nga hi vhunako kumana litsako la ditshuri? (Masalmo 1:1-3)

⁴ NZILA YO KHATA: Kasi ku hiva ni litsako la ditshuri hi fanete kudya sakudya sa moya. Vathu ni sihari va fanete kudya kasi ku ve ma na kuhanya, kambe i vathu dwe va nga dyako sakudya sa moya. Ngu ditshuri ha si lava sakudya soneso, ngu toneto Jesu a ti khene: “M’thu kha na kuhanya ngu dipawa dwe, aniko ngu otshe mapswi awa ma wombwako ngu Txizimu.” (Mat. 4:4) Se kha da fanela kupinda ditshiku hi sa dya sakudya sa moya si tako ngu ka dipswi da Txizimu. Mbhali mwani wa Masalmo a wombile ku khene: “A katekile m’thu wule a tsakelako mlayo wa MKOMA a txi zumba a txi wu alakanya wusiku ni mtshikari.”—Lera Masalmo 1:1-3.

5-6. (a) Hi nga gonda txani ka Bhiblia? (b) Kugonda Bhiblia ku nga hi vhuna ngu tinzila tihi?

⁵ Aku Jehovha a hi randako wa hi gela ti hi fanelako kumaha kasi ku va ni wutomi wo tsakisa. Ka Bhiblia ha gonda to ngu txihi txikongomelo txa Txizimu ngu vathu, ati hi nga mahako kasi kutshuketa kwakwe ni kudivalelwa sionho. Ha tshumela hi gonda ngu sithembiso sakwe ngu wumangwana. (Jer. 29:11) Se ditshuri di hi di manako ngu kugonda Bhiblia da tata timbilu tathu ngu litsako.

⁶ Nga ha hi tizivako ngu kona, Bhiblia yi ni matshina a milayo a mangi aya ma nga hi vhunako ka wutomi wathu wa ditshiku ni  ditshiku. Se ngako hi txi engisa sileletelo soneso hi nga mana litsako la ditshuri. Mbimo yi u tipfako u di karatekile ngu sikarato sa wutomi zama kuteka mbimo yo tala u txi gonda dipswi da Txizimu ni ku alakanyisisa ngu dona. Jesu ati khene: “Va katekile ava va engisako dipswi da Txizimu, va txi di vekisa.”—Luka 11:28.

7. U nga mahisa kutxani ti to u wuyelwa mbimo yi u gondako Dipswi da Txizimu?

⁷ U txi gonda Dipswi da Txizimu ti ninge mbimo yo ti hanya ati u ti gondako. Ngu txikombiso ina u ta nga va ka txiemo txo m’thu e kuninga sakudya si u si dhundako, kambe ngu kuva u di jahile ni kukarateka ngu timwani wo thumela kumitela sakudya u si pfi kutsambisisa kule ka kona? Se u di gwitile kudya u pfisisa to u dyite ngu kujaha kambe u txi tsakela kuva u di dyite kudotho-kudotho u pfa kutshamba ka txiponi ngu txiponi. Ngu ha kufanako ina u ta nga lera Bhiblia u di jahile se ngu magwito u pfisisa ti to kwa nga ti hanya ati Jehovha a nga txi lava ku kugondisa. Ti he mbimo yo hanya ati u ti gondako amu ka Dipswi da Txizimu, u alakanyisisa ngu simahakalo sa wukhalo wu wu wombwako, mapswi ni timwanyani. Ngako u txi ti maha totshelele tiya, litsako lako li nga engeteleka.

8. Txithumi txo thembeka na txi di ni wutxhari txi hetisisa mthumo wa txona ngu nzila muni? (Wona txhamuselo ya hahatshi.)

⁸ Jesu a vekile “txithumi txo thembeka na txi di ni wutxhari” kasi ku txi hi ninga sakudya sa moya ngu mbimo ya kona ni ku ha si mana sakudya soneso. * (Mat. 24:45) Bhiblia ngu dona ditshina da sakudya si hi ningwako ngu txithumi txo thembeka. (1 Vat. 2:13) Sakudya siya sa moya, sa hi vhuna ku pfisisa mialakanyo ya Jehovha ayi yi nga bhalwa ka Bhiblia. Ngu toneto ti hi mahako hi gonda Muwoneleli, ni Khenjemuka ni yimwani misungo ya timhaka yi ku ka site ya jw.org. Ha ti lulamisela ka mitshangano ya hagari ni ya magwito ka divhiki ni ku ha xalela mlongoloko wa JW Broadcasting^® mtxima ni mtxima. Kudya sakudya siya sa moya so hambanelana ti na hi vhuna kuteka dizambo da wumbidi.

9. Ngu yihi nzila ya wumbidi yi nga hi vhunako ku mana litsako la ditshuri?

⁹ NZILA YA WUMBIDI: Kasi ku hi va ni litsako la ditshuri ti lava hi hanya ngu milayo ya Jehovha. Mbhali mwani wa Masalmo a ti khene: “A katekile awule a thavako Mkoma ,awu a londetako tinzila takwe.” (Mas. 128:1) Kuthava Jehovha ti womba ti to ha mxonipha ngutu aha ko hi vayilela ati ti nga mu henyisako. (Mav. 16:6) Ngu toneto ha ti karatela kusimama hi tsimbitisana ni milayo yakwe mayelano ni ta tinene ni to biha ayi yi nga wombwa ka Bhiblia. (2 Vak. 7:1) Hi na tsaka nguto ngako hi txi maha ati Jehovha a ti dhundako ni kuvayilela ati a ti nyenyako.—Mas. 37:27; 97:10; Var. 12:9.

10. Ngu kuya ngu Varoma 12:2, ngu wuhi wutixamuleli wathu?

¹⁰ Lera Varoma 12:2. Ti nga maha m’thu a txi ti ziva to Jehovha ngene a ku ni fanelo yo sunga ati ti i ku tatinene mwendo to biha, kambe a fanete kutshumela e tumela milayo yoneyo ya Jehovha. Ngu txikombiso, m’thu a nga ti ziva to wukoma wu ni fanelo yo veka sipimelo sa livilo ka txitarato, kambe a si tiemiseli kutumela sipimelo soneso, se a na tsimbitisa ngu livilo la hombe. Simaho sathu ngu sona si kombisako to ina ha kholwa to kulondeta sileletelo sa Jehovha ngu yona nzila yo hanya wutomi wa wunene. (Mav. 12:28) Dhavhidha  a ti pfisile toneto nguko a wombile mayelano ni Jehovha a txi: “U na ni komba nzila ya wutomi; masoni kwako ku tate litsako; ka dianza dako da txinene ku ni kuzumbiseka ko mbi gwita.”—Mas. 16:11.

11-12. (a) Hi fanete ku ti wonela ka txani ngako hi di ka sikarato mwendo hi di godhote? (b) Mapswi ya ma ku ka Vafilipiya 4:8 ma nga hi vhunisa kutxani ko sawula misakano?

¹¹ Mbimo yi hi ku ka sikarato, mwendo hi di godhote ti nga maha hi lava ku ti hungata kasi ku hi phungaleta sikarato soneso. Eto ta pfisiseka kambe hi fanete ku tiwonela kasi ku hi si mahi ati Jehovha a ti nyenyako.—Vaef. 5:10-12, 15-17.

¹² Ka dipasi di Paulo a nga bhalela Vafilipiya a kuzetile Makristu kusimama me maha ati i ku ta “kululama, . . . ti dhundekako, . . . ta mahanyelo a manene ni ku dhumiseka.” (Lera Vafilipiya 4:8.) Hambiku Paulo a nga si womba-wombi ngu misakano, ati a nga ti womba ti fanete ku hi vhuna mbimo yi hi sawulako so ti hungata ngu sona. Ka si u hungalako ngu sona, ina “wutxenje” wu wu engiselako mbwo lulama, “mafilmi” ya u xalelako ngo dhundeka, ni ku “mavhidhiyo game” ya u thako ngo dhumiseka? Kumaha toneto ti nga kuvhuna ku wona asi si tumelelwako ni si si tumelelwiko ka mawonelo a Jehovha. Hi lava to mahanyelo athu me tumelelana ni milayo yo guleka ya Jehovha. (Mas. 119:1-3) Ngako hi di ni livhalo lo basa se hi nga teka dizambo da wuraru di nga hi vhunako ku hi va ni litsako la ditshuri.—Mith. 23:1.

13. Ngu yihi nzila ya wuraru yi nga hi vhunako kuva ni litsako la ditshuri? (Johani 4:23, 24)

¹³ NZILA YA WURARU: Tsaniseka ti to wa veka wukhozeli wa Jehovha ka wukhalo wo khata ka wutomi wako. Aku Jehovha i ku Mvangi wathu ngene a ku ni fanelo yo khozelwa. (Mtu. 4:11; 14:6, 7) Ngu toneto hi fanete kuthangetisa wukhozeli wa Jehovha ni ku mkhozela ngu nzila yi a yi tsakelako, i ku ku mkhozela “ngu moya ni ditshuri.” (Lera Johani 4:23, 24.) Hi lava to moya wo sawuleka wa Jehovha wu kongomisa wukhozeli wathu kasi ku wu tsimbitisana ni ditshuri di di ku amu ka Bhiblia. Hi fanete kuthangetisa wukhozeli wa Jehovha, hambi hi txi hanya ka matiko ya wu tsimbiswako mwendo wu nga emiswa. Kona mu ka 100 wa vanathu va jele konku ngu mhaka ya ku i ku Tifakazi ta Jehovha. * Hambiketo ngu litsako vona va maha totshe ti va nga tikotako kasi kukhongela, kugonda ni kubhulela vamwani ngu Txizimu ni txikongomelo txa txona. Hambi hi txi tsimbiswa mwendo kuxaniswa hi nga tsaka nguko ha tiziva ti to Jehovha a ni nathu ni ku a na hi hakela.—Jak. 1:12; 1 Pedro 4:14.

14. Nji txani txi nga humelela mwanathu mmwani wa Tajiquistão ni ku ngu kutxani ti di mahekile toneto?

¹⁴ Maexperiyensia a vathu va ngweno ma kombisa ti to tinzila tiya ta tiraru hi nga ti gonda ti nga hi vhuna kumana litsako la ditshuri ku singa ni mhaka ni siemo sathu. Wona ati ti nga mahekela Jovidon Bobojonov wa Tajiquistão a ku ni 19 wa malembe. Ene va mu sinzisile ku ya wusotxhwani, kambe kha tumela. Ngu 4 ka Outubro wa 2019 a ruruvisilwe mtini ve mkhotela kudingana mitxima ve tshumela ve mñola nga o va txigevenga. Wubihi wuwa wu zivilwe ngu matiko o tala. Kuhaxilwe ti to a peketetwe kasi ku msinzisa ku e maha txixambanyo txa wusotxhwa ni kuambala fardhamento, msana keto a ningilwe  mnando ve gwita ve mu rumela ku ya thuma ka wukhalo wa sibotxhwa kala kuza Mkoma wa ditiko dile e mdivalela ni ku mu humisisa jele. Mbimo yi a nga di ka txiduko, Jovidon a simamile a di thembekile ni kuva ni litsako. A mahisile ku txani? Ngu ku simama e khatalela txilaveko txakwe txa moya.

15. Mbimo yi Jovidon a nga di jele a txi ti khatalelisa kutxani ngu didhawa da moya?

¹⁵ Mbimo yi a nga di khotetwe, Jovidon a txi ti dyisa ngu didhawa da moya hambi ku a nga si nga ni Bhiblia mwendo dimwedo da mabhuku athu. Ti kotekisile kutxani tiya? Vanathu va wukhalo wule va txi mu yisela sakudya, se va txi bhala mbhalo wa ditshiku ka mikwama yile va nga txi m’yisela. Ngu nzila yoneyo ene a txi tikota kugonda Bhiblia ni kualakanyisisa ngu yona ditshiku ni ditshiku. Msana kova a di humile jele ene a ningete txialakanyiso txiya ka vale va sinzi ku manana ni txikarato txo fana ni txakwe: “Thumisa mkhululeko wu u ku nawo kasi kutshimisa wuzivi wako ngu Jehovha ngu kugonda dipswi dakwe ni mabhuku athu.”

16. Ngu tihi ti Jovidon a nga txi veka mapimo ka tona?

¹⁶ Mwanathu wuwa a txi hanya ngu milayo ya Jehovha. Hahanze ko ti pata ka mahanyelo o biha ni minavelo ya walo, ene a txi veka  mapimo ka Jehovha ni ti i ku ta lisima kwakwe. Jovidon a txi tsakiswa ngu si Jehovha a nga si vanga. Ni mixo a txi wuka a txi engisela sinyana si txi embelela ni ku ndaka-ndaka, se ni wusiku a txi wonetela mtxima ni tinyeleti, ene a khene: “Tiningo tiya ta Jehovha ti ni ningile litsako ni txibindi.” Ngako hi txi ni nga lisima malulamiselo a Jehovha a moya ni a nyama, hi na va ni mbilu yo tsaka se litsako lonelo li na hi vhuna ti to hi simama hi timisela.

17. Mapswi ya ma ku ka 1 Pedro 1:6, 7 ma nga vhunisa kutxani m’thu wu a ku ka txiemo txo fana ni txa Jovidon?

¹⁷ Jovidon a txi thangetisa wukhozeli wa Jehovha. A txi li ziva lisima lo simama a di thembekile ka Txizimu txa ditshuri. Jesu a ti khene: “U na khozela Mkoma Txizimu txako, u txi thumela txona dwe.” (Luka 4:8) Vakomandante ni masotxwa ma txi lava to Jovidon e landula wukhozeli wakwe. Kambe ene a txi khongela ngu kuhiseka wusiku ni mitshikari ni ku tshumela e kombela Jehovha e mu vhuna ku asi karali ni ku asi landuli likholo lakwe. Hambiku a nga ñolwa ngu nzila ya tshofu, Jovidon kha landula likholo lakwe. Kota wuyelo, ene wa tsaka nguku a ni txilo txi a nga singa natxo mbimo yi a nga sise ku ñolwa, i ku likholo ali li nga dukwa.—Lera 1 Pedro 1:6, 7.

18. Hi nga simamisa kutxani hi va ni litsako?

¹⁸ Jehovha wa tiziva ati hi ti lavako kasi ku hi mana litsako la ditshuri. Ngako u txi londisela tinzila tiya ta tiraru ti yisako ka litsako la ditshuri, u nga simama u di tsakile hambi u txi manana ni siemo so karata. Se nanawe u nga sikota kuwomba u txi khawe: “Va katekile vathu vale Txizimu i ku MKOMA wawe.”—Mas. 144:15.