GONDO 39
Ina ditina dako di bhatwe ka “dibhuku da wutomi”?
“Kubhatwe dibhuku da syalakanyiso masoni kwakwe, di lumbako vale va thavako MKOMA.”—MAL. 3:16.
NDANDO 61 Yanani masoni, anu Tifakazi!
ATI HI NO TI GONDA *
Kukhukhela kale Jehovha wa bhaletela matina ka “dibhuku da wutomi” (Wona paragrafu 1-2)
1. Ngu kuya ngu dibhuku da Malakiya 3:16 ngu dihi dibhuku adi Jehovha a bhalako? Ni ku a bhala txani ka dona?
KUDINGANA malembe o tala Jehovha a bala dibhuku do sawuleka. Dibhuku donedo di ni lista ya matina kukhukhela ka ditina da fakazi yo khata yo thembeka i ku Abhele. * (Luka 11:50, 51) Kupinda malembe o tala Jehovha atxi bhaletela matina ka dibhuku donedo, kala nyamsi ku ni timiliyoni ta matina. Bhiblia yi dhana dibhuku donedo ku i “dibhuku da txialakanyiso,” mwendo ku “dibhuku da wutomi.” Ka gondo yiya hi na di dhana ku i “dibhuku da wutomi.”—Lera Malakiya 3:16; Mtu. 3:5; 17:8.
2. Matina ava mani ma bhalwako ka dibhuku da wutomi, hi nga maha txani ti to matina athu me bhalwa ka dibhuku donedo?
2 Dibhuku diya do sawuleka di ni matina a votshe a vale va khozelako Jehovha ngu txithavo, txixonipho ni va va ningako lisima ditina dakwe. Avava ngu va va no ta amukela wutomi wo mbi guma. Nyamsi ta koteka ku ditina dathu di bhalwa ka dibhuku da wutomi, ngako mmweyo ni mmweyo wathu a txi sakulela kuva ni wuxaka wo tsana ni Jehovha, ni ku va ni likholo ka digandelo da mterulo wa mwanana wakwe Jesu Kristu. (Joh. 3:16, 36) Ti singa ni mhaka to themba yathu njo ya hanya mzumani mwendo njo ta hanya hamafuni, hotshethu ha tilava to matina athu me bhalwa ka dibhuku da wutomi.
3-4. a) Ina kuva matina athu ma di bhatwe ka dibhuku ti womba to se hi wu mani wutomi wo mbi guma? Txhamusela. b) Hi na gonda txani ka gondo yiya ni ka yi yi londiselako?
3 Ina eto ti womba ti to ava matina awe ma nga bhalwa ka dibhuku ti fana ni ku loko se va di mani wutomi wombi guma? Xamulo ya txiwotiso txonetxo hi na yi mana ka mapswi ya Jehovha a nga gela Mosi aya ma ku ka Eksodha 32:33. Jehovha ati khene: “Ni na pfhita amu ka dibhuku dangu awule a nga ni onhela.” Matina ya ma nga bhalwa ka dibhuku ma nga pfhutwa mwendo kuthaviswa. Eto ti fana ni ku loko Jehovha kukhata ati bhate matina oneyo ngu lapis. (Mtu. 3:5) Se hi fanete kumaha totshe ti hi nga ti kotako ti to matina athu me simama amu ka dibhuku kala me ta bhaletwa ngu kaneta.
4 Atiya ti nga hi maha hi ti wotisa siwotiso so kari. Ngu txikombiso hi nga ti wotisa tiya, Bhiblia yi womba txani ngu va matina awe ma nga bhalwa ka dibhuku da wutomi ni va matina awe ma nga mbi bhalwa ka dona? Ava matina awe ma nga bhalwa ka dibhuku da wutomi va na amukela mbimo muni wutomi wo mbi guma? Ku na maheka txani ngu va va nga fa va sa mana lungelo yo ziva Jehovha? Ina ti nga koteka ti to matina awe me bhalwa ka dibhuku donedo? Siwotiso soneso si na xamulwa ka gondo yiya ni yi yi londiselako.
MATINA AVA MANI MA NGA BHALWA KA DIBHUKU?
5-6. a) Ngu kuya ngu Vafilipiya 4:3 matina a va mani aya ma nga bhalwa ka dibhuku da wutomi? b) I ngu mbimo muni matina awe ma simamako da magwito ka dibhuku donedo?
5 Matina a va mani ma nga bhalwa ka dibhuku diya do fanekisela? Ti to hi mana xamulo ya txiwotiso txiya hi na bhula ngu 5 wa mitxawa ya vathu. Ka mitxawa yoneyo vamwani ngu va matina awe ma nga bhalwa ka dibhuku vamwani kha ma bhalwa.
6 Mtxawa wo khata wu wumbwa ngu ava va nga sawulwa kuya nzumani ti to veya fuma kumweko ni Jesu Kristu. Ina avava matina awe se ma bhatwe ka dibhuku da wutomi? Inna! Ngu kuya ngu mapswi a Paulo aya a nga bhalela “vathumi kulowe” va khe Filipiya, matina a vasawuleki ava va nga rambwa kuya fuma ni Jesu se ma bhatwe ka dibhuku da wutomi. (Lera Vafilipiya 4:3.) Kambe ti to matina awe me simama ka dibhuku diya do fanekisela va fanete kuthembeka kala magwito. Se mbimo yi va no markarwa da magwito hafuhi ni ku vefa mwendo hafuhi ko yi khata xanisa ya hombe matina awe ma na bhalwa ngu ha ku si gumiko ka dibhuku donedo.—Mtu. 7:3.
7. Dibhuku da Mtuletelo 7:16,17 di hi vhunisa kutxani kukupfisisa to i ngu mbimo muni matina ava va tinvuta timwani ma no bhalwa da magwito ka dibhuku da wutomi?
7 Mtxawa wa wumbidi wu wumbwa ngu va va tinvuta timwani. Ina avava matina awe ma bhatwe konku ka dibhuku da wutomi? Inna! Ina matina awe ma na simama ka dibhuku da wutomi msana ko pona Armagedhoni? Inna! (Mtu. 7:14) Jesu a wombile ti to ava va fanako ni tinvuta va na “yiswa ka wutomi wo mbi guma.” (Mat. 25:46) Kambe ava va no pona ka Armagedhoni kha va na mbi tekela ku amukela wutomi wo mbi guma. Matina awe ma na simama ma di bhatwe ka dibhuku ngu lapis nga ti ma nga di ka tona. Ngu mbimo ya kufuma ka Jesu ka 1.000 wa malembe, Jesu “a na va dyisa, e va kombisa nzila ya kuya ka sisima sa mati a wutomi.” Ava va no engisa mkongomiso wa Jesu ni ku lamulwa ngu Jehovha da magwito, e va wona va di thembekile matina awe ma na bhalwa ka dibhuku da wutomi.—Lera Mtuletelo 7:16, 17.
8. Mba mani ava matina awe ma nga mbi bhalwa ka dibhuku da wutomi? Ku na maheka txani ngu vona?
8 Mtxawa wa wuraru ngu va va fanako ni tiphongo ava va no ta loviswa ka Armagedhoni. Avava matina awe kha ma bhalwa ka dibhuku da wutomi. Jesu a wombile ti to vona va na yiswa “kutsayiswani ko mbi guma.” (Mat. 25:46) Ngu kuhuhutelwa ngu moya wo sawuleka Paulo a wombile ti to “txitsayiso txawe ku nava kulova ko mbi guma.” (2 Vat. 1:9; 2 Pedro 2:9) Ku na maheka ti ti fanako ngu va va nga onha khakwenye ve ruketela moya wo sawuleka. Ava ni vona kha va na mbi ta mana wutomi wombi guma, kambe va na ta loviswa da magwito. Ti ha kubasani to kha va na mbi ta wuswa. (Mat. 12:32; Marku 3:28, 29; Vaheb. 6:4-6) Konku he bhuleni ngu mitxawa yimbidi ya vathu va no ta wuselwa kuhanya hamafuni.
AVA VA NO TA WUSWA
9. Nga ha di wombako ngu dibhuku da Mithumo 24:15 ngu yihi mitxawa yimbidi ya vathu ava va no ta wuswa? Ngu kuhi kuhambana aku ku kuho ka mitxawa yiya?
9 Bhiblia yi womba-womba ngu mitxawa yimbidi ya vathu va no ta wuswa kasi ku ta hanya hamafuni ngu ha ku si gumiko, i ku vo “lulama ni va kwambi lulama.” (Lera Mithumo 24:15.) “Vo lulama” ngu ava va nga thumela Jehovha ngu kuthembeka mbimo yi va nga txi hanya. Kasi “va kwambi lulama” kha va thumela Jehovha ngu ku thembeka. Ditshuri to simaho sawe i singa so lulama. Aku mitxawa yi ya yimbidi yi no ta wuswa ti womba to matina awe ma bhatwe ka dibhuku da wutomi? Ti to hi mana xamulo ya txiwotiso txiya he bhuleni ngu mtxawa wumwewo ngu wumwewo.
10. Ngu kutxani “vo lulama” va no ta wuswa, ngu yihi lungelo va no ta ti dila ngu yona? (Wona “Tixamulo ta siwotiso sa vagondi” ka dona direvhista diya ti womba-wombako ngu kuwuswa ka vafi ha mafuni.)
10 Mtxawa wa wumune mbwa va “vo lulama.” Mbimo yi va sise kufa matina awe ma maneka ma di bhatwe ka dibhuku da wutomi. Ina mbimo yi va fako matina awe ma pfhutwa ka dibhuku donedo? Nadha, kha ma pfhutwi nguko ka mialakanyo ya Jehovha va ngadi va txi hanya. Jehovha “hi nga Txizimu txa vafi, aniko nja va vo hanya, nguko ka txona votshe va hanya.” (Luka 20:38) Eto ti womba ti to mbimo yi ava vo lulama va wuswako matina awe ma maneka ma di bhatwe ka dibhuku da wutomi, hambi ku ma manekako ma di bhatwe ngu lapis. (Luka 14:14) Ti hakubasani to vo lulama va na ta amukela wuyelo yo va “tinduna ka matiko otshe.”—Mas. 45:16.
11. Ngu tihi ti ti lavekako kasi ku matina ava va kwa mbi lulama me bhalwa ka dibhuku da wutomi?
11 Ngu magwito he bhuleni ngu mtxawa wa wu 5 i ku ava va “kwa mbi lulama.” Ti nga maha mbimo yi va nga txi hanya va sa si tekela ha msungo sileletelo sa Jehovha, vona kha va hanya ngu wululami. Ngu toneto matina awe kha ma bhalwa ka dibhuku da wutomi, kambe aku va no ta wuswa Jehovha a na ta va ninga mkhanjo wo matina awe me bhalwa ka dibhuku. Ava va kwa mbi lulama ti na lava ve ta mana txivhuno txa hombe. Mbimo yi va nga txi hanya, vamwani va kona va txi hanya ngu wubihi. Ngu toneto ti na ta lava ve gondela kuhanya ngu milayo ya Jehovha yo lulama. Ti to eto ti koteka Mfumo wa Txizimu wu na ta kongomisa mthumo wo gondisa wo kha wu khali ku vaho hamafuni.
12. a) Mba mani vanu gondisa ava va kwambi lulama? b) Ku na ta maheka txani ngu va va no mbi ta thumisa ati va no ti gonda?
12 Mba mani va no ta gondisa ava va kwa mbi lulama? Dibutho da hombe kumweko ni va vo lulama va no ta wuswa. Ti to matina ava va kwa mbi lulama me bhalwa ka dibhuku da wutomi ti na ta lava ve ta aka wuxaka ni Jehovha ni ku ti ningetela kwakwe. Jesu Kristu kumweko ni vasawuleki va na ta wonelela ava va kwa mbi lulama kasi kuwona to i mani wu asi hanyiko ngu ti ati gondako. (Mtu. 20:4) Awu a no mbi ta engisa kha na mbi tumelelwa ku e simama e hanya hambi a txo va ni 100 wa malembe. (Isaya 65:20) Jehovha ni Jesu va lera timbilu, kha va na mbi ta tumelela to ka mafu a maphya kumaneka awu a mahelako wubihi vamwani.—Isaya 11:9; 60:18; 65:25; Joh. 2:25.
KUWUSELWA WUTOMINI NI KUWUSELWA KULAMULWANI
13-14. a) Ngu tihi ti kale hi nga txi ti pfisisa ngu mapswi a Jesu aya ma ku ka Johani 5:29? b) Ngu tihi ti hi fanelako ku ti pfisisa ngu mapswi oneyo?
13 Jesu a tshumete e womba-womba ngu ava va no wuselwa wutomini. Ngu txikombiso ene ati khene: “Ya hoka mbimo, ayiya votshe vale va ku mayivani va no engisa dipswi dakwe; Se ava va nga maha ta tinene, va na wukela kuya kuhanyani ko mbi guma; ani ava va nga maha to biha, va na wukela kuya kusungwani.” (Joh. 5:28, 29) Jesu atxi lava kuwomba txani ngu mapswi oneyo?
14 Kale hi txi pfisisa ti to mapswi a Jesu ma ti womba ti to ava va no ta wuswa va na ta lamulwa ngu kuya ngu simaho si va no ta si maha mbimo yi va no wuswa. I ku ti to mbimo yi va no ta wuswa va na ta maha tatinene kasi vamwani va na ta maha to biha. Kambe mapswi ya Jesu kha ma wombi ti to ava va no wuswa vamwani va na ta maha tatinene vamwani va na ta maha to biha. Jesu a womba-wombile ngu ti se ti nga pinda. Ene a wombile ti to ava “va nga maha tatinene” ni ava “va nga maha to biha.” Eto ti komba to a txi womba-womba ngu ti va nga maha va sise fa. Eto ta pfisiseka hi nga tona? Phela ka mafu a maphya a walo wu a no ta tumelelwa kumaha to biha. A ti ti wombako to ava vo mbi lulama va mahile to biha va sise fa. Se hi nga ma pfisisa ngu nzila yihi mapswi ya Jesu a ya yo va na ta “wuselwa wutomini” ni ya yo va na ta “wuselwa kulamulwani”?
15. Mba mani va no ‘wuselwa wutomini,’ ngu kutxani?
15 Vo lulama ngu va va nga maha tatinene va sise fa va na ‘wuselwa wutomini’ nguko matina yawe se ma ti bhatwe ka dibhuku da wutomi. Atiya ti womba ti to kuwuswa ka va “va nga maha tatinene” aku ku nga txhamuselwa ka Johani 5:29 ka fana ni ku wuswa ka va “vo lulama” aku ku nga wombwa ka Mithumo 24:15. Mapfisiselo yawa ma tsimbitisana ni ti ti ku ka Varoma 6:7, aha yi wombako tiya: “Awule a nga fa a thukunyutwe ka txionho.” I ku ti to mbimo yi ava vo lulama va fako Jehovha wa divala sionho sawe, kambe mithumo yawe ya yinene a yi va nga maha va txi nga txi hanya kha yi divali. (Vaheb. 6:10) Ngu toneto mbimo yi va vo lulama va no wuswa va fanete kuzumba va di thembekile kasi ku matina yawe me simama ka dibhuku da wutomi.
16. Ti womba txani ku “wuselwa kulamulwani”?
16 Ku na maheka txani ngu va va nga maha to biha mbimo yi va nga si se fa? Hambi ku sionho sawe si nga pfhutwa mbimo yi va no fa vona kha va thumela Jehovha ngu thembeka. Ngu toneto matina awe kha ma bhalwa ka dibhuku da wutomi. Kuwuswa ka va “va nga maha to biha” ka fana ni ku wuswa ka va ‘vo mbi lulama’ ku ku nga wombwa ka dibhuku da Mithumo 24:15. Vona va na “wuselwa kulamulwani.” * A va vo mbi lulama va na lamulwa i ku ku lamulwa ngu nzila yo ve kambelwa. (Luka 22:30) Eto ti na teka mbimo kasi ku Jesu e tsaniseka ti to va faneleka ku matina awe me bhalwa ka dibhuku da wutomi. Ngako a va vo mbi lulama va txi leka mithumo yawe yo biha a yi va nga maha va sise fa ve ti ningetela ka Jehovha ngu kona matina awe ma no bhalwa ka dibhuku da wutomi.
17-18. Ngu tihi ati votshe vo ta wuselwa kuhanya mafuni va no ta timaha, ni ku ngu yihi “mithumo” ayi yi wombwako ka Mtuletelo 20:12, 13?
17 Ti si nga ni mhaka ni ti to makhatoni ava va no wuswa i ti vo lulama mwendo i ti singa vo lulama votshe ti na lava ve engisa milayo ayi yi no ta maneka ka dibhuku da diphya adi di no ta tulwa ngu mbimo ya 1.000 wa malembe. Mpostoli Johani a txhamusete ati a nga ti wona ka muwoniso wakwe atxi khene: “Se ni to wona vafi va hombe ni va vadhoto, va di emile masoni ka txikhalo txa wukoma, se me tulwa mabhuku. Ku tutwe kambe dimwani dibhuku, dibhuku da wutomi. Vafi va to lamulwa madingano ni mithumo yawe, nga ti ti nga ti bhalisilwe tona mabhukuni.”—Mtu. 20:12, 13.
18 Ava va no wuswa va na ta lamulwa ngu simaho sihi sa kona? Ina va na ta lamulwa ngu ti va nga timaha va sise fa? Nadha. Khumbula to sionho sawe si divaletwe mbimo yi va nga fa. Se hawa simaho sawe kha ku wombwi a ti va nga maha mbimo yi va nga si se fa. Hahanze keto kuwombwa nzila yi va no ta xamula ngu yona ka trenamento yi va no ta yi mana ka mafu a maphya. Ngu toneto, hambi vavamna vo thembeka vo fana ni Nowa, Samuwele, Dhavhidha, ni Dhaniyeli ti na ta lava to ve gonda ngu Jesu Kristu ni kukombisa likholo ka digandelo dakwe. Hi nga alakanya ngu mthumo wu no ta vaho wo gondisa ava vo mbi lulama!
19. Ngu yihi wuyelo va no yi mana ava va no lamba mkhanjo wuwa wo tsakisa?
19 Ngu yihi wuyelo ya magwito ka va va no lamba mkhanjo wuwa wo tsakisa? Mtuletelo 20:15 yi womba tiya: “Se avale va nga ti sa bhalwa dibhukuni ka wutomi va to vinzwa ni vona txizivani ka mndilo.” Ditshuri ngu ti to vona va na ta loviswa ta magwito. Se da lisima ku tsaniseka ti to matina yathu ma bhatwe ni ti to ma na simama ka dibhuku da wutomi!
Mwanathu a txi pateka ka ditima do gondisa adi ni no ta maheka ngu mbimo ya Mfumo wa 1.000 wa malembe (Wona paragrafu 20)
20. Ngu wuhi mthumo wo tsakisa wu no ta mahwa ngu mbimo ya 1.000 wa malembe? (Wona mfota wa kapa.)
20 Ka Mfumo wa 1.000 wa malembe i na ta va mbimo yo tsakisa ngutu. Yona yi pata ditima da hombe da mthumo wo gondisa wa ha mafuni kotshe wo kha wu khali ku maheka. Ayiya yi na ta va mbimo yo xolisisa vo lulama kumweko ni vo mbi lulama. (Isaya 26:9; Mith. 17:31) Wu na ta mahiswa kutxani mthumo wuwa wo gondisa? Gondo yi yi londiselako yi na ta hi vhuna kupfisisa ni kutsakela lulamiselo yiya ya lisima.
NDANDO 147 Hi thembisilwe wutomi wo mbi guma
^ Gondo yiya yi ni mapfisiselo a maphya mayelano ni mapswi a Jesu aya ma nga bhalwa ka Johani 5:28, 29 aya ma womba-wombako ngu ‘kuwukela kuya kuhanyani ko mbi guma’ ni ‘wukela kuya kusungwani’ mwendo kulamulwani. Hi na gonda to ti womba txani kuwuswa koneko ka kumbidi ni ti to mba mani ava va no pateka ka kuwuswa koneko.
^ Dibhuku diya di khatilwe kubhalwa “kukhukhela di txi mahwa ditiko,” kuwombwako vathu vale va divalelwako sionho sawe. (Mat. 25:34; Mtu. 17:8) Se ti woneka nga Abhele ngene wo khata ku ditina dakwe di bhalwa ka dibhuku da wutomi.
^ Makhatoni hi txi txhamusela ti to dipswi di di ku “kulamula” ka ndimana yiya di thumiswa ngu nzila yo wila timhaka ngako m’thu a di ni mnando. Konkuwa dipswi di ku “kulamula” di nga womba toneto. Kambe ka mhaka yiya Jesu a thumisile dipswi di di ku “kulamulwa” ngu nzila yo txhamusela to tala, ti wombako kuwonisisa kwati m’thu ni ku mkambela, mwendo ati ti wombwako ngu Dicionário ya Bhiblia ya Txigriki i ku “ku xolisisa m’thu.”