GONDO 19
NDANDO 22 Mfumo se wa fuma—Wu nate!
Ngu tihi ati hi ti zivako mayelano ni wulamuli awu Jehovha a no ta wu maha mbimo yi yi tako?
“MKOMA . . . kha ti lavi ti to ni wammweyo a txi lova.”—2 PEDRO 3:9.
TXIKONGOMELO TXA GONDO
Kutsanisa themba yathu ka Jehovha ya ti to mbimo yi a no ta lamula vathu mbimo ayi yi tako a na ta va lamula ngu nzila ya yinene ni yo lulama.
1. Ngu kutxani hi nga wombako ti to hi hanya ka mbimo yo tsakisa ngutu?
ATHU hi hanya ka mbimo yo tsakisa ngutu! Ka mbimo yi hi ku ka yona ditshiku ni ditshiku wuprofeti wa mu ka Bhiblia wa hetiseka hi txi wu wona. Ngu txikombiso, ha wona “mfumeli wa wuphemba” ni “mfumeli wa wulambwe” va txi lwa ngu ku lava kufuma mafu. (Dhan. 11:40) Hi tshumela hi wona mahungu a manene a Mfumo wa Txizimu ma txi txhumayelwa ngu nzila yo xamalisa yo kha hi khali ku nga yi wona, ni ku vathu vavangi va sawula kuthumela Jehovha. (Isaya 60:22; Mat. 24:14) Niku ha amukela sakudya sa moya “ngu mbimo ya kona.”—Mat. 24:45-47.
2. Ngu tihi ati hi fanelako kutsaniseka ka tona, ni ku ngu tihi ati hi fanelako ku ti tumela?
2 Jehovha wa simama e hi vhuna kupfisisa timhaka ta lisima ati ti no hetiseka i singa kale. (Mav. 4:18; Dhan. 2:28) Athu ha tsaniseka ti to mbimo yi xanisa ya hombe yi no khata, hi na va hi txi ti ziva ati hi fanelako kumaha ti to hi simama hi di thembekile ka Jehovha ka mbimo yoneyo yo karata ni ku va ni wumwewo. Hambiketo, nda lisima ku hi tumela ti to timhaka timwani ati ti no maheka mbimo ayi yi tako athu kha hi se ti ziva. Ka gondo yiya, hi na wona kutxitxa ka mapfisiselo o kari aya hi nga ti nawo. Ngu magwito hi na wuseta timhaka timwani ati hi ti zivako mayelano ni ti ti no ta maheka mbimo ayi yi tako ni nzila yi Tate wathu wa nzumani a no ti maha ngu yona.
ATI HI SI TI ZIVIKO
3. Kale hi txi womba txani ngu vathu vale va ndi no ta huluka ka xanisa ya hombe, ni ku ngu kutxani?
3 Kale hi txi womba ti to msana ka kuva xanisa ya hombe yi di khatile, kha ngaho wu a ndi no tshumela eva ni mkhanjo wo thumela Jehovha ni kutshumela e huluka ka Armagedhoni. Athu hi hokelete magwito oneyo nguku hi txi pimisa ti to ati ti nga maheka ka ndambi ya Nowa ti txi kombisa tona ti ti no ta maheka mbimo yi yi tako. Ngu txikombiso, athu hi txi kholwa ti to aku ni wamweyo a nga mbi sikota kubela ka ngalava msana ka kuva Jehovha a di vhate ditimba, kha ngaho awu a ndi no sikota kuthumela Jehovha ni kutshumela e hulukiswa msana ka kuva xanisa ya hombe yi di khatile.—Mat. 24:37-39.
4. Ngu kutxani hi si na kuwomba ti to ati ti nga maheka ka masiku a Nowa ti na ta mahisa toneto ka mbimo ayi yi tako? Txhamusela.
4 Ina i ngava tatinene kuwomba ti to tximwani ni tximwani atxi txi nga maheka ka ndambi ya Nowa txi kombisa ati ti no ta maheka mbimo ayi yi tako? Xamulo ngu yi yo ahim-him. Ngu kutxani? Nguko Bhiblia kha yi ma seketeli mapfisiselo onewo. a Ditshuri ti to Jesu a fananisile “masiku a Nowa” ni mbimo ya kuta kwakwe, kambe ene kha womba ti to timhaka ati ti nga maheka ka masiku a Nowa ngu txikombiso kusekwa ka ditimba da ngalava, ti ndi na hetiseka ngu mpimo wa hombe ka mbimo ayi yi tako. Kambe athu hi nga gonda to tala ka didungula da Nowa ni ka ti ti nga maheka ka Ndambi.
5. a) Nowa a kombisile likholo ngu nzila muni? (Vahebheru 11:7; 1 Pedro 3:20) b) Nzila yi hi txhumayelako ngu yona nyamsi yi fanisa kutxani ni nzila yi Nowa a nga txhumayela ngu yona?
5 Mbimo yi Nowa a nga ziviswa ngu Jehovha, ene a kombisile likholo e khata ku aka ngalava. (Lera Vahebheru 11:7; 1 Pedro 3:20.) Ngu ha kufanako, ngako vathu va txi pfa mahungu a manene a Mfumo wa Txizimu vona va fanete kuthumisa ati va ti gondako. (Mith. 3:17-20) Pedro a dhani Nowa kota “mruruteli wa wululami.” (2 Pedro 2:5) Kambe nga ha hi nga tiwona ngu kona ka gondo ayi yi nga pinda, kha hi ti zive ti to Nowa a sikoti kutxhumayela votshe vathu ka mbimo yakwe. Se nanathu nyamsi ha zama kutxhumayela vathu votshe nga ha hi nga kotako ngu kona hamafuni kotshe ni ku hi maha toneto ngu ha hi nga kotako ngu kona. Kambe ti si nga ni mhaka ni ti to hi zama kuhokela hani athu kha hi na kusikota kutxhumayela votshe vathu ma si se hoka magwito. Ngu kutxani?
6-7. Ngu kutxani hi nga wombako ti to kha hi na mbi sikota kutxhumayela votshe vathu na ma si se hoka magwito? Txhamusela.
6 Pimisa ngu ti Jesu a nga tiwomba mayelano ni mthumo wo txhumayela. Ene a wombile ti to mahungu a manene ma ndi na “txhumayelwa hamafuni kotshe, kasiku matiko otshe me ti ziva.” (Mat. 24:14) Nyamsi wuprofeti wonewo wa hetiseka ngu nzila yo xamalisa ngutu. Mahungu a manene ma maneka ngu tidimi ta tingi ati ti pindako 1.000 wa tona, ni ku ngu kuthumisa site ya jw.org, vathu va vangi hamafuni kotshe va gonda mayelano ni Mfumo wa Txizimu.
7 Kambe Jesu a gete vagondiswa vakwe ti to ‘kha va na mbi heta kutenderuka otshe madhoropa,’ mwendo ku, va si na kusikota kutxhumayela votshe vathu na a si se eta. (Mat. 10:23; 25:31-33) Ni ku mapswi a Jesu ma thuma ni ka masiku athu nyamsi. Tibhiliyoni ta tingi ta vathu ti hanya ka makhalo o kha kuna mkhululeko wo txhumayela. I singa eto dwe, meneti ni meneti kuvelekwa vanana vo tala. Athu hi maha ati hi nga tikotako kasi ku hi mana vathu va “yotshe mifumo, totshe tixaka, ni totshe tidimi” se hi va txhumayela mahungu a manene. (Mtu. 14:6) Kambe ditshuri ngu ti to kha hi na kusikota kutxhumayela votshe vathu na ku si se hoka magwito.
8. Ngu txihi txiwotiso atxi txi gulekako mayelano ni nzila yi Jehovha a no lamula ngu yona vathu mbimo ayi yi tako? (Wona ni mifota.)
8 Kambe kuguleka txiwotiso txiya: Kuna maheka txani ngu vathu vale va no mbi va ni mkhanjo wo pfa mahungu a manene na xanisa ya hombe yi si se khata? Ngu tihi ti Jehovha kumweko ni mwanana wakwe awu a nga mninga wulamuli va no ti maha ngu vathu vonevo. (Joh. 5:19, 22, 27; Mith. 17:31) Ndimana yi yi nga ñola msungo mhaka wuwa yi womba ti to Jehovha “kha ti lavi ti to ni wamweyo a txi lova.” Hahanze keto ene a lava ti to “votshe ve hunduluka.” (2 Pedro 3:9; 1 Tim. 2:4) Tilava hi tumela ti to Jehovha kha si ku hi txhamusela ti to a na va lamulisa kutxani vathu vale va si se kuva ni mkhanjo wo pfa mahungu a manene. Ti hakubasani ti to Jehovha kha sinziseki ku hi txhamusela ati a nga ti maha ni ti a ku ngadi a txi na ti maha.
Ngu tihi ti Jehovha a no ta ti maha ngu vathu vale va nga mbi va ni mkhanjo wo pfa mahungu a manene msana ka kuva xanisa ya hombe yi si se khata? (Wona paragrafu 8) c
9. Ngu tihi ati Jehovha a hi gelako ngu kuthumisa Bhiblia?
9 Ngu kuthumisa Bhiblia Jehovha a hi gela timhaka timwani ati a no ti maha. Ngu txikombiso, Bhiblia yi hi gondisa ti to Jehovha a na wusa “va ku ambi lulama” mwendo ku vathu vale va nga mbi va ni mkhanjo wo pfa mahungu a manene ni ku txitxa wutomi wawe. (Mith. 24:15; Luka 23:42, 43) Se eto ti guleta txiwotiso tximwani txa lisima.
10. Ngu sihi siwotiso simwani si gulekako?
10 Ina votshe vathu ava vo na ta fa ka mbimo ya xanisa ya hombe va na ta loviswa da magwito va si mani mkhanjo wo ve tshumela ve wuswa? Bhiblia yi tiveka hakubasani ti to vathu va va no wukela Jehovha va na ta loviswa ka Armagedhoni, ni ku kha va na mbi tshumela ve va ni mkhanjo wo wuswa kambe. (2 Vat. 1:6-10) Kambe vathu vamwani ka mbimo ya xanisa ya hombe ti nga maha ve ta fa ngu sivangelo simwani, ngu txikombiso, malwati, tanga, phango, mwendo kudawa ngu m’thu mmwani, se ka txiemo txonetxo kuna maheka txani ngu vona? (Ekl. 9:11; Zak. 14:13) Ina vathu vonevo va na tava hagari ka vale “va ku ambi lulama” ava vo na ta wuswa ka mafu a maphya? Xamulo kha hi yi zive.
ATI HI TI ZIVAKO
11. Vathu va na ta lamuliswa kutxani ngu mbimo ya Armagedhoni?
11 Athu ha tiziva timwani ati ti no ta maheka mbimo yi yi tako. Ngu txikombiso, ha tiziva ti to ka mbimo ya Armagedhoni vathu va na ta lamulwa ngu kuya ngu ti va nga ñolisa tona vafowethu va Kristu. (Mat. 25:40) Avale va nga seketela vasawuleki kumweko ni Kristu va na ta lamulwa kota tinvuta. Ha tiziva kambe ti to vamwani vasawuleki va na ta va va di hamafuni msana ka kuva xanisa ya hombe yi di khatile ni ku va na ta tekwa ve ya nzumani msananyana ka kuva Armagedhoni yi si se khata. Aku vasawuleki vamwani va no ta va va ndi ngadi hamafuni ti nga maheka vathu vamwani va timbilu ta tinene ve ta va ni mkhanjo wo va seketela ni ku tshumela ve seketela mthumo wawe. (Mat. 25:31, 32; Mtu. 12:17) Ngu kutxani timhaka toneto i di ta lisima?
12-13. Vathu va nga thuka ve ta angulisa kutxani msana ko wona kuloviswa ka “Bhabhilona wa Hombe”? (Wona ni mifota.)
12 Msana ka kuva xanisa ya hombe yi di khatile, ti nga maheka vamwani ava va nga wona kuloviswa ka “Bhabhilona wa Hombe” ve ta khumbula ti to Tifakazi ta Jehovha malembe msana ti ti wombile ti to eto ti ndi na maheka. Ina vathu vamwani ka vona vava msana ko wona tiya va ndi na khata kukombisa likholo ka Jehovha?—Mtu. 17:5; Eze. 33:33.
13 Ngako eto ti txi maheka ti na khumbutisa ati ti nga maheka akhe Egipta ngu mbimo ya Mosi. Khumbula ti to “dibutho da hombe da vathu” di humile kumweko ni Vaisrayeli Egipta. Vathu vamwani ti nga maha va di khatile kukombisa likholo ka Jehovha mbimo yi va nga wona ti to ati Mosi a nga ti ti wombile mayelano ni 10 wa mitungu ti mahekile ngu ditshuri. (Eks. 12:38) Se ngako timhaka to fana ni tiya ti txo ta maheka msana ka kuva Bhabhilona wa hombe a di lovisilwe, ina hi na ta khuveka hi pimisa tiya: Kha ti pfisiseki vo hi kanganyisa ngu kutxani vathu va txi ta ti pata ni nathu na magwito ma si se hoka? Ditshuri ti to kha hi na mbi ta khuveka, athu hi lava kufana ni Tate wathu wa nzumani i ku “Txizimu txa wumbilu ni kupfela, wo swela kuhenya kambe wo tala ngu wuha ni kuthembeka!” b—Eks. 34:6.
Vamwani ava va no ta wona kuloviswa ka “Bhabhilona wa Hombe” va na ta ti khumbula ti to Tifakazi ta Jehovha se ti ti wombile malembe msana (Wona paragrafu 12-13) d
14-15. Kasiku m’thu e ta hanya ngu ha ku si gumiko ka mbimo ti dhependerwa ngu mbimo yi a fako ngu yona mwendo amu a nga txi zumba kona? Txhamusela. (Masalmo 33:4, 5)
14 Makhambi mamwani ha pfa vanathu vamwani va txi womba tiya mayelano ni dixaka dawe: ‘Ti ndi nava kwati i di ku o fa na xanisa ya hombe yi si se khata nguko a ndi nava ni mkhanjo wo ta tshumela e wuswa.’ Ngu mtolovelo m’thu a womba toneto a di ni txikongomelo txa txinene. Kambe kasiku m’thu e ta hanya ngu ha ku si gumiko ka mbimo ayi yi tako kha ti dhependerwi ngutu-ngutu ngu mbimo ayi a fako ngu yona. Jehovha mlamuli wo pelela ni ku sisungo sakwe mbimo yotshe nza sinene ni so lulama. (Lera Masalmo 33:4, 5.) Ngu toneto hi nga tsaniseka ka ti to “Mlamuli wa ditiko dotshe” yotshe mbimo a na maha timhaka ngu nzila yo lulama.—Gen. 18:25.
15 Kambe hi nga tshumela hi hokelela magwito ya ti to kasiku m’thu e ta hanya ngu ha ku si gumiko kha ti dhependerwi ngu mu a zumbako kona. Jehovha kha na kutshuka e lamula timiliyoni ta vathu ni ku va teka kota “tiphongo” ngu mhaka ya ti to vona va hanya ka makhalo yo mahungu a manene kha ma si kutxhumayelwa. (Mat. 25:46) Se aku athu hi karatekako ngu vathu vonevo hi nga pimisa ngu nzila yi mlamuli wo lulama wa ditiko dotshe a ti pfako ngu yona. Athu kha hi na nzila yo ziva ti to Jehovha a na ta maha txani ka siemo soneso ngu mbimo ya xanisa ya hombe. Ti nga maheka vathu vamwani msana ko wona ati ti no ta maheka ngu mbimo ya xanisa ya hombe ve tshumela ve ema ni Jehovha mbimo yi a sawulekisako ditina dakwe hamafuni kotshe.—Eze. 38:16.
Msana ka kuva xanisa ya hombe yi di khatile, . . . ina vathu vamwani va na txitxa mahanyelo awe?
16. Ngu tihi hi ti zivako ngu Jehovha? (Wona ni mfota.)
16 Ka gondo yathu ya Bhiblia, hi gondile ti to m’thu ni m’thu mbwa lisima ngutu ka Jehovha. A ningete ngu wutomi wa mwanana wakwe kasiku hotshethu hi mana mkhanjo wo hanya ngu ha ku si gumiko. (Joh. 3:16) Hotshethu ha li pfa lirando la hombe ali Jehovha aku nalo ngu ngathu. (Isaya 49:15) Ene wa ziva ditina da mmweyo ni mmweyo wathu. Ene wa hi ziva kwati aha ko hambi hi txo fa, a nga hi wusa hi txi nga to ti hi nga ti zumbisile tona, a si siyi txilo hambi ni kuwuseta mapimiselo athu! (Mat. 10:29-31) Athu kha ti lavi hi kanakana ti to Tate wathu wa nzumani wa lirando a na lamula mmwani ni mmwani ngu nzila yo lulama, ya wutxhari ni ya wuxinji.—Jak. 2:13.
Athu hi nga tsaniseka ti to Jehovha a na lamula mmwani ni mmwani ngu nzila yo lulama, ya wutxhari ni ya wuxinji (Wona paragrafu 16)
17. Hi na ta bhula ngu txani ka gondo ayi yi londiselako?
17 Akuwa konku hi ku ni ku txitxa kuwa ka mapfisiselo, athu ha ti pfisisa ti to mthumo wuwa wo txhumayela mbwa txikuluveta ngutu. Ngu kutxani hi txi womba toneto? Ni ku nji txani txi hi kuzetako kusimama hi txhumayela mahungu a manene ngu kuhiseka? Hi na ta bhula ngu tixamulo ta siwotiso siya ka gondo ayi yi londiselako.
NDANDO 76 U ti pfisa ku txani?
a Kasi kuziva ati ti nga engeteleka mayelano ni ti to ngu kutxani ku di mahilwe kutxitxa kuwa wona msungo mhaka awu wu ku: “Leyi I ‘Ndlela Leyi Amukeriwaka Hi Wena’” ka Muwoneleli wa 15 ka Março wa 2015, mapajina. 7-11.
b Msana ka kuloviswa ka Bhabhilona wa hombe, otshe malanda a Jehovha ma na dukwa ka mbimo yi Goge wa ditiko da Magoge a no xasela. Awu a no ti pata ni vathu va Txizimu msana ka ku va Bhabhilona wa hombe a di lovisilwe nene a na dukwa.
c TITXHAMUSELO TA MIFOTA YA: Simahakalo siraru asi si kombisako txivangelo txa ti to vamwani vathu ti nga maha va si hokelelwi ngu mahungu a manene: 1) Wamsikati awu a hanyako ka ditiko adi m’thu ti si tumelelwiko ku e txitxa wukhongeli wakwe, 2) mpatwa awu wu hanyako ka ditiko di ti tsimbwako ni ku ti ku ni phango kugonda ditshuri, ni 3) wamwamna awu a hanyako ka wukhalo wa kule ngutu awu ti karatako kuhoka ka wona.
d TITXHAMUSELO TA MFOTA: Dijovhem adi di nga ema kuthumela Jehovha di khumbula ati di nga ti gonda mayelano ni ku loviswa ka “Bhabhilona wa Hombe.” Dona di maha txisungo txo tshumelela ka Jehovha ni ku lava txivhuno txa vaveleki va dona. Ngako ti txi maheka to fana, athu hi lava kutekelela Jehovha Tate wathu wa wuxinji ni lirando, ni ku hi tsaka ni vale va nga maha txisungo txo tshumelela ka Jehovha.
