1-2. Kota vathu va Txizimu, nji txani txi hi mahako hi zumba hi di tsakile? (Jakobe 1:22-25)

 JEHOVHA ni mwanana wakwe va lava ti to hiva ni litsako. M’bhali wa Masalmo 119:2 a wombile tiya: “Va katekile avale va xayisako sileleto sakwe, va mlavako ngu yotshe mbilu.” Jesu a tshumete e thembisa tiya: “Va katekile ava va engisako dipswi da Txizimu, va txi di vekisa.”—Luka 11:28.

² Kota vakhozeli va Jehovha athu hi zumba hi di tsakile. Ngu kutxani? Hi ni sivangelo sasingi, kambe txo khata ngu ku hi gondako Bhiblia ditshiku ni ditshiku, ni ku maha mizamo yo thumisa ati hi ti gondako.—Lera Jakobe 1:22-25.

3. Ngu kutxani i di ta tinene kuthumisa ati hi ti gondako ka Dipswi da Txizimu?

³ Ku ni wuyelo ya hombe ngu kuva “valondeteli va dipswi.” Ngu txikombiso mbimo yi hi thumisako ati hi ti gondako a mu ka Dipswi da Txizimu hi tsakisa Jehovha, ni ku eto ti hi maha hi va ni litsako. (Ekl. 12:13) Ngako hi txi hanya ni kutsimbitisana ni ti hi ti gondako ka Dipswi da Txizimu, mwaya wathu wa tsaka ni ku ha va ni wuxaka wo tsana ni vanathu. Eto ti nga maha u di tiwoni ti txi humelela ka wutomi wako. Hahanze keto ha vayilela sikarato asi si manwako ngu vathu ava va si thumeliko Jehovha. Ti hakubasani ti to ha tumelelana ni ti Mkoma Dhavhidha a nga ti womba. Msana ko embelela mayelano ni wulamuli ni milayo ya Jehovha ene a hokelete magwito ya ti to: “Awule a yi xayisako wa mana hakhelo.”—Mas. 19:7-11.

4. Ngu kutxani ti txi hi karatela kugonda ni kuthumisa ati hi ti gondako amu ka Bhiblia?

⁴ Ti hakubasani ti to hi nga mbimo yotshe ti hehukako kugonda Bhiblia ni kuthumisa ati hi ti gondako. Hi zumba hi di ñolekile ngu mithumo ya ditshiku ni ditshiku kambe ti lava hi tiha mbimo otshe masiku yo lera ni kugonda Bhiblia kasi kupfisisa ati Jehovha a lavako ku hi ti maha. Se ka gondo yiya hi na wona  tinzila ati ti nga hi vhunako kugonda Bhiblia ditshiku ni ditshiku. Hi na tshumela hi wona ati ti nga hi vhunako kualakanyisisa ngu ti hi ti gondako ni ku ti thumisa ka wutomi wathu.

TIHI MBIMO YO GONDA DIPSWI DA TXIZIMU

5. Nji txani txi hi mahako ti to hi zumba hi di ñolekile?

⁵ Vathu vavangi ava va thumelako Jehovha va zumba va di ñolekile. Ti lava hi heta mbimo yayingi hi txi maha timhaka ta lisima ati Bhiblia yi nga womba ti to hi fanete hi ti hetisisa. Ngu txikombiso, wungi wathu ti lava hi thuma kasi ku hi ti khatalela ni kukhatalela timwaya tathu. (1 Tim. 5:8) Wungi wa vanathu ti lava ve khatalela maxaka awe malwalako mwendo ma nga kula ngu tanga ni ku hotshethu hi fanete hi khatalela dihanyo dathu, totshe eto ti teka mbimo. Hahanze ka wutixamuleli wuwa athu hi ni timhaka ta lisima kasi ku hi timaha dibanzani. Tximwetxo txa lisima ngutu atxi hi fanelako ku txi maha ngu pateka ka mthumo wo txhumayela. Hambiku u ku ni wutixamuleli wo tala, u nga si kotisa kutxani ku tiha mbimo yo lera Bhiblia ditshiku ni ditshiku, kualakanyisisa ngu ti u ti gondako, ni ku ti thumisa ka wutomi wako?

6. U nga maha txani kasiku kulera Bhiblia kuva mhaka ya lisima ngutu ka wutomi wako? (Wona ni mfota.)

⁶ Kulera Bhiblia timweto ta ti “i ku ta tinene ngutu” kwathu kota Makristu ngu toneto ti lava hi tsaniseka ti to ha ti hetisisa. (Vaf. 1:10) Dibhuku do khata da Masalmo di txi womba-womba ngu m’thu awu a ku ni litsako di womba tiya: “Ene a tsakela mlayo wa MKOMA a zumba a txi wu alakanya wusiku ni mitshikari.” (Mas. 1:1, 2) Ti hakubasani ti to eto txialakanyiso txa ti to hi fanete hi tiha mbimo kasiku hi lera BhibliaKambe ngu yihi mbimo ya yinene ya ku hi lera Bhiblia? Eto tiya ngu txiemo txa m’thu ni m’thu. Kambe txa lisima ngutu ngu ti to hi fanete kusawula mbimo ayi yi no hi vhuna kugonda Bhiblia ditshiku ni ditshiku. Mwanathu awu a dhanwako ku i Victor a womba tiya: “Ni dhunda kulera Bhiblia ni mixo. Kuwomba ditshuri kha ni ti dhundi kuwuka ni mixo ngutu, kambe ka mbimo yoneyo tidotho ati ti nga ni tsulupetako. Ka mbimo yoneyo, kha ku nga ni to tala ati ti nga ni jujako msungo. Se ta ni hehukela kuveka mapimo ka ti ni  tigondako.” Ti nga maha nawe u di ka txiemo atxi txi fanako. Ti wotise tiya: ‘Ngu yihi mbimo ya yinene yo ni lera Bhiblia?’

ALAKANYISISA NGU TI U TIGONDAKO

7-8. Ngu tihi ati ti nga hi phazamisako mbimo yi hi lerako Bhiblia? Txhamusela.

⁷ Mbimo yimwani hi nga gwitela kulera timhaka tatingi hi si pfisisi txilo. Ina awe ti di nga ku mahekela ti to u lera to maha se ngu mbimo yimwani ti kukaratela kukhumbula ti u nga ti lera? Eto ta hi mahekela hotshethu. Txo mbi tsakisa ngu ti to eto ti nga hi mahekela mbimo yi hi lerako Bhiblia. Ti nga maha u di ni makungo o lera makapitulo o kari a mu ka Bhiblia otshe masiku. Eto ndinene. Athu ngu ditshuri ti lava hi tivekela makungo ni kumaha mizamo yo ma hetisisa. (1 Vak. 9:26) Kambe kulera Bhiblia ova makhato ni ku timhaka tatinene ngutu, kambe ova makhato dwe. Ti lava hi maha to pinda kulera Bhiblia dwe ngako hi txi lava kuwuyelwa ngu ti yi ti gondisako.

⁸ Mati ona ngu nzumani nga manene kasiku mindonga yi mana kuhanya, kambe ngako matxiwa ngutu ngu mbimonyana ya yidotho mafu ma tala me va ni madhaka. Ngako toneto ti txi maheka mati ya ma simamako matxiwa kha ma nga ni txivhuno. Ndinene ku mati mewa kudotho-kudotho nguku ma na bela mafuni ni kuvhuna mindonga ti to yi kula. Ngu ha kufanako hi fanete kuvayilela kugonda Bhiblia ngu txikuluveta aha koza hi si tihi mbimo yo alakanyisisa, kukhumbula ni kuthumisa ati hi ti gondako.—Jak. 1:24.

9. Ngu tihi ti hi fanelako ku ti maha ngaku hi txi tumbula ti to hi lera Bhiblia ngu txikuluveta?

⁹ Ina ti di nga ku humelela ti to mbimo yi u lerako Bhiblia u tumbula ti to u lera ngu txikuluveta? Ngu tihi ti u nga ti mahako? Lera ngu mthuthalo kasi ku u vhuneka ka ti u ti lerako, ti nga ku juje msungo wo emanyana dwe u alakanyisisa ngu ti u ti lerako. Ti nga maha u engetelanyana mkama ka gondo yako mwendo kulera mavhersikulo nyana a madotho kasi ku u mana mbimo yo alakanyisisa ngu ti u nga ti lera. Victor a womba tiya: “Ka leyitura ya mina ya Bhiblia ngu mtoloveto ni lera kapitulo yimweyo ngu ditshiku. Aku ni lerako Bhiblia ni mixo dotshe ditshiku na sikota kualakanyisisa  ngu ti ni nga ti lera.” Ti singa ni mhaka ni ti to hi lera ku hokela hani hi fanete kulera ku mthuthalo kasi ku hi mana kualakanyisisa ngu ti hi ti lerako ni kutshumela ti hi vhuna.—Mas. 119:97; wona dikwadru di di ku “ Siwotiso asi si nga kuvhunako.”

10. Ningela txikombiso txa nzila yi u nga thumisako ngu yona ati u ti gondako. (1 Vatesalonika 5:17, 18)

¹⁰ Ti singa ni mhaka ni mkama wu u sawulako mwendo mbimo yi u yi hetako u txi lera Bhiblia pimisa to u nga ti thumisa ngu nzila muni ati u ti lerako. Mbimo yi u lerako txiengenyana txa mu ka Bhiblia ti wotise tiya: ‘Ni nga ti thumisa ngu nzila muni konku ati ni ti gondako ni ka mbimo ayi yi tako?’ Ngu txikombiso hi nga alakanya kulera kwako ka Bhiblia ku txi pata 1 Vatesalonika 5:17, 18. (Lera.) Msana ko gonda mavhersikulo yawa u nga ema u alakanyisisa ngu ti to makhambi ma nga hi u mahako mkombelo ni ku mikombelo yoneyo njo tshima kuhokela hayi. U nga tshumela u ema u alakanyisisa ngu timhaka ti u kombisako kubonga ka tona. Ti nga maha u sunga ku bonga Jehovha ngu timhaka tiraru to kongoma. Ngako u txi tiha mbimo yo alakanyisisa ngu ti Bhiblia yi ti gondisako eto ti na kuvhuna kupfisisa Dipswi da Txizimu ni kumaha ati di ti gondisako. Ni ku ngaku ditshiku ni ditshiku u txi thumisa ati u ti gondako mu ka Bhiblia ngu kutsimbila ka mbimo awe u na va dilanda da dinene ngutu da Jehovha. Se nji txani txi u fanelako ku txi maha ngaku u txi mana tatingi ti u fanelako kutshukwatisa?

TIVEKELE MANKUNGO AYA U NO SIKOTA KU MA HETISISA

11. Ngu kutxani mbimo yimwani u nga tipfako u di godhote? Ningela txikombiso.

¹¹ Ti nga maha u godhola mbimo yi u lerako Bhiblia u tumbula ti to ku ni tatingi ti u fanelako kutshukwatisa. Ngu txikombiso, hi nga alakanya u txi gonda kapitulo yimweyo ngu ditshiku ya dibhuku da Jakobe, se koneho u lera mayelano ni ku vayilela mibhando. (Jak. 2:1-8) U wona ti to u fanete u tshukwatisa ka nzila yi u ñolako ngu yona vamwani se u sunga ku maha kutxitxa ko kari. Eto ndinene ngutu. Se ka ditshiku di di londiselako u gonda ngu tindimana ati ti kombisako lisima lo tiwonela ka ti u ti wombako. (Jak. 3:1-12) Se u khumbula ti to dikhambi dimwani u di nga womba-womba timhaka ti ti si akiko. Konku u sunga ti to u na womba-womba timhaka ati ti akako. Kambe ka ditshiku adi di londiselako u mana txialakanyiso mayelano ni ti to u tiwonela ti to u si ve mngana wa ditiko. (Jak. 4:4-12) Se konku u tumbula ti to u fanete u sawula kwati asi u ti hungatako ngu sona. Ku do pinda nyana masiku a madotho kambe u tumbute ti to ku ni tatingi ati u fanelako ku ti tshukwatisa.

12. Ngu kutxani u sa fanela kugodhola mbimo yi u lerako Bhiblia u tumbula ti to ku ni mu u fanelako u tshukwatisa? (Wona ni txhamuselo ya hahatshi.)

 ¹² Ngako u txi tumbula ti to tingi ti u fanelako ku ti tshukwatisa, u nga godhole. Eto ti kombisa ti to wa ti veka hahatshi ni ku u ti emisete kutshukwatisa. Ngaku hi di vo tiveka hahatshi hi na gonda mibhalo ngu txikongomelo txo wona amu hi nga tshukwatisako kona. a U nga divali ti to, “kuambala m’thu wamphya” timhaka ati hi fanelako kusimama hi ti maha nguku mbimo yotshe hi ni ti hi nga tshukwatisako ka tona. (Vakl. 3:10) Nji txani txi nga kuvhunako ti to u simama u va m’londeteli wa Dipswi da Txizimu?

13. U nga ti vekela ngu nzila muni makungo o thumisa ati u ti gondako amu ka Dipswi da Txizimu? (Wona ni mfota.)

¹³ Hahanze ko lava kumaha kotshe kutxitxa ka ti u nga ti gonda ngu dikhambi dimwedo, zama kuthumisa timweto mwendo timbidi ta kona. (Mav. 11:2) Zama kumaha tiya: Maha lixta ya totshe ti u fanelako kutshukwatisa ka tona, se u sawula timweto mwendo timbidi ati u no khata ngu tona u ti tshukwatisa. Kambe ati timwani u ti lekela mbimo ayi yi tako. Se ngako lixta i di ya hombe, ngu tihi ati u nga khatako ngu tona?

14. Ngu yahi makungo aya u nga khatako ngu ona?

¹⁴ U nga sawula kukhata ngu makungo aya u ma wonako ti to kha ma karati ku ma hokelela. Mwendo u sawula kukhata ngu kuzama kutshukwatisa ati i ku ta lisima ngutu kwako. Msana ko u di tumbute makungo ako, maha wuxolisisi ka mabhuku athu. Awe u nga thumisa Índice das Publicações da Torre de Vigia mwendo Mkongomiso wa Tifakazi ta Jehovha wo maha wuxolisisi. Maha mkombelo mayelano ni makungo ako, u kombela Jehovha e kuvhuna ‘kuxuva ni kuthuma kuranda kwakwe.’ (Vaf. 2:13) Se ngu  msana u khata thumisa ati u nga tigonda. Ngaku u txi sikota kuhetisisa makungo ako o khata eto ti na kukuzeta ku ya masoni u maha mizamu yo hetisisa mamwani makungo. Mbimo yi u wonako ti to u koti kumaha kutxitxa ko kari mwendo kutshukwatisa ka fanelo yo kari ya Wukristu, eto ti na kukuzeta ku ya masoni u lava kumaha kutxitxa ni ku ti na kuhehukela kuhetisisa makungo aya ma londiselako.

TUMELELA DIPSWI DA TXIZIMU “DI THUMA KWAKO”

15. Ngu kutxani vathu va Jehovha va txi hambana ngutu ni vathu vamwani ava va lerako Bhiblia? (1 Vatesalonika 2:13)

¹⁵ Vamwani vathu va womba ti to se va lerile Bhiblia makhambi a mangi. Kambe ina vona ngu ditshuri va kholwa ka Bhiblia? Ina va hanya mayelano ni ti Bhiblia yi ti gondisako? Ahim-him. Vathu vavangi kha va londisi ati Bhiblia yi ti gondisako. Kambe ka malanda a Jehovha ta hambana ngutu. Kufana ni Makristu o khata, athu ha tumela Bhiblia “kota Dipswi da Txizimu m’pela.” Ni ku txa lisima ngutu, athu hi maha totshe ati hi nga ti kotako kasi kuthumisa sialakanyiso sa mu ka Bhiblia ka wutomi wathu.—Lera 1 Vatesalonika 2:13.

16. Nji txani txi no hi vhuna ti to hi va valondeteli va Dipswi da Txizimu?

¹⁶ Hi nga yotshe mbimo ti hehukako kulera ni kuthumisa ati dipswi da Txizimu di ti wombako. Ti nga maha txikarato i di kumana mbimo yo lera mwendo kulera ngu txikuluveta hi si alakanyisisi ngu ti hi ti lerako. Mwendo txikarato i nga va kutipfa hi txi nemelelwa ngu kumana timhaka tatingi ati hi fanelako kutshukwatisa ka tona. Ti si nga ni mhaka ni ti to ngu txihi txikarato txako, awe u na sikota kutshukwatisa ngu kuvhunwa ngu Jehovha. Tiemisele kuamukela txivhuno txakwe, ni kwambi ti maha m’engiseli awu ti m’hehukelako ku e ti divala, kambe u va m’londeteli wa Dipswi da Txizimu. Ti hakubasani ti to mbimo yi hi yako hi lera Bhiblia ni kuthumisa ati hi ti lerako ka wutomi wathu, eto ti na hi maha hi tsaka ngutu.—Jak. 1:25.