I mani ditina da Txizimu? Txizimu txa womba txi txi: “Ani ngani Jehovha; adiya ditina dangu.” (Isaya 42:8, NM) Ditina da Txizimu di maneka ko na mu ka 7.000 wa makhambi a mu ka Bhiblia. Kambe, ka Mabhiblia o tala ku thavisilwe ditina donedo di vhaletwa ngu sithopo so fana ni “Mkoma.” Txizimu txi lava ti to u va mngana wa txona, ngu toneto txa kuramba ku u ‘huwelela ditina da txona,’ ti wombako kudhana ditina da txona.—1 Makronika 16:8.

Sithopo sa Jehovha. Bhiblia ya womba to Jehovha a ni sithopo so fana ni: “Txizimu,” “Txizimu txa mtamo wotshe,” “Tate,” ni “Mkoma”. Ka Bhiblia ku ni mikombelo a yi yi kongomiswako ka Jehovha ngu kuthumisa ditina ni sithopo sakwe a si si xoniphekako.—Dhaniyeli 9:4.

 Txizimu txi zumbisile kutxani? Txizimu i moya wu wu si wonekiko. (Johani 4:24) Bhiblia yi womba to “Txizimu kha txi zivi kuwonwa ngu m’thu.” (Johani 1:18) Kambe, Bhiblia ya txhamusela matipfelo a txona. Yi womba to vathu va nga txi henyisa mwendo ku txi ‘tsakisa.’—Mavingu 11:20; Masalmo 78:40, 41.

Txizimu txi ni tifanelo to tshura. Txizimu kha txi na txisawu-sawu, txi randa votshe vathu. (Mithumo 10:34, 35) Ene “Txizimu txa wumbilu ni kupfela, wo swela kuhenya kambe wo tala ngu wuha ni ku thembeka!” (Eksodha 34:6, 7, NM) Kambe txi ni mune wa tifanelo to pala totshe.

Mtamo. Aku i ku “Txizimu txa Mtamo Wotshe,” a ni mtamo wo mbi na magwito ti to e maha ati a ti thembisako.—Genesisi 17:1.

Wutxhari. Txizimu txa ziva ngutu kupinda sotshe. Ngu toneto Bhiblia yi womba to ngu “txona txokha txo ziva.”—Varoma 16:27.

Wululami. Txizimu mbimo yotshe txi maha to lulama. Mithumo ya txona njo “hetiseka,” ni ku kha txi nga ni “wubihi.”—Dhewuteronome 32:4.

Lirando. Bhiblia yi womba to “Txizimu, lirando.” (1 Johani 4:8) Txizimu kha txi njo kombisa lirando dwe, txona txipune lirando. Totshe ti ati mahako ti susumetelwa ngu lirando, se lirando lakwe la hi vhuna ngu tinzila to tala.

Txizimu txa maha wungana ni vathu. Txizimu i Tate wathu wa nzumani wa lirando. (Matewu 6:9) Ngako hi txi kholwa kwakwe, hi nga va vangana vakwe. (Masalmo 25:14) Phela Txizimu txa kuramba ku u tshuketa hafuhi ni txona ngu mkombelo u ‘veka masoni ka Txizimu kotshe kukarateka kwako, nguko Txizimu ngu txona txi ku khatalelako.’—1 Pedro 5:7; Jakobe 4:8.

Jesu hi nga Txizimu. Jesu wa hambana ni sivangwa simwani, ene a mahilwe ngu manza a Txizimu. Ngu toneto Bhiblia yi mu dhanako ku i Mwnana wa Txizimu. (Johani 1:14) Msana ko va Jehovha a di mahile Jesu, a mu thumisile kota “m’gondiswa wakwe” ti to e vanga sotshe silo.—Mavingu 8:30, 31; Vakolosa 1:15, 16.

 Jesu kha thuka e lava ku ti fananisa ni Txizimu. Ene a ti khene: “Ni ta ngu kwakwe [Txizimu], ni rumilwe ngu ngene.” (Johani 7:29) Mbimo yi a nga ti womba-womba ni mmweyo wa vagondiswa vakwe a wombile to Jehovha i “Tate wangu, i ku Tate wanu” ni “Txizimu txangu, i ku Txizimu txanu.” (Johani 20:17) Msana ko va Jesu a di fite, Jehovha a mu wusile e ya hanya nzumani e mu ninga wukoma wa hombe ngutu ha di dhawani Kwakwe da txinene.—Matewu 28:18; Mithumo 2:32, 33.

Jesu Kristu a nga kuvhuna ku u tshuketa hafuhi ni Txizimu

Jesu a tile hamafuni ti to e ta hi gondisa mayelana ni Tate wakwe. Jehovha a wombile tiya mayelana ni Jesu: “Awuwa i Mwanana wangu ni mu randako. Mu engiseni!” (Marku 9:7) Jesu wa mziva kwati Tate wakwe kupinda votshe. Ene a wombile tiya: “Kha nga ho wu a zivako ku . . . Tate i mani, hahanze ka Mwanana ekha, ni wule ene Mwanana a lavako ku mu wonekisa kwakwe.”—Luka 10:22.

Jesu a txi etetela tifanelo ta Tate wakwe ngu kuhetiseka. Jesu a txi etetela ngutu tifanelo ta Tate wakwe ha ko za a txi khene: “Awule a ni wonako, a woni Tate.” (Johani 14:9) Jesu a txi maha ku vathu ve dhunda Txizimu nguko a txi etetela lirando la Tate wakwe ka ti a nga ti womba ni kumaha. Jesu a wombile tiya: “Ani ngani Nzila, Ditshuri ni Wutomi. Kha nga ho awule a tako ka Tata, i singa ngu ngani.” (Johani 14:6) A tshumete a txi khene: ‘Vakhozeli va ditshuri va na khozela Tate ngu moya ni ditshuri, nguko ngu vonevo vakhozeli vava Tate a va dhundako.’ (Johani 4:23) Hi nga pfa kutsakisa ka tona! Jehovha a lava vathu vo fana ni nawe ava va lavako kuziva ditshuri ngu ngene.