Ditshuri ngu ti to 70 wa valondeteli va ti walo mbimo yi Jesu a nga maha Txilalelo txa Mkoma kambe eto kha ti wombi ti to va ti ko m’leka Jesu mwendo ku Jesu asi ngadi a txi va tsakela. Jesu a to lava kuva basi ni vapostoli vakwe ka mbimo yile.

Avale va 12 ni vale va 70 votshe i di valondeteli va Jesu. Kukhata Jesu a sawute 12 wa vavamna hagari ka valondeteli vakwe eva dhana ti to vapostoli. (Luka 6:12-16) Ene ati Galileya mbimo yi a nga “dhana ava va 12” ni ku va “rumela ti to ve ya txhumayela ni ku kuhanyisa valwati.” (Luka 9:1-6) Ku di pindile mbimo a di khe Judheya, Jesu “a to sawula vamwani va 70 e va rumela vambidi-vambidi.” (Luka 9:51; 10:1) I ku tiya, Jesu ati ni valondeteli ka makhalo o hambana-hambana amu didungula di nga txi txhumayelwa.

Vajudha ava va ngadi mahile vagondiswa va Jesu ti txi lava ve maneka ka m’buso wa Paxkwa ya dilembe ni ku ti nga maha va txi pateka kumweko ni timwaya tawe. (Eks. 12:6-11, 17-20) Msananyana na Jesu a si se fa, va tsute Jerusalema. Kambe Jesu kha nga dhana votshe vagondiswa vakwe vo fana ni Vajudheya ;Vagalileya ni Vapereya kasiku e maha m’buso wa hombe wa Paxkwa. Ti hakubasani ti to Jesu atxi lava kuva ni vapostoli vakwe dwe ka tximahakalo txile. Ene a va gete tiya avale va 12: “Kale ni di ti emete kudya Paxkwa yiya ni nanu, ni si nzi kuxaniswa.”—Luka 22:15.

Jesu ati ni sivangelo so pfala so maha toneto. I singa kale ene adi na fa kota “Txinvutana txa Txizimu atxi txi thavisako sionho sa ditiko.” (Joh. 1:29) Jesu adi na fela Jerusalema, aha kukhukhela kale ku nga txi hiswa magandelo ka Txizimu. Paxkwa yi txi khumbutisa Vaisrayeli ati Jehovha a ngadi mahile kasi kuva khulula Egipta. Kambe digandelo da Jesu di di nava da hombe ngutu. (1 Vak. 5:7, 8) Di ti na maha ti to 12 vapostoli veva makhato ya dibanza da Wukristu. (Vaef. 2:20-22) Txo xamatisa ngu ti to didhoropa do sawuleka da Jerusalema di ti “ni digumi da makhato a kuaka ni mambidi” amu ku nga bhalwa “matina a digumi ni mambidi, a Vapostoli va Digumi ni vambidi va Txinvutana.” (Mtu. 21:10-14) Eto ti kombisa ti to vapostoli vo thembeka va di nava ni mthumo wa lisima ngutu ka kuhetiseka ka makungo a Txizimu. Ngu toneto ta pfisiseka kuva Jesu adi lavile kuva navo ka Paxkwa yo gwita ni ka Txilalelo txa Mkoma.

Ava va 70 ni vamwani vagondiswa va Jesu va singa kumweko nayo ka tximahakalo txiya txo gwita. Hambiketo votshe vagondiswa va va nga txi thembeka va di na londola wuyelo ya Txilalelo txa Mkoma. Votshe vagondiswa va ngava vasawuleki ngu kutsimbila ka mbimo ni vona va di na pateka ka txitumelelano txa mfumo awu Jesu a nga womba-womba ngu wona ka vagondiswa vakwe ka wusiku wakwe wo gwita.—Luka 22:29, 30.