1-2. Mapswi ya ma ku ka Ekleziyaste 11:6 ma yelana njani ni mthumo wo txhumayela?

KA MATIKO mamwani vathu va tsakela mbimo yi hi va txhumayelako, nguko didungula di hi di txhumayelako da va tsakisa. Kasi ka matiko mamwani vathu kha va nga ni mhaka ni Txizimu mwendo Bhiblia. Va njani vathu va wukhalo wako? Ti si nga ni mhaka ni ti to va tsakela mwendo kha va tsakeli, Jehovha a lava ti to hi simama hi txhumayela kala kuza e hi emisa.

² Jehovha a vekile mbimo ayi mthumo wo txhumayela wu no ema ngu yona ni mbimo ayi “magwito” ma no hoka ngu yona. (Mat. 24:14, 36) Kala ka mbimo yoneyo, hi nga txi engisisa kutxani txirumo txi txi ku “u nga zumbi ngu mawoko”? *—Lera Ekleziyaste 11:6.

3. Hi na bhula ngu txani ka gondo yiya?

³ Ka gondo yi yi nga pinda hi gondile ngu mune wa timhaka ati ti lavekako ti to hi humelela kota “vakukuti va vathu.” (Mat. 4:19) Ka gondo yiya hi na bhula ngu timhaka tiraru ati ti hi vhunako ti to hi simama hi txhumayela ti si nga ni mhaka ni siemo si hi mananako naso. 1) Hi na wona to ngu kutxani i di ta lisima ti to hi veka mapimo ka mthumo, 2) kutimisela ni 3) kuva ni likholo lo tsana.

4. Ngu kutxani hi di fanete kusimama hi veka mapimo ka mthumo wu Jehovha a nga hi ruma?

⁴ Jesu a wombile ati ti ndi no maheka ka masiku a magwito. Ene a txi ti ziva ti to timhaka toneto ti ndi na tsulupeta valondeteli  vakwe ko txumayela mahungo a Mfumo, ngu toneto a txharihisile valondeteli vakwe ngu ku va gela atxi khene: “wonelelani.” (Mat. 24:42) Ka masiku a Nowa vathu va ti bhisi ngu mithumo ya ditshiku ni ditshiku aha koza va si ti tekeli ha msungo ati Nowa a nga ti va gela. (Mat. 24:37-39; 2 Pedro 2:5) Se ni nyamsi yingi mithumo yi yi hi tsulupetako. Se ngu toneto ti lava ku hi simama hi veka mapimo ka mthumo awu Jehovha a nga hi ruma.

5. Ngu kuya ngu Mithumo 1:6-8 mthumo wo txhumayela wu ndi na gwitela hani?

⁵ Mthumo wo txhumayela, ngu wona i ku wa lisima awu ti lavako hi veka mapimo ka wona. Jesu a wombile ti to msana ka kufa kwakwe mthumo wo txhumayela wu di na simama kudingana mbimo yo lapha kala wu hokelela vathu vo tala. (Joh. 14:12) Mbimo yi Jesu a nga fa, vamwani ka vagondiswa vakwe va tshumete ka mthumo wo dota sihaka. Se mbimo yi a nga wuswa Jesu a mahile txidiwukiso txo vagondiswa vakwe ve kukuta sihaka sa singi. Se ene a londote mkhanjo wonewo ti to e khumbutisa valondeteli vakwe ti to mthumo wo va vakukuti va vathu ngu wona i ku wa lisima kupinda yimwani mithumo. (Joh. 21:15-17) Msana kova a si se tshumela e ya nzumani Jesu a gete vaengiseli vakwe ti to mthumo wo txhumayela wu si gwiteli Israyeli basi, kambe wu ndi nava wa ha mafuni kotshe. (Lera Mithumo 1:6-8.) Ku di pindile malembenyana Jesu a kombile m’woniso mpostoli Johane wa ti ti ndi no maheka “ngu ditshiku da Mkoma.” * Ka m’woniso wonewo Johani a woni timhaka to xamalisa ngutu, ene a woni ngelozi yi txi kongomisa mthumo wo txhumayela i ku “Evhangeli yo mbi na makhato ni magwito . . . . ka vaaki va ha mafuni, ni yotshe mifumo, totshe tixaka  totshe tidimi ni votshe vathu.” (Mtu. 1:10; 14:6) Ti ha kubasani ti to Jehovha a lava ti to hi pateka ka mthumo wa lisima ngutu kala kuza kuhoka magwito.

6. Nji txani txi nga hi vhunako ti to hi veka mapimo ka mthumo wo txhumayela?

⁶ Hi nga simama hi veka mapimo ka mthumo wo txhumayela ngako hi txi alakanyisisa ngu nzila yi Jehovha a hi gondisako ngu yona. Ngu txikombiso hi ni sakudya sasingi sa moya, hi ni mabhuku a mangi aya u nga ma lerako ngu kuthumisa fone mwendo komputadhori, hi ni so engisela, mavhidhiyo ni JW Broadcasting. U nga tshumela u bela ka site yathu ngu tidimi ti ti pindako 1.000! (Mat. 24:45-47) Hambiko vathu vo tala nyamsi wa ditshiku va si pfaniku ngu mhaka ya politika, wukhongeli ni wusiwana, kambe konamu ka 8 wa timiliyoni ta vathu ha mafuni kotshe va khozela Txizimu ngu wumwewo. Ngu txikombiso ngu wazixanu wa 19 ka Abril wa 2019 Tifakazi ta Jehovha ha mafuni kotshe ti tsanganile ngu wumwewo ti xolisisa m’bhalo wa ditshiku, ni minova ya kona vathu vo dingana 20.919.041 va tshanganile ti to ve khumbula lifo la Jesu. Hi txi alakanyisisa ngu ti ti mahekako to tsakisa ti hi maha hi veka mapimo ka mthumo wo txhumayela mahungu a Mfumo.

7. Txikombiso txa Jesu txi nga hi vhunisa kutxani ti to hi veka mapimo ka mthumo wo txhumayela?

⁷ Nzila yimwani yo veka mapimo ka mthumo wo txhumayela ngu etetela txikombiso txa Jesu. Ene kha tumelela txilo txi mu tsulupeta ka mthumo wo txhumayela. (Joh. 18:37) Jesu kha tumela ku kanganyiswa ngu Sathani mbimo yi a nga mu thembisa ku mninga “yotshe mifumo ya ditiko ni tithomba ta yona” ni ku kha tumela mbimo yi va nga txi lava ku mmaha mkoma. (Mat. 4:8, 9; Joh. 6:15) Ene kha tumela kujikiswa mapimo ngu kulava tithomba, nem kha leka mthumo wakwe ngu mhaka ya ku kanetwa. (Luka 9:58; Joh. 8:59) Mbimo yi hi mananako ni siduko hi nga simama hi veka mapimo athu ka txialakanyiso txa mpostoli Paulo. Ene a kuzetile Makristu to me etetela txikombiso txa Jesu txo ‘mbi guma mtamo’!—Vaheb. 12:3.

8. M’thu a ti kombisisa kutxani ti to wa timisela? Ngu kutxani ti txi laveka ngutu konkuwa?

⁸ M’thu wo timisela wa rinzela na a si karateki kala siemo si txitxa. Ti lava hi timisela ka siemo so hambana-hambana, ngu txikombiso, ti nga maha hi rinzela to sikarato so kari si pinda mwendo kuhetiseka ka mixuvo yo kari. Habhakuki a ti ni mixuvo ya ti to wugevenga wu nga ti tiho Judha wu guma. (Hab. 1:2) Vagondiswa va Jesu va ti emete to Mfumo wu “na kuluveta kuhumelela” ti to wu ta va khulula ka wukoloni wa Roma. (Luka 19:11) Nathu hi di rinzete ngu maso o bhilivila ditshiku di Mfumo wa Txizimu wu no lovisa ngu dona wotshe wubihi, wu tisa mafu a maphya. (2 Pedro 3:13) Kambe ti lava hi timisela ni kurinzeka kala mbimo yi Jehovha a no hetisisa sithembiso soneso. He wone tinzila timwani ati Jehovha a hi gondisako ngu tona kutimisela.

9. Hi tizivisa kutxani ti to Jehovha wa timisela?

⁹ Jehovha njikombiso txa txinene ko timisela. Na yi si se khata ndambi Jehovha a ningile Nowa mbimo yo enela ti to e aka ngalava ni ku e thuma kota “mruruteli wa wululami.” (2 Pedro 2:5; 1 Pedro 3:20) Mbimo yi Abrahamu a nga maha siwotiso so tala mayelano ni txisungo txa Jehovha txo lovisa Sodhoma ni Gomora ene a mu engisete ngu kutimisela. (Gen. 18:20-33) Vaisrayeli va kombisile kwa mbi thembeka kudingana malembe a mangi, hambiketo Jehovha a va timiselete. (Neh. 9:30, 31) Nathu ha kuwona kutimisela ka Jehovha  nyamsi, nguko ene a ninga mbimo ya ti to votshe “ve hunduluka.” (2 Pedro 3:9; Joh. 6:44; 1 Tim. 2:3, 4) Txikombiso txa Jehovha txi hi maha hi timisela mbimo yi hi txhumayelako ni kugondisa. Jehovha a tshumela a hi gondisa kutimisela ngu kuthumisa sikombiso asi si manekako ka Bhiblia.

10. Hi nga gonda txani ka txikombiso txi txi ku ka Jakobe 5:7, 8?

¹⁰ Lera Jakobe 5:7, 8. Txikombiso txa m’dimi txi hi gondisa kuva vo timisela. Ditshuri ti to siyalo simwani sa kuluveta kuvitwa. Hambiketo siyalo simwani sa swela kuvitwa, ngutu-ngutu asi si velekako mihando. Ka ditiko da Israyeli, siyalo si txi teka mitxima yiraru ti to si veleka. Mdimi a txi tolovela kuphaya timbewu takwe ka nzuma yo khata ku txi bela wuxika, se e ta elula siyalo sakwe ka nzuma yo gwita ku txi bela malanga. (Marku 4:28) Nathu hi nga etetela kutimisela ka mdimi, hambiketo kha ti hehuki.

11. Kutimisela ku nga hi vhunisa kutxani ka mthumo wo txhumayela?

¹¹ Aku hi ku vathu vo mbi hetiseka hi tsakela kuwona wuyelo ya mithumo yathu. Kasiku siyalo si humisa mihando, m’dimi ti lava e ti karata, ti lava e dima, e phaya, e sakula ni kutheletela mati. Ta fana ni mthumo wo maha vagondiswa. Ti teka mbimo ti to hi thavisa txisawu-sawu ni kwa mbi khatala ka mbilu ya txigondo. Kutimisela ku na hi maha hi si gumi mtamo ngako vathu va si tsakeli. Hambi vamwani va txi tsakela didungula dathu hi fanete hi va vo timisela. Athu hi nge sinzisi sigondo ti to si va ni likholo. Hambi vagondiswa va Jesu mbimo yimwani va txi swela kupfisisa ati Jesu a nga txi va gondisa. (Joh. 14:9) U nga divali ti to hambi ku hi phayako ni kutheletela mati Txizimu ngu txona txi si mahako si kula.—1 Vak. 3:6.

12. Hi nga kombisisa kutxani kutimisela hi txi txhumayela maxaka athu?

¹² Ta karata kutimisela ngako hi txi txhumayela  maxaka athu. Ditshina da mlayo adi di ku ka Ekleziyaste 3:1, 7 di nga hi vhuna ka mhaka yiya. Yona yi khene: “Ku ni mbimo . . . ya kumalala ni mbimo ya kuwombawomba.” Mithumo yathu ya yinene yi nga ningela wufakazi ka maxaka athu hambi keto hi nga va txhumayela. (1 Pedro 3:1, 2) Ti lava hi timisela hi txi txhumayela ni kugondisa votshe vathu kupata ni maxaka athu.

13-14. Ngu sihi sikombiso so timisela asi hi nga si tekelelako?

¹³ Hi nga gonda kutimisela ka sikombiso sa mu ka Bhiblia ni sa vathu va ngweno. Habhakuki a txi navela to wubihi wu guma Judha, ngu toneto a nga bhala tiya: “Ni nava wukhaloni kwangu ko wonelela.” (Hab. 2:1) Mpostoli Paulo a kombisile mixuvo ya “kuheta” mthumo wakwe. Hambiketo ene a simamile e timisela e “txhumayela Evhangeli ya kateko ya Txizimu.”—Mith. 20:24.

¹⁴ Alakanya txikombiso txa mpatwa wumwani wu nga gradhuwara Giliyadhi. Wona wu avetwe ku ya thuma ka ditiko di ku nga ti ni Tifakazi ta tidotho amu vathu vo tala va nga si kholwi ka Kristu. Aku vathu vo tala va nga si kholwi ka Kristu ti txi karata ku mana vathu vo tala vo tsakela kugonda Bhiblia. Kambe vangana vawe ava va nga gradhuwara kumweko va nga ti avetwe ku ya thuma ka matiko mamwani va ti va rumelela madungula a ti to va ti ni sigondo sa singi sa Bhiblia. Hambiketo mpatwa wuleya wu timisete wu simama wu txhumayela hambi ku vathu va kona va nga si tsakeli. Msana kova va di thumile 8 wa malembe va mani litsako ngu kuwona txigondo tximwetxo txa Bhiblia txi txi bhabhatiswa. Sikombiso siya sa kale ni sa ngweno si yelana ngu nzila yihi? Otshe malanda awa a Jehovha kha ma ngava mikara mwendo kukhalahatsha ngu mawoko, se Jehovha a hakete kutimisela kwawe. Sikombiso soneso si hi kuzeta ku ‘hi londetela avale va amukelako thomba ya sithembiso ngu likholo ni kutimisela.’—Vaheb. 6:10-12.

15. Likholo li nga hi vhunisa kutxani ti to hi simama hi txhumayela?

¹⁵ Aku hi kholwako ka didungula di hi di txhumayelako ti hi maha hi lava kugela vamwani didungula da Mfumo nga ha hi nga kotako ngu kona. Ha kholwa ka sithembiso sa dipswi da Txizimu. (Mas. 119:42; Isaya 40:8) Ni ku ha wona wuprofeti wa Bhiblia wu txi hetiseka ka masiku athu. Ha wona vathu va txi txitxa wutomi wawe ve khata kuhanya ngu milayo ya Bhiblia. Totshe tiya ti tsanisa kuthemba kwathu ka ti to votshe vathu va ti lava kupfa didungula da Bhiblia.

16. Ngu kuya ngu Masalmo 46:1-3, likholo ka Jehovha ni Jesu li nga hi vhunisa kutxani ti to hi simama hi txhumayela?

¹⁶ Hi tshumela hi va ni likholo ka Jehovha i ku txisima txa didungula adi hi di txhumayelako ni ka Jesu awu i ku mkoma wu a nga sawulwa ngu Jehovha. (Joh. 14:1) Ti si nga ni mhaka ni siemo si hi mananako naso, Jehovha a na hi vhikela ni ku hi ninga mtamo. (Lera Masalmo 46:1-3.) I si ngeto dwe ha tiziva ti to Jesu a thumisa mtamo ni wukoma wu a nga ningwa ngu Jehovha ti to e thangela ka mthumo wo txhumayela.—Mat. 28:18-20.

17. Ngu kutxani hi di fanete kusimama hi txhumayela? Womba txikombiso.

¹⁷ Likholo li hi maha hi tsaniseka ti to Jehovha a na katekisa mizamo yathu, kambe ene a nga hi katekisa ngu tinzila ti hi nga sa ti emela. (Ekl. 11:6) Ngu txikombiso ditshiku ni ditshiku vathu va wona mabhuku athu ka timeza ni sikarinyana sa mabhuku. Ina toneto ta vhuna? Inna, ta vhuna. Nosso Ministério do Reino wa novembro wa 2014 a wombile ti  to m’gondi mmwani wa universidade a lavile kubhala to kari ngu Tifakazi ta Jehovha ka mthumo wu a nga ti ningilwe. Ene a sa tikota ku mana Nyumba ya Mfumo, kambe a mani meza ya mabhuku athu hafuhi ni txikolwani kwakwe se ene a mani to tala to bhala ka mthumo wakwe. Ngu magwito a gondile ditshuri se e bhabhatiswa eva Fakazi ya Jehovha. Konkuwa a thuma kota nyaphandule wa mbimo yotshe. Timhaka to nga tiya ti kombisa ti to mbangi va lavako kupfa mahungu a manene a Mfumo. Se eto ti hi maha hi va ni mtamo wo simama hi txhumayela.

18. Hi tizivisa kutxani ti to Jehovha a na emisa mthumo wo txhumayela ngu mbimo ya kona?

¹⁸ Athu ha tiziva ti to mthumo wo txhumayela wu na ema ngu mbimo ya kona. Alakanya ti ti nga maheka ka masiku a Nowa. Jehovha a kombisile ti to wa vekisa mbimo. Ene a wombile ditshiku di yi ndi no khata ngu dona ndambi ku ti nga di sate 120 wa malembe. Ku ti ngadi sate masiku o tala Jehovha a rumile Nowa ti to e aka ngalava. Ene a thumile ngutu kudingana 40 mwendo 50 wa malembe na yi si se khata ndambi. Ti si nga ni mhaka ni ku vathu va nga si engisi, Nowa a simamile e txhumayela kala ditshiku di Jehovha a nga m’gela ku khene betela sihari mndani ka ngalava. Neti di nga hoka ditshiku “Jehovha a to seka ditimba.”—Gen. 6:3; 7:1, 2, 16.

19. Ngu tihi ti hi ti emelako i si nga kale?

¹⁹ I si nga kale Jehovha a na emisa mthumo wo txhumayela. Se e lovisa Sathani ni mafu akwe o biha e gwita e tisa mafu a maphya aha ku no hanya vathu vo dikha ava va engisako Txizimu. Kala kuhoka mbimo yoneyo he tekeleleni txikombiso txa Nowa, Habhakuki ni vamwani va nga mbi khalahatsha ngu mawoko. Hotshethu he simameni hi veka mapimo ka mthumo wo txhumayela hi timisela ni kuva ni likholo lo tsana ka sithembiso sa Jehovha.