Tixamulo ta siwotiso sa vagondi
Ngu kutxani vathu va txi womba ti to Masalmo 12:7 a womba-womba ngu “mapswi a Jehovha” ma ku ka vhersikulo 6, kuve Tradhusawu ya mafu a maphya yi womba-womba ngu va va “xuphekako” ka vhersikulo 5?
Didungula di kombisa ti to vhersikulo yi womba-womba ngu vathu.
Ka Masalmo 12:1-4 hi gonda tiya: “Nguko vathu vo lulama va gumile kha ku nga ho vathu vo thembeka.” Se ka Masalmo 12:5-7 a womba tiya:
“‘Ngu mhaka ya kuxaniseka ka sisiwana,
Ni miketo ya vale va si pwatako,
Ni na khukha ni txi ema, kha MKOMA.
Ni na va veka kuhulukani avale va vilelako.’
Mapswi a MKOMA i mapswi a ditshuri,
Ngu nga silivhela ya ditshuri, ayi yi nga basiswa nyundoni mtxhanu wa sikhati ni simbidi.
Ina, MKOMA, u na va xayisa kha kwati
U na xayisa mmweyo ngu mmweyo wawe ka liveleko liya yotshe mbimo.”
Vhersikulo 5 yi womba ti to Txizimu txi na hulukisa sisiwana.
Vhersikulo 6 yi womba ti to “Mapswi a MKOMA i mapswi a ditshuri” kufana ni ‘silivhela yi nga basiswa nyundoni.’ Ngu toneto hotshethu hi ti pfisako tona mayelano ni mapswi a Txizimu.—Mas. 18:30; 119:140.
Wona ti vhersikulo 7 yi ti wombako: “Ina, MKOMA, u na va xayisa kha kwati; u na xayisa mmweyo ngu mmweyo wawe ka liveleko liya yotshe mbimo.” Mapswi ya ma ku “mmweyo wawe” ma womba-womba ngu mani?
Aku vhersikulo 7 yi londiswako ngu vhersikulo ayi yi womba-wombako ngu “mapswi a MKOMA,” vamwani vathu ti nga maha va txi pimisa ti to “mmweyo wawe” kuwombwa mapswi a Txizimu. Ditshuri ti to Txizimu txa vhikela dipswi da txona i ku Bhiblia, hambi ku valala va nga zama ku di fuvisa mwendo kutsimbisa ti to di mahwa ni ku vathu vamwani ve di mana.—Isaya 40:8; 1 Pedro 1:25.
Kambe ati vhersikulo 5 yi ti wombako ni tona ditshuri. Jehovha mbimo yotshe wa vhuna vo “xaniseka” ni “sisiwana.”—Jobe 36:15; Mas. 6:4; 31:1, 2; 54:7; 145:20.
Se, mapswi ya ma ku “mmweyo ni mmweyo wawe” ma ku ka vhersikulo 7 ma kombetela mani?
Mbimo yi hi xolisisako Masalmo 12, ti hakubasani ti to “mmweyo ni mmweyo wawe” kuwombwa vathu.
Makhatoni ka Masalmo 12, Dhavhidha a womba-womba ngu “vathu vo lulama” va Jehovha, va nga kanganyiswa ngu vathu vo biha. Ka vhersikulo 2 hi lera ti to Jehovha a na fuvisa avale va womba-wombako makuhu. Athu hi nga tsaniseka ti to Jehovha a na ti maha toneto, nguko vhersikulo 6 yi womba ti to mapswi a Jehovha ditshuri.
Se vhersikulo 7 yi womba ti to Jehovha a na xayisa ni kuvhikela avale va xaniswako ngu vabihi.
Mapswi ya ma ku “mmweyo ni mmweyo wawe” ma ku ka vhersikulo 7, ma thumisilwe ka mabhuku a kale o thembeka ya Mibhalo ya Txihebheru. Wuhunduluxeli wo khata wa vhersikulo yiya ngu Txigriki wu thumisile dipswi “athu” kumbidi, wu txi ti veka hakubasani ti to vhersikulo yi ya yi womba malanda o lulama a Txizimu a ya ma xuphwako. Ngu magwito, vhersikulo 7 yi womba ti to “mmweyo ni mmweyo wawe,” mwendo ku, avale vo lulama va na vhikelwa ka “liveleko” la vathu ava va dhundako wubihi wa hombe. (Mas. 12:7, 8) Wuhunduluxeli wumwani wa Mibhalo ya Txihebheru ngu lidimi la txiaramaiko wu womba tiya ka vhersikulo 7: “Awe MKOMA u na vhikela vo lulama. Awe u na va xayisa ka liveleko liya lo biha mbimo yotshe.” Wuhunduluxeli wuwa wu ti veka hakubasani ti to Masalmo 12:7 kha womba-wombi ngu mapswi a Txizimu.
Ngu mhaka ya txivangelo txonetxo, Masalmo yawa ma hi ninga themba ya ti to Txizimu txi na ta hulukisa ava vo “lulama.”
