1. Vamwani va ti pfisa kutxani ngako va txi txhumayela? (Wona ni mfota.)

 KOTA vathu va Jehovha, athu hi txhumayela vamwani nguko ha mranda Tate wathu wa nzumani ni ku hi lava kuvhuna vamwani ti to ve mziva. Vahuweleli vamwani va wu dhunda mthumo wo txhumayela, kambe vamwani ta va karatela ku ve va ni litsako. Ngu kutxani? Vamwani ti nga maha va txi thava mwendo va txi tipfa i si nga vagondisi va vanene. Vamwani kha va tipfi kwati kubela ka miti yi va nga mbi rambwa. Vamwani va thava kuruketelwa ngu vanyamne va miti. Vamwani va gondisilwe kuvayilela mazunga. Hambi ku va mrandako Jehovha, vanathu vonevo ta va karatela kuwomba womba ni vamwani mayelano ni mahungu a manene. Hambiketo va li ziva lisima li mthumo wo txhumayela wu ku nalo ni ku mbimo yotshe, vona va pateka. Jehovha wa tsaka ngutu ngu toneto!

2. Ngako ti txi ku karatela kuva ni litsako ka mthumo wo txhumayela ngu kutxani u sa fanela kugodhola?

² Ina mbimo yimwani ta kukaratela kumana litsako ka mthumo wo txhumayela ngu mhaka ya matipfelo oneyo? Ngako ti txi khala ku kuhumelela, u nga godhole. Ti nga maha eto ti kombisa ti to wa ti veka hahatshi ni ku khu lavi ku ti wonekisa, mwendo khu lavi kuva ni mazunga ni vamwani. Hahanze keto, kha ngaho a tsakelako kuñolwa ngu nzila yo biha, ngutu-ngutu a txi zama kumaha ta tinene ka m’thu eneyo. Kambe u nga tsaniseka ti to Tate wako wa nzumani wa ti ziva ati u ti pfisisako tona ni ku wa ti lava ku kuvhuna. (Isaya 41:13) Ka gondo yiya hi na wona 5 wa tinzila ati ti nga hi vhunako kuwonisana ni matipfelo  oneyo ni nzila yi hi nga sakulelako ngu yona litsako ka mthumo wo txhumayela.

THAVELELWA NGU DIPSWI DA TXIZIMU

3. Nji txani txi nga vhuna Jeremiya ku e txhumayela vamwani?

³ Hambi ka timbimo ti ti nga pinda, Dipswi da Txizimu di txi tsanisa malanda a txona ngako ma txi lava ku hetisisa txiavelo txo karata. Wona txikombiso txa mprofeti Jeremiya. Ene a ti karatekile ngutu mbimo yi Jehovha a nga mninga txiavelo txo txhumayela. Jeremiya a wombile tiya: “Kha ni sikoti kuwombawomba; nguko ni mwanana!” (Jer. 1:6) Nji txani txi nga vhuna Jeremiya ku eva ni txibindi txo txhumayela? Ngu ti Jehovha a nga womba ti nga m’thavelela. Jeremiya a wombile tiya: ‘Aniko [Dipswi dako] di txi nga mndilo wo tura, na di di tsivetwe marambuni kwangu, kambe ni rerekile a ha ko ni si ti koti kuzumba nado.’ (Jer. 20:8, 9) Hambiku Jeremiya a nga di ni teritoriyo yo karata, didungula di a nga di amukela kasi ku di txhumayela, di mningile txibindi txi a nga txi txi lava kasi kuhetisisa mthumo wakwe.

4. Kumaheka txani ngako hi txi gonda Bhiblia ni kualakanyisisa ngu ti hi ti gondako? (Vakolosa 1:9, 10)

⁴ Makristu ma mana mtamo ka Dipswi da Txizimu. Mbimo yi mpostoli Paulo a nga bhalela dibanza da Vakolosa, a gete vanathu ti to ngako va txi gonda to engeteleka mayelano ni kudhunda ka Jehovha, ti ndi na va vhuna ku “tsimbila ngu tifanelo ti ti lavekako masoni ka Mkoma” ni “kuveka mihando ngu kuthuma mithumo ya yinene.” (Lera Vakolosa 1:9, 10.) Mithumo yoneyo ya yinene yi pata kutxhumayela mahungu a manene. Ngu toneto, mbimo yi hi yako masoni hi gonda Bhiblia ni kualakanyisisa ngu ti hi ti gondako, likholo lathu ngu Jehovha liya masoni li tsana ni ku ha pfisisa ti to ngu kutxani mthumo wo txhumayela i di wa lisima ngutu.

5. Hi nga thavisisa kutxani txivhuno ka gondo yathu ya Bhiblia?

⁵ Kasi kuwuyelwa ka Dipswi da Txizimu, kha ti lavi kuva ni txikuluveta ko lera, kugonda ni kualakanyisisa. Ngako u txi gonda didungula do kari u si di pfisisi, u nga ndaki. Hahanze keto thumisa Índice das Publicações da Torre de Vigia mwendo Mkongomiso wa Tifakazi ta Jehovha wo maha wuxolisisi kasi ku u mana txhamuselo mayelano ni ndimana yoneyo. Ngako u txi tiha mbimo yo gonda khakwati, u na tsanisa themba yako ya ti to Bhiblia yi womba ditshuri. (1 Vat. 5:21) Mbimo yi u yako masoni u txi tsaniseka, u na va ni litsako lo bhulela vamwani ngu ti u ti gondako.

 TILULAMISELE KWATI

6. Ngu kutxani hi di fanete ku ti lulamisela kwati hi si se tsula kutxhumayelani?

⁶ Ngako u txi ti lulamisela kwati u si se tsula kutxhumayelani, ti na kuhehukela kubhula ni vathu. Jesu a lulamisete vagondiswa vakwe a si se va rumela ka ma teritoriyo. (Luka 10:1-11) Vona va ti koti kuthumisa totshe ti Jesu a nga va gondisa. Ngu toneto, vona va tsakile ngutu ngu totshe ti va nga ti kota ku ti maha.—Luka 10:17.

7. Hi nga ti lulamisela ngu nzila muni hi txiya ka mthumo wo txhumayela? (Wona ni mfota.)

⁷ Hi nga ti lulamisela ngu nzila muni hi si se ya txhumayela? Ti lava hi pimisa ngu ti hi no ti womba ngu kuthumisa mapswi athu o hehuka. Nda lisima ngutu kambe kualakanyisisa ngu tinzila ti vathu va nga angulisako tona se u ti lulamisela kasi ku u xamula. Se ngako hi di ti lulamisete kwati mbimo yi hi ku ya womba wombako ni vathu, hi na tipfa hi di txhatxhekile se hi kombisa maseko ni txingana.

8. I ngu nzila muni Makristu ma fanako ni siya sa dibumba so wombwa ngu mpostoli Paulo?

⁸ Mpostoli Paulo a wombile tiya: “Thomba yi hi ku nayo, yi vekilwe mu ka siya sa dibumba.” (2 Vak. 4:7) Ngu yihi thomba yoneyo? Mthumo wo txhumayela wu hulukisako vathu, ni kuwomba womba mayelano ni Mfumo wa Txizimu. (2 Vak. 4:1) Nji txani siya sa dibumba? Sona si emela malanda a Txizimu a ya ma txhumayelako mahungu a manene ka vamwani. Ka timbimo ta Paulo, vathu va txi thumisa tidhuwa kasi kuveketela simaha sa lisima, so fana ni mndiwo, vhinya ni male. Ngu ha kufanako, athu hi siya sa dibumba, se Jehovha wa hi thumisa kasi kuteka didungula da lisima da mahungu a manene. Ngu kuvhunwa ngu Jehovha, athu hi ni mtamo wu wu lavekako kasiku hi simama hi txi txhumayela ngu kuthembeka.

MAHA MKOMBELO U KOMBELA TXIBINDI

9. Hi nga kuxula ngu nzila muni kuthava kuwukelwa ngu vathu? (Wona ni mfota.)

⁹ Mbimo yimwani hi nga thava kuwukelwa ngu vathu. Hi nga txi xulisa kutxani txikarato txonetxo? Wona mkombelo wu vapostoli va nga maha mbimo va nga gelwa ti to va sa fanela kusimama va txi txhumayela. Hahanze ko thava, vona va kombete txivhuno ka Jehovha kasi ku ve simama “ve womba dipswi da Txizimu ngu kutsana.” Se Jehovha a xamute ngu  txikuluveta mkombelo wawe. (Mith. 4:18, 29, 31) Ngako hi txi thuka hi wonisana ni kuwukelwa ngu vathu, hi fanete kumaha mkombelo ka Jehovha. Kombela Jehovha ti to lirando li u ku nalo ngu vathu i va la hombe kupinda kuthava kuwukelwa ngu vamwani.

10. Jehovha a hi vhuna ngu nzila muni to hi va Tifakazi takwe? (Isaya 43:10-12)

¹⁰ Jehovha a hi sawute ku hi va Tifakazi takwe, ni ku a hi thembisile ku hi vhuna ku hi va ni txibindi. (Lera Isaya 43:10-12.) A hi woni mune wa tinzila ati ti nga hi vhunako ka mhaka yiya. Yo khata, Jesu mbimo yotshe a ni nathu mbimo yi hi txhumayelako mahungu a manene. (Mat. 28:18-20) Ya wumbidi, Jehovha a avete tingelozi kasiku ti hi vhuna ka mthumo wuwa. (Mtu. 14:6) Ya wuraru, Jehovha wa hi ninga moya wakwe wo sawuleka kasi ku wu hi vhuna kukhumbula ati hi ti gondako. (Joh. 14:25, 26) Ya wumune, hi ni txivhuno txa vanathu ko txhumayela. Ngu kuvhunwa ngu Jehovha ni vanathu, athu hi ni totshe ati hi ti lavako kasi ku hi simama hi va ni txibindi txo txhumayela.

TIPFANANISI NI TXIEMO NI KU VA NI MAWONELO A MANENE

11. U nga va manisa kutxani vathu ngako u di ka mthumo wa thembwe? (Wona ni mfota.)

¹¹ Ina wa godholiswa ngako u si mani vathu mitini kwawe? Tiwotise tiya: ‘Vathu va teritoriyo yangu va hani ka mbimo yiya?’ (Mith. 16:13) ‘Ina va mthumoni mwendo thembweni?’ I di toneto, ina u ndi na mana vathu ngu kutxhumayela hakubasani? Mwanathu wu a dhanwako ku i Joshua a womba tiya: “Ni tumbute mkhanjo wo txhumayela mbimo yi ni nga txi tsimbila amu ku nga tala vathu.” Ene ni msikati wakwe Bridget va mana vathu mitini ngako va txi va endela ni minova mwendo ngu ma dhomingo ni mitshikari.—Vaef. 5:15, 16.

12. Hi nga ti tumbula ngu nzila muni ati m’thu a ti kholwako ni ti ti m’karatako?

¹² Ngako u txi tumbula ti to m’thu kha kholwi ka ti u mgelako, zama kutumbula ti to a kholwa ka txani ni ti to a karateka ngu txani. Joshua ni Bridget va txi thumisa siwotiso sa siphephana kasi kukhata mabhulo. Ngu txikombiso, ngu kuthumisa txiphephana atxi txi ku  Di Bhibhele u di wona i di txani? vona va womba tiya: “Vamwani va pimisa ti to Bhiblia dibhuku da Txizimu, kambe vamwani va kana-kana ka toneto. Ngu yahi mawonelo ako?” Ngu mtoloveto, ngu magwito vona va txiva ni mabhulo a manene.

13. Ngu kutxani hi txi tsaka hambi vathu va hi va txhumayelako va si engisi? (Mavingu 27:11)

¹³ Hambi vathu va si engisi mbimo yi hi va txhumayelako, athu ha hokelela txikongomelo txathu. Ngu kutxani? Nguko hi maha ti Jehovha ni mwanana wakwe Jesu va lavako ku hi ti maha, i ku kutxhumayela votshe vathu. (Mith. 10:42) Hambi hi si mani vathu vo bhula navo mwendo va txi lamba kuengisa didungula, athu hi nga va ni litsako ngu kuziva ti to hi tsakisa Tate wathu wa nzumani.—Lera Mavingu 27:11.

14. Ngu kutxani hi txi tsaka ngako mwanathu a txi mana m’thu wu a tsakelako ka mthumo wo txhumayela?

¹⁴ Athu ha tsaka ngutu ngako mwanathu a txi mana wu a tsakelako hi di ka mthumo wo txhumayela. Muwoneleli a fananisile mthumo wo txhumayela ni kulava mwanana wu a nga mwalala. Vathu va vangi va pateka ka mthumo wo lavetela ka makhalo a mangi. Ngu magwito, ngako mwanana va txi mmana, votshe —ava va nga pateka va tsaka, kha ku tsaki basi —wule i ku ene a nga mmana. Ngu ha ku fanako, dotshe dibanza da vhuneta ko txhumayela yotshe teritoriyo ni ku da tsaka ngutu ngako m’thu a txi khata kuxalela mitshangano.

VEKA MAPIMO KA LIRANDO LAKO NI JEHOVHA NI NGU VAMWANI

15. Ati ti nga bhalwa ka Matewu 22:37-39 ti nga hi vhunisa kutxani kuengetela kuhiseka kwathu ka mthumo wo txhumayela? (Wona ni wa kapa.)

¹⁵ Hi nga engetela kuhiseka kwathu ka mthumo wo txhumayela ngako hi txi pimisa ngu lirando lathu ngu Jehovha ni ngu vamwani. (Lera Matewu 22:37-39.) Hi nga alakanya ngu litsako li Jehovha a li pfako mbimo yi a hi wonako hi txi txhumayela, ni litsako li vathu va li pfako ngako va txi khata kugonda Bhiblia. Khumbula kambe ti to, a va va engisako didungula dathu ni kusunga kuthumela Jehovha, va nga hanya ngu ha ku si gumiko.—Joh. 6:40; 1 Tim. 4:16.

16. Hi nga li manisa kutxani litsako ka mthumo wo txhumayela hambi hi si ti koti kuhuma mtini? Ningela sikombiso.

¹⁶ Se ngako ngu txivangelo txo kari ti si koteki ku u huma mtini? Ngako u di ka txiemo txonetxo, veka mapimo ka ti u nga ti mahako kasi  kukombisa lirando lako ngu Jehovha ni ngu vamwani. Ngu mbimo ya corona virus Samuel ni Dania ti si koteki ku ve huma mtini. Ka mbimo yoneyo yo karata vona va txhumayete ngu kuthumisa telefone, ve bhala makarta ni kutsimbitisa sigondo ngu kuthumisa Zoom. Ka mbimo yoneyo Samuel atxi thumwa câncro, se mbimo yi a nga txiya sibhejela, atxi txhumayela votshe va a nga txi va mana. Ene a womba tiya: “Sikarato si nga kumaha u guma mtamo ngu didhawa da nyama ni da moya. Se ti ni lisima ngutu kumana litsako ka mthumo wa Jehovha.” Ka mbimo yoneyo, Dania a lwate kudingana mitxima yiraru. Ngu msana a lavile txivhuno txa txitulu txa marodha kudingana 6 wa mitxima. Ene a womba tiya: “Ni zamile kumaha totshe ti ni nga ti kota mndani ka txiemo txangu. Ni txi txhumayela dhokodhela wa txisikati awu a nga txita atxi ta ni wona ni kutxhumayela awu a nga txi hi tisela so maha. Ni ve ni mabhulo a manene ni wamsikati wu a nga txi thuma farmasiya.” Ngu kona ha ka txiemo txawe Samuel ni Dania va si ti koti kumaha ti va nga txi ti kota kumaha kale, hambiketo vona va mahile ti va nga txi ti kota, ni ku kota wuyelo va ve ni litsako.

17. U nga wuyelwa ngu nzila muni ka totshe tinzila ti hi nga ti gonda?

¹⁷ Tinzila ti hi nga ti wona ka gondo yiya ta thuma kwati ngako hi txi ti thumisa ngu mbimo ya yimweyo. Nzila yimwani ni yimwani yi fana ni si hi nga si thelako ka mndiwo. Ngako hi txi si thela ka wukhalo wa wumwewo, wuyelo i nga va mndiwo wo tshamba. Ngako hi txi ti thumisa kwati 5 wa tinzila ti hi nga ti gonda, kha hi na mbi thava txilo ni ku hi nava ni litsako ka mthumo wo txhumayela.