Ni velekilwe ngu 1955, ni txigwitisa ndani ka vafana vararu. Ni kute wulambwe ka Finlândia, amu nyamsi ku ziwako kota didhoropa da Vantaa.

Mame wangu a bhabhatisilwe ni si se velekwa. Kambe tate wangu kha tsaka ngu ku mame wangu eva Fakazi ya Jehovha. Tate wangu kha tumela ti to mame wangu e gonda ni nani Bhiblia kumweko ni vakoma vangu mwendo ku hi teka hi ya mitshanganoni. Ngu toneto mame wangu atxi hi gondisa Bhiblia mbimo yi tate wathu a nga ti walo.

Kukhukhela wananani ni di tiemisete kwa mbi thuka ni si engisi Jehovha. Ngu txikombiso mbimo yi ni nga ti ni 7 wa malembe, profesora wangu a henyile ngutu ni nani ngu ku ni nga lamba kudya verilättyjä i ku sakudya so kari so toloveleka Finlândia si ku ni mnoha. A ni ñote sithamana, e tula txisofu txa mina, e zama ku ni dyisa sakudya soneso ngu garfu. Kambe ni ti koti kupeka diwoko dakwe, kasi ku garfu yi mana kuwa.

Mbimo yi ni nga ti ni 12 wa malembe, tate wangu a fite. Msana ka kuva a di fite, ti txi koteka ku ni xalela yotshe mitshangano. Vanathu va dibanzani va txi ni komba lirando, se eto ti ni kuzetile ku ni kula ngu didhawa da moya. Ni khatile kugonda Bhiblia ditshiku ni ditshiku ni kugonda khakwati mabhuku athu. Eto ti ni vhuni ku ni maha txisungo txo bhabhatiswa. Se ni mahile toneto  ngu 8 ka Agosto wa 1969 ni ti ni 14 wa malembe.

Msana ko heta txikolwa ni khatile kuthuma kota nyaphandule wa mbimo yotshe. Ni ku mavhikinyana msana ni rurile ni txi ya mu ku nga di ni txilaveko txa vahuweleli, i ku Pielavesi, hafuhi ni mzinda ka Finlândia.

Pielavesi ni zivile msikati wa mina Sirkka. Ni mtsakete ngutu nguko i di wo dinganisela, wo tiveka hahatshi ni wo vitwa ngu didhawa da moya. Ene a si vileli kuziwa ngutu, ni ku a txi eneliseka ngu si a nga di naso so ti hanyisa. Hi txi lava kumaha totshe ti hi nga txi ti kota kasi kuthumela Jehovha hi si nga ni mhaka ni malungelo. Hi txhadhile ngu 23 ka Março wa 1974. Hahanze ko tsula lua de mel, athu hi tsute Karttula i ku teritoriyo yi yi nga ti ni txilaveko txa vahuweleli.

Kukhukhela hi nga txhadha Jehovha a hi kombile ti to a ndi na hi khatalela, ngako hi txi veka Mfumo ka wukhalo wo khata. (Mat. 6:33) Ngu txikombiso, makhatoni mbimo yi hi nga ti Karttula, hi si nga ni mmovha. Hi txi maha maendo ngu bhasikeni. Ngu mbimo ya pheho ku ni mapedra a jelo wotshe wukhalo. Kasi ku hi kota kutxhumayela ka yotshe teritoriyo ya dibanza ti txi lava hi va ni mmovha. Kambe hi si nga ni male yo xava mmovha.

Hi sa ti rinzela mmweyo wa vakoma va mina a tile a ti hi pfuxela. Ene a hi ningile mmovha wakwe kota prezente. Ene se a ti hakete ni maseguro ya mmovha. Athu ti txo lava hi thela mafura dwe. Ngu toneto, ngu magwito ti kotekile ku hi va ni mmovha wu hi nga txi wu lava.

Jehovha a ti vekile hakubasani ti to a ti na khatalela sotshe silaveko sathu, ti txo lava hi thangetisa Mfumo.

Mbimo yi hi nga ti ka txikolwa txa vanyaphandule, mwanathu Raimo Kuokkanen, a mmweyo wa vagondisi, a hi kuzetile ku hi tatisela petisawu ya Giliyadhi. Se hi khatile kugondela txingiza, hi ti ni mapimo ya ti to hi na faneleka kudhanwa kasi ku hi ya Giliyadhi. Kambe ngu 1980 hi si se tatisela petisawu, hi dhanwi ku ya thuma Bhetele ya Finlândia. Ka mbimo yile va Bhetelita va si tumelelwi ku ve tatisela petisawu yo ya Giliyadhi. Kambe athu hi ti lava kuthuma mu Jehovha a nga txi ku lava, i si nga mu ku nga ti lawa ngu ngathu. Ngu  toneto hi tumete txirambo. Hambi keto hi simamile hi gonda txingiza, kasi ku ku txo va ni mkhanjo, hi tsula Giliyadhi.

Ku di pindile malembe nyana, Mmidi wu wu Fumako wu tumelete ti to va Bhetelita ve ya Giliyadhi. Ka mbimo yoneyo hi tatisete petisawu kasi ku hi tsula Giliyadhi. Kambe i si nga ti to hi si ngadi hi tsakela mthumo wa Bhetele. Kambe athu hi txi lava kuthuma amu ku nga di ni txilaveko ngako va txi hi tumelela. Hi dhanwi kasi kuya pateka ka turma ya wu 79 khe Giliyadhi ngu 1985. Hi avetwe kuya thuma Colombia.

Mbimo yi hi nga hoka Colombia hi avetwe kuya thuma Bhetele. Ni mahile totshe ti ni nga ti kota kasi ku ti pfananisa ni mthumo wa Bhetele, kambe msana ka dilembe, ni kombete kutxitxa txiavelo. Edo i ve dikhambi do khata ni do gwita ka wutomi wangu ni nga kombela kumaha toneto. Hi avetwe ku ya thuma kota varumiwa hahanze ka didhoropa da Neiva a ha kudhanwako ti to i Huila.

Mbimo yotshe ni txi wu dhunda mthumo wo txhumayela. Mbimo yi nga ti ngadi digwenda, ni txi thuma kota nyaphandule khe Finlândia, ni txi khata kutxhumayela ni mixo ni ku ni txi wuya mtini ni minova. Msana nyana ka ku ani ni Sirkka hi di txhadhile, hi txi heta ditshiku dotshe hi di kutxhumayelani. Mbimo yi hi nga txi enda hi ya thuma ka teritoriyo ya kule ni mtini, hi txi tolovela ku otela mmovhani kwathu. Ngu nzila yoneyo hi txi londola kwati dipfumba dathu ni ku hi txi khata kutxhumayela i di ngadi mixo.

Kutshumela hi ya thuma kota varumiwa ka mthumo wo txhumayela ti hi ningile mkhanjo wo pfa litsako li hi nga txi lipfa makhatoni. Dibanza dathu di kute ngutu. Athu hi tumbute ti to vanathu va khe Colombia va ti ni lirando, txixonipho ni kuziva kubonga.

Hafuhi ni ha hi nga txi zumba kona khe Neiva ku si nga ni Fakazi ya Jehovha. Ani ni txi ti lava ngutu ku hi txhumayela mahungu a manene ka vathu va wukhalo wuleya, kambe ngu kona ha ka yimbi, wukhalo wuleya wu sa vhikeleleka ka vathu ava i nga si nga va wukhalo wule. Ngu toneto mbimo yotshe ni txi maha mkombelo ka Jehovha kasi ku m’thu wa wukhalo wuleya eva Fakazi ya Jehovha. Ani ni txi lava ti to m’thu wa wukhalo wuleya eya gonda ditshuri Neiva, e bhabhatiswa e tshumela eya txhumayela vathu va wukhalo wuleya. Ni si ti pimisi ti to Jehovha a ni nzila yimwani ya tshuko yo maha timhaka.

Msana nyana ka toneto ni khatile kugonda Bhiblia ni dijovhem dimwani di dhanwako ku i Fernando González. Ene a txi zumba Algeciras, i ku dimwedo da madhoropa aya ku nga si na Fakazi ya Jehovha. Fernando atxi tsimbila kona mu ko pinda 50 wa makilometro a txiya mthumoni khe Neiva. Atxi ti lulamisela kwati mbimo yi hi nga txi ta gonda ni ku ngu msana a khatile kuxalela mitshangano. Fernando a txi bhulela vathu va didhoropa dileya totshe ti a nga di ti gondile amu ka Bhiblia.

Fernando a bhabhatisilwe ngu Janeiro wa 1990 msana ka 6 wa mitxima adi khatile kugonda Bhiblia. Ngu msana a ve nyaphandule wa mbimo yotshe. Se aku Algeciras ku nga ti ni Fakazi ya Jehovha ti kotekile ku Bhetele yi rumela vanyaphandule vo sawuleka. Ngu Fevereiro wa 1992 kusimekilwe dibanza.

 Kambe Fernando kha gwitela kutxhumayela didhoropani kwakwe dwe. Msana ka ku a di txhadhile, ene ni msikati wakwe va tsute ka didhoropa da San Vicente del Caguán i ku wukhalo wu ni kona ku nga si na Fakazi ya Jehovha. Akheya vona va vhunetile ko simeka dibanza. Ngu 2002 Fernando a avetwe kuthuma kota muwoneleli wa txigava, ni ku ene ni msikati wakwe Olga va thuma ka txiavelo txiya kala nyamsi.

Ka txiperiyensia txiya ni gondile ti to nda lisima ngutu kuva vo kongoma ka mikombelo yathu, mayelano ni txiavelo txathu ni mthumo wu wu patekako ka txona. Jehovha a nga maha ati athu hi si ti kotiko kumaha, nguko kuelula ngwakwe i si nga kwathu.—Mat. 9:38.

Ngu 1990 ni avetwe ku ya thuma kota muwoneleli wa txigava. Txiavelo txathu txo khata i ve ku ya thuma didhoropani ka Bogotá. Eto ti hi mahile hi thava nyana nguko hi sa tolovela kuthuma ka didhoropa da hombe aha ku ku ni pfilu-pfilu ya vathu. Ani ni msikati wangu hi va nyatakadani, kha hi nga ni wusikoti wa lisima. Kambe athu hi yi woni nzila yi Jehovha a nga hetisisa ngu yona mapswi ma ku ka Vafilipiya 2:13: “Kha ditshuri Txizimu ngu txona txi mahako ti to mi xuva ni kuthuma kuranda ka txona.”

Ku di pindile mbimo hi avetwe ku ya thuma ka didhoropa da Medellín, didhoropa di ni nga di womba makhatoni. Vathu va kheya va ti tolovete wugevenga tiruwani, va hokela ha ko va si nga ni mhaka nato. Ngu txikombiso, ditshiku dimwani ni txi tsimbitisa txigondo, ku pfate sibhamu ngu didhawa da mti wu ni nga ti ka wona. Ani ni txi nga ku na ti kelela, kambe txigondiana txa Bhiblia txi simamile txi gonda maparagrafu ngu mthuthala nga kha ku maheki txilo. Mbimo yi a nga gwita kulera, a kombete kukhukha. Ngu msana a wile ni vanana vakwe va vambidi ni ku ngu mthuthala a wombile tiya: “Ni divalele, ni ti ko ya teka vanana.”

Hi tshumete hi txi wonisana ni siemo simwani so thisa. Ditshiku dimwani hi txi txhumayela msikati wangu a ni teti a txi tutuma a di kwalate ngu kuthava. Ani gete ti to m’thu wo kari a txi lava ku mu hophosa. Ani ni thavile ngutu, kambe ngu msana hi tumbute ti to awu a nga txi lava ku mu hophosa asi lavi ene, atxi lava wamwamna wu a nga txi pinda hafuhi ni Sirkka.

Mtamo wu vanathu va wukhalo wule va nga ti nawo wu hi kuzetile ku hi tsanisela sikarato siya ni simwani sa hombe. Hi hokelete magwito ya ti to aku Jehovha a nga txi vhuna vanathu nathu a di na hi vhuna. Hahanze keto athu hi txi engisa sialakanyiso sa madhota a wukhalo wuleya, hi txi ti wonela, ni ku leka totshe manzani ka Jehovha.

Kambe ti hakubasani ti to siemo simwani si si nga ni phango ya hombe nga ti hi nga txi ti pimisisa tona. Ditshiku dimwani ni di ka mti wo kari ni pfite mapswi a vavasikati va vambidi va txi maha likwaha ni kurukatelana ngu didhawa ka mti wu ni nga di ka wona. Ani ni si ti lavi kuwona vathu va txilwa, kambe nyamne wa mti a ni kuzetete ku tsula hi ya wona ti to ku txi maheka txani. Ngu magwito hi tumbute ti to “mbinga” yi hi nga txi yi pfa i ti ya sinyana si si dhanwako to mapapagayo si nga txi etetela va vhizinyo.

Ngu 1997 ni avetwe ku ya thuma kota mgondisi ka Escola de Treinamento Ministerial. b Kwangu yotshe mbimo ku ve lungelo kupateka ka sikolwa sa Bhiblia. Kambe ni si khali kupimisa ti to ditshiku dimwani nava mmweyo wa vagondisi va sikolwa soneso.

Ku di pindile nyana mbimo ni thumile kota muwoneleli wa dhistritu. Mbimo yi ti nga fuviswa ti to kuva ni muwoneleli wa dhistritu ni tshumete ni ya thuma kota muwoneleli wa txigava. Se kupinda 30 wa malembe ni ku ni lungelo yo thuma kota mgondisi ni kuva muwoneleli wa txigava. Siavelo siya si ni tisete makatekwa a mangi. Kambe hi nga ti to totshe ti ti ko hehuka. Se ni na txhamusela ti to ngu kutxani.

Ngu mtumbuluko wangu ni m’thu wa txibindi, se eto ti ni vhuni ku ni tsanisela sikarato so tala. Kambe dikhambi dimwani ni zamile kululamisa timhaka dibanzani ni si jika-jiki. Dikhambi dimwani ni womba wombile ni vanathu ngu lisima lo kombisa lirando ni kudinganisela ka vamwani. Kambe mbimo yi ni nga ningela txialakanyiso txonetxo ni womba wombile ni di thuvikile ni si jika-jiki, se eto ti mahile ti to ni si kombise lirando ni kudinganisela.—Var. 7:21-23.

Mbimo yimwani na godhola ngu mhaka ya tiphazamo tangu. (Var. 7:24) Dikhambi dimwani ni mahile mkombelo ka Jehovha ni m’gela ti to i tshuku ni leka mthumo wa wurumiwa ni tshumela ni ya Finlândia. Kambe ka ditshiku dile ni tsute mitshanganoni, ati ni nga tipfa kheya, ti ni kuzetile ti to ni di fanete kusimama ka txiavelo txa mina ni ku ti karatela kuxula tiphazamo tangu. Ni txi pimisa ngu mkombelo wu ni nga wu maha ni nzila yi Jehovha a nga ni xamula ngu yona, na tsaka ngutu ni nyamsi. Hahanze keto na m’bonga ngutu Jehovha ngu ku a nga ni timiselela ni ku ni vhuna kuwonisana ni kutandeka kwangu.

Ani ni Sirkka ha bonga ngutu Jehovha ngu kuva a di hi ningile lungelo yo mbimo ya yingi ka wutomi wathu hi thuma ka mthumo wa mbimo yotshe. Ni tshumela ni bonga ngutu Jehovha ngu ku va a di ni ningile wa msikati wo thembeka, wa lirando kudingana otshe malembe yawa.

I si nga kale ni na tshanganisa 70 wa malembe, se ti na lava ni leka mthumo wo gondisa ni ku va muwoneleli wa txigava. Kambe eto kha ti ni godholisi nem ni ka kudotho. Wa ti ziva ti to ngu kona ha ka txani? Nguko ani na tiziva ti to txa lisima ngutu ka Jehovha ngu mthumela ngu kutiveka hahatshi ni mbilu yo tala ngu lirando ni kubonga. Eto ngu tona ti tisako wudhumo ka Txizimu txathu. (Mika 6:8; Marku 12:32-34) Kasi kudhumisa Jehovha kha ti lavi hi va ni txiavelo txo guleka.

Ni txi wona ti ti nga maheka msana siavelo si ni nga si mana, ani na ti wona ti to kha na nga si mana ngu kona ha ko pinda vamwani mwendo ngu kuva ni wusikoti wo sawuleka. Jehovha a ni ningile malungelo oneyo ngu mhaka ya wuxinji wu wu si ni faneliko. Ni ku a tumelete ti to ni va siavelo soneso ti si nga ni mhaka ni tiphazamo tangu. Ani na ti ziva ti to ni koti kumaha totshe ti ni nga ti maha ngu kona ha ko vhunwa ngu Jehovha. Ngu toneto ni wombako ti to tiphazamo tangu ti kombisile mtamo wa Txizimu.—2 Vak. 12:9.