1. Nji txani txi vhunako malanda a Jehovha kusimama me mkhozela hambi ma txi wonisana ni sikarato?

 BHIBLIA yi dhana masiku ya hi hanyako ka ona ti to “timbimo to karata.” (2 Tim. 3:1) Hahanze ka sikarato asi hotshethu hi wonisanako naso ka masiku yawa o karata, malanda a Jehovha ma tshumela me wonisana ni kuxaniswa. Kambe nji txani txi hi vhunako kusimama hi khozela Jehovha hambi hi txi wonisana ni sikarato? Tximwetxo txa sivangelo ngu ku hi zivako ti to Jehovha “Txizimu txi txi hanyako.”—Jer. 10:10; 2 Tim. 1:12.

2. Ngu tihi ti hi ti zivako ngu Jehovha ti hi tsanisako ngutu?

² Jehovha m’thu wa ditshuri, ene wa hi vhuna mbimo yi hi wonisanako ni sikarato ni ku mbimo yotshe wa mana tinzila to hi vhuna. (2 Mak. 16:9; Mas. 23:4) Ngako hi txi khumbula ti to Txizimu txathu txa khatala ngutu ngu ngathu ni ku txa ti lava ku hi vhuna hi nava ni mtamo wo wonisana ni txikarato txihi ni txihi txi txi nga humelelako. Hi na tsaniseka ka toneto ngu kuxolisisa txikombiso txa Mkoma Dhavhidha ni mamwani malanda a Jehovha.

3. Dhavhidha atxi lava kuwomba txani mbimo yi a nga womba ti to “Jehovha wa hanya”?

³ Dhavhidha atxi mziva kwati Jehovha ni ku atxi mthemba. Mbimo yi a nga txi wukelwa ngu valala vakwe, kupata ni Mkoma Sawule, Dhavhidha a mahile mkombelo ka Jehovha atxi kombela txivhuno. (Mas. 18:6) Msana ka ku Jehovha a di xamute mkombelo wa Dhavhidha ni ku m’vhuna, Dhavhidha a wombile tiya: “Jehovha wa hanya!” (Mas. 18:46) Atxi lava kuwomba txani Dhavhidha ngu mapswi oneyo? Direferensiya dimwani ka mhaka yiya di wombile ti to Dhavhidha atxi kombisa kuthemba ti to Jehovha, “Txizimu txa tximwetxo txa ditshuri  ni ti to mbimo yotshe txa vhuna malanda a txona.” Dhavhidha atxi ti ziva ti to Jehovha a txi wona totshe ti ti nga txi m’humelela ni ku a di tiemisete ku m’vhuna. Ngu toneto ti nga vhuna Dhavhidha ku e simama e thumela Jehovha ni ku m’dhumisa.—Mas. 18:28, 29, 49.

4. Ngu kutxani i di ta lisima kutsaniseka ti to Jehovha Txizimu txi txi hanyako?

⁴ Kutsaniseka ka ti to Jehovha Txizimu txi txi hanyako, ti na hi vhuna ku mthumela ngu kuhiseka. Ngu toneto ti no hi ninga mtamo wo hi wonisana ni txiduko tximwani ni tximwani ni ku hi vhuna ku hi simama hi maha totshe ti hi nga ti kotako ka mthumo wakwe. Ti na tshumela ti hi vhuna ku hi va hafuhi ni Jehovha.

TXIZIMU TXI TXI HANYAKO TXI NA KUTSANISA

5. Nji txani txi nga tsanisako themba yathu mbimo yi hi wonisanako ni sikarato? (Vafilipiya 4:13)

⁵ Hi nga wonisana ni txikarato txihi ni txihi, txa hombe mwendo txa txidotho, ngu kukhumbula ti to Jehovha Txizimu txi txi hanyako ni ku mbimo yotshe a ti emisete ku hi vhuna. Ditshuri ngu ti to, ka Jehovha kha txi ngaho txikarato txa hombe ngutu. Nguko ene Txizimu txa mtamo wotshe ni ku a nga hi ninga mtamo wu hi wu lavako. (Lera Vafilipiya 4:13.) Se eto ta hi tsanisa mbimo yi hi wonisanako ni sikarato. Mbimo yi hi wonako ti to Jehovha wa hi vhuna ka timhaka ta tidotho, themba yathu yo ya yi kula ka ti to a na hi vhuna ka sikarato sa hombe ngutu.

6. Ngu tihi ati ti nga mahekela Dhavhidha mbimo yi i nga ti ngadi jovhem ti nga mmaha e themba ngutu Jehovha?

⁶ Wona siemo simbidi si nga engetela themba ya Dhavhidha ka Jehovha. Mbimo yi i nga ti ngadi jovhem atxi thuma kota m’dyisi, ngu makhambi o hambana ursu ni ngonyamu si tekile tinvuta ta tate wakwe. Ka otshe makhambi a mambidi, Dhavhidha a londisite sihari soneso ni ku a hulukisile sinvutana. Kambe Dhavhidha kha pimisa ti to a sikoti kumaha toneto ngu mtamo wakwe. Ene atxi ti ziva ti to i ti Jehovha a nga ti mningile mtamo ni txibindi txo maha toneto. (1 Sam. 17:34-37) Dhavhidha kha si divala siemo soneso sa simbidi. Mbimo yi a nga txi pimisa ngu ti ti nga ti mahekile themba yakwe ka Jehovha yi txi ya masoni yi tsana, atxi ti ziva ti to Txizimu txi txi hanyako txi ndi na m’vhuna ka ti a ndi no ti lava ka mbimo yi yi tako.

7. Dhavhidha a vekile mapimo ka txani ni ku ti mvhunisile kutxani ku e xula Goliya?

⁷ Ku dipindile mbimonyana, Dhavhidha i di ngadi jovhem asi se tshanganisa 20 wa malembe, a tsute wugoveloni amu ku nga ti ni dibutho da Vaisrayeli. Ene a tumbute ti to masotxhwa ma txi thava nguku mufilista wu a nga txi dhanwa ku i Goliya atxi “phikizana ni Mabutho a ka Israyeli.” (1 Sam. 17:10, 11) Masotxhwa ma txi thava ngu ku mavekile mapimo ka wu hombe wa Goliya ni ku a nga txi va dhukisela. (1 Sam. 17:24, 25) Kambe Dhavhidha, a vekile mapimo ka timhaka to hambana. Dhavhidha atxi ti ziva ti to Goliya a si ngo phikizana ni masotxhwa a Vaisrayeli basi kambe atxi phikizana ni masotxhwa a Txizimu txi txi hanyako. (1 Sam. 17:26) Dhavhidha a vekile mapimo ka Jehovha. Ene atxi ti ziva ti to Txizimu txona txi txi nga ti mvhuni mbimo yi i nga ti ngadi m’dyisi txi ndi na mvhuna ka txiemo txile a nga ti ka txona. Dhavhidha asi kana-kani ti to a ndi nava ni txivhuno txa Jehovha, ngu toneto, ene a lwite ni Goliya e tshumela e m’xula!—1 Sam. 17:45-51.

8. Nji txani txi nga tsanisako themba yathu ka ti to Jehovha mbimo yotshe a na hi vhuna ka siemo so karata? (Wona ni mfota.)

⁸ Nathu hi nga wonisana ni txikarato txihi ni txihi ngaku hi txi khumbula ti to Txizimu txi txi hanyako mbimo yotshe txi nava ni nathu  kasi ku txi hi vhuna. (Mas. 118:6) Hi txi khumbula ati Jehovha a nga ti maha ka mbimo yi yi nga pinda eto ta tsanisa themba yathu kwakwe. Se, lera madungula amu ka Bhiblia aya ma kombisako nzila yi Jehovha a nga vhuna ngu yona malanda akwe. (Isaya 37:17, 33-37) Hahanze keto, awe u nga gonda siperiyensiya sa vanathu ka site ya jw.org. Siperiyensiya soneso si veka hakubasani nzila yi Jehovha a vhunako ngu yona malanda akwe nyamsi. U nga tshumela u khumbula timbimo ti Jehovha a nga kuvhuna. Makhambi mamwani kha ku na mbi va timhaka to xamatisa, to fana ni kulwa ni ursu mwendo ngonyamu. Kambe ditshuri ngu ti to, Jehovha a ku mahete ta tingi ka wutomi wako. Ngene a nga kudhana ti to u va mngana wakwe. (Joh. 6:44) Ni ku i ngu konaha ka txivhuno txa Jehovha u sikotako kuzumba u di thembekile kwakwe. Se ti ngo txani kumaha mkombelo ka Jehovha u kombela ti to e kuvhuna ku khumbula siemo si a nga xamula mikombelo yako, a nga kuvhuna mbimo yi ti nga txi laveka, mwendo a nga va didhawa kwako mbimo yi u nga di ka txiemo txo karata? Kualakanyisisa ngu toneto ti na kumaha u tsaniseka ti to mbimo yotshe u nga themba Jehovha.

9. Ngu tihi ti hi fanelako ku ti khumbula mbimo yi hi wonisanako ni sikarato? (Mavingu 27:11)

⁹ Kuwona Jehovha kota Txizimu txi txi hanyako ti na tshumela ti hi vhuna kuwona siduko sathu ngu nzila ya yinene. Ti kotekisa kutxani toneto? Mbimo yi wonisanako ni sikarato hi fanete kukhumbula timhaka ta lisima ngutu. Sathani a womba ti to ngaku hi txi wonisana ni sikarato hi na leka kuthumela Jehovha. Se nzila yi hi angulako ngu yona mbimo yi hi wonisanako ni sikarato ya gwesa matipfelo a Jehovha. (Jobe 1:10, 11; lera Mavingu 27:11.) Se mbimo yi hi simamako hi di thembekile ka Jehovha ti si nga ni mhaka ni sikarato, hi kombisa lirando lathu ngu ngene ni ti to Sathani muhembi. Ina awe u wonisana ni kuwukelwa ngu wukoma, txikarato txa timale, kwa mbi tsakela ka vathu mbimo yi u va txhumayelako mwendo txikarato tximwani? I di toneto, khumbula ti to ati u wonisanako nato  mkhanjo wo u tsakisa Jehovha. Kambe, khumbula tiya: Jehovha kha nambi thuka e kuleka u wonisana ni sikarato so khu nge si koti ku si tsanisela. (1 Vak. 10:13) Mbimo yotshe a na kuninga mtamo kasi ku u si xula.

TXIZIMU TXI TXI HANYAKO TXI NA KUHAKELA

10. Ngu tihi ti Jehovha a ti thembisako ka vale va thembekako kwakwe?

¹⁰ Jehovha mbimo yotshe wa hakela awule a thembekako kwakwe. (Vaheb. 11:6) Wa hi ninga kurula ni ku eneliseka konku ni ku ka mbimo yi yi tako a na ta hi ninga wutomi wo mbi guma. Athu ha themba Jehovha nguko ha ti ziva ti to a na hi hakela ni ku a ni mtamo wo maha toneto. Ngu toneto, ha simama hi maha totshe ti hi nga kotako kasi ku mkhozela, nga ti malanda akwe a mbimo yi yi nga pinda ma nga mahisa tona. Ngu toneto Timoti a nga maha.—Vaheb. 6:10-12.

11. Ngu kutxani Timoti a nga txi maha totshe ti a nga txi ti kota ngu mhaka ya dibanza? (1 Timoti 4:10)

¹¹ Lera 1 Timoti 4:10. Timoti a ti ni likholo ka Txizimu txi txi hanyako. Ngu toneto, a mahile totshe ti a nga ti kota kasi kuthumela Jehovha kumeko ni vanathu. A mahisile kutxani toneto? Mpostoli Paulo a mkuzetile ti to eva mgondisi wamnene dibanzani kumweko ni ka mthumo wo txhumayela. Paulo a tshumete e gela Timoti ti to eva txikombiso ka vanathu va majovhem ni vo kula ngu tanga. Timoti amukete siavelo so karata si nga txi pata ku ningela txialakanyiso txo kongoma, kambe ngu nzila ya lirando ka vale ti nga txi laveka. (1 Tim. 4:11-16; 2 Tim. 4:1-5) Timoti atxi tsaniseka ti to hambi mbimo yimwani mthumo wakwe wu si wonwi ngu vamwani mwendo va si mbongi, Jehovha a ndina m’hakela.—Var. 2:6, 7.

12. Ngu kutxani madhota ma txi maha totshe ti ma nga ti kotako ngu mhaka ya dibanza? (Wona ni mfota.)

¹² Madhota nyamsi ni ona ma tsaniseka ti to Jehovha wa ti wona totshe ti mahako ni ku wa ti ninga lisima. Hahanze ko vhuna vanathu, kugondisa ni kutxhumayela, madhota a  mangi ma vhuneta ka maprojeto o aka ni ko vhuna ka ava va nga welwa ngu tiphango. Vamwani va thuma ka mitxawa yo endela valwati mwendo ka Komisawu yo womba-womba ni sibhejela. Madhota aya ma tiningetetelako kumaha mithumo yoneyo ma ti ziva ti to dibanza di lumba Jehovha i si nga m’thu wa hamafuni. Ngu toneto, vona va maha totshe ti va nga ti kotako ni ku va tsaniseka ti to Jehovha a na va hakela ngu totshe ti va ti mahako.—Vakl. 3:23, 24.

13. Jehovha a tipfisa kutxani mbimo yi a wonako mizamu yathu yo lava ku mthumela?

¹³ Hi nga hotshethu hi nga thumako kota madhota, kambe hotshethu hi nga ningela txo kari ka Jehovha. Txizimu txathu txa tsaka ngutu ngako hi txi maha totshe ti hi nga ti kotako kasi ku txi thumela. Ene wa yi wona miningelo yi hi yi mahako kasi ku seketela mthumo wa hamafuni kotshe hambi i ti ya yidotho. Wa tshumela e tsaka mbimo yi hi mahako mizamu yo xula kuthava ni kuguleta diwoko kasi ku hi xamula hi di mitshanganoni, ni kudivalela ava va hi onhelako. Hambi u txi tipfa nga khu tikoti kumahela ta tingi Jehovha, u nga tsaniseka ti to ene wa ninga lisima totshe ti u ti mahako. Ene wa kuranda ngutu, ni ku ngu toneto a na kuhakela.—Luka 21:1-4.

SIMAMA U VA HAFUHI NI TXIZIMU TXI TXI HANYAKO

14. Wungana wo tsana ni Jehovha wu hi vhunisa kutxani kuzumba hi di thembekile? (Wona ni mfota.)

¹⁴ Ti na hi hehukela kusimama hi di thembekile ka Jehovha ngako hi txi mwona kota m’thu wa ditshuri. Ngu toneto ti nga mahekela Josefa. Ene a lambile kumaha wugango nguku atxi ti ziva ti to eto ti ndina henyisa Jehovha. (Gen. 39:9) Ngako hi txi lava ti to Jehovha eva m’thu wa ditshuri kwathu ti lava hi ti ha mbimo kasi ku hi bhula nayo ngu kugonda Dipswi dakwe. Ngu toneto wungana wathu ni nene wu naya wu kula. Ni ku kufana ni Josefa, ngako hi di ni wungana wo tsana ni Jehovha, kha hi nambi thuka hi lava kumaha ati ti no henyisa mbilu yakwe.—Jak. 4:8.

15. Ngu tihi ti hi ti gondako ka ti ti nga mahekela Vaisrayeli mbimo yi va nga ti txiwulani? (Vahebheru 3:12)

 ¹⁵ Avale va divalako ti to Jehovha m’thu wa ditshuri ta hehuka ku ve leka ku mthumela. Wona ti ti nga mahekela Vaisrayeli mbimo yi va nga ti txiwulani. Vona va txi ti ziva ti to Jehovha a tiho, kambe va khatile kukana-kana ti to a ndina va khatalela. Se vona va wotissile tiya: “Ina MKOMA waho mwendo kha nga ho hagari kwathu kani?” (Eks. 17:2, 7) Kota wuyelo, vona va tshuralete Txizimu. Athu kha hi lavi kumaha ati ti fanako hi si engisi Jehovha.—Lera Vahebheru 3:12.

16. Likholo lathu li nga dukwa ngu nzila muni?

¹⁶ Kha ti hehuki kusimama hi di hafuhi ni Jehovha ka mafu ya hi hanyako ka ona. Vavangi va womba ti to Txizimu kha txi ngaho. Ni ku ti ti komba nga avale va si na mhaka ni Txizimu va ni wutomi wa wunene. Ngako hi txi wona eto ti txi maheka likholo lathu li nga dukwa. Ti hakubasani ti to kha hi na kuhokelela ko lamba ti to Jehovha waho, kambe hi nga kana-kana ti to ene a nga hi vhuna. M’bhali wa Masalmo 73 a wonisanile ni txiemo txonetxo. Vathu va va nga txi hanya ka timbimo takwe va si engisi milayo ya Jehovha ni ku va txi hanya ngu nzila yi yi nga txi va tsakisa. Ngu mhaka yeto, a khatile ku kana-kana ti to ina ti di ni txivhuno kusimama e thumela Jehovha.—Mas. 73:11-13.

17. Nji txani txi no hi vhuna kusimama hi di hafuhi ni Jehovha?

¹⁷ Nji txani txi nga vhuna m’bhali wa masalmo ku e txitxa mawonelo? Alakanyisisile ngu ti ti ndi no maheka ka vale va ndi no leka kuthumela Jehovha. (Mas. 73:18, 19, 27) A tshumete e alakanyisisa ngu makatekwa aya hi ma manako ngu kuthumela Jehovha. (Mas. 73:24) Zama kualakanyisisa ngu ti wutomi wako wu ndi no va wu di zumbisile tona i di ku i si thumeli Jehovha. Kukhumbula eto ti na hi vhuna kusimama hi di thembekile ka Jehovha. Ni ku kufana ni m’bhali wa masalmo hi nga womba tiya “aniko kwangu, ndinene kuzumba hafuhi ka Txizimu.”—Mas. 73:28.

18. Ngu kutxani hi sa fanela kuthava ati ti no maheka mbimo yi yi tako?

¹⁸ Athu hi nga sikota kuwonisana ni txikarato txihi ni txihi atxi txi nga humeleko ka masiku yawa o gwita nguku hi “thumela Txizimu txi txi hanyako, na i di txa ditshuri.” (1 Vat. 1:9) Jehovha m’thu wa ditshuri ni ku a ti emisete ku hi vhuna. Ene a txi vhuna malanda akwe a mbimo yi yi nga pinda ni ku a na maha ati ti fanako nyamsi. I singa kale hi na wonisana ni xanisa ya hombe. Kambe athu kha hi nga hokha Jehovha ani nathu. (Isaya 41:10) Se hotshethu hi nga “sikota kuwomba ngu kutsana hi txi khathu: ‘Mkoma ngene txivhuno txangu, kha ni na mbi thava txilo.’”—Vaheb. 13:5, 6.