GONDO 20
NDANDO 67 “Txhumayela dipswi”
Simama u txhumayela ngu lirando!
“Ku fanete kukhata ngu kutxhumayelwa mahungu a manene ka matiko otshe.”—MARKU 13:10.
TXIKONGOMELO TXA GONDO
Kuwona nzila yi lirando li hi kuzetako ngu yona kutxhumayela ngu kuhiseka.
1. Hi gondile txani ka mtshangano wa dilembe wa 2023?
KA MTSHANGANO wa dilembe wa 2023, a hi zivisilwe ngu kutxitxa ko tsakisa ka mapfisiselo aya hi nga ti nawo, kumweko ni siziviso so tsakisa ngutu mayelano ni mthumo wathu wo txhumayela. Ngu txikombiso, ku wombilwe ti to vamwani vathu ti nga maha ve ta khata thumela Jehovha msana kova Bhabhilona wa Hombe a di lovisilwe. Ni ku hi tshumete hi ziviswa ti to kukhukhela ngu Novembro wa 2023, ku ndina va ni kutxitxa ka nzila yi vahuweleli va ningelako ngu yona maora. Ina kutxitxa koneko ku maha ti to mthumo wathu wu si vi wa lisima ni kwa mbi va wa txikuluveta? Ni ka kudotho!
2. Ngu kutxani ditshiku ni ditshiku di di pindako mthumo wo txhumayela wuyako wu va wa txikuluveta? (Marku 13:10)
2 Ditshiku ni ditshiku adi di pindako, mthumo wathu wo txhumayela wuya wu va wa txikuluveta. Ngu kutxani? Nguko mbimo yo guma. Wona ti Jesu a nga tiwomba mayelano ni mthumo wo txhumayela ka masiku a magwito. (Lera Marku 13:10.) Ka dibhuku da Matewu, Jesu a wombile ti to mahungu a manene ma ndi na txhumayelwa hamafuni kotshe na “magwito” ma si se hoka. (Mat. 24:14) Dipswi di di ku magwito di txhamusela kuguma ka mafu yawa ma fumwako ngu Sathani. Jehovha se a vekile “ditshiku donedo ni diora” adi simahakalo soneso si no maheka ngu dona. (Mat. 24:36; 25:13; Mith. 1:7) Ditshiku ni ditshiku hi ya hi tshuketa magwito. (Var. 13:11) Kala kuza ditshiku donedo di hoka hi fanete kusimama hi txhumayela.
3. Nji txani txi hi kuzetako kutxhumayela?
3 Ngako hi txi pimisa ngu mthumo wo txhumayela, hi fanete hi tiwotisa txiwotiso txiya txa lisima ngutu: Ngu kutxani hi txi txhumayela mahungu a manene? Ngu mapswi o hehuka, hi txhumayela ngu ku hi ku ni lirando. Mbimo yi hi txhumayelako hi maha toneto ngu ku hi dhundako mahungu a manene, hi dhundako vathu, ni ku txa lisima ngutu ngu lirando li hi ku nalo ngu Jehovha ni ditina dakwe. A hi woneni mhaka yimweyo ngu yimweyo.
HI TXHUMAYELA NGU KU HI DHUNDAKO MAHUNGU A MANENE
4. Hi angulisa kutxani ngako hi txipfa mahungu a manene?
4 Ina wa khumbula nzila yi u nga tipfa ngu yona ka ditshiku do gwita adi u nga gelwa mahungu o tsakisa, ti nga maha i di ku velekwa ka mwanana ha mwayani mwendo u di koti ku mana mthumo awu u nga txi wu lava ngutu? Kha ti kanakanisi ti to awe u tsakile ngutu aha ko u ti navete kubhulela mahungu oneyo vangana vako kumweko ni va hamwayani. Ina ku mahekile to fana mbimo yi u nga pfa mahungu a tshuko kupinda otshe, i ku mahungu a manene a Mfumo wa Txizimu?
5. U ti pfisile kutxani mbimo yi u nga gonda ditshuri da mu ka dipswi da Txizimu ngu dikhambi do khata? (Wona ni mifota.)
5 Pimisa ngu nzila yi u nga tipfa ngu yona mbimo yi u nga pfa ditshuri da dipswi da Txizimu ngu dikhambi do khata. Awe u gondile ti to tate wako wa nzumani wa kuranda ngutu, ene a lava ti to u maha txienge txa mwaya wa vakhozeli vakwe. U tshumete u gonda ti to ene a thembisile kuheta kotshe kuxaniseka, ni ku mafu a maphya u na tshumela u wona kuwuswa ka maxaka a wena aya ma nga fa, eto ova timwani ta kona ka ti u nga ti gonda. (Marku 10:29, 30; Joh. 5:28, 29; Var. 8:38, 39; Mtu. 21:3, 4) Awe u tsakile ngutu mbimo yi u nga ziva ditshuri donedo. (Luka 24:32) Awe u ti tsakete ngutu ku tiziva timhaka toneto, ni ku u lavile kugela vamwani mahungu oneyo!—Wona ni Jeremiya 20:9.
Mbimo yi hi nga gonda ditshuri hi lavile kubhulela vamwani ngu totshe ti hi nga ti gonda! (Wona paragrafu 5)
6. Ngu tihi ti u nga ti gonda ka txiperiyensiya txa Ernesto ni Rose?
6 Wona ati ti nga humelela mwanathu wu a dhanwako ku Ernesto, b mbimo yi a nga ti ni 10 wa malembe tate wakwe a fite. Ernesto a womba tiya: “Ni txi tiwotisa ti to: ‘Ina tate wangu a to ya nzumani? Ina ditshiku dimwani na tshumela ni m’wona tate wangu?’ Ni txi va bavela nyana vanana va va nga di ni vatate vawe.” Yotshe mbimo Ernesto atxi tsula dithithani ka tate wakwe, eya khizama e khongela atxi: “Txizimu na kombela, ni lava kuziva ti to tate wangu a hani?” Ku di pindile 17 wa malembe, mbimo yi Ernesto a nga mana m’thu wo m’gondela Bhiblia, kha nga pimisa kumbidi a to tekela kutumela. Ene a tsakile ngutu mbimo yi a nga ziva ti to ava va nga fa kha va zivi txilo, ni ku Bhiblia yi womba ti to ku na va ni kuwuswa ka va va nga fa. (Ekl. 9:5, 10; Mith. 24:15) Ngu magwito, ene a mani tixamulo ta siwotiso asi a nga ti naso! Ernesto ati tsakile ngutu ngu mahungu a manene aya a nga txi ma gonda. Msikati wakwe, Rose, nene a khatile kugonda e tshumela e pfa lirando la mahungu a manene a Mfumo. Ngu 1978 vona va bhabhatisilwe. Se koneho va khatile kubhulela vangana kumweko ni maxaka mayelano ni ditshuri do tsakisa adi va nga ti di gondile. Ernesto ni Rose va vhunile vathu vo pinda konamu ka 70 ti to ve ziva ditshuri ve tshumela ve bhabhatiswa.
7. Kumaheka txani ngako ditshuri da mu ka Bhiblia di txi gwesa timbilu tathu? (Luka 6:45)
7 Ngako hi txi randa ditshuri da mu ka Bhiblia kha hi nambi gwenta kuzumba nado hi si geli vamwani. (Lera Luka 6:45.) Athu hi tipfa kufana ni vagondiswa va Jesu va nga womba tiya: “Athu kha hi na kusikota kumalala ni ti hi nga ti wona, ni ti hi nga tiengisa.” (Mith. 4:20) Athu ha di dhunda ngutu ditshuri ni ku hi lava ku gela votshe vathu va hi nga va kotako.
HI TXHUMAYELA NGU KU HI DHUNDAKO VATHU
8. Nji txani atxi txi hi kuzetako kutxhumayela mahungu a manene vathu vamwani? (Wona dikwadro adi di ku “ Dhunda vathu—Va gondise.”) (Wona ni mfota.)
8 Kufana ni Jehovha ni mwanana wakwe, nanathu ha va dhunda vathu. (Mav. 8:31; Joh. 3:16) Athu ha va pfela ngutu vathu va va si ngako ‘ni Txizimu’ ni va va si ngako ni ‘themba.’ (Vaef. 2:12) Ngu mhaka ya sikarato sawe, vona va tipfa nga va pfala mndani ka txisima, kambe hi ni dijoke kasiku hi va humisa mndani mu ka txisima, i ku mahungu a manene a mfumo wa Txizimu. Nguko susumetwa ngu lirando ni wumbilu wu hi ku nawo ngu vathu hi lava kumaha totshe ti hi nga tikotako kasiku hi va txhumayela mahungu a manene. Ngako va txipfa mahungu a manene eto ti va vhuna ku ve va ni themba ya mbimo yi yi tako, ve tsaka konkuwa, ni ku ditshiku dimwani “veva ni wutomi wa ditshuri,” i ku tiya, veva ni wutomi wo mbi guma ka mafu a maphya.—1 Tim. 6:19.
Lirando ni wumbilu wu hi ku nawo ngu vathu si hi kuzeta ku hi maha mizamo kasiku hi va bhulela mahungu a manene (Wona paragrafu 8)
9. Ngu txihi txialakanyiso hi ningako vathu mayelano ni ti ti no ta maheka mbimo yi yi tako, ni ku ngu kutxani? (Ezekhiyele 33:7, 8)
9 Lirando li hi ku nalo ngu vathu li hi kuzeta ku hi va txharihisa ti to mafu yawa o biha ma hafuhi ni kuloviswa. (Lera Ezekhiyele 33:7, 8.) Athu ha va pfela wumbilu votshe vathu kupata ni vamwayani kwathu avale va si khozeliko Jehovha. Vamwani va bhisi ngu mithumo ya ditshiku ni ditshiku kha va pimisi ngu ti ti tako, ku na va ni “kuxaniseka ka hombe, ko kha ku khali kumaheka kukhukhela ma nga vangwa mafu kala kuwa, ni ku kha ku na mbi swa ku humelela kambe.” (Mat. 24:21) Athu hi lava ti to vathu ve tiziva ati ti no ta maheka ka mbimo yoneyo yo lamula, wukhozeli wa makuhu wu na loviswa, ngu magwito mafu yawa ma fumwako ngu Sathani mana loviswa ka Armagedhoni. (Mtu. 16:14, 16; 17:16, 17; 19:11, 19, 20) Athu ha maha mkombelo kasiku ku tala ka vathu ve engisa didungula dathu ni ku ve maha txisungo txo khozela Jehovha kumweko ni nathu. Kambe hi nga womba txani ngu vathu kupata ni maxaka athu aya ma si hi engisiko nyamsi?
10. Ngu kutxani i di ta txikuluveta ku hi txharihisa vathu?
10 Nga ha hi nga tiwona ngu kona ka gondo ayi yi nga pinda, vathu vamwani ava va no ta wona ku loviswa ka Bhabhilona wa Hombe, ti nga maha ve ta khata kukombisa likholo ka Jehovha se ve hulukiswa. Ngako i di toneto, nda txikuluveta ngutu ku hi zivisa vathu ngu ti ti no maheka mbimo yi yi tako. Pimisa ngu tiya: Vathu va no khumbula basi ngu ti hi nga nga va gela kale kule. (Wona ni Ezekhiyele 33:33.) Ti nga maha ve khumbula txialakanyiso txi hi nga va ni nga se ve ti pata ni nathu hi khozela Jehovha kumweko na di si se va swela. Kufana ni muwoneleti wa m’kora wa khe Filipiya a nga khata kukombisa likholo mbimo yi “a nga wona kudeka-deka ka hombe ka mafu,” vathu va va si engisiko mahungu a manene nyamsi ti nga maha ve ta txitxa mawonelo awe mbimo yi va no wona Bhabhilona wa Hombe atxi loviswa.—Mith. 16:25-34.
HI TXHUMAYELA NGU KU HI DHUNDAKO JEHOVHA NI DITINA DAKWE
11. Hi ningelisa kutxani kupfaliswa, wudhumo ni mtamo ka Jehovha Txizimu? (Mtuletelo 4:11) (Wona ni mfota.)
11 Txivangelo txa lisima ngutu atxi txi hi mahako hi txhumayela mahungu a manene nguku hi randako Jehovha ni ditina dakwe do sawuleka. Mthumo wathu wo txhumayela i nzila yimwani yo dhumisa Txizimu txathu atxi hi txi dhundako. (Lera Mtuletelo 4:11.) Athu ha tumelelana ni ti to: Jehovha a ni fanelo ya kuamukela kupfaliswa, wudhumo ni mtamo wa vakhozeli vakwe vo thembeka. Athu ha ningela wudhumo ni kupfaliswa ka Jehovha mbimo yi hi bhulelako vamwani ngu sitsanisekiso sa ditshuri asi si kombisako ti to “Txizimu ngu txona txi nga vanga sotshe” ni ti to hiho nguko ngu txona txi nga hi ninga wutomi. Ni ku hi ninga mtamo wathu Jehovha ngu kuthumisa kwati mbimo yathu, mtamo wathu, asi hi ku naso ngu ku hi pateka ngu ha hi nga kotako ngu kona ka mthumo wo txhumayela. (Mat. 6:33; Luka 13:24; Vakl. 3:23) Ngu mapswi o koma, hi nga womba ti to ha ti dhunda kuwomba-womba ngu Txizimu nguku hi txi randako. Ni ku nanathu ha ti lava kubhulela vamwani ngu ditina da Txizimu ni ti to Jehovha Txizimu txo zumbisa kutxani. Ngu kutxani?
Hi ningela mtamo wathu ka Jehovha ngako hi txi thumisa mbimo yathu, mtamo wathu, asi hi ku na so kasiku hi pateka ka mthumo wo txhumayela ngu ha hi nga kotako ngu kona (Wona paragrafu 11)
12. I ngu nzila muni hi sawulekisako ditina da Jehovha kutxhumayelani?
12 Lirando li hi ku nalo ngu Jehovha li hi kuzeta ku hi sawulekisa ditina dakwe. (Mat. 6:9) Eto tiwomba ti to hi lava kugela vathu ti to totshe ti Sathani a nga tiwomba mayelano ni Txizimu makuhu. (Gen. 3:1-5; Jobe 2:4; Joh. 8:44) Mbimo yi hi txhumayelako, hi lava kugela votshe ava va nga tiemisela kutiziva ti to, Jehovha i mani ngu ditshuri. Hi lava ku votshe ve tiziva ti to fanelo ya hombe ka totshe ya Jehovha lirando, ni ti to nzila yakwe yo fuma njo lulama, ni ku Mfumo wakwe i singa kale wu na heta kotshe kuxaniseka, wu tisa kurula ni litsako ka vathu votshe hamafuni. (Mas. 37:10, 11, 29; 1 Joh. 4:8) Mbimo yi hi womba-wombako ditshuri mayelano ni Jehovha, hi sawulekisa ditina dakwe. Ni ku ha tsaka ngu kuziva ti to hi maha ati ti emelwako ku mahwa ngu Tifakazi ta Jehovha. Ngu nzila muni?
13. Ngu kutxani kudhanwa kota Tifakazi ta Jehovha i di lungelo ya hombe ngutu kwathu? (Isaya 43:10-12, NM)
13 Jehovha a hi sawute ti to hi va ‘Tifakazi takwe.’ (Lera Isaya 43:10-12, NM.) Malembe nyana msana, dipasi da Mmidi wu wu Fumako di wombile tiya: “Wudhumo wa hombe awu m’thu mmwani ni mmwani a nga vako nawo ngu dhanwa ti to i Fakazi ya Jehovha.” c Ngu kutxani? Ngu txikombiso. Ngako ti txo lava u sawula m’thu wo kari ti to eya va fakazi yako tribhunali, ditshuri ti to u ndi na sawula m’thu wu u mthembako, adi ni mahanyelo a manene ni kuziwa ngu vathu vamwani kota m’thu wo thembeka. Ngu toneto Jehovha a nga ti maha, mbimo yi a nga hi sawula kota Tifakazi takwe, ene a kombisile ti to wa hi ziva kwati ni kuthemba ti to athu hi na gela vamwani ti to ene Txizimu txa ditshuri. Kwathu wudhumo wa hombe ngutu kudhanwa kota Tifakazi ta Txizimu txathu. Ngu toneto hi lava kulondola yotshe mikhanjo kasiku hi bhulela vamwani ngu ditina da Jehovha ni kuveka hakubasani ti to totshe timhaka to biha ti wombwako mayelano ni nene makuhu. Ngako hi txi maha toneto, hi kombisa ka vathu votshe ti to athu hi Tifakazi ta Jehovha!—Mas. 83:18; Var. 10:13-15.
HE SIMAMENI HI TXHUMAYELA KALA MAGWITO
14. Ngu sihi simahakalo so tsakisa asi hi si emelako?
14 Ngu kupimisa basi ngu ti ti no ta maheka mbimo yi yi tako ta hi maha hi tsaka! Ngu ku katekiswa ngu Jehovha, hi emela ti to vathu vavangi ve tumela mahungu a manene na xanisa ya hombe yi si se khata. Hi tshumela hi tsaka ngu kuziva ti to ka mbimo ya xanisa ya hombe, i ku mbimo yo karata ngutu, ti nga maha vathu vavangi ve maha txisungo txo huma ka ditiko diya da Sathani ve ti pata ni nathu ti to hi khozela Jehovha!—Mith. 13:48.
15-16. Ngu tihi ti hi lavako ku simama hi ti maha, ni ku kala mbimo muni?
15 Hambiketo, hi ni mthumo wa hombe awu hi ku ngadi hi txi na wu maha. Hi ni lungelo yo pateka ka mthumo awu wu no mbi thuka wu mahwa kambe i ku wo txhumayela mahungu a manene a Mfumo wa Txizimu hamafuni kotshe. Ngu mbimo yoneyo ya yimweyo, hi fanete hi simama hi txharihisa vathu ti to i singa kale mafu yawa o biha a Sathani mana loviswa. Mbimo yi ku no hoka kulamula koneko, va na ti khumbula ti to didungula adi hi nga txi di txhumayela di txi ta ngu ka Jehovha Txizimu.—Eze. 38:23.
16 Ngu tihi ati hotshethu hi nga tiemisela ku ti maha? Athu hi lava kusimama hi txhumayela ngu konaha ka lirando, lirando ngu mahungu a manene, lirando ngu vathu, txa lisima ngutu, lirando li hi ku nalo ngu Jehovha ni ngu ditina dakwe. Hi lava kusimama hi txhumayela ngu kuhiseka ni ngu txikuluveta, kala Jehovha atxi: “Xega!”
NDANDO 54 “Nzila ngu yona yi”
a Mtshangano wa dilembe wu mahekile ngu 7 ka Outubro wa 2023, ka Salão de Assembleias ya Tifakazi ta Jehovha ya Newburgh akhe New York, Estados Unidos. Mtshangano wotshelele wuwa wa dilembe wu kombisilwe ka JW Broadcasting, txienge txo khata ngu Novembro wa 2023 ni txa wumbidi ngu Janeiro wa 2024.
b Wona gondo yi yi ku “Bibele yi hundzula vutomi bya vanhu —Ndzi Tsakisiwe Hi Tinhlamulo Ta Bibele Leti Twisisekaka,” ka Muwoneleli wa 1 ka Fevereiro wa 2015.