1. Nga siemo sihi ti nga karatako kuthumela Jehovha?

NGU yihi mbimo u yi wonako ti txi ku karatela kuthumela Jehovha? I mbimo yi u mananako ni sikarato mwendo i mbimo yi u nga tsaka? Ta hi hehukela kuthumela Jehovha ngako hi txi manana ni sikarato. Kambe hi maha txani mbimo yi txa wutomi txi hi tsimbilelako? Ina ha divala lisima lo khozela Jehovha? Jehovha a gete Vaisrayeli ti to eto ti nga thuka ti va mahekela.—Dhewut. 6:10-12.

2. Ngu txihi txikombiso txa txinene a txi Asa a nga hi siyela?

² Mkoma Asa a vile txikombiso txa txinene ko thumela Jehovha. Ene kha thumela Jehovha ka mbimo ya sikarato dwe, kambe a mu thumete hambi ka mbimo ya kudikha. Kukhukhela i nga di m’dotho, “mbilu ya Asa i ti ya yinene ka MKOMA.” (1 Vafu. 15:14.) Nzila yimwani a nga kombisa ti to wa khozela Jehovha ngu mbilu yotshe ngu fuvisa wukhozeli wa makuhu khe Judha. Bhiblia yi womba ti to Asa “a thavisile siluvelo sa sizimu sa walo, e fayetela marigwi awe a wukhongeli, a txi wilela tiphande.” (2 Mak. 14:3, 5) Ene a tshumete e thavisa kokwani wakwe Maka ka txitulu txi a nga ti natxo. Ngu kutxani? Nguko ene a txi kuzeta vathu ku ve khozela sizimu sa walo.—1 Vafu. 15:11-13.

3. Hi na bhula ngu txani ka gondo yiya?

³ Asa kha gwitela ko gumisa wukhozeli wa makuhu dwe ha ditikoni. Ene a tshumete e kuzeta vathu ti to ve khozela Jehovha khe Judha ni kuvhuna vathu ku ve themba Jehovha. Jehovha a katekisile Asa ni votshe va Isarayeli ngu ku va ninga mbimo ya kudikha. * Kudingana 10 wa malembe aya Asa a  nga fuma “ditiko di di thuthile.” (2 Mak. 14:1, 4, 6) Ka gondo yiya hi na wona ti to Asa a yi londolisile kutxani mbimo yi ku nga ti ni kudikha. Hi na gwita hi xolisisa txikombiso txa Makristu o khata, kufana ni Asa ni ona kha ma khudhahela mbimo yi ku nga ti ni kudikha. Ngu magwito hi na xamula txiwotiso txi txi ku: Ngako hi txi hanya ka ditiko di ku ku ni mkhululeko wa wukhozeli, hi nga maha txani ti to hi si khudhaheli ngu mbimo yi ku ku ni kudikha?

4. Ngu kuya ngu 2 Makronika 14:2, 6, 7, Asa a londolisile kutxani mbimo yile ya kudikha?

⁴ Lera 2 Makronika 14:2, 6, 7. Asa a gete txitshungu ti to Jehovha a ti va “ningile kuhumula ngu madhawa otshe.” Asa kha pimisa ti to mbimo yile ya kudikha i ti mbimo yo dya do hola. Kuhambana nito ene a londote mbimo yile ti to e aka didhoropa, maguma, sitezi ni matimba a didhoropa. Asa a gete Vaisrayeli ti to ditiko “di nga di thuthile.” Asa a ti lava kuwomba txani? Ene a txi lava kuwomba ti to vathu va ti ni mkhululeko wo tsimbila tsimbila ditikoni mule ni ku aka nem va si khulumetwi ngu valala. Asa a kuzetile txitshungu ti to txi londola mbimo yile ya kudikha.

5. Ngu kutxani Asa a di lulamisete ni kutsanisa masotxhwa akwe a yimbi?

⁵ Asa a tshumete e londola mbimo yile ti to e lulamisela dibutho dakwe da yimbi ni ku di tsanisa. (2 Mak. 14:8) Ina atiya ti womba ti to a txo mba themba Jehovha? Ahim-him. Kota ku i nga ti mkoma Asa a txi ti ziva ti to a fanete kululamisela vathu vakwe ti to ve ta wonisana ni sikarato asi si ndi no thuka si ta humelela. Asa a txi tiziva ti to mbimo yile yodya do titila yi ndi na guma. Se ngu toneto ngu ditshuri ti nga maheka.

6. Makristu o khata ma yi londolisile kutxani mbimo yile yo dikha?

⁶ Hambiku Makristu o khata mbimo yimwani ma nga ti xaniswa, kambe ma ve ni mbimo ya kudikha. Ma ti maha txani ngu mbimo yoneyo yo dikha? Ona ma londote mbimo yoneyo ti to me txhumayela mahungu a manene va si emi. Dibhuku da mithumo di womba ti to ona ma “txi hanya ngu kuxonipha Mkoma.” Makristu ma txi simama me huwelela mahungu a manene, se eto ti ti maha to dibanza di ‘anda.’ Ona ma simamile me txhumayela ngu kuhiseka ka mbimo yile ya kudikha se Jehovha a ma katekisile.—Mith. 9:26-31.

7-8. Paulo ni Makristu mamwani va txi maha txani mbimo yi va nga ti mana mkhanjo? Txhamusela.

⁷ Makristu o khata ma londote yotshe mikhanjo yi ma nga ti nayo ti to me txhumayela mahungu a manene. Ngu txikombiso, mbimo yi Paulo a nga wona to a tuleketwe ngu mkhanjo khe Efesu ene a londote mkhanjo wule ti to e txhumayela ni kumaha vagondiswa ka didhoropa dile.—1 Vak. 16:8, 9.

⁸ Paulo ni Makristu mamwani va tshumete ve tulekelwa ngu mkhanjo mbimo yi ku nga lulamiswa txikarato mayelano ni kuyiswa wukwerani ngu dilembe da 49 ka mbimo ya Makristu. (Mith. 15:23-29) Msana ko va txikarato txi di lulamisilwe mabanza otshe me ziviswa, Makristu ma txhumayete “Mahungu a Manene a dipswi da Mkoma” ngu kuhiseka. (Mith. 15:30-35) Ngu yihi wuyelo yi nga vaho? Bhiblia yi womba tiya: “Mabanza ma ti tsaniswa amu ka likholo, me anda ditshiku ni ditshiku.”—Mith. 16:4, 5.

9. Ngu wuhi mkhululeko awu wu kuho nyamsi? Hi nga ti wotisa txani?

⁹ Ka matiku o tala nyamsi ha txhumayela hi di khululekile. Ina awe u hanya ka ditiko di kuthumela Jehovha ku si tsimbiswiko? I di toneto ti wotise tiya, ‘I na na yi londola mbimo yiya ya kudikha?’ Ka masiku ya o gwita sengeletano ya Jehovha yi thangela mthumo wo txhumayela ni kugondisa awu wu yako wu txi kula. (Marku 13:10) Ngu toneto ku ni to tala to ti maha ka sengeletano ya Jehovha.

10. Dibhuku da 2 Timoti 4:2, di hi kuzeta kumaha txani?

¹⁰ U nga yi londolisa kutxani mbimo yiya yo dikha? (Lera 2 Timoti 4:2.) Ti ngo txani u xolisisa txiemo txa mwaya wanu kasi kuwona to mmweyo wanu a nga engetela masiku o txhumayela mwendo kuthuma kota nyaphandule? Ayi hi nga mbimo yo sengeletela tithomba nguko ti na mbi ta kuvhikela ka xanisa ya hombe.—Mav. 11:4; Mat. 6:31-33; 1 Joh. 2:15-17.

11. Ngu tihi ti vamwani va ti mahako ti to ve txhumayela mahungu a manene?

¹¹ Vahuweleli vo tala va gonda tidimi timwani ti to ve kota kutxhumayela mahungu a manene. Sengeletano ya Jehovha ya va vhuna vahuweleli vonevo ngu kuhumisa mabhuku ni mavhidhiyo ngu tidimi to tala. Ngu txikombiso ngu 2010 mabhuku athu ma txi maneka ngu tidimi ti pindako 500. Nyamsi mtengo wonewo wu engetelekile, konkuwa mabhuku ni mavhidhiyo ma maneka ngu tidimi ti ti pindako 1.000!

12. Ngu kutxani ti ni lisima ku vathu ve txhumayelwa ngu lidimi lawe? Womba txikombiso.

¹² Va tipfisa kutxani vathu va va gondako ditshuri ngu lidimi lawe? Wona txikombiso txa mwanathu awu a nga xalela mtshangano wa M’ganga khe Memphis ku manekako Tennessee, Estados Unidos da America. Mtshangano  wonewo wu vekilwe ngu Txikinyarwanda i ku lidimi li li wombwa-wombwako khe Ruanda, Congo-Kinshasa ni Uganda. Msana ka mtshangano, ene a ti khene: “Ni ni 17 wa malembe ni ti muwa Estados Unidos, kambe a diya di khambe do khata ni pfisisako kha kwati timhaka ta moya.” Ti ha kubasani ti to mwanathu a gwesekile ngu mtshangano wule wu nga vekwa ngu lidimi li a nga velekwa ka lona. Ngako siemo si txi ku tumelela, ina u nga gonda lidimi limwani ti to u txhumayela vathu vamwani ka wukhalo wanu? Ti nga maha ka wukhalo awu kutxhumayelwako ngu dibanza dako ku di ni vathu va va tsakelako kubhula ngu lidimi limwani. Eto ti nga kumaha u tsakela kugonda lidimi lonelo, hambiku ti karatako tona ta wuyelisa.

13. Vanathu va Rússia va yi londolisa kutxani mbimo yo dikha?

¹³ Hi nga votshe vanathu va ku ni mkhululeko wo txhumayela. Ka matiko mamwani wukoma wa tsimbisa kutxhumayela. Ngu txikombiso, alakanya ti ti mahekako Rússia. Ku pindile malembe o tala va txi tsimbiswa kutxhumayela, kambe ngu Março wa 1991 va tumeletwe kutxhumayela. Ngu mbimo yoneyo Rússia ku to ko va ni 16.000 wa vahuweleli. Ku di pindile 20 wa malembe, mtengo wu engetelekile wu hoka ko na mu ka 160.000! Ti ha kubasani ti to va yi thumisile kwati mbimo yile ya mkhululeko. Kambe kha ta swela, vona va tshumete ve tsimbiswa. Ti si nga ni mhaka ni kutxitxa ka siemo vanathu kha va khutareli mawoko vona va simama ve thumela Jehovha ngu kuhiseka. Vona va londola mkhanjo wumwani ni wumwani ti to ve khozela Jehovha.

14-15. Jehovha a mu vhunisile kutxani Asa?

¹⁴ Dibutho da hombe di nga ti ni 1.000.000  wa masotxhwa di nga txita ngu Etiyopiya di dhumete Judha ka mbimo ya kufuma ka Asa, se kudikha ku va nga ti nako kugumile. Zera mthangeli wa dibutho da va Etiyopiya ati ti gela ku a na xula ditiko da Judha. Kambe Asa a si thembi mtengo wa masotxhwa, ene a ti themba Jehovha. Ene a khongete ka Jehovha a txi khene: “Hi vhune MKOMA, Txizimu txathu! Nguko hi thembile awe, hi xomile yimbi ngu ditina dako, ku yalwa ni vathu vava.”—2 Mak. 14:11.

¹⁵ Hambiku dibutho da Etiyopiya di nga ti pinda kumbidi dibutho da Asa ngu kutala, Asa a txi ti ziva ti to Jehovha a ni mtamo ni ku a ndi na vhuna vathu Vakwe. Se Jehovha kha mu dhanisa Asa, Vaetiyopiya va xutwe ve dya hahatshi.—2 Mak. 14:8-13.

16. Hi ti zivisa kutxani ti to mbimo yo dikha yi na guma i si nga kale?

¹⁶ Kha hi ti zivi a ti ti no humelela mmwani ni mmwani wathu ka mbimo yi yi tako. Hambiketo, ha tiziva ti to kudikha aku vathu va Txizimu va ku nako ku na guma. Khumbula ti to Jesu a gete vagondiswa vakwe ti to va ndi na “vengelwa ngu votshe vathu.” (Mat. 24:9) Mpostoli Paulo nene a wombile tiya: “Votshe va va lavako kuhanya ngu wukhongeli ngu ka Kristu Jesu, va na xaniswa.” (2 Tim. 3:12) Sathani a ni “txiviti” txa hombe, ngu toneto hi txo pimisa to kha na mbi hi maha txilo hi nga va hi txo ti xenga.—Mtu. 12:12.

17. Ti nga maha hi ta wonisana ni txani i singa kale?

¹⁷ I si nga kale hotshethu likholo lathu li na dukwa. I si nga kale ditiko di na wonisana ni “kuxaniseka . . . kova ku si zivi kuwonwa kukhukhela kukhatani ka ditiko kala nyamsi, akuwa kambe ku no mba va ni kumaheka kambe.” (Mat. 24:21) Ka mbimo yoneyo ti nga maha maxaka athu me hi wukela mwendo mthumo wathu wu tsimbwa. (Mat. 10:35, 36) Hi na maha txani? Ina nawe u na themba Jehovha kufana ni Asa?

18. Ngu kuya ngu Vahebheru 10:38, 39 nji txani txi no hi vhuna ku hi ti lulamisela ti to hi ta wonisana ni mbimo ya sikarato?

¹⁸ Mbimo yotshe Jehovha a hi lulamisela ngu didhawa da moya ti to hi ta wonisana ni sikarato si si tako. Ene a kongomisa ‘txithumi txo thembeka na txi di ni wutxhari’ to txi  hi ninga sakudya sa moya “ngu txikhati txi txi fanelako” ti to si hi vhuna hi tsana ngu didhawa da moya. (Mat. 24:45) Mmwani ni mmwani wathu a fanete ku tikaratela ti to eva ni likholo lo tsana ka mthumo wa Jehovha.—Lera Vahebheru 10:38, 39.

19-20. Ngu kuya ngu 1 Makronika 28:9, ngu sihi siwotiso si hi fanelako ku tiwotisa? Ngu kutxani?

¹⁹ Kufana ni Mkoma Asa nathu he ‘laveni Mkoma.’ (2 Mak. 14:4; 15:1, 2) Ti to hi lava Jehova, txo khata hi fanete kugonda ngu ngene hi tshumela hi bhabhatiswa. Hi fanete kumaha totshe ti hi nga ti kotako ti to hi tsanisa lirando lathu ngu Jehovha. Ti to hi tiziva to ina ngu ditshuri ha m’randa Jehovha hi fanete ku tiwotisa tiya: ‘Ina mbimo yotshe na ya mitshanganoni?’ Mbimo yi hi ku mitshanganoni na tidila ngu sakudya sa moya ni kutsaniswa ngu vanathu. (Mat. 11:28) Hi fanete kutshumela hi ti wotisa tiya: ‘Ina na lera Bhiblia ditshiku ni ditshiku?’ Ngako u txi hanya ni vaveleki, ina wa tiha mbimo yova ka wukhozeli wa mwaya divhiki ni divhiki? Ngako u txi hanya wekha, ina wa tiha mbimo yova ni gondo yako u pune? Ina wa tiha mbimo yo txhumayela ni kumaha vagondiswa ngu ha u nga tikotako ngu kona?

²⁰ Ngu kutxani i di ta lisima ku ni tiwotisa siwotiso soneso? Bhiblia yi womba ti to Jehovha wa xolisisa ati ti ku mbiluni kwathu, se nanathu hi fanete kumaha toneto. (Lera 1 Makronika 28:9.) Kasi ku hi tumbula ti to ku ni ti hi fanelako ku txitxa ka makungu ni mahanyelo athu hi fanete kukombela Jehovha e hi vhuna to hi maha kutxitxa koneko. Konkuwa i mbimo yo tilulamisela ti to hi ta wonisana ni siduko sa mbimo yi yi tako. Ngu toneto u nga tumeleli txilo txi kukhowotisa ngu mbimo yi ku ku ni kudikha!