“Awe wa engisa mikombelo yathu se votshe va ta kwako.”—Masalmo 65:2.

Vathu vamwani va maha mkombelo hambi va si kholwi ti to ku ni wu a wu engiselako. Vona va maha toneto nguku va pimisa ti to kuwomba matipfelo awe mwendo ku ti phofula ka mkombelo ta vhuna ku u tipfa kwati. Kambe txikongomelo txo maha mkombelo hi nga kulava ku hi tipfa kwati kasi ku hi kota kuwonisana ni sikarato sathu. “Jehovha a a hafuhi ka votshe vale va m’dhanako; ka votshe vale va m’dhanako ngu ditshuri. . . . A na engisa kudila kwawe, kambe a va hanyisa.”—Masalmo 145:18, 19, NM.

Se, hi nga tsaniseka ti to Jehovha Txizimu wa engisa mikombelo ya malanda akwe. Ngu lirando, a hi tsanisekisa tiya: “Mi na ni dhana mi txi khongela kwangu, se ani ni na mi engisa.”—Jeremiya 29:12.

“Simama kukhongelani.”—Varoma 12:12.

Bhiblia yi hi kuzeta ku hi ‘simama hi maha mkombelo’ ka ‘sotshe siemo.’ Ti ha kubasani ti to, Jehovha Txizimu a lava ti to vathu ve maha mkombelo kwakwe.—Matewu 26:41, NM; Vaefesu 6:18, NM.

Ngu kutxani Txizimu txi txi lava ti to athu hi maha mkombelo ka txona? Alakanyisisa ngu tiya: Tate wa tsaka ngako mwanana a txi kombela txivhuno kwakwe, hi nga tona? Ditshuri ti to makhambi a mangi tate wa tiziva ati mwanana a ti lavako. Kambe ngako tate a txipfa mwanana wakwe a txi kombela txivhuno txakwe, tate wa tipfa ti to mwanana wa mthemba, ni ku a dhependerwa ngu ngene. Ngu ha kufanako, ngako hi txi maha mkombelo ka Jehovha Txizimu, hi kombisa ti to ha mthemba ni ku hi lava kumaha vangana vakwe.—Mavingu 15:8; Jakobe 4:8.

“Vekani ka Txizimu kotshe kukarateka kwanu, nguko txona txa mi khatalela.”—1 Pedro 5:7.

Txizimu txi lava ti to hi maha mkombelo ka txona nguko txa hi randa ni ku txa khatala ngu ngathu. Txona txa khatala ngu sikarato sathu, kuvilela kwathu, ni ku txa tilava ku hi vhuna.

Mndani ka wutomi wakwe wotshe, Mkoma Dhavhidha a mahile mkombelo ka Jehovha Txizimu a txi kombela txivhuno. Ene a tshumete e gela Txizimu a ti a nga txi ti pimisa ni matipfelo akwe. (Masalmo 23:1-6) Ngu tihi ti Txizimu txi nga txi tipfa ngu Dhavhidha? Txona txi txi mu randa Dhavhidha ni ku txi txi engisa mikombelo yakwe. (Mithumo 13:22) Ngu ha kufanako, Txizimu txa engisa mikombelo yathu ni ku txa khatala ngu mmweyo ni mmweyo wathu.

Ngu toneto ti nga wombwa ngu m’bhali mmweyo wa masalmo. Mapswi yawa ma kombisa to a txi tsaniseka ti to Txizimu txi txi engisa mikombelo yakwe, se toneto ti txi m’vhuna ngutu. Ene a txi tipfa a di hafuhi ni Txizimu ni ku ati ni mtamo awu a nga txi wu lava ti to e wonisana ni sikarato ni kupandiseka ka wutomi.—Masalmo 116:1-9.

Ngako hi tsaniseka ti to Txizimu txa engisa mikombelo yathu, hi na simama hi kombela. Wona txikombiso txa Pedro, awu a zumbako wuphemba ka Espanha. Ene a luzile mwanana wakwe wa 19 wa malembe ka acidente. Pedro a karatekile ngutu. Ene a gete Txizimu ngu mkombelo totshe ati ti nga ti mbiluni kwakwe a txi kombela kuthavelelwa ni txivhuno. Kumahekile txani? Ene a womba tiya: “Jehovha a xamute mikombelo yangu ngu ku ni thavelela ni ngu txivhuno a txi ani ni msikati wangu hi nga txi amukela ngu ka vanathu.”

Ti hakubasani ti to mikombelo kha ya nga wusa mwanana wakwe. Kambe yona yi thavelete Pedro ni mwaya wakwe. Msikati wakwe, María Carmen a txi khumbula mbimo yoneyo a womba tiya: “Mkombelo wu ni vhuni kutimisela kupanda kwangu, ani ni txi tiziva ti to Jehovha wa ni pfisisa nguko mbimo yi ni nga txi maha mkombelo ni txi tipfa ti to ene wa ni ninga kurula.”

Hahanze ka Bhiblia, sikombiso so fana ni siya si veka hakubasani ti to Txizimu txa engisa mikombelo yathu. Kambe ti hakubasani ti to Txizimu kha txi xamuli yotshe mikombelo yathu. Ngu kutxani Txizimu txi txi xamula mikombelo yimwani, yimwani txi si yi xamuli?