Ati vamwani va ti pimisako mayelano ni mkombelo
“Mbimo yi ni mahako mkombelo, ni tipfa nga Txizimu txi didhawani kwangu, txi txi ni ñola ngu diwoko, txi txi ni kongomisa ngako ni txi tipfa ni di mwalalekile, ni si tizivi ti to ni na maha txani.”—MARÍA.
“Msikati wangu a fite msana ka 13 wa malembe a txi lwisana ni câncro. Ni txi khumbula kumaha mkombelo ka Txizimu ditshiku ni ditshiku. Ni txi ti pfisisa ti to txona txi ti ni engisa ni kupfa kupanda kwangu. Eto ti txi ni ninga kurula.”—RAÚL.
“Mkombelo i ningo ya lisima ya Txizimu ka vathu.”—ARNE.
Ka María, Raúl, Arne ni vamwani vo tala, mkombelo i ningo yo sawuleka. Ngu konaha ka mkombelo, vona va tipfa ti to va nga womba-womba ni Txizimu, ve txi bonga ni ku kombela txivhuno ka txona. Vona va themba ngu mbilu yawe yotshe ka mapswi ya Bhiblia aya ma ku: “Kuthemba ku ni ku nako masoni ka Txizimu ngu kuwa: Ngako hi txi txi kombela txo maha, madingano ni kuranda ka Txizimu, txa hi engisa.”—1 Johani 5:14.
Kambe vathu vo tala va tipfa ti txi karata kukholwa ka ti Bhiblia yi ti gondisako mayelano ni ku maha mkombelo ka Txizimu. Steve a womba ati a nga txi ti pimisa mayelano ni mkombelo: “Mbimo yi ni nga ti ni 17 wa malembe ni luzeketwe ngu vangana vararu, mmweyo a fite ka acidente ya mmovha vamwani va vambidi vatxisikati va bhwabhwamete matini.” Ngu tihi ti Steve a nga maha msana keto? “Ni mahile mkombelo ni wotisa Txizimu ti to ngu konaha ka txani tile ti di humelete, kambe kha na mana xamulo. Se ni pimisile tiya: ‘Ngu kutxani ni txi maha mkombelo?’” Kufana ni Steve, vavangi va pimisa ti to mikombelo yawe kha yi xamulwi, se va tiwotisa ti to ina ti ni txivhuno kumaha mkombelo?
Kambe etxo hi nga txona basi txivangelo txi mahako vo tala ve pimisa ti to kha ti na txivhuno kumaha mkombelo. Vamwani va pimisa ti to, aku Txizimu txi zivako totshe, kha ti sungi ku athu hi maha mkombelo hi txi gela mayelano ni sikarato sathu mwendo kukombela txo kari.
Vamwani vathu va pimisa ti to Txizimu kha txi lavi kuengisa mikombelo yathu ngu mhaka ya to kari to biha ati va nga ti maha ka mbimo ayi yi nga pinda. Jenny a txhamusela tiya: “Ani na tipfa mnando ni ku tisola ngu konaha ka timhaka to biha ati ni nga ti maha. Ngu toneto, ni ti pfa ni si fanelwi kuengiswa ngu Txizimu.”
Se awe ko? U ti pfisa kutxani ngu mkombelo? Ngako u di tipfite ngu nzila yiya, u na tsaka ngutu ngu ziva ati Bhiblia yi ti wombako mayelano ni mkombelo. Athu hi nga themba ati Bhiblia yi ti wombako. a Yona yi nga hi vhuna ku mana tixamulo ta siwotiso so hambana-hambana so fana ni siya:
-
Ina ngu ditshuri Txizimu txa engisa mikombelo yathu?
-
Ngu kutxani mikombelo yimwani yi si xamulwi?
-
Ni fanete kumaha txani kasi ku Txizimu txi engisa mikombelo yangu?
-
Mkombelo wu nga ni vhunisa kutxani?
a Mikombelo ya yingi ya malanda o thembeka a Txizimu yi bhatwe amu ka Bhiblia kupata ni mikombelo ya Jesu Kristu. Mibhalo ya Txihebheru, yi ziwako kota Testamentu ya Kale yi ni konamu ko pinda 150 wa mikombelo.
