Ndimana yiya yi womba tiya: “Ngako u txi wona kuxaniswa ka sisiwana sa ditiko do kari da hombe, ni kulwiswa ka wukhalo wa wulamuli ni wululamo, u ngu xamali ngu mhaka yo nga eho; nguko wule aku txitximwi ngutu kupinda avale va ku txitimwi, wa khatala ngu tona; kambe ku ni wo guleka ngutu kupinda vona.”—Ekl. 5:8.

Ngu kuya ngu mawonelo a vathu, ndimana yiya yi womba-womba ngu vathu va va fumako. Kambe ndimana yiya yi ni mapswi ya ma womba-wombako ngu Jehovha aya ma thavelelako ni kutsanisa.

Ekleziyaste 5:8 a womba-womba ngu mfumeli awu a xanisako sisiwana ni ku kha si ñoli ngu nzila yo lulama. Mfumeli eneyo a fanete ku khumbula ti to wa wonelelwa ngu mfumeli awu a ku txitimwi kwakwe mwendo a ku ni wukoma wo guleka kupala wakwe. Hambiketo, ti nga maha ku di ni vamwani vo guleka ngutu kupala mfumeli eneyo. Txo mbi tsakisa ka wukoma wa vathu ngu ti to ti nga maha vakoma vonevo votshe va di ni wukanyisi, se vathu va fumwako ngu vona va xanisekako.

Ti si nga ni mhaka ni ti to txiemo txa nemela ha ko za hi pwata themba kambe ta hi thavelela kuziva ti to Jehovha a woneleta “wule aku txitximwi ngutu” ka wukoma wa vathu. Hi nga gela Jehovha kukarateka kwathu hi kombela txivhuno. (Mas. 55:22; Vaf. 4:6, 7) Ha ti ziva to “Maso a MKOMA ma wona totshe ha mafuni, kutsanisa ava i ku vakwe ngu timbilu tawe totshe.”—2 Mak. 16:9.

Ndimana ya Ekleziyaste 5:8 yi womba-womba ngu ti ti mahekako ngu wukoma wa vathu i ku ti to mbimo yotshe ku ni wu i ku wa hombe kupala vamwani. Txa lisima ngutu ngu ti to ndimana yiya yi hi vhuna ku hi khumbula to Jehovha Mkoma awu a nga guleka ngutu ka vakoma va vathu. Konkuwa ene wa fuma ngu kuthumisa Jesu Kristu i ku Mkoma wa Mfumo wa Txiximu. Jehovha Nyamitamo, ene wa wonelela sotshe ni ku a lulamile. Kufana ni Jehovha Jesu nene a lulamile ni ku wa khatala ngu vathu.