INA U TI WONA U DI M’THU WU U NGA TSAKA? U txi khawe ina, u tsakiswa ngu txani? Ngu mwaya, ngu mthumo, mwendo ngu wukhongeli wako? Ti nga maha u txi lava silo si si nga kumahako u tsaka, so fana ni kuheta kugonda, kumana mthumo wa wunene mwendo kuxava mmovha wa wuphya.

Vathu va tipfa va di tsakile ngako va di sikoti kuhetisisa makungo mwendo kumana txo kari txi va nga ti txi lava. Litsako lonelo kha va sweli ku limana. Kambe li fana ni mwando.

Kuwombwa ti to litsako njiemo txa txinene txa mazumbelo txi wonekako ngu kutikarata ka kunene, ngu matipfelo ya ma tako ngu ka kutsaka ka wutomi ni minavelo ya mtumbuluko yo simama ni litsako.

I singeto dwe, aku i ku txiemo txa txinene, kuwombwa ti to litsako hi nga magwito mwendo makungo, kambe li txhamuselwa kota liendo. Ngako m’thu a txi khene: “ni na tsaka mbimo yi . . . ” o leka litsako a txi khene a na li mana mbimo yi yi tako.

Ngu txikombiso, dinganisa litsako ni wutomi wa wunene. Hi nga di manisa kutxani dihanyo da dinene? Ngu kulondisela madyelo a manene, ngu kutxhukumisa kwati mmidi, ni kuzumba hi di tsakile. Ngu ha kufanako, li ta ngu kulondetela nzila ya yinene ni kuhanya ngu milayo ya yinene.

Ngu yihi milayo mwendo tifanelo ati ti tisako litsako? Ku ni tifanelo ta tingi ta lisima, kambe ta lisima ngutu kupinda timwani ngu tiya:

• KUENELISEKA NI WUHA

• DIHANYO DA DINENE NI KUTIMISELA

• LIRANDO

• KUDIVALELA

• TXIKONGOMELO KA WUTOMI

• THEMBA

Dibhuku da wuzivi di di xoniphwako ngutu di khene: “Va katekile avale va tsimbilako ngu nzila yo lulama.” (Masalmo 119:1) Konkuwa he xolisisi nzila yoneyo.