1. Ngu tihi ti Jesu a nga gela vadothi vale va mune? Vona va mahile txani?

MPOSTOLI Pedro, Andreya, Jakobe ni Johani i ti vakoki a sihaka. Alakanya ti va nga ti pfisa tona mbimo yi va nga pfa txirambo txa Jesu txo khene: “Ni londiseni, ni na mi maha vakukuti va vathu.” * Ina va tumete? Bhiblia yi khene: “Kunukunuko, va to leka ngalava ni tate wawe, ve mu londisa.” (Mat. 4:18-22) Txisungo txonetxo txi txitxile wutomi wawe wotshe. Kukhukhela ka mbimo yoneyo vo na va ndi na va ‘vakoki wa vathu’ i si nga va sihako. (Luka 5:10) Ni nyamsi Jesu a maha txirambo txi txi fanaka ka va va ku ni timbilu ta tinene ava va dhundako ditshuri. (Mat. 28:19, 20) Ina awe u tumete txirambo txa Jesu txo va mkukuti wa vathu?

2. Ngu kutxani hi di fanete ku wu tekala ha msungo mthumo wo va vakukuti wa vathu? Nji txani txi no hi vhuna kumaha txisungo txonetxo?

² Ti nga maha i di kale u txi gonda Bhiblia u txi yi pfisisa, se ti txi lava u maha txisungo txa ti to ina u na va m’huweleli wa mahungu a manene. Ti nga maha u txi txi thava txirambo txa Jesu, kambe u nga godholi. Eto ti kombisa ti to u teka txirambo txa Jesu i di txa lisima ngutu. Bhiblia yi womba ti to mbimo yi Pedro ni vangana vakwe va nga pfa txirambo txa Jesu “kunukunuko” va to leka tikoka ve mu londisa. Phela ku txi pinda 6 wa mitxima Pedro ni vangana vakwe va  di zivile Jesu. Ngu toneto, mbimo yi Jesu a nga va ramba kha ta va karatela kumaha txisungo. (Joh. 1:35-42) Ti ha kubasani ti to ati u ti gondako mayelano ni Jehovha ni Jesu ti ku maha u kula ngu didhawa da moya. Hambiketo, kha ti lavi u maha txisungo u si se pimisa kwati ngu tona. Nji txani txi nga vhuna Pedro, Andreya ni vamwani ti to ve maha txisungo txo tumela txirambo txa Jesu?

3. Nji txani txi nga ku vhunako ti to u va m’gondiswa wa mnene wa Kristu?

³ Vagondiswa vo khata va Jesu va txi ti ziva ti va ti lavako, va txi wu ziwa kwati mthumo, va ti ni txibindi ni ku va txi ziva kutigondisa. Ti hakubasani ti to eto ti txi lava ku ve va vadoti va vanene va vathu. Kuziva ti u ti lavako, kuziva kwati mthumo, ku va ni txibindi ni ku kuziva kutigondisa ti nga kuvhuna nawe ti to u va m’gondiswa wa mnene wa Kristu. Ka gondo yiya hi na wona to hi nga ti kotisa kutxani toneto.

4. Ngu kutxani Pedro i nga ti m’doti?

⁴ Pedro a txi dota sihaka ti to e wunja mwaya wakwe, asi mahi mthumo wuwa ngu ku ti nga txo sunga dwe. Ti ti komba ene a txi pata ni ku wu dhunda. (Joh. 21:3, 9-15) Pedro a tshumete a txi maha m’doti wa vathu. Ngu kuvhunwa ngu Jehovha ene a txi wu maha kwati mthumo wuwa ni ku a txi wu dhunda.—Mith. 2:14, 41.

5. Ngu kuya ngu Luka 5:8-11, ngu kutxani Pedro a nga ti thava? Nji txani txi no kuvhuna ku u amukela txirambo txa Jesu?

⁵ Txivangelo txa lisima txi hi mahako hi txhumayela nguko hi randako Jehovha. Kuranda Jehovha ti na hi maha hi maha kwati mthumo wuwa hambi hi txi tipfa nga hi na  mbi tikota. Mbimo yi Jesu a nga ramba Pedro ku e va m’doti wa vathu a mu gete tiya: “U nga thave.” (Lera Luka 5:8-11.) Pedro a si thavi ngu kupimisa ati ti ndi no humelela mbimo yi a ndi no khata kutxhumayela. Kambe ene a txo tipfa i si nga wa txilo ngu mhaka ya txidiwukiso atxi Jesu a nga ti ngadi ku txi maha, txo kukuta sihaka so tala ngu mbimo yimweyo. Kufana ni Pedro nawe u nga thuka u thava ngu pimisa ngu ti ti patekako ka kuva m’huweleli. I di toneto, engetela lirando li u ku nalo ngu Jehovha, Jesu ni vathu vamwani, eto ti na kuvhuna ku u tumela txirambo txa Jesu txo va mkukuti wa vathu.—Mat. 22:37, 39; Joh. 14:15.

6. Ngu sihi sivangelo si hi mahako hi txhumayela?

⁶ Wona sivangelo simwani si hi mahako hi lava kutxhumayela. Ngu ti to hi lava kuengisa txirumo txa Jesu atxi txi ku: “Tsulani . . . mi txi ya maha vagondiswa.” (Mat. 28:19, 20) Tximwani txi hi mahako hi txhumayela ngu ti to vathu va “karate ni ku rereka” se va ni ditora do ziva ditshuri mayelano ni Mfumo wa Txizimu. (Mat. 9:36) Jehovha a lava to vathu va tixaka totshe ve ziva ditshuri kasi ku ve hulukiswa.—1 Tim. 2:4.

7. Dibhuku da Varoma 10:13-15 di kombisisa kutxani ti to kutxhumayela nga lisima?

⁷ Ngako hi txi alakanyisisa ngu ti mthumo wuwa wu vhunisako tona vathu hi na wu wona i di wa lisima. Ku hambana ni mkukuti wa sihaka awu a kukutelako kudya ni kuxavisa, athu hi “kukuta” kasi ku hi ponisa wutomi wawe.—Lera Varoma 10:13-15; 1 Tim. 4:16.

8-9. Ngu tihi ti m’doti a fanelako ku ti ziva? Ngu kutxani?

⁸ Ka timbimo ta Jesu m’doti ti txi lava e ziva kwati lixaka la sihaka si a nga txi dota. (Levhi 11:9-12) Ti txi lava e tshumela e ziva to lixaka la sihaka soneso li maneka hani. Sihaka si tolovela zumba amu ku si tshambelako, ni mu si manako so dya. M’doti ti lava e tshumela e ziva mbimo yi sihaka si manekako ngu yona. Wona ti mwanathu awu a zivako kudota a zumbako hafuhi ni linene a nga womba. Ene a rambile mwanathu awu i ku murumiwa ti to ve ya kudotani. Mwanathu wule a ti khene: “Ngu tona, hi na ta manana mangwana ngu ma 9.” Se mwanathu wule a zivako kudota a to khene: “Ti na ya ngu mbimo yi sihaka si dyelako ngu yona.”

⁹ Ngu ha kufanako ka ti mbimo ta vapostoli vakukuti va vathu va txi ya ha vathu va manekako ni ngu mbimo yi ti nga txi hehuka ku mana vathu. Ngu txikombiso vagondiswa va Jesu va txi txhumayela dithepeleni, masinagogani, mitini ni mabhazara. (Mith. 5:42; 17:17; 18:4) Se nanathu ti lava hi ziva kutsimbitisana ni siemo, hi ziva amu hi nga manako kona vathu ni mbimo yi hi nga va manako ngu yona.—1 Vak. 9:19-23.

10. Nji txani txi hi vhunako hi tshukwatisa wusikoti wathu wo txhumyela?

¹⁰ M’doti ti lava e va ni sotshe si si lavekako ka mthumo wakwe ni kuziva ku si thumisa. Se nathu ti lava hi va ni si si lavekako ka mthumo wathu ni kuziva ku si thumisa. Jesu a ningete sileletelo ka vagondiswa vakwe sa ti va nga kukutisako tona vathu. Ene a va gete asi va nga ti fanela kuteka, amu va nga ti fanela kutxhumayela ni ti va nga ti fanela kuwomba. (Mat. 10:5-7; Luka 10:1-11) Nyamsi sengeletano ya Jehovha yi ni Farameti yo Gondisa ayi yi ku ni si hi si lavako ti to hi va gondiswa va vanene. * Yona yi tshumela  yi hi gondisa mathumiselo a farameti yoneyo. Eto ti hi vhuna kugondisa hi si thavi ni ku tshukwatisa wusikoti wathu wo txhumayela.—2 Tim. 2:15.

11. Ngu kutxani vadoti ti txi lava ve tsanisela?

¹¹ Vadoti wa sihaka ti lava ve tsanisela, nguko va manana ni sikarato sa singi. Ngu txitalo vadoti ti lava ve thuma ni wusiku ni ku ka tshuka kupeka timoya va sa ti rinzela. Vakukuti va vathu ni vona ti lava ve tsanisela. Mbimo yi va khatako kutxhumayela ni kuziwa kota Tifakazi ta Jehovha va nga manana ni sikarato so tala so fana ni kuvengelwa ngu maxaka, kupoyilwa ngu vangana ni kukanetwa. Kambe, atiya kha ti hi xamalisi. Jesu a gete va gondiswa vakwe ti to hi nga votshe ava va ndi no txhumayelwa va ndi no amukela mahungu a manene.—Mat. 10:16.

12. Ngu Joxuwa 1:7-9, nji txani txi no hi vhuna ku hi tsanisela?

¹² U nga maha txani ti to u si thavi. Txo khata tsaniseka ti to Jesu a na simama e thangela mthumo wuwa a di nzumani. (Joh. 16:33; Mtu. 14:14-16) Txa wumbidi, kholwa ka ti Jehovha a wombako to a na ku khatalela. (Mat. 6:32-34) Ngako likholo lako li txi tsana khu na mbi thava txilo. Pedro ni vathumi kulowe va kombisile likholo mbimo yi va nga leka kudotha ve londisa Jesu. Nawe u kombisile likholo mbimo yi u nga gela vangana vako ni maxaka ako ti to wa gonda  Bhiblia ni Tifakazi ta Jehovha ni ku waya mitshangoni! Ti ha kubasani ti to u mahile kutxitxa ka hombe ti to u hanya ngu milayo yo lulama ya Jehovha. Ti to u ti kota toneto ti lavile likholo ni ku tsanisela. Ngako u txi ya masoni u txi tsanisela u na kholwa ti to Jehovha: “MKOMA, Txizimu txako, a ni nawe, ni hani mu u yako kona.”—Lera Joxuwa 1:7-9.

13. Ngu tihi ti nga ku vhunako ti to u va ni txibindi?

¹³ Nji txani tximwani txi nga hi vhunako? Kombela Jehovha e ku ninga txibindi ni kutsanisela. (Mith. 4:29, 31) Jehovha a na xamula mikombelo yako ene kha na mbi kuleka ha pfukani. Ene mbimo yotshe a na kuvhuna. Tshumela u khumbula nzila yi Jehovha a nga vhuna vamwani ngu yona. Khumbula kambe nzila yi Jehovha a nga kuvhuna u xula sikarato ni ku ku ninga mtamo wo u xula sikarato ni ku ku ninga mtamo wo u kota kutxitxa mahanyelo ako. Hambi linene lo Bhilivila Jehovha a nga li abanisa ti to e hulukisa Vaisrayeli, ene kha na ku ti tanda kukuvhuna ti to u va m’gondiswa wa Kristu. (Eks. 14:13) Tekelela m’bhali wa Masalmo awu a nga khene: “MKOMA a ni nani, kha ni thavi txilo; m’thu a nga ni maha txani kani?”—Mas. 118:6.

14. U gondile txani ka ti ti nga humelela Masae ni Tomoyo?

¹⁴ Nzila yimwani yi yi nga kuvhunako ti to u tsana ngu gonda ka nzila yi Jehovha a nga vhuna ngu yona vathu va nga ti ni dizowa ti to ve va vathu va txibindi. Wona txikombiso txa mwanathu wu a dhanwako ku i Masae. Ene a ti ni dizowa ni ku a si pimisa to a nga sikota kutxhumayela. A txi pimisa ngu kuxhumayela a txi navela ni ku me bhandeka mafu e bela. Ngu toneto ene a ti karatete kukulisa lirando li a nga ti nalo ngu Jehovha ni vathu vamwani. Ene alakanyisisile ngu ti to ka masiku awa a magwito mthumo wo txhumayela mbwa txikuluveta se a kombete Jehovha to e mu vhuna e tsakela kutxhumayela. Ene a xute dizowa e tshumela a thuma kota nyaphandule. Jehovha a nga vhuna vahuweleli va vaphya ti to ve “tsana.” Wona ti ti nga humelela Tomoyo. Ditshiku do khata kutxhumayela ngu mti ni mti, ka mti wo khata kubela a ti ya mana wamsikati awu a nga mu bhongela a txi khene: “Kha ni lavi Tifakazi ta Jehovha hawa!” Se e gwita e gwabata ditimba. Tomoyo a to gela mwanathu a nga ti nayo a txi khene: “Ani nem kha na womba txilo kambe ene a ti tumbute ku hi Tifakazi ta Jehovha, eto ta ni tsakisa ngutu.” Konkuwa Tomoyo a thuma kota nyaphandule wa mbimo yotshe.

15. Nji txani kutigondisa, ngu kutxani i di ta lisima ka Makristu?

¹⁵ Vadoti va va humelelako va ziva kutigondisa. Kuwombwa to kuziva kutigondisa “ngu tiemisela kumaha mthumo wu ti ko sunga ku wu mahwa hambi ti txo karata.” Vadoti va sihaka va fanete ku tiemisela kuwuka ni mixo ve ya heta mbimo yo lapha va di matini hambi ku txi titila. Nanathu, ti lava hi ziva kutigondisa hi tsanisela hi txi maha mthumo wathu.—Mat. 10:22.

16. Hi nga maha txani ti to hi kota kumaha timhaka ti ti hi karatelako?

¹⁶ Kuziva kutigondisa hi nga timhaka to ti tekelela. Ngu mtumbuluko hi lava kumaha timhaka ati ti hi hehukelako. Kumaha timhaka ti i ku ta lisima ngutu kha ti hehuki, ngu toneto ti lava hi ziva kutiñola. Se ti lava hi ziva kutigondia kasi ku hi maha timhaka ti hi  ti wonako ti txi karata. Jehovha a na hi vhuna ngu kuthumisa moya wakwe wo sawuleka.—Vag. 5:22, 23.

17. Ngu kuya ngu 1 Vakorinto 9:25-27, mpostoli Paulo a ti khene ku laveka txani ti to hi maha ti ti lavekako?

¹⁷ Mpostoli Paulo a txi ziva kutigondisa. Hambiketo, a txi ti ziva ti to ti txi lava e “tsayisa” mmidi wakwe ti to e maha ati i ku ta tinene. (Lera 1 Vakorinto 9:25-27.) Ene a gondisile Makristu ti to me ziva kutigondisa ni kumaha totshe “ngu fanelo ni mlayo.” (1 Vak. 14:40) Nathu ti lava hi ziva kutigondisa kasi hi londisela txiemiso txathu txa moya ti patako kupateka mbimo yotshe ka mthumo wo kukuta vathu.—Mith. 2:46.

18. Hi nga maha txani ti to Jehovha e hi wona hi txi humelela?

¹⁸ M’doti wa sihaka a humelela ngako a txi kukuta sihaka so tala. Kambe kuhambana ni vadoti va sihaka, ti to hi humelela ka mthumo wathu kha ti yi ngu mtengo wa vathu ava hi va tisako ka sengeletano. (Luka 8:11-15) Ngako hi txi tsanisela ka mthumo wo txhumayela ni kumaha vagondiswa Jehovha a hi wona hi txi humelela. Ngu kutxani? Nguko hi va hi txi engisa ene ni Mwanana wakwe.—Marku 13:10; Mith. 5:28, 29.

19-20. Ngu tihi tihi kuzetwako ku ti maha ti to hi pateka ka mthumo wo txhumayela?

¹⁹ Ka matiko mamwani, vadoti vo tumelelwa kudota ngu mitxima yo kari. Ka makhalo onewo vadoti va ti tsitsirita va txi wona to mbimo se yo tsula. Nathu kota vakukuti va vathu hi kuzetwa ku hi hiseka ngutu aku magwito ma ko ya ma txi tshuketa. Mbimo yi yi nga sala ti to hi hulukisa wutomi wa vathu njidotho ngutu. Ngu toneto, u nga sweli, u nga emele siemo sa ninene ti to u pateka ka mthumo wuwa wa lisima ngutu.—Ekl. 11:4.

²⁰ Londola mbimo yiya ti to u tsanisa kutiemisela kwako kumaha mthumo, u ziva sivangelo ni ku va ni wuzivi wo engeteleka ngu Bhiblia. Ti pate ni vakukuti vamwani ava va pindako 8 wa timiliyoni u na pfa litsako lo thumela Jehovha. (Neh. 8:10) Tiemisele kumaha totshe ti u ti kotako ka mthumo wo txhumayela ni kupateka ka wona kala magwito. Ka gondo yi yi londiselako hi na ta bhula ngu tinzila tiraru ati ti nga hi vhunako kuzumba hi di tsani ka mthumo wo txhumayela kota va vakukuti va vathu.