Ina u ti ti ziva?
Ngu kutxani vavamna ava i nga singa Vaisrayeli va nga lwa yimbi kumweko ni Mkoma Dhavhidha?
KA VALWI va yimbi ava i nga singa Vaisrayeli va mkoma Dhavhidha ku ti ni vavamna ava i ngati Zeleki Muamoni, Uriya Muheti, ni Itima wa ka Mowabhi. a (1 Mak. 11:39, 41, 46) Vavamna va mtamo va Dhavhidha va txi pata “Vakereti, Vapeleti, ni Vageti.” (2 Sam. 15:18) Ti ti kholwisa ti to Vakereti ni Vapeleti i ti maxaka a hafuhi ngutu ni Vafilista. (Eze 25:16) Vageti va txi huma ka didhoropa da Filisteya wa Gati.—Jox. 13:2, 3; 1 Sam 6:17, 18.
Ngu kutxani Dhavhidha a nga ti fanete kubeta vavamna ava i nga singa Vaisrayeli ka dibutho da vavamna va yimbi? Ene a txi tsaniseka ti to va txi thembeka kwakwe, ni ku txa lisima ngutu va txi thembeka ka Jehovha. Ngu txikombiso, mayelano ni Vakereti ni Vapeleti, disiyonario ya yiphya ayi yi ku Intérprete da Bíblia yi womba tiya: “Vona va simamile va di thembekile ka Dhavhidha hambi ka siemo so karata mbimo yi a nga txi fuma.” Ngu kutxani? Mbimo yi “vavamna votshe va ka Israyeli” va nga leka kulondisa Mkoma Dhavhidha ve londisa ‘mkuzeteli awu a dhanwako ku i Sebha,’ Vakereti ni Vapeleti va simamile ve thembeka ka Dhavhidha ni ku va mvhuni e wonisana ni txikarato txo wukelwa ngu Sebha. (2 Sam. 20:1, 2, 7) Ka txiemo tximwani mwanana wa Mkoma Dhavhidha Adhoniya a zamile kuhonyola wukoma. Hambiketo Vakereti ni Vapeleti va simamile va di thembekile ka Dhavhidha, ni ku va mvhuni e veka mwanana wakwe Solomoni kasi ku e mvhaleta ka txikhalo txa wukoma kota mkoma wu a nga sawulwa ngu Jehovha.—1 Vafu. 1:24-27, 38, 39.
Wamwamna mmwani awu a nga simama e thembeka ka Dhavhidha hambi ku i nga singa Muisrayeli i ti Itayi wa Mugeti. Itayi kumweko ni 600 wa vavamna vakwe va yimbi va mtamo va seketete Mkoma Dhavhidha mbimo yi mwanana wakwe Abhisalome a nga mu wukela e tshumela e kuzetela vavamna Vaisrayeli kuwukela mkoma. Makhatoni Dhavhidha a gete Itayi ti to aku i nga singa Muisrayeli a sa fanela kupateka ka tiyimbi ta Dhavhidha. Se Itayi a to xamula mfumeli a txi khene: “Hanya Mkoma, ni kuhanya mfumeli, nyamne wangu, ti to kotshe mu mfumeli, nyamne wangu, a noya kona, mwendo kufani, mwendo ngu hanyani, ngu ditshuri txithumi txako txi na va koneho!”—2 Sam. 15:6, 18-21.
Itayi a ti thembekile ka Dhavhidha, i ku mkoma awu a nga sawulwa ngu Jehovha
Hambiku Vakereti, Vapeleti ni Vageti i nga singa Vaisrayeli vona va tumete ti to Jehovha Txizimu txa ditshuri, ni Dhavhidha kota wu a nga sawulwa ngu Jehovha. Hi nga wona nzila yi Dhavhidha a nga tsaka ngu yona ngu kuva ni vavamna va va vo thembeka didhawani kwakwe!
a Mlayo wa Txizimu awu wu nga bhalwa ka Dhewuteronome 23:3-6 wu txi tsimba ti to Vaamoni ni Vamowabhi ve kubela ka sengeletano ya Israyeli. Hambiketo, ti woneka nga Mlayo wonewo wu si tumeleli ti to a va i nga si nga Vaisrayeli ve lumba ditiko da Israyeli, kambe wu si tsimbisi ku vathu vonevo ve hanya mwendo kuzumba kumweko ni vathu va Txizimu. Wona Estudo Perspicaz das Escrituras, Vholume 1, paj. 95.
