1. Ngu wuhi wuxaka awu vathu vo thembeka va nga vako nawo ni Jehovha?

MWAYA wa vakhozeli va Jehovha wu pata Jesu Kristu i ku “matiwula wa sotshe sivangwa” kumweko ni tingelozi to tala. (Vakl. 1:15; Mas. 103:20) I singeto dwe, mbimo yi Jesu a nga ti ha mafuni a kombisile ti to vathu vo thembeka va nga sikota kuwona Jehovha kota Tate wawe. Mbimo yi Jesu a nga txi womba-womba ni vagondiswa vakwe ene a wombile ti to Jehovha ‘Tate wakwe . . . i Tate wawe.’ (Joh. 20:17) Ngako hi txi ti ningetela ni kubhabhatiswa hi lumba mwaya awu wu ku ni lirando wu wumbwako ngu vanathu.—Marku 10:29, 30.

2. Hi na bhula ngu txani ka gondo yiya?

² Vamwani ti nga va karatela kuwona Jehovha kota Tate wa lirando. Ni ku vambenyani ta karatela kuziva ti to va nga kombisisa kutxani ti to va randa vanathu. Ka gondo yiya hi na wona nzila yi Jesu a hi vhunako ngu yona kuwona Jehovha kota Tate wa lirando awu hi nga vako ni wuxaka nayo. Hi na tshumela hi wona tinzila ati hi nga etetelako ngu tona Jehovha ka nzila yi hi ñolako ngu yona vanathu.

3. Mkombela wa txikombisa wu hi vhunisa kutxani kuwa ni wuxaka ni Jehovha?

³ Jehovha Tate wa lirando. Jesu a lava ti to hi wona Jehovha kota Tate wa lirando awu hi nga tshuketako kwakwe, i si nga m’thu wo karata. Atiya ta ti komba ka nzila yi a nga gondisa ngu yona vagondiswa vakwe kumaha mkombelo. Ene a khatilwe mkombelo wa txikombiso ngu nzila yiya: “Tate wathu.” (Mat. 6:9) Jesu nga a di dhanile Jehovha kota “Wa mtamo-wotshe,” “Mvangi,” “Mkoma wa totshe timbimo” i ku sithopo asi si fanelako. (Gen. 49:25; Isaya 40:28; 1 Tim. 1:17) Kuhambana  ni eto, Jesu a thumisile dipswi di di ku “Tate.”

4. Hi ti zivisa kutxani ti to Jehovha a lava ku hi va ni wungana nayo?

⁴ Ina u ti wona ti txi kukaratela kuwona Jehovha kota Tate wa lirando? Vamwani kwathu ta hi karatela. Vamwani ti nga va karatela ngu nzila yi va nga kuliswa ngu yona. Kambe ta thavelela kuziva ti to Jehovha wa hi pfisisa. Ene a lava ku hi va ni wungana nayo. Ngu toneto Bhiblia yi hi kuzetako ku hi ‘tshuketa hafuhi ka Txizimu, kasi ni txona txi na tshuketela hafuhi kwathu.’ (Jak. 4:8) Jehovha wa hi randa, se a lava ku hi mu wona kota Tate wathu wa mnene.

5. Ngu kuya ngu dibhuku da Luka 10:22, Jesu a hi vhunisa kutxani ti to hi va ni wungana ni Jehovha?

⁵ Jesu wa hi vhuna ku hi va ni wungana ni Jehovha. Ene wa mu ziva kwati Jehovha ni ku a tekelela tifanelo takwe ngu kuhetiseka ha ko za e womba tiya: “Awule a ni wonako, a woni Tate.” (Joh. 14:9) Jesu a fana ni mkoma wathu awu a hi gondisako nzila yo xonipha ni kuengisa Tate wathu, ti to hi si mu henyisi kasi ku hi tsakelwa ngu ngene. Nzila yi Jesu a nga hanya ngu yona hamafuni yi kombisa nzila yi Jehovha a ku ni lirando ngu yona. (Lera Luka 10:22.) He wone ati ti kombisako ti to Jehovha wa hi randa.

6. Ningela txikombiso txa nzila yi Jehovha a nga engisa ngu yona Jesu?

⁶ Jehovha wa hi engisa kota vanana vakwe. Wona nzila yi a nga engisa ngu yona mwanana wakwe wa matiwula, Jehovha a engisile mikombelo ayi yi nga txi mahwa ngu mwanana wakwe mbimo yi a nga ti hamafuni. (Luka 5:16) Jesu a khongete ngutu mbimo yi a nga ti lava kumaha sisungo sa hombe, so fana ni mbimo yi a nga ti la kusawula vapostoli vale va 12. (Luka 6:12, 13) Jehovha amu engisile. Jehovha a tshumete engisa Jesu mbimo yi a nga txi khongela a di karatekile. Ku di sate mbimonyana ti to Jesu e ningelwa ene a khongete ka Tate wakwe mayelano ni sikarato sile a ndi no wonisana naso. Jehovha kha ko gwitela ko engisa mkombelo wa Jesu dwe, kambe ene a tshumete e rumela ngelozi kasi ku yi ta  tsanisa mwanana wakwe wo dhundeka.—Luka 22:41-44.

7. Hi ti pfisa kutxani ngu kuziva ti to Jehovha wa engisa mikombelo yathu?

⁷ Ka timbimo ta ngweno Jehovha wa simama engisa mikombelo ya sithumi sakwe, ni ku a tshumela a hi xamula ngu mbimo ya kona ni ngu nzila ya yinene. (Mas. 116:1, 2) Wona txikombiso txa mwanathu wu a zumbako Índia wu a nga tiwona to eto ditshuri. Ene a ti ni txikarato txa matipfelo se a wombile ta mbiluni kwakwe ngu mkombelo a txi gela Jehovha mayelano ni mhaka yoneyo. Ene a bhate tiya: “Mlongoloko wa JW Broadcasting^® wa Maio wa 2019, wu wombawombile ngu nzila yo wonisana ni ku vilela. Wona wu ni vhunile ngutu. I ti xamulo ya mikombelo yango.”

8. Jehovha a kombisile kutxani to wa mu randa Jesu?

⁸ Jehovha ati mu randa Jesu ni kutshumela e khatalela silaveko sakwe mbimo yi a nga ti ha hamafuni. (Joh. 5:20) Ni nyamsi Jehovha wa karateka ngu ngathu vathu. Ene a khatalete silaveko sa nyama sa moya ni sa matipfelo sa Jesu ni ku Jehovha kha leka kukombisa lirando ngu mwanana wakwe ni kutshumela e mu amukela. (Mat. 3:16, 17) Jesu kha tipfa a di ekha nguko a txi tiziva to mbimo yotshe Jehovha Tate wakwe a txi mkhatalela.—Joh. 8:16.

9. Ngu tihi ti kombisako to Jehovha wa hi randa?

⁹ Kufana ni Jesu hotshethu hi ti woni hipune ti to Jehovha wa hi randa. Alakanya ngu tiya, Jehovha a hi ndindete kwakwe e tshumela e hi ninga vanathu ava va ku ni lirando ti to hi va ni litsako ni ku ve hi khatalela ngu didhawa da matipfelo. (Joh. 6:44) Jehovha a tshumela e simama e hi ninga sakudya sa moya mbimo yotshe, asi si hi akako ngu didhawa da moya. Ene wa hi vhuna ngu kukhatalela silaveko sathu sa nyama. (Mat. 6:31, 32) Ngako u txi alakanyisisa ngu nzila yi Jehovha a hi randako ngu yona, lirando lathu ngu ngene la kula.

10. Hi nga gonda txani ka nzila yi Jehovha a ñolako ngu yona vanathu?

¹⁰ Jehovha wa va randa votshe vanathu, kambe athu ti nga hi karatela kukombisa lirando lonelo ka vanathu. Ti nga hi karatela ngu ku hi ta ka midhawuko yo hambana. Phela hotshethu ha maha tiphazamo ati ti henyisako vamwani. Hambiketo hi nga maha txo kari kasi kukombisa to ha randa vanathu. Hi nga mahisa kutxani? Ngu kuetetela txikombiso txa Tate wathu awu a kombisako lirando ka vanathu. (Vaef. 5:1, 2; 1 Joh. 4:19) He wone to hi nga gonda txani ka txikombiso txa Jehovha txo kombisa lirando.

11. Jesu a ti kombisile ku txani to wa tekelela “wumbilu” wa Jehovha?

¹¹ Jehovha wa kombisa “wumbilu.” (Luka 1:78) M’thu wu aku ni wumbilu wa karateka ngako atxi wona vathu va txi xaniseka, se a lava tinzila to va vhuna ni ku va thavelela. Nzila yi Jesu a nga ti ñola ngu yona vathu a txi kombisa kutekelela nzila yi Jehovha a kombisako ngu yona kukarateka ngu ngathu. (Joh. 5:19) Ditshiku dimwani Jesu a to wona dibutho se a ‘to di pfela wusiwana, nguko di ti ti karate ni kurereka, nga tinvuta to mbi na m’dyisi.’ (Mat. 9:36) Jesu asi njo gwitela kopfela wumbilu dwe. Ene ati hanyisa valwati ni kutshumela e humuta avale va nga ti ‘nemetwa ngu mrwalo.’—Mat. 11:28-30; 14:14.

12. Ningela txikombiso txa nzila yi hi nga kombisako wumbilu vanathu.

¹² Na hi si se kombisa wumbilu ka vanathu hi fanete kukhata ngu kuxolisisa sikarato asi va mananako naso. Ngu txikombiso, ti nga maha mwanathu wo kari a di ni txikarato txa malwati.  Ene ti nga maha asi womba-wombi ngu tona kambe ti nga maha atxi la txivhuno. Ti nga maha mwanathu eneyo a txi lava txivhuno ko xayisa mwaya wakwe, ngu txikombiso ti nga maha a txi lava txivhuno ko bhika sakudya mwendo kuhiyela. Mwendo ku mwanathu ti nga maha a di luzeketwe ngu mthumo, se hi nga mvhuna ku mninga simaleana hambi hi si wombi to hi va mani kala kuza e mana mthumo wumwani?

13-14. Hi nga kombisisa kutxani ti to hi na ni wuha ku fana ni Jehovha?

¹³ Jehovha ani wuha. (Mat. 5:45) Ngu toneto athu kha hi lavi ku rinzela ku vanathu ve hi kombela so kari kasi kukombisa wumbilu. Kufana ni Jehovha hi lava kuteka dizambo do kombisa wumbilu. Ene a humisa ditambo ditshiku ni ditshiku hi sa mkombela. Lisani lonelo li hi ninga wutomi hotshethu, hambi ni va va si kombisiko kubonga va wuyelwa ngu lisani lonelo. Jehovha a hi ninga si hi si lavako nguko a lavako kukombisa ti to wa hi randa. Ngu toneto, athu ha mranda ngutu Jehovha ngu wunene wakwe ni wuha wakwe!

¹⁴ Ngu kuetetela txikombiso txa Tate wathu wa nzumani, vathu vo tala va tekile dizambo do kombisa wuha. Ngu txikombiso, ngu 2013 mbimo yi ku nga va ni txingulo txa hombe atxi txi nga hoxota ngutu khe Filipinas, vanathu vo tala va luzeketwe ngu tinyumba tawe ni silo sawe. Se vanathu va hamafuni kotshe va va vhunile. Vo tala va mahile miningelo ya ku ti dhundela, vamwani va patekile ko wuseta tinyumba ati ti hokako kona mu ka 750 wa tona ngu dilembe dimwedo dwe. Ka mbimo ya mtungu wa COVID-19 vanathu vo tala va thumile ngutu kasi kuvhuna vanawe. Ngako hi txi kuluveta hi vhuna vanathu, hi kombisa ti to ha va randa.

15-16. Ngu kuya ngu dibhuku da Luka 6:36, ngu tihi hi nga ti mahako kasi kukombisa ti to hi lava kuetetela Tate wathu wa nzumani?

¹⁵ Jehovha a ni wumbilu ni kudivalela. (Lera Luka 6:36.) Ditshiku ni ditshiku ha wu wona wumbilu wa Jehovha. (Mas. 103:10-14) Vagondiswa va Jesu hambi ku va nga ti sa hetiseka ene atxi va kombisa wumbilu ni kudivalela. Ene a tshumete e tumela  kuningela wutomi wakwe ngu kona ha ka sionho sathu. (1 Joh. 2:1, 2) Kuziva ti to Jehovha ni Jesu va ni wumbilu ni kudivalela, ti hi maha hi kulisa lirando lathu ngu vona.

¹⁶ Hi nga kulisa lirando li hi ku nalo ngu vanathu ngako hi va ‘divalela.’ (Vaef. 4:32) Ditshuri ti to ta karata mbimo yimwani ku divalela se ti la hi simama hi sakulela ku maha toneto. Mwanathu mmwani wa txisikati a vhunwi kumaha toneto ngu gondo yimwani ya Muwoneleli ayi yi nga txi khene: “Perdoem uns aos outros liberalmente.” * Ene a womba tiya: “Mbimo yi ni nga gonda msungo wuwa wa mhaka wu ni vhuni ku va ni mawonelo a manene. Wona wu txhamusete ti to ngako hi txi divalela vamwani kha ti wombi ti to ho tumelelana ni mawonelo awe a walo mwendo ku ho wona ti va nga maha i si nga ta txilo. Kambe ti womba ti to ngako hi txi divalela hi maha ti to hi si sali ni txiviti ni kutshumela hi zumba hi di ni kurula.” Ngako hi txi divalela vanathu ti txi huma mbiluni ti kombisa ti to ha va randa ni ku hi lava kuetetela Tate wathu wa nzumani Jehovha.

17. Ngu kuya ngu dibhuku da Matewu 5:16, hi nga kombisisa kutxani ti to ha dhumisa Tate wathu wa nzumani?

¹⁷ I lungelo ya hombe kulumba mwaya wa hamafuni kotshe wa moya awu wu randanako. Athu hi lava ti to vathu vo tala ve ti pata ni nathu ko khozela Txizimu. Ngu toneto hi lava ku tiwonela kasi ku hi si mahi txilo atxi txi nga rukisako vathu va Jehovha ni Tate wathu wa nzumani. Se hi zama kuhanya ngu nzila yi yi no maha ti to vathu ve tsakela mahungu a manene.—Lera Matewu 5:16.

18. Hi nga vhunwa ngu txani ti to hi ningela wufakazi hi si thavi?

¹⁸ Mbimo yimwani vathu va nga hi poyilela mwendo ku hi xanisa nguko hi engisako Tate wathu wa nzumani. U nga maha txani nga ku u txi tipfa ti txi kukaratela kugela vamwani ngu ti u ti kholwako? Hi nga themba ti to Jehovha ni mwanana wakwe va na hi vhuna. Jesu a gete vagondiswa vakwe ti to va sa fanela  kuthava ti to va na womba txani mwendo kuwombisa kutxani. Ngu kutxani? Nguko Jesu a wombile ti to “a ti mi no womba tona mi na ningwa, ngu ku hi nga anu mi no womba-womba, aniko i Moya wa Tate wanu wu no womba-womba ngu nganu.”—Mat. 10:19, 20, NM.

19. Ningela txikombiso txa m’thu a nga ningela wufakazi ngu txibindi.

¹⁹ Hi nga wona txikombiso txa Robert wa Joni, mbimo yi i nga ti ngadi txigondiana txa Bhiblia a si se ku va ni wuzivi wo tala wa Bhiblia, ene a yisilwe tribhunal ka wusotxhwa. Ene a txhamusete ti to a ti fanete kusimama asi ti beteli ka ta wusotxhwa ngu kona ha ka ku a randako vanathu. Mwanathu Robert atxi kombisa ti to wa bonga ku va ha ka mwaya wuwa wa vanathu hamafuni kotshe. Se mxuxise a to mu wotisa tiya: “Mba mani vanathu?” Robert a si ti zivi to a ndi na wotiswa txiwotiso txonetxo kambe ngu txikuluveta a khumbute a tiya a nga ti ti gondile ka m’bhalo wa ditshiku. Wona i ti Matewu 12:50 awu wu ku: “Wuhi ni wuhi a no maha kuranda ka Tate wangu a ku nzumani, ngene i ku mwanathu ni ndiyangu ni mame wangu.” Hambi ku Robert i nga ti kova txigondiana txa Bhiblia dwe, moya wa Jehovha wu mvhuni e xamula txiwotiso ni simwani a nga sa si rinzela. Jehovha a tsakile ngutu ngu ti Robert a nga maha. Ngu toneto Jehovha wa tsaka ngu ngathu ngako hi txi themba ti to ene a na hi ninga txibindi kasi ku hi wonisana ni siemo so karata.

20. Ngu tihi ati hi fanelako ku tiemisela kumaha? (Johani 17:11, 15)

²⁰ He simameni hi ninga lisima lungelo yi yo lumba mwaya wuwa wa lirando. Hi na ni Tate awu a hi dhundako ngutu kumweko ni vanathu ava va hi randako, kha ha fanela ku tiwona ti si nga ta txilo kulumba mwaya wuwa wa vanathu. Sathani ni vaemeli vakwe va zama ku hi maha hi kanakana ti to Tate wathu wa nzumani wa hi randa, ni kudaya wumwewo awu hi ku nawo. Jesu a kombete Jehovha ti to e hi wonelela kasi ku hi simama hi di ni wumwewo. (Lera Johani 17:11, 15.) Jehovha wa xamula mkombelo wonewo. Kufana ni Jesu kha ha fanela kukanakana lirando ni txivhuno a txi Tate wathu wa nzumani a hi ningako txona. Ngu toneto he ti emiseleni kusimama hi kulisa lirando lathu ngu vanathu.