1. Vathu va Jehovha va ti organizadhu ngu nzila muni ka dilembe dizana do khata?

 YOTSHE mbimo yi Jehovha a ningako mthumo vathu vakwe ku ve wu maha, a emela ku ve wu maha ngu nzila ya organizadhu. (1 Vak. 14:33) Ngu txikombiso, ngu dhunda ka Jehovha ku mahungu a manene me txhumayelwa hamafuni kotshe. (Mat. 24:14) Ni ku, Jehovha a ningile Jesu wutixamuleli wo e khatalela mthumo wuwa. Se Jesu a maha totshe kasi ku e tsaniseka ti to mthumo wuwa wu mahwa ngu nzila ya organizadhu. Ka dilembe dizana do khata khe Jerusalema, ku simekilwe mabanza ni ku ku vekilwe madhota kasi ku me thangela. (Mith. 14:23) Vapostoli ni madhota va ningete sialakanyiso a si mabanza ma ndi no si londisa. (Mith. 15:2; 16:4) Kota wuyelo, mabanza ma ti tsaniswa a mu ka likholo, me anda ditshiku ni ditshiku.”— Mith. 16:5.

2. Kukhukhela ngu 1919, Jehovha a ningelisa kutxani mkongomiso ni sakudya sa moya?

² Nyamsi, Jehovha wa simama e organizara vathu vakwe. Ku khukhela ngu 1919, Jesu a thumisa mtxawanyana wa wudotho wa vavamna ava va nga sawulwa kasi ku lulamisela mthumo wo txhumayela ni ku ningela sakudya sa moya ka valondeteli vakwe. a (Luka 12:42) Ti hakubasani ti to Jehovha wa wu katekisa mthumo wonewo kota mtxawa.— Isaya 60:22; 65:13, 14.

3-4. a) Ningela txikombiso txi vekako hakubasani ti to ha wuyelwa ngu kuva hi di organizadhu. b) Hi na bhula ngu txani ka gondo yiya?

³ I di ku hi singa organizadhu, hi si na kusikota ku maha mthumo wu Jesu a nga hi ninga. (Mat. 28:19, 20) Hi nga pimisa i di ti to kha hi nga ni siavelo sa ma teritoriyo, mmwani ni mmwani a ndi na txhumayela amu aku lavako. Hi ndi na wuyeletela kutxhumayela makhalo a mamwewo, mamwani makhalo ma si txhumayelwi.  Ina wa pimisa ngu mabhindu mamwani hi ma manako ngu ku hi ku vathu va organizadhu?

⁴ Mbimo yi Jesu a nga ti ha mafuni a vekete mkongomiso ka valondeteli vakwe, ni ku nyamsi a nga txi simama e ningela mkongomiso. Ka gondo yiya hi na wona txikombiso txi Jesu a nga txi siya, ni ku Sengeletano yathu yi txi londisa ngu nzila muni txikombiso txonetxo. Hi na tshumela hi wona ti to hi nga kombisisa ku txani txixonipho ni ku themba sengeletano ya Jehovha.

SENGELETANO YATHU YI LONDISA TXIKOMBISO TXA JESU

5. Ngu yihi nzila yo etetela txikombiso txa Jesu? (Johani 8:28)

⁵ Jesu a gondile ka Tate wakwe ati a nga ti mahako ni ti a nga ti wombako. Ngu ku tekelela txikombiso txa Jesu, sengeletano ya Jehovha yi thumisa Bhiblia kasi ku hi gondisa tatinene ni to biha, ni ku hanya ngu nzila yi yi tsakisako Txizimu. (Lera Johani 8:28; 2 Tim. 3:16, 17) Sengeletano ya Jehovha mbimo yotshe yi hi khumbutisa kugonda Bhiblia ni ku thumisa a ti hi ti gondako. Kumaha toneto ti na hi vhuna ngu nzila muni?

6. Ngu yihi yimweyo ya tinzila ta lisima ayi yi hi wuyelisako ka gondo ya Bhiblia?

⁶ Athu ha wuyelwa ngutu ngaku hi txi gonda Bhiblia ngu ku thumisa mabhuku athu. Ngu txikombiso ha fananisa ati hi ti gondako mu ka Bhiblia ni mkongomiso hi wu manako ka sengeletano. Mbimo yi hi wonako ti to mkongomiso wu hi wu manako wu seketetwe amu ka mibhalo, themba yathu ka sengeletano ya Jehovha yi ya yi kula.— Var. 12:2.

7. Ngu dihi didungula di Jesu a nga di txhumayela, ni ku sengeletano ya Jehovha nyamsi yi londisa txikombiso txakwe ngu nzila muni?

⁷ Jesu a txhumayete “evhangeli ya Mfumo wa Txizimu.” (Luka 4:43, 44) Hahanze keto, Jesu a wombile ti to valondeteli vakwe ni vona va ti fanete kutxhumayela mahungu a manene. (Luka 9:1, 2; 10:8, 9) Nyamsi hotshethu hi lumbako sengeletano ya Jehovha, ha txhumayela ngu mfumo wa Txizimu, ti singa ni mhaka ni ti to hi zumba hani, mwendo hi ni wutixamuleli muni ka sengeletano.

8. Ngu yihi lungelo yi hi ku nayo?

⁸ I lungelo ku womba-womba ni vamwani mayelano ni Mfumo wa Txizimu. Ni ku hi nga votshe va ku ni lungelo yo maha toneto. Ngu txikombiso, mbimo yi Jesu a nga ti ha mafuni a si tumeleli ti to madhimoni me womba-womba mayelano ni nene. (Luka 4:41) Ti ngu ha ku fanako ni nyamsi, kasi ku m’thu e pateka ko txhumayela ti lava e hanya ngu nzila yi yi tsakisako Txizimu. Ni ku hi kombisa ti to ha ninga lisima mthumo wo txhumayela, ngu ku tiemisela kutxhumayela hani ni hani. Hi lava kufana ni Jesu se hi maha totshe a ti hi nga ti kotako kasi kutxhumayela vamwani ni ku va gondisa ditshuri.—Mat. 13:3, 23; 1 Vak. 3:6.

9. Sengeletano ya Jehovha yi maha txani kasi ku ditina da Jehovha di ziwa?

⁹ Jesu a gondisile vamwani ditina da Txizimu. Ka mkombelo wu a nga txi mahela tate wakwe, Jesu a wombile tiya: “Ni va ningile kuziva ditina dako.” (Joh. 17:26) Ngu ku londisa txikombiso txa Jesu, sengeletano ya Jehovha yi maha totshe ti yi nga ti kotako kasi ku vhuna vathu ve ziva ditina da Txizimu. Nzila yo maha toneto ngu thumisa Tradução do novo Mundo das Escrituras Sagradas. Wuhunduluxeli wonewo wa ho ngu Bhiblia yotshe mwendo ngu sienge ngu tidimi to pinda 270. Apendisi A4 ni A5 ka wuhunduluxeli wuwa ma hi gela to engeteleka mayelano ni ti to ngu kutxani ditina da Jehovha di di vekilwe mu ka Bhiblia. Apendisi C yi manekako ka Bíblia de estudo, yi hi txhamusela to ngu kutxani ditina da Jehovha di di fanete ku humelela 237 wa makhambi ka Mibhalo ya Txigriki.

10. Hi nga gonda txani ka ti ti nga wombwa ngu wamsikati wo kari wa khe Myanmar?

 ¹⁰ Kufana ni Jesu, nathu hi lava kumaha nga ha hi nga kotako ngu kona kasi ku hi vhuna vathu ve ziva ditina da Txizimu. Mbimo yi wamsikati wa 67 wa malembe wa khe Myanmar a nga gonda to ditina da Txizimu i Jehovha, a dite. A wombile tiya: “Ni si khali ku pfa ditina da Txizimu ka wutomi wangu. . . . Awe u ni gondisile mhaka ya lisima ka totshe.” Nga ha hi ti wonako ngu kona ka txiperiyensia txiya, ngaku vathu va txi gonda ditina da Txizimu, eto ti nga txitxa wutomi wawe.

SIMAMA U KOMBISA TI TO WA THEMBA SENGELETANO YA JEHOVHA

11. Madhota ma kombisisa kutxani ti to ma themba sengeletano ya Jehovha? (Wona ni mfota.)

¹¹ I ngu nzila muni madhota ma nga kombisako ngu yona ti to ma themba sengeletano ya Txizimu? Ngaku ma txi amukela mkongomiso wo kari, madhota ma wu gonda khakwati ni kumaha totshe ti ma nga ti kotako kasi ku wu thumisa. Ngu txikombiso, hahanze ko amukela mkongomiso mayelano ni nzila yo maha sienge ka mitshangano, ni ku pata vanathu ka mikombelo yawe, ona ma tshumela me amukela mkongomiso wo khatalela tinvuta ta Kristu. Ngako madhota ma txi londisa mkongomiso wu ma wu manako ka sengeletano, vanathu va ti pfa va txi dhundwa ni ku khatalelwa ngu Jehovha.

12. a) Ngu kutxani hi di fanete kuseketela vanathu va va thangelako? (Vahebheru 13:7, 17) b) Ngu kutxani hi di fanete ku veka mapimo ka tifanelo ta tinene ta vanathu va va thangelako ka sengeletano?

¹² Ngako hi txi amukela mkongomiso wo kari wo ta ngu ka madhota, ti lava hi tiemisela ku wu londisa. Ngaku hi txi maha toneto, ti na ma hehukela kumaha mthumo wa ona wo khatalela dibanza. Bhiblia yi hi gela ti to hi fanete kuengisa ni ku ti veka hahatshi ka vale va thangelako. (Lera Vahebheru 13:7, 17.) Kambe mbimo yimwani ti nga hi karatela ku maha toneto. Ngu kutxani? Nguko vavamna vonevo va hi thangelako kha va pelela. Kambe, ngako hi txi veka mapimo ka tiphazamo tawe, i si nga ka tifanelo tawe ta tinene, hi na va hi txi vhuna mlala. Ngu nzila muni? Valala va zama ku hi maha hi kanakana ti to Jehovha a thumisa sengeletano yakwe kasi ku hi kongomisa. Ngako hi txi zumbela kuwonetela tiphazamo ta vanathu va va thangelako, hi na va hi txi pimisa to biha ngu sengeletano yathu ni ku luza themba yathu ka yona. Nji txani a txi athu hi nga txi mahako kasi ku wona ni ku vayilela makuhu ya valala vathu va ma wombetelako?

U NGA LEKE VAMWANI VE HOLISA THEMBA YI U KU NAYO NGU SENGELETANO YA JEHOVHA

13. Valala va Txizimu va zama ngu nzila muni ku onha nduma ya sengeletano ya Jehovha?

¹³ Valala va Txizimu va zama ku maha ti to timhaka ta tinene ka sengeletano ya Jehovha ti woneka nga wubihi. Ngu txikombiso, Bhiblia yi hi gondisa ti to hi fanela ku hi simama hi va ava va nga basa ni ku khozela Jehovha ngu nzila yi a yi tsakelako. Yona yi tshumela yi womba ti to m’thu wu a mahako to biha a si ti soli a fanete kuthaviswa dibanzani. (1 Vak. 5:11-13; 6:9, 10) Kambe aku athu hi londiselako mlayo wonewo valala vathu va womba ti to kha hi va randi vathu ava va thaviswako dibanzani, ni ti to hi valamuli.

14. I mani awu a wukelako sengeletano ya Jehovha?

¹⁴ I mani wu a wukelako sengeletano ya Jehovha? Sathani Dhiyabhulosi ngene a hangalasako makuhu ngu sengeletano. Ene i “tate wa makuhu.” (Joh. 8:44; Gen. 3:1-5) Se, kha ti hi xamatisi aku Sathani a thumisako vathu ti to ve hangalasa makuhu mayelano ni sengeletano ya Jehovha. Ngu toneto ti nga mahekela Jesu ni Makristu o khata.

15. Vathangeli va wukhongeli va mahile txani ngu Jesu ni valondeteli vakwe?

 ¹⁵ Jesu mwanana wa Txizimu i ti m’thu wo pelela, ni ku a mahile sidiwukiso so xamalisa, hambiketo, Sathani a thumisile vathu vo kari kasi kuhangalasa makuhu mayelano ni nene. Ngu txikombiso, vathangeli va wukhongeli va txi gela vathu ti to Jesu a txi hinga madhimoni ngu kuthumisa “mkoma wa madhimoni.” (Marku 3:22) Ngu txikombiso, mbimo yi Jesu a nga txi thethiswa, vathangeli va wukhongeli va mlumbetile ti to a txi ruketela Jehovha, ni ku va zamile ku kuzetela vathu ku e dawa. (Mat. 27:20) Ku di pindile mbimo yo kari, mbimo yi valondeteli va Jesu va nga txi txhumayela mahungu a manene, valala vawe “va to kujetela vamatiko kasiku timbilu tawe ti wukela vanathu.” (Mith. 14:2, 19) Muwoneleli wa 1 ka Dezembro wa 1998 a txi txhamusela dibhuku da Mithumo 14:2 a wombile tiya: “Ava va nga txi seketela Sathani, va si tumeli didungula a di Makristu ma nga txi txhumayela, ni ku va txi womba timhaka to biha mayelano navo kasi ku vathu vamwani va si va engisi ni ku ve va nyenya.”

16. Hi fanete kukhumbula txani ngako hi txi pfa makuhu mayelano ni sengeletano ya Jehovha?

¹⁶ Kala nyamsi Sathani a nga txi simama e hangalasa makuhu. Ene “mxengeteli wa dotshe ditiko.” (Mtu. 12:9) Ngaku u txi pfa makuhu mayelano ni sengeletano ni vanathu va va thangelako, khumbula nzila yi valala va nga ñola ngu yona Jesu kumweko ni Makristu o khata. Nga ha Bhiblia yi nga womba ngu kona, vathu va ndi na xanisa ni ku womba-womba kubiha ngu vathu va Txizimu nyamsi. (Mat. 5:11, 12) Kha hi na mbi kholwa ka makuhu ngako hi txi khumbula ti to i mani a ma xoxotelako, ni kumaha ti hi nga ti kotako kasi ku ma vayilela ngu txikuluveta. Hi nga maha txani kasi ku hi ti vhikela?

17. Hi fanete ku maha txani kasi ku vayilela makuhu? (2 Timoti 1:13) (Wona dikwadro di di ku “ U nga maha txani ngako u txi pfa sitoriya sa makuhu?”)

 ¹⁷ Vayilela makuhu mayelano ni sengeletano. Mpostoli Paulo a ningete sialakanyiso mayelano ni ti hi fanelako ku maha ngaku hi txi pfa makuhu. Ene a gete Timoti ti to ‘tsunzukisa vamwani ti to. . . va si heti mbimo ngu tikaringane’ ni ku ve “nyenya mabhulo o hambana ni likholo.” (1 Tim. 1:3, 4; 4:7) Ditshuri ti to mwanana ngu kona ha ka kwambi ziva txilo a nga rola txomaha e beta mkanani. Kambe m’thu wa hombe wu a yi zivako phango kha na ku maha toneto. Athu ha vayilela makuhu onewo nguku ha ti ziva ti to i mani a ma xoxotelako. Athu hi engisa basi “mapswi a manene” a ditshuri.—Lera 2 Timoti 1:13.

18. Hi nga kombisa ngu nzila muni ti to ha themba sengeletano ya Jehovha?

¹⁸ Ka gondo yiya hi to wona tinzila tiraru basi, ati Sengeletano ya Jehovha yi etetelako ngu tona txikombiso txa Jesu. Mbimo yi u gondako Bhiblia veka mapimo ka tinzila timwani a ti hi etetelako ngu tona txikombiso txa Jesu. Vhuna vamwani dibanzani kwako ku ve va ni txixonipho ni ku themba sengeletano ya Jehovha. Ni ku mbimo yotshe thumela Jehovha ngu kuthembeka, ni kuthuma kumweko ni sengeletano yi a yi thumisako kasi kumaha kudhunda kwakwe. (Mas. 37:28) A hi simameni hi ninga lisima lungelo ya hombe yi hi ku nayo yo thumela Jehovha kumweko ni vathu vakwe ava va ku ni lirando na va di thembekile.