Mbimo yi hi ti lulamiselako kasi ku hi gonda, hi nga ti wotisa tiya: ‘Ngu tihi ati ni lavako ku ti gonda?’ Kambe hi fanete kukhumbula ti to, ku va ni makungo o lava kugonda timhaka to kari kha ti lavi kuwomba ti to kha ti ngaho ta tiphya ati Jehovha a lavako ku hi ti gonda. Ngu tihi ati hi nga ti mahako kasi ku hi engisa ati Jehovha a lavako ku hi gondisa?

Maha mkombelo u kombela wutxhari. Kombela Jehovha ku e ku vhuna kuwona ati ene a lavako ku u ti gonda konku. (Jak. 1:5) U nga eneliseki ngu ti u ti zivako.—Mav. 3:5, 6.

Tumelela ti to mtamo wa Dipswi da Txizimu wu thuma ka wutomi wako. “Dipswi da Txizimu da hanya.” (Vaheb. 4:12) Ngu toneto, yotshe mbimo yi u lerako Bhiblia yi na kugondisa timhaka ta tiphya ni ku kuvhuna ngu tinzila to hambana-hambana, kambe toneto ti no maheka ngaku u txi tumela kugonda ati Txizimu txi lavako ku kugondisa.

Ninga lisima totshe ati Jehovha a ku gondisako. Sakudya sa moya asi Jehovha a hi ningako si fana ni ‘m’buso wa sihari so nona.’ (Isaya 25:6) U nga leke kugonda misungo mhaka ayi u pimisako ti to khu na mbi yi tsakela ku yi gonda. Leka Jehovha e kuvhuna ku u va m’thu wa tshuku, se toneto ti na kuvhuna ku u tsakela ati ene aku gondisako.