INA U TA NGA PFA TO LITSAKO NI KUHUMELELA SI YELANA NI MALE YI U KU NAYO? Mawonelo oneyo ma maha vathu ve thuma ngutu ti to ve mana male. Ina male ni si yi si xavako si nga hi tisela litsako la ditshuri? Pfana mawonelo mamwani.

Ngu kuya ngu dijornal da Happiness Studies di womba ti to ngako hi txi enelisa silaveko sathu sa makhato, se hi txi hola male ya yingi ti na seketela ti to hi va ni litsako mwendo txiemo txa txinene. Phela txikarato kha txi nga ka male. Nga ha di wombako ngu kona direvhista da Monitor on Psychology, “kuhingisana ni male ti vhalela vathu kumana litsako.” Mapswi awa ma yelana ni mlayo wu wu ku ka Bhiblia awu wu ku khene: “Nguko kuranda ngutu male ngu wona mkoloti wa totshe tixaka ta wubihi; ngu mhaka ya kona kunavela kuwa ko mbi na mpimo vamwani va hambani ni likholo, ve ti nemeta vapune ngu kuvilela ko tala.” (1 Timoti 6:9, 10) Sikarato soneso si pata txani?

KUKARATEKA NI KUPWATA WUKOHE NGU KULAVA KUVHIKELA TITHOMBA. “Wukohe wa mthumi wa tshamba, hambi a di dyite sa sidotho mwendo sa singi; aniko kukhura ka nyatithombe ka mpwatisa wukohe.”​—Ekleziyaste 5:12.

KUKARATEKA NGAKO U SI MANI LITSAKO LI U NGA TI LI RINZETE. Wulaka wo lava ngutu male kha wu gumi. “Awule a dhundako male kha na mbi dhuka e kolwa ngu male; ni wule a randako thomba yayingi kha na mbi dhuka e kolwa ngu dibhindu da kona.” (Ekleziyaste 5:10) I singeto dwe, ti nga tshumela timaha ti to m’thu e leka silo sa lisima asi si seketelako litsako, kuzumba ni mwaya wakwe, vangana mwendo mithumo ya moya.

KUHENYA NI KUKARATEKA NGAKO MALI MWENDO DIBHINDU DI TXI WA. “U nga ti karateli kuva nyatithombe; ninga wukhalo wo khata wutxhari wako. Ina u nga dhuka u ronokela sa kuva i singa sa txilo kani? Nguko eso si na ti mahela tibhapi si purumela nzumani kufana ni digama.”​—Mavingu 23:4, 5.

KUENELISEKA. “Nguko kha ha ta ni txilo ha mafuni, kambe kha hi na mbi teka txilo txa ha mafuni, ngako hi txi khukha. Ngu toneto, ngako hi di ni sakudya ni sakuambala, he tsakeleni soneso.” (1 Timoti 6:7, 8) Vathu va va enelelwako ngu si va ku naso kha va baveli vamwani mwendo ku va ngungurukela. Ngako va si laviko kuxava silo sa singi so pinda male yawe, va vayilela kuzumba va txi karateka mwendo kujujeka mapimo.

WUHA. “Kuha i kateko ya hombe ngutu kupinda kuhiwa.” (Mithumo 20:35) Vathu va va ku ni wuha va tsaka ngako va txi maha ti ti tsakisako vamwani, hambi i di ti to ti lava ve ningela ngu mbimo ya yidotho ni mtamo wawe. Vona va mana sa singi asi male yi si sikotiko ku si xava, i ku lirando txixonipho ni vangana va ni vona va ku ni wuha!​—Luka 6:38.

VATHU MBA LISIMA KUPINDA TITHOMBA. “I txhuko kudya mndiwo wa mazokoro, na ku di ni lirando, kupinda nyama ya homu yo nona, na ku di ni livengo.” (Mavingu 15:17) Ti womba txani eto? Ku va ni wuxaka wa wunene ni vamwani nda lisima ngutu kupinda tithomba. Nga ha hi no ti wona ngu kona, lirando nda lisima ti to hi va ni litsako.

Sabina wa América ka wulambwe a gondile kuxonipha milayo ya Bhiblia. A ku a nga lekwa ngu mwamna wakwe, ti lavile e thuma ngutu ti to e xayisa sihoranana sakwe sa simbidi. Ene a ni mithumo yimbidi ni ku ditshiku ni ditshiku a wuka ngu ma 4 wora eya mthumoni. Hambiketo, ene a khatile kugonda Bhiblia. Ku ve ni wuyelo yihi?

Txiemo txakwe txa timale kha txa txitxa, kambe wutomi wakwe wu txhukwatile! Ngu txikombiso, a mani litsako li li manwako ngu va va enelisako txilaveko txawe txa moya. (Matewu 5:3) A mani vangana va ditshuri ava va thumelako Txizimu. A tshumete e kombisa litsako lonelo ngu kugela vamwani ati a nga ti gonda.

Bhiblia yi womba ti to: “Wuzivi wa Txizimu wu kombisile kululama ka wona ngu mithumo ya wona.” (Matewu 11:19) Kota wuyelo, hi na eneliseka, hi va ni wuhani kuninga lisima vathu kupinda tithomba!