1. Ngu yahi matipfelo aya malanda mamwani a Jehovha o thembeka ti lavako me wonisana nawo?

 TA TSAKISA ngutu kuwona ti Masalmo 149:4 ati wombako. Ene a womba tiya: “Mkoma a tsakiswa ngu vathu vakwe.” Kambe mbimo yimwani vamwani va godhola ve tiwotisa tiya: ‘Ina ani nokha ni wa lisima ka Jehovha?’ Malanda mamwani o thembeka a Jehovha a timbimo ta kale, mbimo yimwani ma ti pfite ngu nzila yoneyo.—1 Sam. 1:6-10; Jobe 29:2, 4; Mas. 51:11.

2. I mani wu a nga tsakelwako ngu Jehovha?

² Bhiblia yi tiveka hakubasani ti to vathu vo mbi pelela va nga sikota kumana kutsakelwa ngu Jehovha. Ngu nzila yihi? Ti lava hi kombisa ti to hi ni likholo ka Jesu Kristu ni ku tshumela hi bhabhatiswa. (Joh. 3:16) Ngu nzila yoneyo hi kombisa hakubasani ti to hi tisote ka sionho sathu ni ku hi thembisile Jehovha kumaha kudhunda kwakwe. (Mith. 2:38; 3:19) Jehovha wa tsaka ngutu ngaku hi txi maha toneto kasiku hi va vangana vakwe va hafuhi. Ngaku hi txi maha totshe ti hi nga tikotako kasi kuhetisisa txixambanyo txathu, Jehovha a na hi amukela ni ku hi teka kota vangana vakwe va hafuhi.—Mas. 25:14.

3. Hi na bhula ngu txani ka gondo yiya?

³ Ngu kutxani vamwani va txi pimisa ti to kha va tsakelwi ngu Jehovha? Ngu tihi ti Jehovha a ti mahako kasi ku kombisa ti to wa hi tsakela? Ni ku hi nga tsanisisa kutxani themba yathu ya ti to Jehovha wa hi tsakela?

 NGU KUTXANI VAMWANI VA TXI PIMISA TO KHA VA TSAKELWI NGU JEHOVHA?

4-5. U nga tsaniseka ka ti to txani ngaku u txi tipfa u si nga wa lisima?

⁴ Wungi wathu ku khukhela wananani hi lwisana ni ku ti wona hi si nga ni lisima. (Mas. 88:15) Mwanathu wu a dhanwako ku i Adrián a womba tiya: “Mbimo yotshe ni txi tipfa ni si vhuni txilo. Kukhukhela ni di ngadi mwanana ni maha mkombelo ti to mwaya wangu u va paradhise, hambiku ani ni nga txi tsaniseka ti to ni si faneleki kuva kona.” Tony, mwanathu wu a nga mbi kulela ditshurini a womba tiya: “Vaveleki vangu kha va khali ku ni gela to va ni dhunda mwendo ku va ti guleta ngu ngani. Eto ti ni mahile ni pimisa ti to totshe ti ni nga txi ti maha ti si vhuni txilo.”

⁵ Ngaku u txi thuka u tipfa u si vhuni txilo, khumbula ti to Jehovha ngene a nga kusawula to u mthumela. (Joh. 6:44) Jehovha wa tiwona ti i ku ta tinene ka mmweyo ni mmweyo wathu ni ku wa yi ziva kwati mbilu yathu ni ku nzila yi a hi wonako ngu yona hi nga yona yi athu hi ti wonako ngu yona. (1 Sam. 16:7; 2 Mak. 6:30) Se u nga tsaniseka ti to Jehovha ati tiwombako to u wa lisima ngutu kwakwe ditshuri.—1 Joh. 3:19, 20.

6. Paulo a txi ti pfisa kutxani mbimo yi a nga txi khumbula tiphazamo takwe ta kale?

⁶ Na hi si se gonda ditshuri, vamwani kwathu ti nga maha hi di mahile to kari ati ti ku ngadi ti txi hi maha hi tipfa mnando. (1 Pedro 4:3) Hambi ni vamwani va i ku kale va txi thumela Jehovha ngu kuthembeka ti nga maha va txi lwisana ni ku tipfa mnando ngu tiphazamo ti va nga ti maha. Se awe ko, ina wa tipfa nga Jehovha kha ku divalela? Ka txiemo txonetxo ndinene kukhumbula ti to hambi malanda a Jehovha o thembeka a timbimo ti ti nga pinda ma wonisanile ni matipfelo o fana. Ngu txikombiso, mpostoli Paulo, mbimo si a nga txi khumbula ngu tiphazamo takwe ti txi mmaha e guma mtamo. (Var. 7:24) Ti hakubasani ti to Paulo a di tisote ka sionho sakwe ni ku se a di bhabhatisilwe. Hambiketo, ene a txi ti dhana kota “wa m’dotho ka votshe vapostoli” ni “wo thanga” ka vaonhi.—1 Vak. 15:9; 1 Tim. 1:15.

7. Ngu tihi ti hi fanelako ku ti khumbula?

⁷ Jehovha a thembisa ti to ngaku hi txi tisola ene a na hi divalela. (Mas. 86:5) Se ngaku hi txi tisola ti txi huma mbiluni hi nga tsaniseka ti to Jehovha a womba ditshuri, ene a hi divalete.—Vakl. 2:13.

8-9. Hi nga sikotisa kutxani kuwonisana ni matipfelo o kha hi mahi ati ti nga enela kasi kutsakisa Jehovha?

⁸ Hotshethu hi lava kuthumela Jehovha ngu ha hi nga tikotako ngu kona. Ti nga maha mbimo yimwani hi tipfa hi si mahi ati ti nga enela kasi kumana kutsakelwa ngu Jehovha. Mwanathu wa txisikati wu a dhanwako ku i Amanda a womba tiya: “Ngu mtolovelo ni txi pimisa to kasiku ni tsakisa Jehovha ti txi lava ti to mbimo yotshe ni maha ti ti nga engeteleka. Se makhambi a mangi ni tolovela kumaha to pinda ti ni tikotako. Mbimo yi ni ti tandako na godhola ni kupimisa ti to kha ni tsakelwi ngu Jehovha.”

⁹ Hi nga ma xulisa kutxani matipfelo ati to kha hi sikoti kumaha ati ti nga enela kasi kutsakisa Jehovha? Khumbula ti to Jehovha wa dinganisela. Ene kha hi kombeli kumaha to pinda ati hi nga tikotako kumaha. Ngako hi txi maha mizamo, Jehovha wa ninga lisima totshe ti hi ti mahako ngu ngene. Hahanze keto, awe u nga alakanyisisa ngu sikombiso sa mu ka Bhiblia sa vathu va va nga thumela Jehovha ngu mbilu yotshe. Alakanyisisa ngu Paulo, a thumile ngu kuhiseka a txi tsimbila mipfhuka yo lapha ni kusimeka mabanza a mangi. Kambe mbimo si txiemo txi nga txitxa ka wutomi wakwe a si swi e txhumayela nga ti a nga txi mahisa tona kale. Ina Jehovha a lekile ku ninga lisima ati a nga txi ti maha? Ahim-him. Paulo a simamile e  maha ti a nga txi tikota ni ku Jehovha a mkatekisile. (Mith. 28:30, 31) Ngu ha ku fanako, ati hi tikotako kumaha ka mthumo wa Jehovha ti nga txitxa ngu ku tsimbila ka mbimo. Kambe a txi i ku txa lisima kwakwe txivangelo txi txi hi mahako hi mthumela. Konku a hi wone to i ngu nzila yihi Jehovha a kombisako to wa hi tsakela.

JEHOVHA A TI KOMBISISA KUTXANI TI TO WA HI TSAKELA?

10. Hi nga di ‘pfisa’ kutxani dipswi da Jehovha di txi hi tsakela? (Johani 16:27)

¹⁰ Ngu kuthumisa Bhiblia. Jehovha a lava tinzila to kombisa vathu vakwe ti to wa va randa ni ku wa tsaka ngu ti va ti mahako. Bhiblia yi womba-womba ngu makhambi mambidi aya Jehovha a nga gela Jesu ti to i ti mwanana wakwe wo randeka ngutu awu a nga txi mtsakela. (Mat. 3:17; 17:5) Ina u ndina ti tsakela kupfa Jehovha a txi womba mapswi yawa ngu ngawe? Nyamsi, Jehovha kha womba-wombi ni nathu ngu ku kongoma, kambe ngu kuthumisa Bhiblia. Hi nga “pfa” dipswi da Jehovha di txi hi tsakela mbimo yi hi gondako muni wa ti evhangeli ta Jesu. (Lera Johani 16:27.) Jesu a etetede ngu kupelela wuthu wa Tate wakwe Jehovha. Se mbimo yi hi gondako mapswi o tsakisa aya Jesu a nga gela vagondiswa vakwe, hi nga alakanya i di Jehovha a hi gelako apune mapswi oneyo.—Joh. 15:9, 15.

11. Ngu kutxani sikarato si si kombisiko ti to kha hi ngadi hi tsakelwa ngu Jehovha? (Jakobe 1:12)

¹¹ Ene wa hi ninga sotshe si hi si lavako. Jehovha ati emisete ku hi vhuna, ngu txikombiso wa hi khatalela ngu didhawa da nyama. Mbimo yimwani Jehovha a nga tumelela ti to hi wonisana ni sikarato so kari nga ti ti nga mahekela Jobe. (Jobe 1:8-11) Kambe kuwonisana ni sikarato kha ti lavi kuwomba to kha hi ngadi hi tsakelwa ngu Jehovha. Kuhambana nito, mkhanjo wo kombisa lirando lathu ngu Txizimu ni ti to ha txi themba. (Lera Jakobe 1:12.) Mbimo yi hi wonisako ni sikarato hi na wona nzila yi Jehovha a hi randako ngu yona ni ku hi vhuna ku hi tsanisela.

12. Hi nga gonda txani ka txikombiso txa Dmitrii?

¹² Wona ati ti nga maheka ngu mwanathu wu a dhanwako ku Dmitrii a zumbako Asiya. A luzeketwe ngu mthumo ni ku a zumbile mitxima ya yingi asi mani wumwani. A kombisile kuthemba kwakwe Jehovha ngu ku sunga kupateka ngutu ka mthumo wo txhumayela. Ku pindile mitxima ya yingi ni ku a simamile a si mani  mthumo. A gwitile a ñolwa ngu malwati a hombe a ha koza a si tikoti ku khukha ha mbhedhuni. A khatile kupimisa ti to i si nga ngadi mwamna mwendo tate wa mnene ni ku a khatile ku tiwotisa ti to ina Jehovha a txi ngadi a txi mtsakela? Ka wusiku wo kari, mwanana wakwe wa dihorana a tsute kwartu kwakwe a di ni difoliya adi di ngadi ni m’bhalo wa Isaya 30:15 awu wu ku: “Kuzumbisekani ni mu ka kuthemba ku ndina maneka mtamo wanu.” A mningile a txi m’gela tiya: “Papa, ngaku u txi tipfa u di gumile mtamo khumbula ndimana yiya.” Dmitrii a ti tumbute ti to, ngu kuvhunwa ngu Jehovha, mwaya wakwe wu ti ni sa kuambala, sa kudya ni wukhalo wo zumba ka wona. Ene a womba tiya: “Ati ni ngadi fanete ni timaha i di kuzumba ni di rute ni kusimama ni themba Txizimu txangu.” Ngaku u txi wonisana ni txikarato atxi txi fanako, tsaniseka ti to Jehovha a na ku khatalela ni ku kuvhuna ku u tsanisela.

13. Mba mani va Jehovha ava thumisako kasi kukombisa ti to wa hi tsakela?

¹³ Ngu kuthumisa vanathu. Jehovha a nga thumisa vanathu kasi ku kombisa ti to wa hi tsakela. Ngu txikombiso, a nga thumisa vamwani kasiku va hi tsanisa ngaku ti txi laveka. Ngu tona ti ti nga humelela mwanathu wa txisikati awu a zumbako Asiya mbimo yi a ngadi ni txitrese. A luzeketwe ngu mthumo ni ku a txi lwala ngutu. Mwamna wakwe a mahile txionho txa hombe ni ku a lekile kuva didhota. Ene a womba tiya: “Ni si ti pfisisi ti to ngu txani tile ti nga txi maheka. Ni khatile kupimisa ti to ni ti mahile phazamo yo kari ni ku Jehovha a ti ni henyete.” Mwanathu wuwa a mahile mkombelo ka Jehovha a txi kombela ti to e mkomba to wa m’dhunda ngu ditshuri. Ngu tihi ti Jehovha a nga ti maha? Ene a womba tiya: “Madhota a dibanzani kwangu ma bhute ni nani ni ku ni tsanisekisa ti to Jehovha wa ni dhunda ngutu. Ku di pindile mbimo a tshumete a  kombela tximwani txivhuno ka Jehovha. Ene a womba tiya: “Ka ditshiku donedo ni nga maha mkombelo ni amukete dipasi da vanathu va dibanzani. Mbimo yi ni nga txi lera dipasi dile do thavelela ni ti woni to Jehovha ati ni engisile.” Ngu ditshuri, makhambi a mangi Jehovha wa kombisa ti to wa hi tsakela ngu kuthumisa mapswi o thavelela aya vamwani va hi gelako.—Mas. 10:17.

14. Ngu tihi tinzila timwani ti Jehovha a kombisako ngu tona ti to wa hi tsakela?

¹⁴ Jehovha a tshumela a kombisa ti to wa hi tsakela ngu kuthumisa vanathu kasiku va hi ninga sialakanyiso ngaku ti txi laveka. Ngu txikombiso, Jehovha a thumisile mpostoli Paulo ku e bhala 14 wa mapasi ya ma nga huhutelwa a txi bhalela mabanza. Ka mapasi onewo, Paulo a ningete sialakanyiso so kongoma ngu nzila ya lirando. Kambe ngu txani Jehovha a di huhutete Paulo kubhala sialakanyiso soneso? Nguku Jehovha i Tate wa lirando ni ku a kawuka vanana vakwe ‘avale a va randako.’ (Mav. 3:11, 12) Se ngaku hi txi amukela sialakanyiso asi si nga seketelwa amu ka Bhiblia, kha ti wombi ti to Jehovha kha ngadi e hi tsakela kambe ti kombisa ti to ene wa hi randa. (Vaheb. 12:6) Ngu tihi tinzila ati Jehovha a kombisako ngu tona ti to wa hi tsakela?

SIKOMBISO SIMWANI SA TI TO JEHOVHA WA HI TSAKELA

15. Mba mani va Jehovha ava ningako moya wakwe wo sawuleka ni ku eto ti hi tsanisekisa ka ti to txani?

¹⁵ Jehovha a ninga moya wakwe wo sawuleka avale ava tsakelako. (Mat. 12:18) Tiwotise tiya: ‘Ina na sikota ku kombisa fanelo yimweyo ya mihando ya moya ka wutomi wangu?’ Ina wa timisela ngutu kupinda mbimo yi u ngadi ngadi kugonda ditshuri? Mbimo yi u yako masoni u kombisa tifanelo ta Jehovha, u naya masoni u tsaniseka ti to ene wa ku tsakela!—Wona dikwadro adi di kukhene “ Mihando ya moya i . . . ”

16. Mba mani va Jehovha ava thumisako kasi kutxhumayela mahungu a manene ni ku u ti pfisa kutxani ngu kuziva toneto? (1 Vatesalonika 2:4)

¹⁶ Kasi kuhetisisa mthumo wa lisima ngutu wo txhumayela mahungu a manene Jehovha a thumisa avale ava tsakelako. (Lera 1 Vatesalonika 2:4.) Wona ti mwanathu wa txisikati wu a dhanwako ku i Jocelyn a nga vhuniswa tona ngu ku pateka ka mthumo wo txhumayela. Ditshiku dimwani Jocelyn a wukile a di karatekile ngutu. A womba tiya: “Ni txi tipfa ni si nga  wa txilo ni ku ni di gumile mtamo. Kambe ni ti nyaphandule ni ku i di ditshiku dangu do ya kutxhumayelani. Se ni mahile mkombelo ni khukha ni tsula.” Ka mixo yile Jocelyn a zivile Mary, awu a nga tumela gondo ya Bhiblia. Ku di pindile mitxima yo kari Mary a wombile ti to, mbimo yi Jocelyn a nga txi peka ditimba ene a txo maha mkombelo ka Txizimu a txi kombela Txivhuno. Jocelyn a gondile txani ka txiperiyensiya txiya? Ene a womba tiya: “Ni ti pfite nga Jehovha o ni gela tiya: ‘Na tsaka ngutu ngu ngawe’” Ditshuri ti to hi nga votshe va no amukela mbimo yi hi txhumayelako. Kambe hi nga tsaniseka ti to Jehovha wa tsaka ngutu mbimo yi hi mahako totshe ti hi nga ti kotako kasi kubhulela vamwani mahungu a manene.

17. U gondile txani ka ti Vicky a nga tiwomba mayelano ni mterulo? (Masalmo 5:12)

¹⁷ Jehovha a ningete mterulo kasi kuvhuna avale ava tsakelako. (1 Tim. 2:5, 6) Se i di ti to mbilu yako kha yi tsaniseki to Jehovha wa ku tsakela hambi u di ni likholo ka mterulo ni ku u di bhabhatisilwe, khumbula ti to kha ha fanela ku themba mapimiselo athu hi pune, kambe hi fanete ku themba Jehovha. Kwakwe, avale va ku ni likholo ka mterulo va dhanwa to valulami ni ku a thembisa ku va katekisa. (Lera Masalmo 5:12; Var. 3:26) Mwanathu wa txisikati wu a dhanwako ku i Vicky a li woni lisima lo alakanyisisa ngu mterulo. Ene a womba tiya: “Ni tumbute ti to Jehovha a di ni timiselete kudingana mbimo yo lapha. Kambe ti txo fana ni ku ni txo gela Jehovha ni txi khani: ‘Awe khu na ku randa m’thu wo ngani. Digandelo da mterulo da mwanana wako kha di na ku sikota ku fenengeta sionho sangu.’” Mbimo yi Vicky a nga khata kualakanyisisa ngu lisima la mterulo, a khatile ku tipfa a txi randwa ngu Jehovha. Nathu hi nga tipfa hi txi randwa ni ku tsakelwa ngu Jehovha ngaku hi txi alakanyisisa ngu mterulo.

18. Hi nga tsaniseka ka txani ngaku hi txi simama hi randa Tate wathu wa nzumani?

¹⁸ Ditshuri ti to hambi u txo maha mizamo yo thumisa totshe ti u nga tigonda ka gondo yiya, mbimo yimwani u nga godhola ni ku kanakana to wa tsakelwa ngu Jehovha. Ngaku eto ti txi maheka, khumbula ti to Jehovha a tsakela “avale va mrandako.” (Jak. 1:12) Ngu toneto, simama u tshuketa ka Jehovha ni kuzama kuwona tinzila ti a kombisako ngu tona to wa ku tsakela. Mbimo yotshe khumbula ti to ‘Txizimu kha txi nga kule ni mmweyo ni mmweyo wathu.’—Mith. 17:27.