1. U tipfisa kutxani ngu kuva u di gondile ditshuri?

 KOTA vathu va Jehovha athu ha di dhunda ditshuri di hi di manako ka dipswi da Txizimu. Ni ku athu hi seketela likholo lathu ka dona. (Var. 10:17) Athu ha tsaniseka ti to Jehovha a mahile dibanza da wukristu kota “phande ya hombe ni txihiketo txa ditshuri.” (1 Tim. 3:15) Athu ha tsaka ngutu ngu kuseketela ‘vathangeli vathu’, nguko ngu vona va hi txhamuselako ditshuri da mu ka Bhiblia ni ku hi vhuna ku hi maha kuranda ka Txizimu.—Vaheb. 13:17.

2. Ngu kuya ngu Jakobe 5:19, ku nga thuka kumaheka txani msana ka kuva hi di gondile ditshuri?

² Kambe, hambi msana ka kuva hi di gondile ditshuri ni kutumela ti to sengeletano ya Jehovha yi hi kongomisa, hi nga thuka hi timetwa. (Lera Jakobe 5:19.) Sathani a nga tsaka ngutu ngu ku hi wona hi luza themba yathu ka Bhiblia ni ka mkongomiso wa sengeletano ya Txizimu.​—Vaef. 4:14.

3. Ngu kutxani hi di fanete kusimama hi di thembekile ka ditshuri? (Vaefesu 6:13, 14)

³ Lera Vaefesu 6:13, 14. I singa kale Sathani a na hangalasa makuhu aya ma no maha ti to matiko me wukela vathu va Txizimu. (Mtu. 16:13, 14) Hi tshumela hi ziva ti to Sathani a na maha totshe ti a nga tikotako kasi kukanganyisa vathu va Jehovha. (Mtu. 12:9) Ngu toneto, nda lisima ngutu ku hi ti treinara konku kasi ku hi ziva kuhambana ka ditshuri ni makuhu kasi ku hi kota kuengisa ditshuri. (Var. 6:17; 1 Pedro 1: 22) Eto nda lisima ngutu kasi ku hi kota ku ta huluka ka xanisa ya hombe!

4. Hi na bhula ngu txani ka gondo yiya?

⁴ Ka gondo yiya, hi na wona tifanelo timbidi ati ti lavekako kasi ku hi vhuna kuwona ditshuri da mu ka Bhiblia ni kutumela mkongomiso wa sengeletano ya Jehovha. Hi na gwita hi wona 3 wa timhaka ati hi fanelako ku ti maha kasi ku hi simama hi di tsani ka ditshuri.

TIFANELO ATI TI NO HI VHUNA KUWONA ATI I KU DITSHURI

5. Kuthava kwathu Jehovha ngu nga hi vhunisa kutxani kuziva ati i ku ditshuri?

⁵ Kuthava Jehovha. Kuthava Jehovha ti womba ti to ha mranda ngutu ni ku kha hi lavi kumaha txilo atxi txi nga m’henyisako. Ngu toneto hi fanete kugonda kuziva kuhambana ka ta tinene ni to biha, ta ditshuri ni makuhu, kasi ku hi kota kutsakelwa ngu Jehovha. (Mav. 2:3-6; Vaheb. 5:14) Aku ati vathu va ti dhundako ti tolovelako kwambi tsakisa Jehovha, kha ha fanela kutumelela ti to kuthava vathu kuva ka hombe kupinda lirando lathu ngu Jehovha.

6. I ngu nzila muni kuthava vathu ku nga maha ti to 10 wa Vaisrayeli ve jikisa ditshuri?

⁶ Ngako hi txi thava ngutu vathu kupinda Jehovha, hi nga gwitisa kuleka ditshuri. Wona txikombiso txa 12 wa Vaisrayeli ava va nga ya xolela ditiko adi Jehovha a nga di thembisile kuninga ditiko da Israyeli. 10 wa Vaisrayeli va lekile kuthava kwawe Vakanana kuva ka hombe kupinda lirando lawe ngu Jehovha. Vona va gete tiya votshe Vaisrayeli: “Hambi hi txo tshumela, kha hi na mbi ya va xula, nguko mbathu va ku ni mtamo ku hi pinda.” (Mit. 13:27-31) Ditshuri ti to ngu mawonelo a vathu, Vakanana va ti ni mtamo ngutu kupinda Vaisrayeli. Kambe kuhokela magwito o womba ti to Vaisrayeli va si na kusikota kuxula valala vawe, i di kukombisa kwambi themba Jehovha. 10 wa vavamna vale va di fanete kuveka mapimo ka ti Jehovha a nga txi lava ti to  Vaisrayeli ve ti maha. Va di tshumete kambe ve alakanyisisa ngu ti Jehovha a nga ti va mahete. Ngu nzila yoneyo, vona va di khumbute ti to Vakanana i singa va txilo va txi fananiswa ni Jehovha Txizimu txa mtamo wotshe. Kambe kuhambana ni vavamna vonevo Joxuwa ni Kalebhi va txi lava kutsakelwa ngu Jehovha. Vona va wombile tiya ka votshe Vaisrayeli: “Ku ngako MKOMA a txi tsaka ngu ngathu, Ene a na hi maha hi wulela ka ditiko a nga hi ninga.”​—Mit. 14:6-9.

7. Hi nga tsanisa ngu nzila muni kuthava kwathu Jehovha? (Wona ni mfota.)

⁷ Kasi ku hi tsanisa kuthava kwathu Jehovha, yotshe mbimo yi hi mahako sisungo ti lava hi pimisa ngu ti ti no mtsakisa. (Mas. 16:8) Mbimo yi u gondako madungula amu ka Bhiblia, tiwotise tiya: ‘I ti ku nova ka txiemo txiya i di nava txihi txisungo txangu?’ Ngu txikombiso, mbimo yi 10 wa sipiyawu si nga womba ti to Vaisrayeli va si na kusikota kuxula Vakanana, ina awe u di khotwe kwawe u thava mwendo lirando lako ngu Jehovha li di engetete? Vaisrayeli kha va kholwa ti to ati Joxuwa ni Kalebhi va nga txi ti womba i ti ditshuri. Ngu toneto, va luzile mkhanjo wo bela ka Ditiko da Txithembiso.—Mit. 14:10, 22, 23.

8. Ngu yihi fanelo ayi hi fanelako ku yi sakulela, ni ku ngu kutxani?

⁸ Kutiveka hahatshi. Jehovha a xawutela ditshuri ka vale va tivekako hahatshi. (Mat. 11:25) Ni ku ngu ku tiveka hahatshi athu ha tumela txivhuno kasi kugonda ditshuri. (Mith. 8:30, 31) Hambiketo, ti lava hi ti wonela kasi ku hi si ti guleti. Ngako eto ti txi maheka, hi nga khata kupimisa ti to mawonelo athu nga wuzivi kupinda matshina a milayo a Bhiblia ni mkongomiso wa msengeletano ya Jehovha.

9. Hi nga simama ngu nzila muni hi va vo tiveka hahatshi?

⁹ Ngako hi txi lava kusimama hi di vo tiveka hahatshi, hi fanete kukhumbula ti to hi txi fananiswa ni Jehovha athu kha hi nga va txilo. (Mas. 8:3, 4) Hi nga tshumela hi maha mkombelo, hi kombela ti to Jehovha e hi vhuna ku hi tiveka hahatshi ni kutumela kugondiswa. Jehovha wa hi gondisa mapimiselo akwe ngu kuthumisa Bhiblia ni Sengeletano yakwe, ni ku a na hi vhuna ku hi ninga lisima toneto, kupinda mapimiselo athu. Mbimo yi u lerako Bhiblia zama kuwona ti to i ngu nzila muni Jehovha a dhundako vathu vo tiveka hahatshi, ni kunyenya vathu vo ti guleta ni kutigela. Maha totshe ti u nga tikotako kasi kusimama u tiveka hahatshi ngako u txi mana txiavelo atxi txi nga kumahako u va ni wutixamuleli wo guleka.

HI NGA SIMAMA NGU NZILA MUNI HI VA VATHU VO ENGISA

10. Mba mani ava Jehovha a nga va thumisa kasi kuningela mkongomiso ka vathu vakwe?

¹⁰ Themba sengeletano ya Jehovha. Ka mbimo yi yi nga pinda Jehovha a thumisile Mosi, ni ku ngu msana a thumisile Joxuwa kasi kuningela mkongomiso ka vathu va Israyeli. (Jox. 1:16, 17) Vaisrayeli va txi katekiswa mbimo yi va nga txi wona vavamna vonevo kota vaemeli va Jehovha. Ku di pindile malembe amangi mbimo yi dibanza da wukristu di nga simekwa, 12 wa vapostoli i di vona va nga txi kongomisa vathu va Txizimu. (Mith. 8:14, 15) Ngu msana mtengo wonewo wu engetete ni ku wu txi pata madhota mamwani khe Jerusalema. Ngu kulondisa mkongomiso awu va nga txi wu mana ka vavamna vonevo vo thembeka, “mabanza ma ti tsaniswa amu ka likholo, me anda ditshiku ni ditshiku.” (Mith. 16:4, 5) Nyamsi ni kona, athu ha katekiswa mbimo yi hi londisako mkongomiso wa sengeletano ya Jehovha. Kambe u alakanya ti to Jehovha a di na tipfisa kutxani idi ku hi si engise avale a  nga va sawula kasi ku ve hi thangela? Hi nga xamula txiwotiso txiya ngu kuwona ati ti nga maheka mbimo yi Vaisrayeli va nga txiya ka Ditiko da Txithembiso.

11. Nji txani txi nga maheka ka avale va nga si xoniphi Jehovha ni wu a nga ti msawute kasi ku e thangela vathu vakwe? (Wona ni mfota.)

¹¹ Dikhambi dimwani mbimo yi Vaisrayeli va nga txi kongoma ka Ditiko da txithembiso, madhota a nduma ma bhongete Mosi ni kwambi seketela txiavelo atxi Jehovha a nga ti mningile. Vona va bhongile va txi kha vona: “Wotshe msengeletano wu sawulekile, ni Mkoma aho hagari ka wona.” (Mit. 16:1-3) Hambiku i nga ti ditshuri ti to ka Jehovha “wotshe msengeletano” wu di sawulekile, Jehovha a di sawute Mosi ti to e thangela vathu vakwe. (Mit. 16:28) Mbimo yi va nga wukela Mosi, vavamna vale va sindaka-milayo va txo wukela Jehovha. Vona kha va veka mapimo ka ti Jehovha a nga txi ti lava, va vekile mapimo ka ti vona va nga txi ti lava i ku wukoma ni kuziwa ngutu. Jehovha a lovisile vavamna vonevo, kumweko ni timiliyoni ta va va nga txi va seketela. (Mit. 16:30-35, 41, 49) Ngu ha kufanako, nyamsi Jehovha kha va tsakeli avale va si xoniphiko mkongomiso wa sengeletano yakwe.

12. Ngu kutxani mbimo yotshe hi nga thembako sengeletano ya Jehovha?

¹² Mbimo yotshe hi nga themba sengeletano ya Jehovha. Ti hakubasani ti to mbimo yi ku ku ni kutxitxa ka mapfisiselo a ditshuri do kari da mu ka Bhiblia mwendo nzila yi hi thumelako ngu yona Jehovha, ava va thangelako kha va pimisi kumbidi kasi kumaha kutxitxa koneko. (Mav. 4:18) Vona va maha toneto nguko va lava kutsakisa Jehovha. Vona va tshumela va maha totshe ti va nga ti kotako kasi kumaha sisungo soneso sa simbidi ngu kuthumisa Dipswi da Txizimu, ni ku ngu toneto otshe malanda a Jehovha ma fanelako ku ti maha.

13. Nji txani “mapswi a manene,” ni hi fanete kumaha txani ngu ona?

¹³ “Londetela mapswi a manene.” (2 Tim. 1:13) “Mapswi a manene” kuwombwa tigondo  ta wukristu ati hi ti manako amu ka Bhiblia. (Joh. 17:17) Ngu ona hi seketelako ka ona totshe ati hi ti kholwako. Sengeletano ya Jehovha yi hi gondisa ku hi londisa tigondo toneto. Ngako hi txi maha toneto hi na mana makatekwa.

14. I ngu nzila muni makristu a mbimo ayi yi nga pinda ma nga leka kulondisa “mapswi a manene”?

¹⁴ Ku ndi na maheka txani i di ku hi si seketeli wukhozeli wathu ka “mapswi a manene”? Wona txikombiso txiya. Ka dilembe dizana do khata, makristu ma txi hangalasa sitoriya sa makuhu sa ti to ditshiku da Jehovha di ti hokile. Ti nga maha va di amukete dipasi di nga txi tikomba di di bhatwe ngu mpostoli Paulo di txi womba toneto. Ni ku va sa ti xolisisa kwati, makristu o kari a Vatesalonika ma khotwe ka sitoriya soneso ni ku va khatile ku si hangalasa ka vamwani. I ti ku va ti khumbute ati Paulo a nga ti va gondisile vona va sa nga kanganyiswa. (2 Vat. 2:1-5) Paulo ati gete vanathu vonevo ti to va si kholwi ka totshe ti va ndi no tipfa. Ni ku kasi ku va vhuna ka siemo asi si ndi no londisa, Paulo a wombile tiya ka mapswi akwe o gwita ka dipasi da wumbidi ka Vatesalonika: “Madingula awa, ngani Paulo, ngu txanza txangu ni nga bhala. Ngu txona txitsaniso txangu. Ngu tona ti ni bhalisako tona ka otshe mapapilo angu, ni bhalisa tona tiya.”​—2 Vat. 3:17.

15. Hi nga ti vhikela ngu nzila muni ka makuhu ya ma wonekako nga ova ditshuri? Ningela txikombiso. (Wona ni mfota.)

¹⁵ Hi nga gonda txani ka ti Paulo a nga gela Vatesalonika? Ngako hi txi pfa timhaka to kari ti si tsimbitisaniko ni ti hi ti gondako amu ka Bhiblia mwendo sitoriya so thisa, ti lava hi va ni wutxhari. Ka dikhambi dimwani kale ka União Soviética, valala vathu va ningete dipasi ka vanathu adi di nga txi tikomba nga di txi ta ngu mzinda. Dipasi donedo di txi kuzeta vanathu ti to ve ti mahela sengeletano yawe aha va nga di no ti mahela sisungo vapune. Dipasi donedo di txi nga di ta ngu mzinda wa hamafuni kotshe. Kambe vanathu va va nga ti thembekile kha va kangayiswa. Vona va tumbute ti to didungula da dipasi di si tsimbitisani ni ti va nga di ti gondile. Ngu nzila yi yi  fanako nyamsi, avale va nyenyako ditshuri mbimo yimwani va thumisa internet ni ma redes sociais ti to ve zama ku hi kanganyisa ni ku hi hambanisa. Hahanze ko “kuluveta hi dekadekiswa timbiluni kwathu,” ti lava hi pimisisa ti to ati hi tipfako ni ti hi ti lerako ta tsimbitisana ni ditshuri di hi nga di gonda.​—2 Vat. 2:2; 1 Joh. 4:1.

16. Ngu kuya ngu Varoma 16:17, 18, ngu tihi ati hi fanelako kumaha ngako m’thu atxi leka ditshuri?

¹⁶ Simama u tipata ni va va nga thembeka ka Jehovha. Jehovha a lava ti to hi mkhozela ngu wumwewo ni vanathu. Ni ku hi nga sikota kumaha toneto ngako hi txi simama hi di tsani ditshurini. M’thu wu a hangalasako ati ti si pfaniko ni ditshuri a maha ti to dibanzani kuva ni mibhandu. Jehovha a hi txharihisa ti to ‘hi si patani navo.’ Ni ku, hi si mahi toneto hi na khata kukholwa ka ti i singako ditshuri se hi va vo mbi thembeka masoni ka Jehovha.​—Lera Varoma 16:17, 18.

17. Ngu yihi wuyelo hi yi manako ngu kuziva ditshuri ni kutshumela hi tsana ka dona?

¹⁷ Ngako hi txi wona ati i ku ditshuri hi tshumela hi tsana ka tona, hi na sikota kuva hafuhi ni Jehovha ni kusimama hi va ni likholo lo tsana. (Vaef. 4:15, 16) Hahanze keto, hi nambi kanganyiswa ngu tigondo ta makuhu ta Sathani, ni ku hi napfa kuvhikelwa ni kukhatalelwa ngu Jehovha ka mbimo ya xanisa ya hombe. Ngu toneto simamani mi di tsani ka ditshuri, “ni ku Txizimu txa kudikha txi nave ni nanu.”​—Vaf. 4:8, 9.