“THEMBA NJA LISIMA TI TO HI VA NI LIKHOLO LO TSANA,” mapswi oneyo ma maneka ka dibhuku di di womba-wombako ngu wuyelo ya yinene ya themba. Dibhuku donedo di tshumela di txi “themba i mrende wa wunene wo xula kutipfa u singa wa txilo, txiwunda ni kuthava.”

Bhiblia yi khene hi fanete kuva ni themba, kambe kulava hi tiwonela kuva ni themba ya makuhu. Masalmo 146:3 yi khene: “Mi nga thembeni vakoma, mwendo vanana va vathu, va singako ni kuhanyisa.” Kuhambana ni kuthemba kuhanyiswa ngu m’thu, hi nava hi di txharihile ngako hi txi themba M’vangi wathu. Ene a ni mtamu wo hetisisa sotshe sithembiso sakwe. Ngu tihi ti a nga hi thembisa? A hi ti wone.

VATHU VO BIHA VA NA GUMA; KASI VO LULAMA VA NA HANYA NGU KUDIKHA: “Ngu mbimoanyana ya yidotho, khu na mbi va wona kambe vabihi . . . Aniko avale vo thutha va na mana mafu va na tsaka, ve hanya ngu kudikha,” ka Masalmo 37:10, 11. Ndimana 29 yi engetela ti to “vo lulama . . . va na xayiseka” ha mafuni mbimo yotshe.

TIYIMBI TI NA GUMA: “MKOMA wa fuvisa tiyimbi kotshe ha mafuni; wa funyetela wulaho, e wila ditxhari; ni kuhisa sikotxikani ha mndiloni.”​—Masalmo 46:8, 9.

KHA KU NAMBI SWA KUVA NI MALWATI, KUXANISEKA NI LIFO: “Ndide ditenda da Txizimu di ku hagari ka vathu . . . Txi na bahulela yotshe mirongo tikhoheni kwawe; kha ku nambi swa ku txi maneka kambe lifo, hambi kudila, hambi tihuwa, hambi kupandiseka.”​—Mtuletelo 21:3, 4.

VOTSHE VATHU VA NA VA NI SAKUDYA SO ENELA: “Ditiko di na talelwa ngu kupfuna ka fulaho, ayi yi zinginikelako txitimwi ka situnga, yi veleka mihando.”​—Masalmo 72:16.

MAFU OTSHE MA NA FUMWA NGU MFUMO WO LULAMA, I KU MFUMO WA KRISTU: “Se [Jesu Kristu] a to ningwa kufuma, ni wudhumo, ni mfumo, kasi ku votshe vathu, matiko, ni tidimi si mthumela; kufuma kwakwe ngu fuma ka kwa mbi gwita, kha ku na mbi pinda, kambe mfumo wakwe, ngu wona wokha wa kwa mbi khundumuswa.”​—Dhaniyeli 7:14.

Hi ti zivisisa kutxani ti to ngu ditshuri toneto ti na maheka? Mbimo yi a nga ti ha mafuni, Jesu a ti kombisile ti to wa faneleka ku va Mkoma. Ene a hanyisile vo lwala, e phamela sisiwana ni kuwusa vakufa. Kambe txa lisima ngutu i ti tigondo takwe. Vathu va va hanyako ngu tigondo toneto va nava ni kudikha ni wumwewo. Jesu a tshumete e profeta ngu ti ti ndino maheka mbimo yi yi tako, ati ti patako sikombiso sa masiku awa o gwita a mafu.

Jesu kha womba ti to ka masiku o gwitisa ku nava ni kudikha ni kukhaliseka. Kuhambana ni eto, a wombile txikombisotxa “kuguma ka ditiko,” txi patako tiyimbi ta hombe, tinzala, malwati ni kuzinginikela ka mafu. (Matewu 24:3, 7; Luka 21:10, 11; Mtuletelo 6:3-8) Jesu a tshumete a txi khene: “Se ngu mhaka ya kutala ka wubihi, lirando la wungi wa vathu li na hola.”​—Matewu 24:12.

Vabhali vamwani va Bhiblia va txhamusete to tala mayelano ni kupwateka ka lirando. 2 Timoti 3:1-5 yi khene, “ka masiku a kugwitisa” mtalo wa vathu kha va nambi khatala ngu vamwani, va ndina dhunda ngutu male ni misakano, . Va ndina tiguleta. Timwaya ti ndina va ti singa ni lirando, vanana vo mbi engisa vaveleki. Wukanganyisi wa wukhongeli wu ndina tala.

Sikarato soneso njikombiso txa ti to hi hanya ka masiku o gwitisa. I singeto dwe, si tshumela si kombisa ti to Mfumo wa Txizimu i singa kale wu na tisa kudikha. Ka wuprofeti wakwe mayelano ni masiku o gwitisa, Jesu a tshumete e hi ninga txitsanisekiso txiya: “Mahungu awa a manene a Mfumo ma na huwelelwa ka dotshe ditiko, kasi kumahwa wufakazi ka yotshe mifumo. Se msana keto, ngu kona ku no va i di magwito.”​—Matewu 24:14.

Mahungu a manene njialakanyiso ka va vo biha. Kambe ma ninga themba ka vo lulama ngu ku va khumbutisa ti to i singa kale Txizimu txi na hi tisela makatekwa ya txi nga hi thembisa. Khu tilavi kuziva to tala ngu makatekwa oneyo? Ngako u txi ti lava simama u gonda kala magwito ka direvhista diya.