1-2. a) Ngu ku ya ngu dibhuku da Mavingu 16:31, hi fanete ku va wonisa kutxani vanathu ava va nga kula ngu tanga? b) Ngu sihi siwotiso asi hi no bhula ngu sona ka gondo yiya?

AVA va endako ve ya ka parke ka didhoropa da Arkansas khe Estados Unidos, ti tolovelekile to ve ya wona dhayimana yi di mbambamete hahatshi. Aku dhayimana yoneyo yi nga mbi lulamiselwa yi basiselwa, vo tala ava va yi wonako dhayimana yoneyo ti nga maha va si ti tumbuli to vona va wona tximaha txa lisima ngutu. Se va nga yi wona nga dirigwi do kari dwe, se ve kandetela ve pinda.

² Vanathu ava va nga kula ngu tanga ni vona va fana ni tidhayimana toneto, vona tithomba ta lisima ngutu. Bhiblia yi fananisa misisi yo basa ni m’bhoti. (Lera Mavingu 16:31; 20:29) Hambiketo ti nga maha hi si ti tumbuli tithomba toneto. Vanathu va i ku nga di vaphya, va nga wuyelwa ngutu ngako va txi ti tumbula tithomba toneto. Ka gondo yiya hi na xamula siwotiso siya sa siraru: Ngu kutxani Jehovha a txi wona vanathu ava va nga kula i di tithomba? Jehovha a va thumisa ngu nzila yihi vanathu ava va nga kula ngu tanga ka sengeletano yakwe? Hi nga maha txani ti to hi wuyelwa ngu txikombiso txawe?

3. Ngu kuya ngu dibhuku da Masalmo 92:12-15, ngu kutxani vanathu va va nga kula ngu tanga i di va lisima ka Jehovha?

³ Vanathu ava va nga kula ngu tanga mba lisima ngutu ka Jehovha. Ene a wona ati va ku ngu tona mbiluni, ni ku wa wona ni kuninga lisima tifanelo tawe tatinene. Ene wa tsaka ngutu ngako vanathu vonevo va txi vhuna vamwani ngu wutxhari ni experiyensia yawe ayi va nga yi mana ka wutomi wawe wo thumela Jehovha. (Jobe 12:12; Mav. 1:1-4) Jehovha wa ninga lisima kutimisela kwawe. (Mal. 3:16) Hambi ku va nga manana ni sikarato ka  wutomi likholo lawe kha la nyekanyekiswa. Themba yawe konkuwa nja hombe ngutu kupinda mbimo yiya va nga gonda ngu yona ditshuri. Jehovha wa va randa, nguko va simama ve huwelela ditina dakwe ‘hambi va di kumbile.’—Lera Masalmo 92:12-15.

4. Ngu tihi ati ti nga thavelelako vanathu va va nga kula ngu tanga?

⁴ I di to u mmweyo wa va malembe ma nga tsula, u nga tsaniseka ti to Jehovha wa wu khumbula mthumo wako ni ti u nga timaha msana khe. (Vaheb. 6:10) Ngu kuhiseka u vhunetile ka mthumo wo txhumayela, ni ku eto ta tsakisa ngutu Tate wathu wa nzumani. Awe u tsanisete sikarato, khwa ya leka kuhanya ngu milayo ya Bhiblia, u rwate wutixamuleli wo nemela ngutu ni kutshumela u trenara vamwani. U mahile totshe ti u nga tikota to u simama u thumisana ni sengeletano ya Jehovha. U seketete ni kutshumela u kuzeta vamwani ti to ve tivekela makungo yo bela ka mthumo wa mbimo yotshe. Jehovha wa kuranda ngutu ngu kona hawa ka kuthembeka kwako. Ene a thembisa ti to kha na mbi ‘leka vathu va va mthembako’! (Mas. 37:28) A tshumela e kuninga txitsaniso txiya: “Na mi gula kala mi huma tinvi.” (Isaya 46:4) Se u nga pimisi to awe aku u nga kula ngu tanga khu nga ni lisima kambe ka sengeletano ya Jehovha. Awe u ni lisima la hombe ngutu!

5. Ngu tihi ati ava va nga kula ngu tanga va fanelako ku ti khumbula?

⁵ Vanathu ava va nga kula ngu tanga va nga va txivhuno txa hombe ka sengeletano ya Jehovha ngu tinzila to hambana-hambana. Hambiku vona va singa ni mtamo awu va nga ti nawo makhatoni, vona va ni experiyensia yo tala ayi va nga yi mana ngu kutsimbila ka malembe. Konkuwa hi na wona sikombiso sa mbimo yi yi nga pinda ni sa ngweno asi si kombisako ti to Jehovha wa simama e va thumisa vanathu vonevo ngu tinzila to hambana-hambana.

6-7. Womba sikombiso sa mu ka Bhiblia sa ava va nga ti kute ngu tanga ava va nga mana makatekwa ya Jehovha ngu kona hawa ka kuthembeka kwawe?

⁶ Hi nga mana sikombiso sa sinene amu ka Bhiblia, sa vathu ava va nga simama ve thumela Jehovha hambi ku va nga ti kute ngu tanga. Ngu txikombiso, mbimo yi Mosi a nga khata kuthuma kota mprofeti ni muemeli wa Jehovha  ati ni mu ka 80 wa malembe. Jehovha a simamile e thumisa Dhaniyeli kota mprofeti wakwe hambi mbimo yi a nga ti ni 90 wa malembe. Jehovha a thumisile mpostoli Johani ti to e bhala dibhuku da Mtuletelo a ti ni mu ka 90 wa malembe.

⁷ Vamwani ava va nga ti thembekile ka Jehovha i ti singa vo ziwa ngutu mwendo va nduma. Eto ti ndi na maha va si ningwi lisima. Hambiketo, Jehovha a txi va wona ni ku a txi hakela kuthembeka kwawe. Ngu txikombiso, wamwamna mmwani a nga ti dhanwa ku i Simiyoni i nga ti wa “kululama ni kutiningetela ka wukhongeli” kha wombwi ngutu amu ka Bhiblia, hambiketo Jehovha a mningile lungelo yo e ya wona Jesu a di ngadi kuvelekwa ni kutshumela e profeta ngu ngene ni ngu mwamwakwe. (Luka 2:22, 25-35) Alakanya ngu mprofeti Ana awu i nga ti noni. Ene a ti ni 84 wa malembe kambe a si “khukhi Dithepeleni.” Aku a nga ti khatala ngu timhaka ta moya, Jehovha a mkatekisile mbimo yi a nga va ni lungelo lo wona Jesu a di ngadi kuvelekwa. Simiyoni kumweko ni Ana i ti va lisima ka Jehovha.—Luka 2:36-38.

8-9. Ningela txikombiso txa nzila yi vanathu va i ku tinoni va ku ni lisima ngu yona ka sengeletano ya Jehovha?

⁸ Ka timbimo ta ngweno ku ni vanathu vo tala ava va nga kula ngu tanga ava i ku sikombiso sa sinene ka vanathu ava i ku ngadi vaphya. Wona txikombiso txa mwanathu wa txisikati a dhanwako ku i Lois Didur. Mbimo yi a nga ti ni 21 wa malembe a khatile kuthuma kota nyaphandule wo sawuleka khe Canadá. Msana ko va a di txhadhile, ene ni mwamna wakwe John, va hetile malembe o tala va txi thuma ka mthumo wa wuwoneleli wa txigava. Ngu msana va thumile Bhetele ka Canadá kudingana 20 wa malembe. Mbimo yi Lois a nga ti ni 58 wa malembe ene ni mwamna wakwe va rambilwe ti to ve ya thuma Ucránia. Vona va ndi na maha txani? Ina va ndi na pimisa ti to aku va nga kumba va na mba sikota ku ya thuma ka ditiko dimwani? Vona va tumete txiavelo, John a sawutwe kuthuma kota txiro txa Komisawu ya Bhetele. Ku di pindile 7 wa malembe John a di fite, Lois a sawute kusimama ka txiavelo txakwe. Konkuwa ene ani 81 wa malembe ni ku wa simama e maha ti a tikotako ka txiavelo txakwe ni ku vanathu va Bhetele ya Ucránia va mranda ngutu.

⁹ Vanathu vo fana ni Lois, ti nga maha ati va ti mahako ti si woneki nguku i ku tinoni, kambe hi nga ti to va to hunguka lisima. Jehovha a nga di a txi va ninga lisima vanathu vonevo ava va nga vhuneta vamna vawe kudingana malembe ni ku va simamako va di tsani kala konkuwa. (1 Tim. 5:3) Vona va tshumela va tsanisa ava i ku ngadi vaphya.

10. Ngu txihi txikombiso txa txinene a txi Tony a nga hi vekela txona?

¹⁰ Vanathu vo tala ava va nga kula ngu tanga va hanyako ka tinyumba to xayisa ava va nga kula ngu tanga, tithomba ta moya. Wona txikombiso txa mwanathu Tony awu a zumbako ka wukhalo wonewo. Ene a bhabhatisilwe khe Pennsylvania, Estados Unidos ngu Agosto wa 1942 a di ni 20 wa malembe. Msana keto ene a  wonisanile ni txikarato txo e sinziswa ku ya yimbini kuveti eto ti lwisana ni matshina a milayo ya Bhiblia, se a khotetwe jele kudingana malembe mambidi ni hafu. Ene ni msikati wakwe Hilda va velekile vanana vambidi ve va kulisa ditshurini. Ngu kutsimbila ka malembe Tony a vhunetile ka mabanza mararu kota mtshanganisi wa madhota, ni ku a thumile kota muwoneleli wa mitshangano ya txigava. Ene a txi endela majele kasi kuya tsimbitisa mitshangano ni kutsimbitisa sigondo sa Bhiblia. Konkuwa ani kona muwa ka 98 wa malembe kambe kha zumbi ngu mawoko. Ene a simama e maha ti a tikotako ko thumela Jehovha ni kuthuma kumweko ni dibanza dakwe!

11. Hi nga maha txani ti to hi kombisa to ha khatala ngu vanathu ava va zumbako ka makhalo o xayisa ava va nga kula ngu tanga?

¹¹ Hi nga maha txani ti to hi kombisa ku ha ninga lisima vanathu va va nga kula va va hanyako ka tinyumba to xayisa vathu va va nga kula ngu tanga? Madhota ma nga va pata vanathu vonevo ka mithumo ya dibanza ngako ti txi koteka. Hi nga tshumela hi kombisa to ha khatala ngu vona ngu ku va endela ni ku va ramba ku hi bhula navo ngu videoconferência. Hi lava kukombisa to ha khatala ngutu ngu vanathu va va nga kula ngu tanga ava ti nga mahako va txi hanya kule ni dibanza dawe. Ngako hi si tiwoneli hi nga thuka hi va divala vanathu vonevo. Vamwani ti nga va karatela kubhula ngu ta wutomi wawe. Kambe ngako hi txi tiha mbimo yo ve hi txhamusela ni ku va engisela khakwati mbimo yi va womba-wombako ngu ma experiyensia aya va nga ma mana ka sengeletano ya Jehovha hi na wuyelwa ngutu.

12. Hi nga tumbula txani ka vanathu va va nga kula ngu tanga ngako hi txi tininga mbimo yo va ziva?

¹² Phela vanathu va va nga kula ngu tanga va nga hi xamatisa ngu sikombiso sawe sa likholo. Mwanathu mmwani a dhanwako ku i Harriette a thumete Jehovha ngu kuthembeka kudingana malembe yo tala khe dibanzani kwakwe di manekako Nova Jersey, Estados Unidos. Ngu kutsimbila ka mbimo a rurile eya zumba ni mwanana wakwe wa dihorana. Vanathu va dibanza di da diphya, va lavile ku mziva kwati se va tumbute to a ni tithomba. Ene a va kuzetile ngu matimu akwe ati ti nga mu humelela mbimo yi a nga ti ngadi kugonda ditshuri ngu ma 1920. Ka mbimo yoneyo ngako atxi huma a txi ya kutxhumayelani, a txi tsimbila-tsimbila ni txikovha txo guva makwasa ti to eya txi thumisa ngako a txi ñolwa eya jele. Phela ngu 1933 a ñotwe kumbidi, ni ku dikhambi dimwani ni dimwani a nga ñolwa a ti ya heta divhiki jele. Mbimo yi a nga ti jele mwamna wakwe awu i si ngako fakazi a txi khatalela vanana vawe vavararu. Ngu ditshuri vanathu vo thembeka vo fana ni Harriette va fanela kuningwa lisima!

13. Hi gonda txani ka nzila yi Jehovha a ningako lisima vathu va va nga kula ngu tanga ka sengeletano yakwe?

¹³ Vanathu va va nga kula ngu tanga mba lisima ngutu ka sengeletano ya Jehovha. Vona va wonile tinzila to hambana-hambana atiya Jehovha a nga ti thumisa ti to e katekisa sengeletano yakwe ni vona vapune. Vona va gondile tigondo ta lisima ka tiphazamo ti va nga timaha ka wutomi wawe. Se va wone kota ‘sisima sa wutxhari’ ni kutshumela u gonda ka experiyensia yawe. (Mav. 18:4) Ngako u txi tiha mbimo yo va ziva khakwati, likholo lako li na tsaniswa ni ku awe u na gonda to tala kwawe!

14. Dibhuku da Dhewuteronome 32:7 di kuzeta va i ku ngadi vaphya kumaha txani?

¹⁴ Tininge mbimo yo bhula ni vanathu va va nga kula ngu tanga. (Lera Dhewuteronome 32:7.) Ditshuri ti to ti nga maha maso yawe ma txi khata kupfhupela, ni ku va singa ni mtamo wo tsimbila, ni ku va siswi ve wombawomba khakwati nga mbimo yi va nga ti ngadi vaphya.  Kambe mbiluni i nga di vaphya, ni ku vona va tivekete “nduma ya yinene” ni Jehovha. (Ekl. 7:1) Mbimo yotshe hi fanete hi khumbula to ngu kutxani Jehovha a txi va ninga lisima. Ngu toneto simama u va kombisa txithavo. Maha kufana ni Elizewu awu a nga sinzisa Elija ti to ve zumba votshe ka masiku akwe o gwita va sinze ku hambana. Elizewu a wombile tiya ngu makhambi mararu a txi khene “kha ni na mbi kuleka.”—2 Vaf. 2:2, 4, 6.

15. Ngu sihi siwotiso asi hi nga si thumisako ti to hi bhula ni va va nga kula ngu tanga?

¹⁵ Kombisa to wa khatala ngu ditshuri ngu va va nga kula ngu tanga nguku u bhula navo. (Mav. 1:5; 20:5; 1 Tim. 5:1, 2) Thumisa siwotiso so fana ni siya: “Mbimo yi u nga ti ngadi mphya, nji txani txi nga kukholwisa to u mani ditshuri?” “Experiyensia yi u nga yi mana yi kuvhunisile kutxani ti to u va ni wungana ni Jehovha?” “Ngu txihi txihunja atxi u nga txi tumbula atxi txi kuvhunako ti to u simama u va ni litsako ka mthumo wa Jehovha?” (1 Tim. 6:6-8) Se engisela khakwati mbimo yi va kukontarelako ta wutomi wawe.

16. Ngako va va nga kula ngu tanga ni vaphya va txi bhulisana ku na maheka txani?

¹⁶ Ngako ava va nga kula ngu tanga ni va i ku ngadi vaphya va txi bhula, votshe va na wuyelwa. (Var. 1:12) Ava i ku vaphya va na tsaniseka to Jehovha wa khatalela vathu vakwe ni ku ava va nga kula va na tipfa i di va lisima. Ava va nga kula ngu tanga va na tsakela kuxawutela makatekwa aya va nga ningwa ngu Jehovha.

17. Ngu kutxani hi nga wombako ti to ava va nga kula ngu tanga va tshura ngutu masoni ka Jehovha ngu kutsimbila ka mbimo?

¹⁷ Mbimo yi hi yako hi txi kula, kutshura ka nyama ko ya ku txi pinda, kambe ava va thembekako ka Jehovha, va ya masoni ve tshura ditshiku dimwani ni dimwani. (1 Vat. 1:2, 3) Ngu kutxani i di ditshuri toneto? Nguko ngu kutsimbila ka malembe vona va tumelela moya wa Txizimu ti to wu va wumba ni ku va vhuna to ve va ni tifanelo tatinene. Ngako hi txi tininga mbimo yo ziva khakwati vanathu vonevo va nga kula ngu tanga, hi tshumela hi va kombisa txithavo ni kugonda ka txikombiso txawe, ti na hi vhuna ku hi va teka i di va lisima!

18. Hi na ta bhula ngu txani ka gondo yi yi londiselako?

¹⁸ Dibanza da kula ngako ava va nga kula ngu tanga ni va i ku ngadi vaphya va txi ningana lisima. Ka gondo ayi yi londiselako hi na ta bhula ngu ti to ava va nga kula ngu tanga va nga maha txani ku ve kombisa to va ninga lisima ava i ku di vaphya dibanzani.