1-2. Ngu yahi makatekwa ya m’thu a ma manako msana ko bhabhatiswa?

 LITSAKO la hombe ngutu kubhabhatiswa ni maha txienge txa mwaya wa Jehovha. Ava va nga maha toneto ni kuva ni wuxaka wa hafuhi ni Jehovha va tumelelana ni mapswi a Dhavhidha a nga khene: “A katekile wule awe u m’sawulako u txi m’dhana kasiku e hanyela dithepelani kwako.”—Mas. 65:4.

² Jehovha a sawula kwati va va mahako txienge txa mwaya wakwe. Nga ha hi nga tiwona ngu kona ka gondo yi yi nga pinda, ene a sawula ava va langako kuva ni wungana wo tsana nayo. (Jak. 4:8) Mbimo yi u tiningetelako ka Jehovha u txi bhabhatiswa, u khata kuva ni wuxaka wo sawuleka ngutu nayo. Ni ku u nga tsaniseka ka ti to msana ka bhabhatiso Jehovha a na ‘tshakunutela makatekwa o tala aya u no pwata ni ko thela kona.’—Mal. 3:10; Jer. 17:7, 8.

3. Ngu wuhi wutixamuleli awu m’thu wu a nga tiningetela ni kubhabhatiswa aku nawo? (Ekleziyaste 5:4, 5)

³ Ti hakubasani ti to bhabhatiso o va makhato. Ti na lava u maha totshe u nga ti kotako kasi kusimama u di thembekile ka Jehovha, hambi u txi wonisana ni siduko. (Lera Ekleziyaste 5:4, 5.) Kota mgondiswa wa Jesu ti na lava u simama u etetela txikombiso txakwe ni totshe ti a nga gondisa. (Mat. 28:19, 20; 1 Pedro 2:21) Gondo yiya yi na kuvhuna kumaha toneto.

 ‘SIMAMA U TXI LONDISELA’ JESU HAMBI U TXI WONISANA NI SIDUKO

4. I ngu nzila muni, vagondiswa va Jesu va rwalako phande ya xanisa? (Luka 9:23, NM)

⁴ Msana ko bhabhatiswa u na simama u wonisana ni sikarato. Jesu a ti vekile hakubasani ti to vagondiswa vakwe va ti na rwala phande ya xanisa. Ni ku ti ndina lava va maha toneto ditshiku ni ditshiku. (Lera Luka 9:23, NM.) Ina Jesu a txi lava kuwomba to vagondiswa vakwe mbimo yotshe va ndina wonisana ni sikarato? Ahim-him. Ene a txi lava kutxhamusela ti to, hahanze kova ni makatekwa, valondeteli vakwe va ndina wonisana ni sikarato. Simwani ka sikarato soneso si ndi nava so nemela ngutu.—2 Tim. 3:12.

5. Ngu yahi makatekwa ya Jesu a nga ma thembisa ka va le va nga maha mizamo kasi kuthumela Jehovha?

⁵ Ti nga maha u di wuketwe ngu siro sa mwaya wako mwendo u di lekile ku londisela tithomba kasi kuthangetisa kumaha kudhunda ka Jehovha. (Mat. 6:33) I di toneto, tsaniseka ti to Jehovha kha ti divali totshe ti u nga maha. (Vaheb. 6:10) Ti nga maha u di tsanisekile ka ti to mapswi ya Jesu a nga ma womba ditshuri: “Kha ku nga ni m’thu wu a nga leka nyumba, vanawe, tindiyakwe, mame, tate, vanana mwendo tithembwe, ngu mhaka yangu ni ngu mhaka ya Evhangeli, awu a no mbi amukela, ka txona txikhati txa nyamsi, 100 da tinyumba, da vanawe, da tindiya, da vamame, da vanana mwendo da tithembwe, kumweko ni sixaniso; se ka txikhati txi txi tako, wutomi wo mbi guma.” (Marku 10:29, 30) Ti ha kubasani ti to makatekwa ya u nga ma mana nga hombe ngutu kupinda yotshe mizamo yi u nga yi maha.—Mas. 37:4.

6. Ngu kutxani u di fanete kusimama u lwisana ni ku navela ka mmidi msana ko bhabhatiswa?

⁶ Msana ka bhabhatiso ti na lava u simama u lwisana ni ku navela ka mmidi. (1 Joh. 2:16) Nguko u ngadi u txi lumba liveleko lo mbi pelela la Adhamu. Ti nga maha mbimo yimwani u txi tipfa kufana ni mpostoli Paulo a nga bhala tiya: “Nguko ni tsakela mlayo wa Txizimu ani ngu wutumbu wangu; kambe amu ka sihango sangu ni mana wumwani mlayo awu wu lwako ni Mlayo wu wu tsimbitisako mialakanyo yangu, wona wu ni ndindela wukhumbini ka txionho txi txi ku ka sihango sangu.” (Var. 7:22, 23) Mbimo yimwani u nga tipfa u di godhote ngu konaha ka tiphazamo tako. Kambe ku khumbula ati u nga thembisa Jehovha mbimo yi u nga ti ningetela ti na kuvhuna ku u simama u txi wonisana ni siduko. Ditshuri ngu di do txixambanyo txako txo thumela Jehovha txi na hehukisa wutomi wako mbimo yi u wonisanako ni siduko. Ti kotekisa kutxani toneto?

7. I ngu nzila muni ku ti ningetela kwako ka Jehovha ti no kuvhuna kusimama u di thembekile kwakwe?

⁷ Mbimo yi u tiningetelako ka Jehovha, awe wo ti lamba upune. Eto tiwomba to u na lamba totshe ati ti si tsakisiko Jehovha. (Mat. 16:24) Ngu toneto, mbimo yi u no wonisana ni siduko kha ti na mbi lava u heta mbimo ngu kupimisa ti to u na maha txani. Nguku awe u nava u txi tiziva ati u fanelako ku ti maha, i ku kusimama u di thembekile ka Jehovha. U na simama u di tiemisete ku tsakisa Jehovha. Ka mhaka yoneyo, u na fana ni Jobe. Hambi mbimo yi a nga txi wonisana ni sikarato sa hombe, ene a wombile tiya: “Kha ni na mbi dhuka ni leka ditshuri dangu.”—Jobe 27:5.

8. Kualakanyisisa ngu mkombelo wako wo ti ningetela ka Jehovha ti nga kuvhunisa kutxani kutsanisela siduko?

⁸ Kualakanyisisa ngu mkombelo wu u nga wu maha, mbimo si u nga ti ningetela ka Jehovha ti na kuvhuna ku mana mtamo wo wonisana ni txiduko tximwani ni tximwani. Ngu txikombiso, ina u di na navela m’thu wu a nga txhadha? Ti hakubasani to ahim-him. Awe u thembisile Jehovha to u na mbi thuka u di mahile toneto.  Ngaku u si tumeleli ti to mialakanyo yo biha yi bela mbiluni kwako, kha ti na mbi lava u ti ninga mthumo wo ti khulula ka yona mbimo yi yi tako. Ngu nzila yoneyo, awe u nava u txo ti khulula ka “nzila ya vaonhi.”—Mav. 4:14, 15.

9. Kualakanyisisa ngu mkombelo wako wo tiningetela ti nga kuvhunisa kutxani kuthangetisa timhaka ta moya ka wutomi wako?

⁹ Se, i di ku wa mana mthumo wa wunene kambe wu txi ku tsivela kuxalela yotshe mitshangano, awe khu na mbi kanakana ti to u na maha txani. Nguku wu si se humelela mthumo wonewo, awe u di tiemisete ku mbi leka txilo txi ku tsivela kuxalela yotshe mitshangano. Se eho khu na mbi dukwa kutumela mthumo wonewo kasi ku u gwita u zama ku mana nzila yo thangetisa kumaha kudhunda ka Jehovha. Kualakanyisisa ngu txikombiso txa Jesu, ti nga hi vhuna ngutu ka mhaka yiya. Ene a di tiemisete ku mbimo yotshe e tsakisa Tate wakwe. Kufana ni Jesu, mbimo yotshe hi lava ku tsakisa Tate wathu.—Mat. 4:10; Joh. 8:29.

10. Jehovha a na kuvhunisa kutxani kusimama u londeta Jesu msana ka bhabhatiso?

¹⁰ Ditshuri ngu ti to siduko si na ku ninga mkhanjo wo kombisa ti to u ti emisete “kusimama u txi londisa” Jesu. Tsaniseka ti to Jehovha a na kuvhuna kumaha toneto. Bhiblia yi womba tiya: “Kha mi nze kuhumelelwa ngu txiduko txa kuhambana ni siduko sa vamwani vathu. Txizimu txi thembekile, kha txi ku tumelela ti to mi txi dukwa ngu si si ku txitimwi ka mtamo wanu. Aniko ngaku txiduko txi txi mi tela, a na mi ninga nzila ya ku pona ka txona ni mtamo wa ku txi rwala.”—1 Vak. 10:13.

U NGA SIMAMISA KUTXANI U TXI LONDETA JESU?

11. Ngu yihi yimweyo ya tinzila to simama u londeta Jesu? (Wona ni mfota.)

¹¹ Jesu a thumete Jehovha ngu kuthembeka ni ku mbimo yotshe a txi maha mkombelo kwakwe.  (Luka 6:12) Ngaku u txi lava kusimama u txi londisela Jesu msana ko bhabhatiswa, maha totshe ati ti no ku tshuketisa hafuhi ni Jehovha. Bhiblia yi womba tiya: “Hambi i di keto, ka ti hi nga hoka ka tona he simamiseni hi tsimbila ngu nzila yimweyo.” (Vaf. 3:16) Makhambi mamwani u na pfa ma experiyensia ya vanathu ava va nga sunga kumaha to engeteleka ka mthumo wa Jehovha. Ti nga maha va di yite ka Txikolwa txa va Txhumayeli va Mfumo, mwendo va di rurile va txi ya mu ku ku ni txilaveko. Ngaku txiemo txako txi txi ku tumelela, eyo ku nga va makungo ya u nga vako nawo nawe. Vathu va Jehovha va simama va txi lava kumaha to engeteleka ka mthumo wakwe. (Mith. 16:9) Se ngaku, ngu txivangelo txo kari, ti si koteki ku tivekela makungo onewo? U nga pimisi ti to khu nga wa txilo ka vanathu va va si kotako ku hokelela makungo oneyo. Txa lisima ngutu ngu simama u tsanisela. (Mat. 10:22) U nga divale ti to Jehovha wa tsaka ngu totshe ti u ti mahako ngu kuya ku siemo ni wusikoti wako. Ngu toneto ti no kuvhuna kusimama u londeta Jesu msana ko bhabhatiswa.—Mas. 26:1.

12-13. U nga maha txani ngaku u txi tumbula ti to ku hiseka kwako ka pumbeka? (1 Vakorinto 9:16, 17) (Wona dikwadro adi di ku “ Simama u tutuma.”)

¹² U nga maha txani ngaku u txi pfisisa to mikombelo yako hi nga ngadi yo huma mbiluni? Mwendo khu ngadi u pateka ka mthumo wo txhumayela, kufana ni kale? Ti nga maha u si nga ngadi u txi tidhunda kulera Bhiblia kufana ni kale. Ngaku ti txi maheka toneto msana ko bhabhatiswa u nga pimisi ti to khu ngadi ni moya wo sawuleka wa Jehovha. Kota vathu va kwa mbi pelela, ti tolovelekile ku matipfelo athu me txitxa-txitxa. Ngaku kuhiseka kwako ku txi pumbeka, alakanyisisa ngu txikombiso txa mpostoli Paulo. Ene a txi maha mizamo yo etetela Jesu, kambe mbimo yimwani Paulo  a txi ti ziva ti to asi na kuva ni minavelo yo maha ati a ngadi fanete ku timaha. (Lera 1 Vakorinto 9:16, 17.) Ene a wombile tiya: “Ngaku i si nga ta ku ti maha ngu kuranda kwangu, i mrwalo ni nga sikelwa.” Ngu mapswi mamwani, Paulo a di tiemisete ku hetisisa mthumo wakwe, ti si nga ni mhaka ni matipfelo akwe.

¹³ Ngu ha kufanako, u nga mahe sisungo ngu kuya ngu ti u ti pfisako tona dwe. Tiemisele kumaha ti i ku tona, hambi i si nga ngu mbilu yotshe. Ngaku u txi simama u txi maha ti i ku tatinene, ngu ku tsimbila ka mbimo, matipfelo ako ma nga txitxa me va a manene. Ditshuri ngu di do, kusimama u va ni txiemiso txa txinene txa timhaka ta moya, to fana ni kumaha mkombelo, kulera Bhiblia, kuxalela yotshe mitshangano, gondo yako upune, ti na kuvhuna kusimama u londisela Kristu msana ko bhabhatiswa. Hahanze keto, kusimama u txi tsanisela ngu kuthembeka ti na kuzeta vanathu ava va ku wonako u txi maha toneto.—1 Vat. 5:11.

“YANA MASONI . . . NGU KUTIXOLA”

14. Ngu tihi ti u fanelako ku mbimo yotshe u ti xolisisa? (2 Vakorinto 13:5)

¹⁴ Tximwani atxi txi nga kuvhunako msana ko bhabhatiswa, ngu mbimo yotshe u ti xolisisa kha kwati upune. (Lera 2 Vakorinto 13:5.) Nda tinene ku u ti ninga mbimo yo xolisisa ati u ti mahako ka wutomi wako, to fana ni kumaha mkombelo ditshiku ni ditshiku, kugonda Bhiblia, kuxalela yotshe mitshangano ni ku pateka ka mthumo wo txhumayela. Zama ku mana tinzila to londola ni kuwuyelwa ngu mithumo yoneyo. Ngu txikombiso, tiwotise tiya: ‘Ina na tikota kutxhamusela kwati tigondo ta makhato ta Bhiblia ka vamwani? Ina ni nga maha to engeteleka kasi ku ni va ni litsako ka mthumo wo txhumayela? Mikombelo yango njo kongoma ni ku kombisa to na mthemba Jehovha ngu mbilu yotshe? Ina na xalela yotshe mitshangano? Ni nga tshukwatisisa kutxani kuveka mapimo ka ti hi ti gondako mitshanganoni ni ku pateka ka yona?’

15-16. Ngu tihi ti u nga tigonda ka txiperiyensiya txa Robert mayelano ni kuxula siduko?

¹⁵ Tximwani txa lisima ngu ziva amu u tandekako kona. Mwanathu mmwani a dhanwako ku i Robert a kontarete txiperiyensiya atxi txi junyatisako kwati mhaka yiya: “Mbimo yi ni ngadi ni 20 wa malembe, ni mani mthumo wo thuma hafu ya ditshiku. Ditshiku dimwani msana ka mthumo kolega wo kari wa txisikati a ni rambile ku hi tsula mtini kwakwe. Ene a ni gete to hi ti na ya va hokha ni ku hi ti na hungala ngutu. Makhatoni ni lavetete sivangelo kambe ngu magwito ni lambile ni kutshumela ni txhamusela ti to ngu kutxani ti nga si koteki ku ni tumela txirambo txakwe.” Ati Robert a nga ti  maha ta tsakisa nguku ene a koti kuxula txiduko. Kambe ngu msana nyana a pimisisile kha kwati ngu ti ti nga maheka ni ku a tumbute ti to a di xute txiduko txonetxo ngu nzila yimwani. Ene a womba tiya: “Ani ni di fanete ku lamba txirambo txakwe ni di tsani mwendo ngu txikuluveta kufana ni ti Josefa a nga mahisa tona ka msikati wa Potifari. (Gen. 39:7-9) Kuwomba ditshuri ti ni xamatisile kuwona to ti ni karatete kulamba. Eto ti ni vhuni kuwona to ni ti fanete kutsanisa wuxaka wangu ni Jehovha.”

¹⁶ Kufana ni Robert, nda lisima ngutu ku ma xolisisa kha kwati matipfelo ako. Hambi i di ti to u sikoti kuxula txiduko tiwotise tiya: ‘Ina ni khatile ngu ku ti tshuva msungo kasi kuwomba to ahim-him. Ngaku u txi tumbula to ti lava u tshukwatisa, u nga zumbeli ku ti ninga mnando. Hahanze keto, tsaka nguko u nga kuluveta kutumbula amu u tandekako kona i ti ngadi mbimo. Maha mkombelo mayelano ni ku tandeka kwako ni kumaha totshe ti u nga ti kotako kasi kutsanisa kunavela kwako ko tsakisa Jehovha.—Mas. 139:23, 24.

17. Ditina da Jehovha di patekisile kutxani ka txiperiyensia txa Robert?

¹⁷ Hi nga gonda timwani ka txiperiyensiya txa Robert. Ene a simama a txi womba tiya: “Msana ka ku ni di lambile txirambo txa kolega wangu, ene a wombile tiya: ‘U xute txiduko,’ se ni mu wotisile ti to a txi lava kuwomba txani ngu toneto. Ene a ni txhamusete ti to, mngana wakwe awu kale i ngadi Fakazi ya Jehovha a mu gete ti to otshe majovhem ya Tifakazi ta Jehovha kha ma thembeki. Ngaku ma txi mana mkhanjo wo maha to biha va ti maha. Se a gete mngana wakwe ti to, a lava ku ni duka. Ni tsakile ngutu ngu kuziva ti to ni dhumisile ditina da Jehovha.”

18. U ti emisete kumaha txani msana ko bhabhatiswa? (Wona dikwadro adi di ku “ Tigondo timbidi ati u no ti tsakela.”)

¹⁸ Mbimo yi u tiningetelako ka Jehovha ni kubhabhatiswa awe u kombisa ti to u lava ku dhumisa ditina da Jehovha ti si nga ni mhaka ni ti ti nga mahekako. Tsaniseka ti to Jehovha wa si wona sikarato si u mananako naso ni siduko si u si tsaniselako. Ni ku ene a na katekisa yotshe mizamo yako yo simama u di thembekile. Tsaniseka ti to ngu kuthumisa moya wakwe wo sawuleka a na kuninga mtamo awu u wu lavako. (Luka 11:11-13) Ngu kuvhunwa ngu Jehovha u na sikota kusimama u londetela Jesu msana ko bhabhatiswa.