Ku pindile malembe a mangi na vathu va si ti zivi to ngu kutxani malwati ma txi tshapelana, se mitungo yi hetile wutomi wa vathu vo tala. Ngu mbimo, va siyentista va zivile ditshuri. Va tumbute ti to malwati ma ti vangwa ngu sipungwana so fana ni ma bactéria ni ma vírus. Kuziva ditshuri, ti vhunile vathu ku ve ti vhikela ni kuthumwa malwati o tala. Se, vathu vo tala va tshukwatisile dihanyo dawe.

Se kuwombwa txani ngu siwotiso simwani sa lisima ka wutomi? U pimisia to kuxolisisa ditshuri mayelana ni siwotisa siya ti nga ku vhunisa kutxani?

• I mani Txizimu?

• I mani Jesu Kristu?

• Nji txani Mfumo wa Txizimu?

• Wumangwana wathu wu na zumbisa kutxani?

Timiliyoni ta vathu ti mani xamulo ya siwotiso soneso ni ku ti va mahile ve tshukwatisa wutomi wawe. Nawe u nga wuyelwa ngu kuziva tixamulo ta siwotiso soneso.

U nga ti wotisa tiya: ‘Ti nga kotekisa kutxani kumana ditshuri mayelana ni tximwani ni tximwani ka wutomi?’ Phela, kumana ditshuri mayelana ni timhaka to tala ka wutomi ta karata. Ngu kutxani?

Vathu vo tala kha va thembi ti to va nga gelwa ati i ku ditshuri ngu vakoma, vanyamabhindu mwendo so ningela mahungu. Vona va ti wona ti txi karata kuhambanisa timhaka ta ditshuri ni mawonela, makuhunyana ni makuhu aya ma tekwako i di ditshuri do thembeka. A ku ti karatako kuthemba m’thu ni ku madungula o tala aya ma ningelwako i ku makuhu, vathu va ni mawonelo o hambana ka nzila yo pfisisa timhaka to kari ni ku va tshumela ve hambana ka ti to timhaka toneto ti nga va ti txi womba txani.

Ti si nga ni mhaka ni sikarato soneso, ti nga koteka kumana ditshuri mayelana ni siwotiso sa lisima ka wutomi. Ngu nzila yihi? Ngu kumaha tontiya u ti mahaka u txi lava kuziva tixamulo ta siwotiso simwani sa ditshiku ni ditshiku.

Phela ditshiku ni ditshiku awe wa xola ditshuri do kari. Wona txikombiso txa Jessica. Ene a khene: “Dihorana dangu kha di dyi tinyume, ha ko za tshenda yimweyo dwe ya nyume yi nga m’daya.” Jessica ti lava e tsaniseka ti to sakudya si a xavelako dihorana dakwe kha si nga ni phango. A tshumela e womba tiya: “Txo khata ni lera kwati siphephana asi si tako ni sakudya soneso. Ngu msana ni maha wuxolisisi wumwani, hambi kufonela mmahi wa sona ti to ni tsaniseka ka sona. Ni wotisa ni vamwani ava va zivako kwati empreza wuleya kasi ku ni tsaniseka to empreza wonewo wa thembekakani.”

Wuxolisisi wako wa ditshiku ni ditshiku wo xota ditshuri ti nga maha i si nga wo nga wa Jessica, kambe, kufana ni Jessica u nga thumisa mamahelo awa malondiselako u txi lava kumana ditshuri:

• Xolisisa kwati timhaka.

• Maha wuxolisisi wo engeteleka.

• Tsaniseka ti to amu u tekako kona timhaka ka thembeka.

Mamahelo yawa ma nga kuvhuna kumana tixamulo ta siwotiso sa lisima ka wutomi. Ngu nzila yihi?

Mbimo yi Jessica a nga xota ditshuri ka Bhiblia, a thumisile mamahelo o fana ni ya a nga ma thumisa mbimo yi a nga txi xota ditshuri mayelana ni sakudya sa dihorana dakwe. Ene a khene: “Kutiemisela kugonda kwati Bhiblia ni kumaha wuxolisisi ti ni vhuni kumana ditshuri ka Bhiblia.” Kufana ni Jessica, timiliyoni ta vathu ti gondile ati Bhiblia yi ti wombako mayelana ni siwotiso siya:

• Ngu kutxani hi di hawa ha mafuni?

• Kumaheka txani hi txi fa?

• Ngu kutxani hi txi xaniseka?

• Txizimu txi maha txani ti to txi gumisa kuxaniseka?

• Hi nga li manisa kutxani litsako ha mwayani?

U nga sikota kumana tixamulo ta siwotiso siya ni simwani ngu kugonda Bhiblia ni kumaha wuxolisisi ka www.pr418.com.