1. Ngu yahi makungo aya hi nga ti vekelako mbimo yi hi yako hi txi kula ngu tanga?

MBIMO yi hi yako hi txi kula ngu tanga, hi nga thava hi pimisa ti to, hi na mbi va txivhuno txa hombe ka Jehovha nga ti hi nga ti maha kale. Ditshuri ti to hi nga va hi si nga ni mtamo wo fana ni wu hi nga ti nawo makhatoni. Kambe hi nga thumisa wutxhari ni experiyensia ayi hi nga yi mana ka wutomi ti to hi vhuna ava i ku ngadi vaphya kasi ku ve thumisa mtamo wawe ni kukhatalela wutixamuleli wa hombe. Didhota dimwani adi di nga kula ngu tanga di womba tiya: “Mbimo yi ni nga khata ku tipfa nga kha ni na kumaha to tala ngu kona hawa ka tanga, ni ti tsaka ngu kuziva to ka sengeletano ku ti ni majaha aya i nga ti maphya kasi ku me khatalela mthumo.”

2. Hi na bhula ngu txani ka gondo yiya?

² Ka gondo ayi yi nga pinda hi woni nzila yi ava i ku ngadi vaphya va nga wuyelwako ngu yona ngako va txi maha wungana ni va va nga kula ngu tanga. Ka gondo yiya, hi na wona nzila yi ku tiveka hahatshi, kudinganisela, kukombisa kubonga ni wuha ti nga vhunako ngu yona ti to ava va nga kula ngu tanga ve thumisana ni va i ku ngadi vaphya, ati ti no maha to sengeletano yotshe yi wuyelwa.

3. Ngu kuya ngu dibhuku da Vafilipiya 2:3, 4, nji txani ku tiveka hahatshi ni ku ti nga hi vhunisa ku txani?

³ Ava va nga kula ngu tanga va fanete ku tiveka hahatshi ti to ve vhuna ava i ku ngadi vaphya. M’thu wu a tivekako hahatshi a wona vamwani i di va tshuko ku mpinda. (Lera Vafilipiya 2:3, 4.) Ngu txikombiso m’thu wu a tivekako hahatshi, wa tipfisisa  ti to ta koteka kukhatalela mthumo wo kari ngu tinzila to hambana-hambana, kambe totshe tinzila toneto ta tsimbitisana ni Bhiblia ni ku mthumo wonewo wu nga huma kwati. Ngu toneto vona kha va sinzisi ku to maha ti mahwa ngu nzila ayi vona va yi wonako i di yona. (Ekl. 7:10) Hambi ku va ku ni experiyensia yo tala kasi ku abana ni va i ku vaphya vona va ti ziva ti to “ditiko da guma” i ku ti to txiemo txa mafu txa txitxa, se ti nga laveka to ve tipfananisa ni siemo.—1 Vak. 7:31.

4. Vawoneleli va sigava va etetelisa kutxani txikombiso txa Valevhi?

⁴ Vanathu ava va nga kula ngu tanga va va tivekako hahatshi va tiziva ti to mbimo yi va yako va txi kula va na mbi sikota kumaha to tala nga ti va nga ti maha kale. Wona txikombiso txa vawoneleli va sigava. Mbimo yi va hokako ka 70 wa malembe, vona va rambwa to ve ya khatalela siavelo simwani. Eto ti nga va txikarato. Phela vona va nga di va txi wu dhunda mthumo wo vhuna vanawe. Hambiku va ku ngadi va txi txi randa txiavelo txo thuma kota vawoneleli va sigava, vona va tipfisisa ti to ava i ku ngadi vaphya va nga wu khatalela kwati mthumo wuwa. Ngu toneto vona va tekelela Valevhi va kale ka ditiko da Israyeli, ava va nga ti ema kuthuma khe ditendani do sawuleka ngako va txi hoka ka malembe ya 50. Phela Valevhi vonevo, litsako li va nga ti li mana i singa ngu ku va nga ti thumela ditendani. Ngu toneto vona va ti maha ati va nga ti tikotako ka tanga yawe, ti to ve vhuna ava i nga ti ngadi vaphya. (Mit. 8:25, 26) Nyamsi, ava kale  kwawe i ngati vawoneleli va sigava, hambiku va si nga ngadi ve endela mabanza, vona va vhuneta ngutu ka mabanza aya va nga avelwa ka wona.

5. Hi gonda txani ka txikombiso txa Dan ni Katie?

⁵ Wona txikombiso txa mwanathu Dan awu a nga thuma kota muwoneleli wa txigava kudingana 23 wa malembe. Mbimo yi Dan a nga va ni 70 wa malembe, ene ni msikati wakwe Katie, va avetwe kuya thuma kota vanyaphandule vo sawuleka. Vona va ti kotisile kutxani ku tipfananisa ni txiemo txiya txa txiphya? Dan a womba ti to konkuwa a bhisi ngutu kupinda kale! Ene a khatalela wutixamuleli dibanzani a vhuna vanathu ku ve hokelela tifanelo ta malanda a wuthumeli ni kutrenara vamwani kasi ku ve txhumayela ngu kuthumisa txikarinyana ni kutxhumayela majele. Vanathu ava va nga kula ngu tanga, ti singa ni mhaka to va ka mthumo wa mbimo yotshe mwendo nem, va nga maha to tala kasi kuvhuna vamwani. U nga mahisa kutxani toneto? Tipfananise ni kutxitxa ka siemo, ti vekele makungo aya u nga kotako ku ma hokelela, i singa kuveka mapimo ka ti u si tikotiko kumaha.

6. Ngu kutxani ti txi lava hi ziva kudinganisela? Ningela txikombiso.

⁶ M’thu wo ziva kudinganisela kha emeli kumaha ati a si tikotiko. (Mav. 11:2) Ngu toneto ene wa simama e va ni litsako ni kuthumela Jehovha. Hi nga fananisa m’thu wo ziva kudinganisela ni wu a tsimbitisako mmovha ka mmango. Mtsimbitisi eneyo ti nga lava e txitxa magera ti to e simama e kwela mmango. Hambi ku ti no lava e hungula livilo la mmovha, kambe ene a na simama e tsimbila. Ngu ha kufanako m’thu wo ziva kudinganisela wa tiziva ti to ku ni mbimo yi ti no lava “e txitxa magera” ti to e simama e thumela Jehovha.—Vaf. 4:5.

7. Bharizilayi a kombisisile kutxani kudinganisela?

⁷ Wona txikombiso txa Bharizilayi, ene a ti ni 80 wa malembe mbimo yi Mkoma Dhavhidha a nga mramba ti to e ya thumela wukomani. Aku Bharizilayi a nga ti ni kudinganisela kha tumela. Ngu kuziva to ene a ti si na ku tikota ku maha mthumo wule ngu konaha ka tanga yakwe, Bharizilayi a woni ti di tshuko ku wamwamna mmwani awu i nga ti mphya a dhanwako ku i Kimani e mvhaleta. (2 Sam. 19:35-37) Kufana ni Bharizilayi vanathu ava va nga kula ngu tanga ngu kutitsakela va ninga lungelo vanathu va i ku ngadi vaphya ti to ve maha mthumo.

8. Dhavhidha a kombisisile kutxani ti to wa ziva kudinganisela mbimo yi ku nga txi lava ku akwa nyumba ya Jehovha?

⁸ Mkoma Dhavhidha a hi vekete txikombiso txo ziva kudinganisela. Ati ene a nga txi ti lava ngutu i ti ku akela Jehovha nyumba. Kambe mbimo yi Jehovha a nga m’gela ti to i singa ene a ndi no maha mthumo wuwa ni ku wu na mahwa ngu mwanana wakwe Solomoni, Dhavhidha a tumete txisungo txi Jehovha a nga ti txi mahile se e vhuneta ka mthumo. (1 Mak. 17:4; 22:5) Dhavhidha kha tipfa nga Solomoni a si na ku sikota kumaha kwati mthumo wuwa ngu ku i nga ti “mfana.” (1 Mak. 29:1) Dhavhidha a txi ziva ti to hi nga tanga mwendo experiyensia ya va va thangelako mthumo yi nga mahako ti to wu humelela, kambe wona wu ngo humelela dwe ngako wu txi katekiswa ngu Jehovha. Kufana ni Dhavhidha, ava va nga kula ngu tanga nyamsi va simama ve thuma hambiku va thumako mithumo yo hambana ni yi va nga ti yi maha kale. Ni ku va ziva ti to Jehovha a na katekisa ava i ku ngadi vaphya ava va khatalelako mthumo wule vona va nga txi wu maha.

9. Mwanathu Shigeo a kombisisile kutxani ti to wa ziva kudinganisela?

⁹ Ka timbimo ta ngweno, ku ni txikombiso txa mwanathu a dhanwako ku i Shigeo. Ene a  sawutwe kota txiro txa Komisawu ya Bhetele ngu 1976 a di ni 30 wa malembe. Ngu 2004 ene a vile mtshanganisi wa siro sa Komisawu ya Bhetele. Kambe ngu kutsimbila ka mbimo a woni ti to a txi ya a kula ngu tanga, se a ti singa ni mtamo ngutu, ngu toneto a si na kukhatalela siavelo sakwe khakwati. Ene a khongete ngu mhaka yiya e wona to i tshuko ku va ni mwanathu wu i ku ngadi mphya kasi ku khatalela txiavelo txiya. Hambi kuwa konku a si thumiko kota mtshanganisi wa siro sa Komisawu ya Bhetel, Shigeo a simama e va txiro txa Komisawu ya Bhetele. Nga ha hi nga tiwona ngu kona ka txikombiso txa Bharizilayi Mkoma Davhidha ni Shigeo, m’thu wu a tivekako hahatshi ni kuziva kudinganisela kha na mba veka mapimo ka kwa mbi na experiyensia ka va i ku vaphya, kambe a na themba mtamo wu va ku nawo wo thuma. Ene kha na mbi va nyenya, kambe a na wona va i ku ngadi vaphya kota vathumi kulothi.—Mav. 20:29.

10. Ngu yahi mawonelo aya ava va nga kula ngu tanga va fanelako kuva nawo ngu vaphya?

¹⁰ Ava va nga kula ngu tanga va wona ava i ku ngadi vaphya i di sihiwa si si tako ngu ka Jehovha se vona va bonga ngutu ngu mthumo wu ava i ku ngadi vaphya va wu mahako. Mbimo yi mtamo ni wusikoti wawe wu yako wu txi pumbeka, vona va tsaka ngutu ngako ku di ngadi ni va i ku vaphya ava va ku ngadi ni mtamo ti to ve khatalela mthumo wuwa ni kutshumela ve vhuneta dibanza.

11. Dibhuku da Rute 4:13-16 di kombisisa kutxani ti to ti nga va makateko a hombe kutumela txivhuno txa va i ku ngadi vaphya?

¹¹ Nowemi njikombiso txa txinene txa m’thu wu a nga kombisa kubonga; ene a tumete txivhuno txa Rute awu i nga ti mphya kwakwe. Makhatoni Nowemi a sinzisile Rute ti to e sala ditikoni kwakwe. Kambe mbimo yi Rute a nga sinzisa ku ve tsula votshe ni Nowemi  Bhetlehema, ene a tumete, Nowemi a tumete txivhuno txa Rute. (Rute 1:7, 8, 18) Eto ti tisile makatekwa ka votshe vavambidi! (Lera Rute 4:13-16.) Vanathu ava va nga kula ngu tanga ava va tivekako hahatshi va na tekelela txikombiso txa Nowemi.

12. Mpostoli Paulo a kombisisile kutxani kubonga?

¹² Mpostoli Paulo a ti bonga txivhuno txi a nga ti txi mana. Ngu txikombiso, ene a bongile Makristu a Filipiya aya ma nga ti mvhuna ngu silo si a nga ti si lava. (Vaf. 4:16) Ene a kombisile kubonga ngu txivhuno txi a nga txi amukela ka Timoti. (Vaf. 2:19-22) Paulo a bongile Txizimu ngu vanathu ava va nga mtsanisa mbimo yi a nga ti tekwa e yiswa jele khe Roma. (Mith. 28:15) Paulo i ti m’thu wo thuma ngutu ene a ti endela makhalo a kule ngutu a txi txhumayela ni kutsanisa mabanza. Hambiketo ene kha tiwona ti to a sina kumana txivhuno txa vanathu.

13. Ava va nga kula ngu tanga va nga kombisisa kutxani ti to va bonga kuva va di ni va i ku ngadi vaphya dibanzani?

¹³ Anu mi nga kula ngu tanga, mi nga kombisa to ma bonga ava i ku ngadi vaphya ava va ku dibanzani kwanu ngu tinzila to hambana hambana. Ngako va txi lava ku mvhuna ngu ku muhakelela xapa, mwendo ku mvhuna kuya xava sokari, mwendo mithumo yimwani, kombisani kubonga nguku mi tumela ku ve mi vhuna. Wonani txivhuno txonetxo i di txikombiso txa lirando la Jehovha. Phela ngako mi txi maha toneto mi nga thuka mi va ni txingana ni vanathu vonevo va mi vhunako. U nga tshumela u kombisa ti to wa bonga ngu kukhatala ngu nzila yi va kulako ngu yona ngu didhawa da moya, ni ku va gela ti to wa tsaka nguku va wona va txi kula kasi ku ve sikota kumaha mithumo yo kari dibanzani. Ti he mbimo yo abana experiyensia yako navo. Ngako u txi maha toneto u na ‘kombisa kubonga kwako’ ka Jehovha ngu konaha ko va ni va i ku ngadi vaphya vava dibanzani.—Vakl. 3:15; Joh. 6:44; 1 Vat. 5:18.

14. Mkoma Dhavhidha a kombisisile kutxani wuha?

¹⁴ Ka txikombiso txa Dhavhidha hi tshumela hi wona fanelo yimwani yi ti lavako hi yi kombisa i ku wuha. Ene a humisile male yayingi ni tithomba takwe ti to e vhuneta ka kuaka ka nyumba ya Jehovha. (1 Mak. 22:11-16; 29:3, 4) Ene a mahile tiya a txi ti ziva to awu a no thangela ko maha mthumo wuwa i ti mwanana wakwe Solomoni. Ngu ha kufanako ngako hi txi wona to mtamo wathu wuya wu txi guma ti to hi maha to tala ko aka tinyumba ti hi khozelako ka tona, hi nga simama hi vhuneta mthumo wo aka ngu tinzila timwani ngu kuthumisa miningelo ngu ha hi nga tikotako ngu kona. Hi nga tshumela hi vhuna va i ku ngadi vaphya ti to ve wuyelwa ngu experiyensia yathu ayi hi nga yi mana ngu kutsimbila ka malembe.

15. Ngu tihi ati mpostoli Paulo a nga gondisa Timoti?

¹⁵ Ka mhaka yiya wona txikombiso txa mpostoli Paulo. Ene a rambile Timoti ti to ve ya thuma votshe ka mthumo wa wurumiwa, ni ku Paulo a gondisile Timoti tinzila to txhumayela ni kugondisa. (Mith. 16:1-3) Trenamento yi Timoti a nga yi mana ka Paulo yi mvhunile ti to e va mtxhumayeli wa mnene wa mahungu a manene. (1 Vak. 4:17) Se Timoti nene, a thumisile tinzila ti Paulo a nga ti m’gondisile ti to e trenara vamwani.

16. Ngu kutxani Shigeo a txi trenara vamwani?

¹⁶ Ava va nga kula ngu tanga nyamsi kha va thavi to ngako va txi trenara ava i ku ngadi vaphya va na mbi va ni mthumo kasi ku ve wu maha. Ngu txikombiso, kudingana malembe o tala, mwanathu Shigeo, awu hi nga bhula ngene, a ti trenara ava i nga ti vaphya kota siro sa Komisawu ya Bhetele. Ene a ti maha tiya kasi  kuvhuneta mthumo wa Mfumo ka ditiko di a nga ti thuma ka dona. Kota wuyelo, ku di hokile mbimo ya ti to e vhaletwa kota mtshanganisi wa siro sa Komisawu ku ti ni mwanathu awu a nga ti trenadhu khakwati kasi kukhatalela txiavelo txile. Shigeo konku a ni 45 wa malembe a txi thuma kota txiro txa Komisawu ya Bhetele kambe wa simama e trenara ava i ku ngadi vaphya. Vanathu vo fana ni Shigeo ngu ditshuri i kateko ngutu!

17. Ngu kuya ngu dibhuku da Luka 6:38, ngu tihi ati va va nga kula ngu tanga va nga ti mahako?

¹⁷ Anu vanathu mi nga kula ngu tanga mi sikombiso sa ti to kuthumela Jehovha ngu kuthembeka ni likholo ngu tona i ku tatinene ngutu. Ngu txikombiso anu ma tiveka hakubasani ti to kugonda ni kuthumisa ati Bhiblia yi ti wombako ka wutomi wanu ti ni lisima ngutu ni ku ta vhuna ngutu. Hambiku mi ku ni experiyensia ya nzila yi to maha ti nga ti mahiswa tona masiku msana, konkuwa ma tiziva to ti lava mi tipfananisa ni kutxitxa ka siemo. Nananu mi nga kula ngu tanga mi ku ngadi kubhabhatiswa mi ni to tala ati mi nga ti mahako; timwani ta kona ngu bhulela vamwani ngu litsako li mi nga li mana ngu kuziva Jehovha mi di kute ngu tanga. Ava i ku ngadi vaphya va na tsaka ngutu ngu kupfa maexperiyensia a wutomi wanu ni tigondo ati mi nga tigonda. Se ngako u txi ‘ha vamwani’ ngu ku va bhulela ngu experiyensia yako, Jehovha a na kukatekisa.—Lera Luka 6:38.

18. Ava va nga kula ngu tanga ni vaphya va nga vhunanisa kutxani?

¹⁸ Ngako anu mi nga kula ngu tanga ni nanu mi ku ngadi vaphya mi txi va ni txingana mi na vhunana. (Var. 1:12) Mmwani ni mmwani ani ti a nga vhunako ngu tona vamwani. Ava va nga kula ngu tanga va ni wutxhari ni experiyensia ayi va nga yi mana ngu kutsimbila ka mbimo. Ava i ku ngadi vaphya va ni mtamo. Ngako ava i ku ngadi vaphya va txi thuma kumweko ni va va nga kula ngu tanga, vona va na tisa wudhumo ka Tate wathu wa nzumani se eto ti na va makatekwa a hombe ka dotshe dibanza.