Txitrese ngu ti mmidi wu mahako ngako u txi manana ni phango mwendo u txi dhukiswa. Wuluvi wu gela mmidi ti to wu humisa ma hormônio o hambana-hambana. Ma hormônio onewo ma txitxa matutumelo a mnoha ni ma hefemulelo, se eto ti maha mbilu yi peka ngutu, ti tshumela ti kukumukisa misuna. Hambi awe u si se tumbula txilo, mmidi wako wu maneka se wu di mahile totshelele eto ti to wu ti wonela. Ngako phango mwendo asi si kudhukisako si txi hangalaka, mmidi wako wa tshumela wu wuyela.

Txitrese ngu ti mmidi wu mahako ti to awe u kota kuwonisana ni mhaka yo karata mwendo yi yi ku ni phango. Toneto ti khukhela ka wuluvi. Txitrese txa txinene txi kuvhuna to u kota kumaha to kari ngu txikuluveta. Txitrese txa mpimo wa wunene txi nga kuvhuna to u kota kuhumelela ka to kari to fana ni kumaha maezame, u txi kambelwa ka mthumo mwendo u txi ti olola mmidi.

Kambe txitrese txo swela kupinda, txo nemela ngutu mwendo txo mbi pinda, txi nga vanga sikarato sa dihanyo. Ngako mmidi wako wu txi zumba mbimo yo lapha wu di ka txiemo txo kuvhikela ka phango, ti nga kumaha u va ni sikarato ka mmidi ni ka mialakanyo. Txirese txo mbi pinda, txi nga gwesa mazumbelo ako ni nzila yi u ñolako vamwani ngu yona. Txi tshumela txi maha vamwani ve sela ngutu wusuki, kudhaha timbangi, kuthumisa mirende ngu nzila yo biha, kudya ngutu, kudhaha ni silo simwani so biha. Txi nga tshumela txi maha m’thu e dyeka mapimo, e zumba a di karate ni kuva ni mapimo o ti sunga.

Hambiku txitrese txi si gwesiko vathu ngu nzila yi yi fanako, txi nga maha ti to vathu vo tala ve va ni malwati. Futhi txi nga thuka txi gwesa mmidi wotshe.