1. Masalmo 15:1-5 a nga hi vhunisa kutxani?

 KA GONDO ayi yi nga pinda hi gondile ti to awu a ningetelako wutomi wakwe ka Jehovha, a nga va mngana wakwe ni ku a nga bela ka ditenda dakwe. Kambe hi nga simamisa kutxani hi va vapfhumba ka ditenda da Jehovha? Masalmo 15 a womba-womba mayelano ni mhaka yoneyo. (Lera Masalmo 15:1-5.) Masalmo oneyo ma txhamusela ati hi fanelako ku ti maha kasi ku hi simama hi va ni wungana wa hafuhi ni Jehovha.

2. Ti nga maha Dhavhidha atxi pimisa ngu txani mbimo yi a nga womba-womba ngu ditenda da Jehovha?

² Masalmo 15 a khata ngu kuwomba tiya: “MKOMA, i mani a no zumba Dithepeleni [Ditendani] kwako ko sawuleka kani? I mani a no zumba ka mmango wako wo sawuleka kani?” (Mas. 15:1) Mbimo yi Dhavhidha a nga womba-womba ngu “ditenda” da Jehovha, ti nga maha atxi alakanya ditenda da msengeletano adi di nga ti zumba Gibheyoni ka mbimo yile. Dhavhidha a tshumete e womba-womba ngu “mmango wo sawuleka” wa Txizimu, ti nga maha atxi womba-womba ngu mmango wa Siyoni awu wu nga txi maneka Jerusalema. Ka mmango wonewo wu nga txi maneka konamu ka 10 wa makilometro wulambwe ka Gibheyoni, Dhavhidha a ti mahile ditenda kasi ku kuvekwa dibhokiso da txitumelelano, kala kuza ku akwa nyuma ya dona ya magwito.—2 Sam. 6:17.

3. Ngu kutxani i di ta lisima kupfisisa ati Masalmo 15 ati wombako? (Wona ni mfota.)

³ Ti hakubasani ti to, hi nga votshe Vaisrayeli va nga txi thuma ka ditenda da msengeletano, hambi ku bela amu dibhokiso da txitumelelano di nga ti zumba kona. Kambe otshe malanda a Jehovha o thembeka ma ndi nava vapfhumba ka ditenda dakwe do fanekisela. Vona va maha toneto ngu ku va vangana va Jehovha  ni ku tiemisela kusimama ni wungana wonewo. Eto ngu ti hotshethu hi ti lavako. Masalmo 15, a womba-womba ngu tifanelo to kari ati hi fanelako ku ti sakulela ni ku ti kombisa kasi ku hi simama hi va vangana va Jehovha.

HANYA NGU KUTHEMBEKA U MAHA ATI I KU TA TINENE

4. Hi ti zivisa kutxani ti to Jehovha a lava hi maha to pinda kubhabhatiswa? (Isaya 48:1)

⁴ Masalmo 15:2, yi womba ti to mngana wa Txizimu ngu “wule a hanyako wutomi wo mbi na dikhwiti [wule a thembekako, NM] a mahako kululama.” Mapswi ya ma ku “hanya” ni “kumaha” ma kombisa ti to hi fanete kusimama hi maha toneto. Kambe ina ngu ditshuri ha sikota ku ‘hanya ngu kuthembeka’? Ina. Hambiku a si ngaho wo hetiseka, athu ‘hi hanya ngu kuthembeka’ ka Jehovha mbimo yi hi mahako totshe ti hi nga ti kotako kasi ku hi muengisa. Mbimo yi hi tiningetelako ka Txizimu ni kubhabhatiswa, ngu kona hi khatako kutsimbila ni Txizimu. Ngu txikombiso, ka timbimo ti ti nga pinda, ti si wombi ti to ka nga va m’thu i ti Muisrayeli a ndi nava mpfhumba wa Jehovha. Vamwani va txi womba ti to va khozela Txizimu kambe i singa “ngu ditshuri ni kululama.” (Lera Isaya 48:1.) Vaisrayeli va va nga ti lava kuva vangana va Jehovha va ti fanete kugonda milayo yakwe ni ku yi londisa. Ngu ha kufanako nyamsi, kasi ku hi mana kuamukelwa ngu Jehovha ti lava hi maha to pinda kubhabhatiswa ni kuwomba ti to hi Tifakazi ta Jehovha. Hi fanete kusimama “hi maha kululuma.” Ti womba txani toneto?

5. Ti womba txani kuengisa Jehovha ka totshe ti hi ti mahako?

⁵ Ka Jehovha, ‘kuhanya ngu kuthembeka’ ni ‘kumaha kululama’ ti womba ku maha to pinda kuya mitshanganoni. (1 Sam. 15:22) Athu hi fanete kumaha mizamo yo engisa Jehovha ka totshe ti hi ti mahako ka wutomi wathu, hambi hi di hokha (Mav. 3:6; Ekl. 12:13, 14) Nda lisima kusimama hi maha mizamo kasi kuengisa Jehovha hambi ka timhaka ti ti wonekako nga hi  nga ta lisima. Hi txi maha toneto, hi kombisa ti to ngu ditshuri ha mranda Jehovha ni ku lirando li aku nalo ngu ngathu li na engetela.—Joh. 14:23; 1 Joh. 5:3.

6. Ngu kuya ngu Vahebheru 6:10-12, ngu tihi ti i ku ta lisima ngutu kupinda timhaka ta tinene ati hi nga ti maha ka mbimo yi yi nga pinda?

⁶ Jehovha wa ninga lisima ati hi nga m’mahela mbimo yi yi nga pinda. Kambe mithumo yathu ya mbimo yi yi nga pinda hi nga yona basi yi nga tsanisako ti to hi na simama hi va vapfhumba ka ditenda da Jehovha. Eto ta junyatiswa kwati ka Vahebheru 6:10-12. (Lera.) Ti hakubasani ti to Jehovha kha divali ta tinene ati hi nga mmahela ka mbimo yi yi nga pinda. Kambe ene a lava ti to hi simama hi mkhozela ngu mbilu yotshe “kala magwito.” Ni ku athu hi na sikota kuva vangana vakwe ngu ha ku si gumiko “ngako hi txi timisela.”—Vag. 6:9.

WOMBA-WOMBA DITSHURI MBILUNI KWAKO

7. Ti womba txani kuwomba-womba ditshuri mbiluni?

⁷ M’thu wu a lavako kuva mpfhumba awu a amukelekako ka ditenda da Jehovha a fanete e “womba-womba ditshuri mbiluni kwakwe.” (Mas. 15:2) Eto ti pinda kwa mbi hemba basi. Hahanze kova vo thembeka dwe ka ti hi ti wombako ti lava hi va vo thembeka ni ka totshe ti hi ti mahako. (Vaheb. 13:18) Eto nda lisima, “nguko Jehovha wa m’nyenya m’thu wu a kanganyisako, kambe mngana wa hombe wa va vo lulama.”—Mav. 3:32, NM.

8. Ngu tihi ti hi sa fanela ku ti maha?

⁸ Awu ‘a womba-wombako ditshuri mbiluni kwakwe’ kha kanganyisi a txi nga wa engisa Jehovha mbimo yi a ku hagari ka vathu kasi a di ekha kha mu engisi. (Isaya 29:13) Kuhamba ni eto m’thu eneyo wa vayilela kuva mkanganyisi. M’thu wu i ku mkanganyisi a nga khata kupimisa ti to hi nga mbimo yotshe i ku ta tinene kulondisa milayo ya Jehovha. (Jak. 1:5-8) Ene a nga khata kwa mbi engisa Jehovha ka timhaka ti ti wonekako nga hi nga ta lisima ngutu. Se, mbimo yi a wonako ti to kha txi ngaho txi txi mahekako ngu konaha ka kuva a si engisi, a khata kumaha timhaka to biha ngutu. Hambiku a pimisako ti to a thumela Txizimu, Jehovha kha wu amukeli wukhozeli wakwe. (Ekl. 8:11) Kambe athu, hi lava kuva vo thembeka ka totshe ti hi ti mahako.

9. Ngu tihi ti ti nga maheka mbimo yi Jesu a nga ziva Nataniyeli, ni ku hi gonda txani ka toneto? (Wona ni mfota.)

 ⁹ Hi nga gonda to tala mayelano ni lisima lo va vathu va ditshuri ngu mbiluni ngu kuwona ti ti nga maheka mbimo yi Jesu a nga ziva Nataniyeli ngu dikhambi do khata. Mbimo yi Filipi a nga kombisa mngana wakwe Nataniyeli ka Jesu, kuhumelete timhaka to xamalisa ngutu. Hambiku Jesu a nga si mu zivi Nataniyeli, ene a wombile tiya: “Ndiyo Muisrayeli wa ditshuri, awu kwakwe, ku kuwalo kukanganyisa.” (Joh. 1:47) Ditshuri ti to Jesu atxi wona vamwani vagondiswa vakwe kota vathu vo thembeka, kambe Nataniyeli ati thembekile ngutu. Kufana ni nathu, Nataniyeli a sa hetiseka, kambe ene i singa m’kanganyisi, a ti thembekile ka totshe ti a nga txi ti maha. Jesu a xamate ngutu ngu toneto ni ku a ndunduzete Nataniyeli. Ina Jesu a txo womba tiya ngu ngawe, khu alakanyi ti to i nga va lungelo ya hombe?

10. Ngu kutxani hi di fanete ku ti wonela ka ti hi ti wombako? (Jakobe 1:26)

¹⁰ Wungi wa sialakanyiso asi hi si manako ka Masalmo 15 si tsimbitisana ni nzila yi hi ñolako ngu yona vathu vamwani. Masalmo 15:3 yi womba ti to mpfhumba ka ditenda da Jehovha ngu “awule asi lumbetiko mkwawe ngu lidimi lakwe ni wu asi mahiko to biha ka mmwani, asi bhumisiko phungo yo biha [asi lukeliko makuho] mwakelani wakwe.” Ngako athu hi txi lumbeta mwendo kuhembela vamwani eto ti nga va khuvekisa, ni ku ngu mhaka ya toneto Jehovha kha na mbi hi amukela kota vapfhumba vakwe.—Lera Jakobe 1:26.

11. Nji txani kulumbeta ni ku ku nga maheka txani ngu mlumbeti awu a si ti soliko?

¹¹ Dhavhidha a womba-wombile ngu kukongoma ngu kulumbeta. Nji txani kulumbeta? Ngu mtolovelo, ti womba kuwomba-womba makuho ngu m’thu wo kari se toneto ti onha nduma yakwe. Awu a lumbetako mwendo kuhembela vamwani e gwita asi ti soli kha fanela kusimama eva Fakazi ya Jehovha.—Jer. 17:10.

12-13. Ngu ka sihi siemo aha hi nga thukako hi lukela makuho vangana vathu? (Wona ni mfota.)

 ¹² Masalmo 15:3 a tshumela e hi khumbutisa ti to vapfhumba va Jehovha kha va maheli to biha vamwani, ni ku kha va lukeli makuho mwendo kudhanisa vangana vawe. Ti lava kuwomba txani toneto?

¹³ Ti nga maheka hi thuka hi khata kuluka makuho ngu m’thu mmwani ni kuhangalasa timhaka to biha ngu ngene. Alakanyisisa ngu siemo siya: 1) mwanathu wa txisikati awu a nga ema kuva nyaphandule, 2) mpwata wu wu nga huma Bhetele, mwendo 3) mwanathu wu a nga ema kuva didhota mwendo dilanda da wuthumeli. Ti nga va ti di bihile ngutu kuzumbela kuwomba ti to hi nga walo-walo aku vanathu vonevo va nga humelelwa ngu tiya, tiho to biha ati va nga ti maha. Ti nga maha ku di ni sivangelo sasingi asi athu nem hi si si ziviko. Ngu toneto mpfhumba ka ditenda da Jehovha kha fanela ‘kumahela wubihi vamwani hambi kulukela makuho vaakelani vakwe.’

XONIPHA AVALE VA THAVAKO JEHOVHA

14. Txhamusela nzila yi mpfhumba wa Jehovha a nga va tshuralelako ngu yona “ava vo biha.”

¹⁴ Masalmo 15:4 a womba ti to mngana wa Jehovha ngu “awule a solako ava vo biha.” Hi m’zivisa kutxani awu i ku wo biha? Kota vathu vo mba hetiseka, kha hi sikoti ku ti ziva ti to awu mbihi mwendo nem. Ngu kutxani? Kota vathu va kwambi hetiseka ti nga maha hi dhunda vathu vale hi pimisako ti to ta hehuka kuhanyisana navo, hi nyenya avale va mahako ati ti si hi tsakisiko. Ngu ditshuri, athu hi fanete kutshuralela basi avale Jehovha ava wombako ti to ngu “va vo biha.” (1 Vak. 5:11) Eto ti pata avale va mahako to biha va si ti soli, avale va si xoniphiko ati hi kholwako ka tona, ni wu a duketako kuholisa wuxaka wathu ni Jehovha.—Mav. 13:20.

15. Hi va xonipha ngu nzila muni “avale va thavako MKOMA”?

¹⁵ Ngu didhawa dimwani, Masalmo 15:4 ma womba ti to hi fanete “kudhunda avale va thavako MKOMA.” Kasi kumaha toneto hi lavetela tinzila to kombisa wunene ni txixonipho ka vangana va Jehovha. (Var. 12:10) Ngu nzila muni? Yimweyo ya tinzila yo maha toneto yi tshumete yi seketelwa ka Masalmo 15:4. Mpfhumba ka ditenda da Jehovha ngu “awule a mahako ti a nga thembisa, hambi ene a txi luzekelwa.” Ngako hi si hetisisi sithembiso sathu hi nga khuvekisa vathu vamwani. (Mat. 5:37) Ngu txikombiso, Jehovha a emela ti to vavamna ni vavasikati ve hetisisa txithembiso txi va nga mahelana txona mbimo yi va nga txhadha. Jehovha wa tsaka kambe mbimo yi vaveleki va tikaratelako kuhetisisa sithembiso si va nga mahela vanana vawe. Ngu konaha ka lirando li hi li pfako ngu Jehovha ni ngu vathu vamwani athu hi maha totshe ti hi nga ti kotako kasi kuhetisisa sithembiso sathu.

16. Ngu yihi yimwani nzila ayi hi kombisako ngu yona txixonipho ka vangana va Jehovha?

¹⁶ Nzila yimwani yo xonipha vangana va Txizimu ngu amukela vapfhumba ni kuva ni wuha. (Var. 12:13) Kuheta mbimo ni vanathu hambi i singa mitshanganoni mwendo mthumoni wa thembwe ta hi vhuna kutsanisa wungana wathu navo kumweko ni wungana wathu ni Jehovha. Hahanze keto, ngu kuamukela vapfhumba, hi etetela Jehovha.

U NGA DHUNDE NGUTU MALE

17. Ngu kutxani Masalmo 15 me tshumela me womba-womba ngu male?

¹⁷ Ka Masalmo 15:5 hi lera ti to mpfhumba wa Jehovha ngu “awule a txenekisako male yakwe asi lavi dibhindu, hambi awule asi tumeliko kuxavelelwa kasi kuninga mnandu m’thu wo mbi na txionho.” Ngu kutxani Dhavhidha adi sungile kuwomba-womba ngu male  ka ndima yiya ya yidotho ya Masalmo? Nguku ngako hi txi karateka ngutu ngu male kupinda mpimo yona yi nga hunduka yi va ya lisima ngutu kwathu kupinda vathu vamwani hambi kupinda Jehovha. (1 Tim. 6:10) Ka timbimo ti ti nga pinda, vamwani va txi londola vanathu va i nga di sisiwana ngu ku va lomba male ayi yi nga ti lava kusanzekelwa ha koza vanathu vava ti va tanda ku yi hakela. Hahanze keto, valamuli vamwani va txi tumela kuxavelelwa kasi kulamula vathu va kwambi na mnando ngu nzila yo biha. Kambe Jehovha wa ti nyenya mbimo yi vathu va mahako timhaka toneto.—Eze. 22:12.

18. Ngu sihi siwotiso si hi nga ti mahelako sona kasi kuwona ti to ngu yahi mawonelo athu mayelano ni male? (Vahebheru 13:5)

¹⁸ I nga va tinene ku hotshethu hi ema hi alakanyisisa ti to ngu yahi mawonelo athu mayelano ni male. Tiwotise tiya: ‘Ina ni zumbela kupimisa ngu male ni si ni ndi no xava ngako ni di kova ni male yayingi? Ngako m’thu atxi ni lomba male, ina na swela ku m’hakela ngu kupimisa ti to awule a nga ni lomba a ni male yayingi? Ina ni tipfa ni di wa lisima kupinda vamwani nguku ni ku ni male yayingi? Ina ta ni karatela kukombisa wuha ka vamwani? Ina ka ngava m’thu a di ni male ni womba ti to wa dhunda tithomba? Ina ni dhunda kumaha wungana ni vathu va va ku ni male ni si theli kota sisiwana?’ Hotshethu hi ni lungelo ya hombe yo rambwa ti to hi va vapfhumba va Jehovha. Kambe ngako hi txi lava kusimama hi va vapfhumba va Jehovha hi fanete ku ti wonela ti to hi si dhundi ngutu male. Hi txi dhunda ngutu Jehovha kupinda male, Jehovha kha nambi thuka adi hi lekile!—Lera Vahebheru 13:5.

JEHOVHA WA VA RANDA VANGANA VAKWE

19. Ngu txihi txikongomelo txa hombe txa milayo ya Jehovha?

¹⁹ Masalmo 15 ma gwita ngu txithembiso txiya: “Awule a mahako tona eto kha na mbi va ni kurereka.” (Mas. 15:5) Ahawa Dhavhidha a kombisa txivangelo txa hombe atxi txi mahako Jehovha e hi kombela timhaka tatingi. Ene a lava ti to hi tsaka. Ngu toneto, mbimo yi hi mahako ati Txizimu txi hi kombelako hi ni wutomi wa txhuko ni ku txona txa hi vhikela.—Isaya 48:17.

20. Ngu tihi ti vapfhumba va Jehovha va ti emelako ka mbimo yi yi tako?

²⁰ Vapfhumba va Jehovha va ni kuemela masoni kwawe, wumangwana wo xamlisa. Vasawuleki vo thembeka va na rambwa ti to veya zumba ka “makhalo amangi” aya Jesu a nga va lulamisela nzumani. (Joh. 14:2) Ani va va emelako kuhanya hamafuni, va emela kuhetiseka ka txithembiso atxi txi ku mu ka Mtuletelo 21:3. Hahanze ko kana-kana, i lungelo ya hombe ngutu kuva hi di rambilwe ngu Jehovha to hi va vangana vakwe ni ti to hi va vapfhumba ka ditenda dakwe ngu ha ku si gumiko!