1-2. Nji txani atxi m’thu a fanelako ku txi maha asi se bhabhatiswa?

 KA MTXHANU wa malembe aya ma nga pinda, kona mu ka 1.000.000 wa vathu va tiningetete ku ve bhabhatiswa ve va Tifakazi ta Jehovha. Wungi wawe, va fana ni mgondiswa Timoti, va gondile ditshuri “kukhukhela wuwananani.” (2 Tim. 3:14, 15) Vamwani va gondile ditshuri mayelano ni Jehovha i di vahombe, vamwani se va ti kumbile. Mmwani wa msikati a nga gonda Bhiblia ni Tifakazi ta Jehovha a bhabhatisilwe a di ni 97 wa malembe!

² Ngako u di txigondiana txa Bhiblia mwendo u txi kuliswa ngu vaveleki ava i ku Tifakazi ta Jehovha, ina wa alakanya ngu kubhabhatiswa? Edo dikungu da dinene! Kambe, u si se bhabhatiswa u fanete kutiningetela ka Jehovha. Gondo yiya yi na txhamusela ti to ti womba txani kutiningetela. Hi na tshumela hi wona ti to ngu kutxani u sa fanela kuthava kutiningetela ni kubhabhatiswa ngako u di tiemisete kumaha toneto.

NJI TXANI KUTININGETELA?

3. Ningela sikombiso so kari sa mu ka Bhiblia sa vathu ava va ngadi tiningetete ka Jehovha?

³ Ka Bhiblia, ti womba kusawulwa kasi kuthumela Jehovha ngu nzila yo sawuleka. Vaisrayeli i ti vathu a va va nga ti tiningetete ka Jehovha. Kambe vamwani va ti tiningetete ka Jehovha ngu nzila yo sawuleka. Ngu txikombiso, Aroni a txi ambala “marka yo sawuleka ya kutiningetela”—limo la nzalama masoni ka txigoko txakwe. Limo la nzalama li txi kombisa ti to a ti sawutwe kasi kuthumela Jehovha ngu nzila yo sawuleka—kota Mphaxeli wa Hombe wa Israyeli. (Levhi 8:9, NM) Vanazira ni vona va ti tiningetete  ka Jehovha ngu nzila yo sawuleka. Dipswi “Mnazira,” di ta ngu ka dipswi da txihebheru di di ku nazirʹ, di txhamuselako “Ku ti hambanisa,” mwendo “Kutiningetela.” Vanazira ti txi lava ve londisa milayo yo kari yi nga ti bhatwe ka Mlayo wa Mosi.—Mit. 6:2-8.

4. a) Nji txani txi patekako ka kutiningetela ka Jehovha? b) Ti womba txani “kutileka”? (Wona ni mfota.)

⁴ Mbimo yi u tiningetelako ka Jehovha, u sawula kuva mgondiswa wa Kristu ni ku kumaha kudhunda ka Txizimu nda lisima ngutu ka wutomi wako. Kambe nji txani txi txi patekako ka ku tiningetela koneko? Jesu a wombile tiya: “Ngako mthu a txi lava ku ni londisa a na ti leke.” (Mat. 16:24) Dipswi da Txigriki di hunduluxelwako di txi “ku ti leka” di tshumela kambe di hunduluxelwa di txi womba “ku ti lamba.” Ngako u txi tiningetela ka Jehovha, u fanete kulamba totshe ati ti nga m’henyisako. (2 Vak. 5:14, 15) Eto ti pata kulamba “mithumo ya mtumbuluko wa nyama,” kufana ni ku ti ñola ko biha ngu ta mataho. (Vag. 5:19-21; 1 Vak. 6:18) Ina kuengisa Jehovha ti na nemetisa wutomi wako? Kha ti na mba nemetisa wutomi wako ngako u txi randa Jehovha ni kutsaniseka ti to milayo yakwe yi wuyelisa awe. (Mas. 119:97; Isaya 48:17, 18) Mwanathu mmwani a dhanwako ku i Nicolau a wombile tiya: “Awe u nga wona milayo ya Jehovha kufana ni magradhi ya jele aya ma kutsivelako kumaha ati u ti lavako mwendo magradhi a dithanga da tingonyamo aya ma kuvhikelako ka phango.”

5. a) M’thu a tiningetelisa ku txani ka Jehovha? b) Ngu kuhi ku hambana ku kuho ka ku tiningetela ni kubhabhatiswa? (Wona ni mfota.)

⁵ U tiningetelisa kutxani ka Jehovha? U tiningetela ka Jehovha mbimo yi u mahako mkombelo u mthembisa ti to u na khozela ene dwe ni kuthangetisa kumaha kudhunda kwakwe ka wutomi wako. Ngu ditshuri awe u thembisa Jehovha to u na simama u mranda “ngu yotshe  mbilu yako, ni wotshe muhefemulo wako, ni otshe mapimo ako ni wotshe mtamo wako.” (Marku 12:30) Kutiningetela koneko u kumaha wekha awe ni Jehovha. Ngu didhawa dimwani bhabhatiso yi mahwa hakubasani, kasi kukomba vamwani ti to u tiningetete ka Jehovha. Kutiningetela kwako i mhaka ya lisima ngutu, se u na maha totshe kasi kuhetisisa txixambanyo txako ni ku Jehovha a emela toneto.—Ekl. 5:4, 5.

NGU KUTXANI U DI FANETE KUTININGETELA KA JEHOVHA?

6. Ngu kutxani m’thu atxi maha txisungo txo tiningetela ka Jehovha?

⁶ Txivangelo txa hombe txo u tiningetela ka Jehovha lirando ali u ku nalo ngu ngene. Lirando lonelo hi nga matipfelo a mbimonyana. Hahanze keto lirando lonelo li seketetwe ka “wuzivi wa kuranda kwakwe” ni “kualakanya kotshe ka moya” i ku ti u nga ti gonda mayelano ni Jehovha ni kuranda kwakwe ti mahako ti to lirando lako ngu ngene liya masoni li kula. (Vakl. 1:9) Gondo yako ya Bhiblia yi ku tsanisekisile ti to 1) Jehovha mbwa ditshuri, 2) Bhiblia dipswi dakwe di nga huhutelwa, ni 3) Ene a thumisa sengeletano yakwe kasi ku maha kudhunda kwakwe.

7. Nji txani a txi ti lavako hi txi maha hi si se tiningetela ka Jehovha?

⁷ Ava va tiningetelako ka Jehovha va ni wuzivi wa tigondo ta makhato ta Bhiblia ni ku va hanya ngu ku tsimbitisana ni milayo ya mu ka Bhiblia. Vona va maha totshe ti va nga ti kotako kasi kubhulela vamwani ngu ti va ti gondako amu ka Bhiblia. (Mat. 28:19, 20) Lirando lawe ngu Jehovha li engetete, ni ku va lava ku m’khozela ngu mbilu yotshe. Ina u tipfisa toneto? Ngako u di ni lirando lonelo, khu nambi tiningetela  mwendo kubhabhatiswa ngu ku lava kutsakisa mgondisi wako wa Bhiblia mwendo vaveleki vako, nem khu nambi maha toneto ngu kulava kuetetela vangana va wena ava va nga bhabhatiswa.

8. Nji txani txi nga kuvhunako ti to u maha txisungo txo tiningetela ka Jehovha? (Masalmo 116:12-14)

⁸ U txi alakanya ngu totshe ati Jehovha a nga ku mahela wa bonga ngutu aha ko ti ku kuzeta kuningetela wutomi wako kwakwe. (Lera Masalmo 116:12-14.) Bhiblia yi womba to Jehovha ngene ahi ningako “sotshe sihiwa sa lisima” ni “sotshe siningo sa ku hetiseka.” (Jak. 1:17) Ningo ya lisima ka totshe digandelo do hetiseka da mwanana wakwe Jesu. Alakanyisisa ngu eto! Mterulo wu mahile ti to ti koteka ku u va ni wuxaka wo tsana ni Jehovha. Hahanze keto aku ningile lungelo yo hanya ngu ha ku si gumiko. (1 Joh. 4:9, 10, 19) Kutiningetela ka Jehovha i nzila yo kombisa kubonga mterulo ni otshe makatekwa aya Jehovha a nga kuninga. (Dhewut. 16:17; 2 Vak. 5:15) Ngu toneto hi ti gondako ka gondo 46, pontu 4, ka dibhuku adi di ku Hanya wutomi wo tsakisa kala kupinduka! tipatako vhidhiyo ayi yi ku Ngu tihi tiningo ati hi nga ti ningelako ka Txizimu.

INA U TIEMISETE KUTININGETELA NI KUBHABHATISWA?

9. Ngu txani m’thu a sa fanela ku tipfa atxi sinziswa kutiningetela ka Jehovha?

⁹ Ti nga maha u pimisa ti to khu se lungekela ku tiningetela ka Jehovha ni kubhabhatiswa. Ti nga maha u txi lava ku maha kutxitxa ko kari ka wutomi wako kasi ku hanya ngu kutsimbitisana ni matshina a milayo a Jehovha, mwendo u txi nga txi lava mbimo kasi kutsanisa likholo lako. (Vakl. 2:6, 7) Hi nga sotshe sigondiyana si kulako ngu nzila ayi yi fanako ngu didhawa da moya, ni ku hi nga otshe majovhem ma bhabhatiswako ka tanga yimweyo. Nda lisima ngutu kupfisisa ti to ngu kuhi kutxitxa aku u fanelako ku ku maha se koneho u maha ati u nga ti kotako u si ti fananisi ni vamwani.—Vag. 6:4, 5.

10. Ngu tihi ti u fanelako ku ti maha ngako u txi wona ti to khu se ku lungekela kutiningetela ka Jehovha ni kubhabhatiswa? (Wona dikwadru adi di ku “ Ina u kulela ditshurini?”)

¹⁰ Hambi u txi tipfisisa ti to khu se lungeka ku tiningetela ka Jehovha, simama u va ni makungo oneyo. Kombela txivhuno ka Jehovha kasi ku u kota kumaha kutxitxa aku ku lavekako. (Vaf. 2:13; 3:16) Tsaniseka ti to Jehovha a na engisa mkombelo wako ni ku a na kuvhuna.—1 Joh. 5:14.

NGU KUTXANI VAMWANI VA TXI KANA-KANA

11. Jehovha a nga hi vhunisa kutxani ku hi simama hi di thembekile kwakwe?

¹¹ Vathu vamwani ava se va nga lungeka ku tiningetela ni kubhabhatiswa va nga txi kana-kana ti to va nga maha toneto mwendo ahim-him. Ti nga maha ve ti wotisa tiya: ‘Se ngako msana ko bhabhatiswa ni txo maha txionho txa hombe ni thaviswa dibanzani?’ I di ku u thava toneto, u nga tsaniseka ti to Jehovha a na kuninga totshe ti u ti lavako kasi ku ‘u tsimbila ngu tifanelo ati ti lavekako masoni ka Mkoma u txi mtsakisa ka totshe timhaka.’ (Vakl. 1:10) Ene a na tshumela e kuninga mtamo awu wu lavekako kasi ku u kota kumaha ati i ku ta tinene. Jehovha se a vhuni vathu vo tala ti to ve kota ku muengisa. (1 Vak. 10:13) Ngu toneto ti mahako ti to mtengo wa va va wilwako dibanzani i di wa wudotho. Jehovha ahi ninga totshe ti hi ti lavako kasi ku hi simama hi di thembekile kwakwe.

12. Ngu tihi ti u nga ti mahako kasiku u si weli ka txionho txa hombe?

¹² Hotshethu ha dukwa ku hi maha ati i ku to biha. (Jak. 1:14) Kambe awe u nga sawula ati u nga ti mahako mbimo yi u dukwako. Ku womba ditshuri ngu magwito ngawe u nga  mahako txisungo txa ti to u nga maha txani ngu wutomi wako. Vamwani va womba ti to hi nge sikoti kufuma matipfelo athu ni ti hi ti mahako kambe toneto makuho. Awe u nga sikota kufuma minavelo yako yo biha. Ngu toneto otshe makhambi ya u dukwako, awe u nga sikota ku sawula kwambi maha ati i ku to biha. Kasi ku kota ku maha toneto ku ni to kari ati ti nga ku vhunako. Ngu txikombiso, maha mkombelo ka Jehovha otshe masiku, vana ni txiemiso txa txinene txa gondo yako upune ni kuxalela yotshe mitshangano. Londola yotshe mikhanjo kasi ku u txhumayela vamwani. Ngako mbimo yotshe u txi maha tiya, awe u nava ni mtamo awu wu lavekako kasi ku simama u di thembekile ka Jehovha. Ni ku u nga divali to yotshe mbimo Jehovha a na kuvhuna kumaha toneto.—Vag. 5:16.

13. Ngu txihi txikombiso txa txinene atxi Josefa a nga hi siyela txona?

¹³ Ti na ku hehukela ku simama u di thembekile ka Jehovha ngako u txi zumba u di mahile txisungo txa ti to u na maha txani u si se dukwa. Bhiblia yi womba-womba ngu vathu vo tala ava va nga maha toneto, ni ku kufana ni nathu i ti vathu va kwambi pelela. Ngu txikombiso, mbimo yi msikati wa Potifari makhambi amangi a nga zama ku ndindetela Josefa ku ve maha ta mataho, ene asi kanakani to a na angulisa ku txani. Bhiblia yi womba ti to ‘Josefa atxi lamba.’ Josefa apuni a wombile tiya: “Ni nga sikotisa kutxani ku maha to biha ta hombe to ngeto ni kuonhela Txizimu kani?” (Gen. 39:8-10) Ti hakubasani ti to Josefa atxi ti ziva ati anga txi fanela ku maha na asi se dukwa ngu msikati wa Potifari. Ngu toneto a koti ku maha ati i ku ta tinene mbimo yi anga dukwa.

14. U nga si lamba ngu nzila muni siduko?

¹⁴ Hi nga sikotisa ku txani ku va ni ku tiemisela ko fana ni ka Josefa? U nga sunga konku to u na maha txani mbimo yi u no wonisana ni txikarato. U nga pimisi kumbidi kuwomba to ahim-him ka ti Jehovha ati nyenyako ni ku u nga zumbi u txi pimisa ngu tona. (Mas. 97:10; 119:165) Ngako u txi maha eto u na sikota kuwonisana ni txiduko ni ku u na ti ziva to u na angulisa kutxani.

15. M’thu a nga ti kombisisa ku txani ti to a lava Jehovha ngu ditshuri? (Vahebheru 11:6)

¹⁵ Ti nga maha u txi tsaniseka to u mani ditshuri ni ku u lava ku thumela Jehovha ngu yotshe mbilu yako. Kambe ti nga maha u si tipfi u di lungekile kutiningetela ka Jehovha ni kubhabhatiswa. Ka txiemo txonetxo u nga maha  to fana ni ti Mkoma Dhavhidha a nga maha. Ene a mahile mkombelo ka Jehovha atxi khene: “Ni xolisise, Txizimu, kasi kuziva mbilu yangu, ni duke kasi kuziva mi alakanyo yangu. Wona ti to mwendo ni tsimbila ngu nzila yo biha u txi ni tsimbitisa ngu nzila yi ni yisako ka wutomi wo mbi guma.” (Mas. 139:23, 24) Jehovha a katekisa vale “va mlavako ngu ditshuri.” Mizamo yako yo hokelela makungo o tiningetela ni kubhabhatiswa yi kombisa ti to awe u lava Jehovha ngu ditshuri.—Lera Vahebheru 11:6, NM.

SIMAMA U TSUKETA KA JEHOVHA

16-17. Ava va kulelako ditshurini va tshuketisa kutxani ka Jehovha? (Johani 6:44)

¹⁶ Jesu a wombile ti to vagondiswa vakwe va dhanwa ngu Jehovha. (Lera Johani 6:44.) Pimisa ngu nzila yi eto ti tsakisako ngu yona ni nzila yi ti ku gwesako ngu yona. Jehovha wa wona ta tinene ka mmweyo ni mmweyo awu a m’dhanako ditshurini. Ene a wona mmweyo ni mmweyo wathu kota “thomba ya lisima.” (Dhewut. 7:6, NM) Ngu toneto Jehovha a kuwonisako tona.

¹⁷ Ti nga maha u di jovhem ayi yi kuliswako ngu vaveleki ava va ku ditshurini. Niku kutilava u tipfa nga u thumela Jehovha ngu ku vaveleki vako va mahako toneto i si nga ngu ku Jehovha a nga ku sawula. Kambe Bhiblia yi womba tiya: “Tshuketani hafuhi ka Txizimu, kasi ni txona txi na tshuketela hafuhi kwanu.” (Jak. 4:8; 1 Mak. 28:9) Mbimo yi awe u khatako kutshuketa ka Jehovha ene a maha txienge txakwe e tshuketa kwako. Jehovha kha ku woni basi kota txienge txa mtxawa wa vathu. Jehovha a tshuketa hafuhi ka mwani ni mwani hambi ka vale va kulelako ditshurini. Ngako m’thu atxi khata e tshuketa ka Jehovha, ene a maha ati ti nga bhalwa ka Jakobe 4:8.—Wona 2 Vatesalonika 2:13.

18. Hi na bhula ngu txani ka gondo ayi yi londiselako? (Masalmo 40:8)

¹⁸ Mbimo yi u tinigetelako ka Jehovha ni kubhabhatiswa u etetela Jesu. Jesu ngu ku ti tsakela adi tiemisete kumaha totshe ti Tate wakwe a nga txi mkombela. (Lera Masalmo 40:8; Vaheb. 10:7) Ka gondo ayi yi londiselako hi na wona ati ti nga ku vhunako kasi ku simama u thumela Jehovha u di thembekile msana ko bhabhatiswa.