HOTSHETHU HA LI LAVA LIRANDO. Wu walo wukati, mwaya ni wuxaka wu wu nga manekako ku singa ni lirando. Ngu toneto lirando ngu lona la lisima ngutu ti to hi va ni wutomi wo tsakisa. Kambe nji txani “lirando”?

Lirando ali li wombwako hawa hi nga li la mwamna ni msikati, hambiku ni lona i ku la lisima. Kambe i lirando li li mahako ti to m’thu e khatala ngu vamwani i singa ngu silaveko sakwe basi. Lirando lonelo li kongomiswa ngu milayo ya Txizimu, kambe i singa la wukanganyisi.

Fanelo yiya yo tshura yi txhamuselwa ngu nzila yiya: “Lirando la timisela, lirando li ni wumbilu, lirando kha li nga ni mazonda, lirando kha li ti guleti, lirando kha li ti kukumukisi; lirando kha li mahi ati ti singa ni sigelo, lirando kha li ti laveli sa lona, kha li kwati, kha li na txiviti. Lirando kha li tsakeli to biha, kambe li tsakela ti i ku ta ditshuri. Lona la divalela totshe. . . . la rinzela totshe, la timisela totshe; Lirando kha li na mbi va ni magwito.”—1 Vakorinto 13:4-8.

Lirando lo nga toneto “kha li na mbi va ni magwito” i ku ti to kha li na mbi leka ku vaho. Mbimo yotshe li na zumba li di tsani. Ni ku aku li timiselako, li ku ni wunene ni kudivalela, lona “njitsaniso txa wotshe wunene.” (Vakolosa 3:14) Kambe ngako vathu vambidi va txi kombisana lirando liya va vhikeleka ni kutsaka, ti singa ni mahaka ni kwa mbi hetiseka kwawe. Konkuwa he xolisisi lirando la vatekani.

Jesu Kristu a gondisile matshina a lisima ka vatekani. A ti khene: ‘Ngu konaho wamwamna a na siya tate wakwe, a txi namarela ka msikati wakwe, se vona ngu wumbidi wawe va na va nga m’thu mmweyo dwe’ . . . Ngu konaho, asiya Txizimu txi nga si patanisa, m’thu a nga thuke a txi si abanisa.” (Matewu 19:5, 6) Hi na wona timhaka timbidi ta lisima ati hi ti gondako ka ditshina diya da mlayo.

“VAMBIDI VA NA MAHA MMIDI WUMWEWO.” Wukati njitsaniso txo tsana atxi txi fanelako ku vaho hagari ka vathu vambidi. Ni ku lirando li nga va vhikela ti to va si kanganyiselani i ku ti to, wamwamna mwendo wamsikati wu a kanganyisako mngana a maha “mmidi wumwewo” ni wu i singako msikati mwendo mwamna wakwe. (1 Vakorinto 6:16; Vahebheru 13:4) Kwa mbi thembeka ti nga daya wukati. I di ti to va ni vanana, vona va nga karateka, va nga tipfa va si dhundwi ngu vaveleki mwendo kutipfa va sa vhikeleka.

“ASIYA TXIZIMU TXI NGA SI PATANISA.” Phela wukati mbumwewo wo sawuleka. Vatekani va va xoniphako mlayo wuwa va tsanisa wukati wawe. Vona kha va lweli kuhambana ngako ku txi humelela sikarato. Lirando lawe li tsani. Lirando lo nga toneto “la timisela totshe,” lona la va vhuna kululamisa sikarato sawe ngu kudikha ni ngu wumwewo.

Mbimo yi vaveleki va mahako mizamo yo kombisana lirando vanana va wuyelwa ngutu. Mphya wu a dhanwako ku i Jessica a ti woni toneto a khene: “Papa ni mame va dhundana ni kuxoniphana. Mbimo yi ni wonako mame a txi xonipha papa ngutu-ngutu ka timhaka to hi khatalela, eto ti ni maha ni lava ku mu tekelela.”

Phela lirando i fanelo ya lisima ngutu ya Txizimu. Bhiblia yi khene: “Txizimu i lirando.” (1 Johani 4:8) Ngu toneto kha ti hi xamalisi aku Jehovha a dhanwako ku i “txisima txa makatekwa.” (1 Timoti 1:11) Nathu hi na tsaka ngako hi txi etetela tifanelo ta M’vangi wathu, ngutu-ngutu lirando lakwe. Dibhuku da Vaefesu 5:1, 2 di khene: “Etetelani Txizimu, anu mi ku vanana va txona vo randeka ngutu, nananu vanani ni lirando.”